TI WER jar Israyel wo mono, jõõ hay diŋ fẽn maaga daŋgo debaŋ. Ti ngeel maa po Bible wãã ga jar de ma’ jõõ, lan wo de ‘waa siŋ. Ɓil Bible, naa da’ ti ngeel maa po wo debaŋ diŋ siŋ wo. Naa ko ba ɗa, doo Siŋ wora, Siŋ maa de daŋ siŋn wo, lan Lawge maa ni Jermin wo de yerge maa ‘waage. Kefder po maaga wãã ti tenen le ti wur maa ni jar maa ɓil Bible wo le wãã ga jar Israyel hay wo joŋ joŋre de jõõ ti fẽẽre ngaɓa nen naw ɓaara.

Jõõ nen naw maa tum. Jar Israyel hay wo ma’ jõõ maa naa nen ɗiggi ɓaara wo go. (Esa. 30:29) Naare hay wo ma’ tembal, ‘waa siŋ de fruygi, lan dag jõõ ti few maa doo hayge waŋ ti paale, ti wur maaga soode naa wo blum we le ti durgi no, lan wur few maa goŋ Baa wo. (Kii. 11:34; 1 Sam. 18:​6, 7; 1 Waŋ. 1:​39, 40) Jar Israyel hay wo ‘waa siŋ maa naa nen lawge ɓaara go de maaga jobo húu we no pa. (2 Kron. 35:25) Sen go tinoo tu ga jar Israyel hay wo da jõõ debaŋ.

Waŋre maa Israyel hay wo da jõõ. Waŋre maa Israyel hay wo fruygi de jõõ. Waŋ Sawul hay ɗe Dafid le liŋ ni ɓe maa ma’ jõõ ne hẽne. (1 Sam. 16:​18, 23) Go blam de maaga Dafid kol waŋ mono, á joŋ fẽẽre jõõ wo, kaŋ siŋ maa de cõõre wo, lan tay fẽẽre jõõ wo maa ma’ge ɓi tiŋ-Baa. (2 Kro. 7:6; Amos 6:5) Werpiiri wo de naare maa ‘waa siŋ hay wo liŋ ni waŋ Salomoŋ.—Ekl. 2:8.

Jõõ maa togoɗ Jeofa. Fẽn maaga daŋgo diŋ ga jar Israyel hay wo ma’ jõõ maa goŋ Jeofa. Diŋ wersen so ga jar 4,000 hay wo ma’ jõõ ɓi tiŋ-Baa Jerusalem. (1 Kro. 23:5) Á hay wo ma’ kondoloŋ wo, mandilna wo, dilna wo, lan cõõ wo. (2 Kro. 5:12) Amaa, hay togoɗ Jeofa de jõõ hay bay diŋ jar sen wo tawa wa. Jar Israyel wo ngaɓa hay wo ‘waa siŋ de maaga á raw wo ti few Jerusalem mono. À ɗe siŋ sen wo ga “Siŋ maa Ɗiigi wo ti Few wora”. (Siŋ. 120-134) Lan kefder jar Jwif wo wãã ga jar Israyel hay wo ‘waa siŋ maa ɓil siŋ wora a ti hoole few Page.

Hãã wara jõõ diŋ fẽn maaga daŋgo nen jar goŋ Baa wo. (Jag 5:13) Naa ‘waa siŋ ne Jeofa maa togoɗge ɓe. (Efe. 5:19) Naa ko see naa see hẽẽre naa wo maŋ de maaga naa ‘waa siŋ ne Jeofa de kããra mono. (Kol. 3:16) Lan jõõ coɓ naa de maaga naa yaŋ nen re maa de gayri wo no. (Joŋre 16:25) Jõõ diŋ ɗeŋ maa de woore maa ngaɓ hãge ɓil naa ti Jeofa, lan maa naa nen dage naa go see ɓe.