1. Mayse kay Sedeewa Jeofa wo maa goŋge ɓe tum koh de maaga á mbaara de yiŋgi de bon wo là?

 “BIBLE wãã ga naa go wara nen wur maa de gayri debaŋ. (2 Tim. 3:1) Ciŋ ti gayri se ga wosela ɓuy yiŋ de ɓaara wara nen wur maa de gayrin la mono, à kaŋ ne Sedeewa Jeofa wo nene, lan à joŋ bon ɓaara. Mayse kay naa maa goŋ Jeofa tum de maaga naa mbe nen gayri sen là? Fẽn po boŋ yoo maa tigriŋ wo ga daŋgo diŋ maaga naa ko Jeofa doo “Baa maa tenen no” mono.—Jer. 10:10; 2 Tim. 1:12.

2. Ti ɓaŋ maa hõn ga Jeofa diŋ Baa maa tenen là?

² Jeofa de ko re maaga naa yiŋ de ɓaara mo ɓuy, day se tum de sãy kay naa ti lay. (2 Kron. 16:9; Siŋ. 23:4) De maaga naa fer ɗiggi ga Baa naan de ko de el naa, lan ga go gorge maa kay naa lay mono, naa da’ ẽgre maa soɗ re maa hõnla ɓuy. Ko maaga á hay diŋ mopo maa cwãy nen Waŋ Dafid mo ɗa.

3. Dafid hay da wããge ga hãy de maaga á wãã ga “Jeofa bay ti naa wa” mo là?

³ Dafid hay go de ko Jeofa de woore, day se hay deŋ see ɓe see ɓe. De maaga Waŋ Sawul wo de jar maa tigriŋ hay kiɗ wo ga saara ĩĩ Dafid go mono, Dafid wii kayge do Jeofa nen tosge.(Siŋ. 18:7) Blam maaga Baa yiŋ jag ne hẽn ti tosge ɓe, lan caa war ɓe mono, Dafid kal wããge ga: Jeofa tenene- (Siŋ. 18:46) Wer wããre sen wo, Dafid hay bay de koge diŋ ga Baa yaŋ tawa wa. Kefder maa kiɗ wer fẽẽre wãã ga Dafid hay de ko Jeofa doo Baa maa cwãy ga tum kay jar maa goŋge ɓen wo nono. Dafid hay go de koge de woore ga á diŋ Baa maa tenene. Sen kay Dafid maa ya’ wer joŋ joŋre ne Jeofa, lan maa togodge ɓe.—Siŋ. 18:​28, 29, 49.

4. Naa yaŋ ko Jeofa doo Baa maa tenen no, naa da’ mayse wer ɓe là?

 ⁴ Fẽn maaga naa go de bawge jag jiili ga Jeofa diŋ Baa maa tenen kay naa maa joŋ joŋre ne hẽn go de jiili naa ɓuy. Naa da’ ẽgre maa soɗ ren wo, lan maa joŋ joŋre kwũy ti joŋre maa ni Baa no. Naa joŋ ge go de baa wer maa lagge see Jeofa maŋ.

BAA MAA TENENN COƁ GE MO YAŊ

5. Mayse hã coɓge ne naa de maaga naa yaŋ nen re mo là? (Filip wo 4:13)

⁵ Naa joŋ ge mbe yaŋ de kããge maa soɗ ren wo ɓuy, maa kwũy noga maa mẽ’ mẽ’ wo, hayga naa fer we ɗiggi ga Jeofa bay ti naa wa, lan ga á kay naa yaŋ tum lay no. Á de ẽgre maa kay naa nen re maa hõnla ɓuy, werga re po raw ẽgre ɓe ga. Á diŋ Baa Waŋkluu maa de ẽgre, ga de kããge maa hã ẽgre maa soɗ re wo ne naa. (Jaŋ Filip wo 4:13.) Diŋ wersen so ga naa oo jag ren wo ɓuy bay joŋ hẽẽne mono. Day de maaga naa ko ga Jeofa kay naa nen re maa mẽ’ mẽ’ wo mono, sen hã bawge go ne naa jag jiili ga á kay naa yaŋ nen re maa de gaalin wo pa.

6. Re mayse hay da’ Dafid de maaga á hay klee ga ya’ wer kaŋ ɗiggi ɓe ti Jeofa là?

⁶ Ko fẽẽre po wo ɓog ga Dafid yiŋ de ɓaara, ga hay ya’ wo wer kaŋge ɗiggi ɓe ti Jeofa ciŋ ni mo ɗa. De maaga Dafid hay klee wer fiiri ɗa mono, Urse lan Mingir hay wo bag Wesam yoo horog maa ni pan ɓen wo no. De bay joŋ hẽẽne, Dafid ur ɗee wer ɓaara boŋ boŋ ɓuy, day yãã horogn wo go. Amaa, Dafid ɗig ti boŋ ga se yãã ra go de ẽgre se ga. Dafid hay de koge ga hã ẽgre ne se maa joŋ sen diŋ Jeofa. (1 Sam. 17:​34-37) Dafid yõõ ti kayge maaga Jeofa kay ne go ga hase. De maaga se ɗig ti fẽẽre sen wo mono, sen ya’ wer hãge ɓil ɓe ciŋ ni ga Jeofa kay ge se yaŋ nen naw maa peeln wo pa.

7. Dafid kaŋ ɗiggi ɓe diŋ ti mayse là, day sen kayn na kayge maa dur Goliyad là?

⁷ Go blam sen, de maaga á hay bay go jõõ ɓuy wa ɗa mono, Dafid wo ti ngeel durgi soode maa Israyeln wo no. Dafid da’ ga sooden hay wo go de caa jiili debaŋ werga jee Filistẽẽ po de gẽẽre de ẽgre ga à ɗen ga Goliyad, kal go maa “ɓod bum wo ne soode ma Israyeln” wo no. (1 Sam. 17:​10, 11) Sooden hay wo joŋ hẽẽne diŋ werga á kaŋ wo ɗiggi ɓaara diŋ ti gẽẽre wo de ẽgre maaga Goliyad hay de ɓe mono, lan ti wããre maaga á wãã ne hara mono. (1 Sam. 17:​24, 25) Amaa Dafid hay de kaŋ ɗiggi diŋ ti fẽn tigriŋ. Dafid hay de koge ga Goliyad hay ɗarge diŋ Baa maa tenenn de maaga á hay ɓod bum ne “soode maa ni Baa maa tenenn” wo ti mono. (1 Sam. 17:26) Dafid hay kaŋ ɗiggi go taŋgu tu diŋ ti Jeofa. Dafid hay go de kaŋge ti ɓe de woore ga Baa maaga hay kay se de maaga se hay koɗ fiiri maa ni pan sen taŋgu, kay ge mbe se yaŋ jag re maa sen la pa. Wer maaga Dafid hay go de bawge jag jiili ɓe ga Baa kay se yaŋ so mono, Dafid raw dur Goliyade, day se ‘ĩĩ ne go!—1 Sam. 17:​45-51.

8. De ɗeŋ maa hõn ga naa kaŋ ɗiggi ti Jeofa ga á mo kay naa de maaga naa yaŋ nen re là? (Ko foton lay.)

⁸ Naa mbe de kããge maa soɗ ren wo ɓuy hayga naa fer we ɗiggi ga Baa maa tenenn go de gorge tum maa kay naa no. (Siŋ. 118:6) Hayga naa yaŋ kaŋ ɗiggi ti fẽẽre maaga Jeofa joŋ ra le ɓaa no, hãge ɓil naa ya’ ge yaŋ ciŋ ni debaŋ. Jaŋ mbaa maa ɓil Bible po wo ga fer ɗig ti ɓo ti ɗeŋ maaga Jeofa hay yãã jar maa ni ɓen wo le go ɓaa mono. (Esa. 37:​17, 33-37) Ni pa mono, jaŋ mbaa maa ɓil jw.org ga ngaɓ ɗeŋ maaga Jeofa de kay hẽẽrebe maa waran wo mono. De daŋ sen pa, ɗig ti wur maaga Jeofa hay caa war ɓo mo lay. Hayga ndo bay we de kããge maa ngaɓ saɓlaŋ po doo ĩĩgi Urse  noga Mingir wa laybla no, hãy see ɓo go ti sen wa. Wer may ne? Werga Jeofa joŋ fẽẽre wo nen naw ɓo debaŋ maa kay mo ge! Jeofa ɗe mo le see ɓe maaga ndo mo kol bar Se. (Jaŋ 6:44) Koh patala, se diŋ wer kayge maa ɓen ga ndo yaŋ goŋge ɓe ɗa mono. Wersen, tos Jeofa maaga á mo kay ndo maa ferge ɗiggi ti wur maaga á hay laa tosge ɓo wo, se kay ndo ti wur ɓe, noga ti wur maaga á kay ndo soɗ re po maa de gayri mono. De maaga ndo ɗig we ti fẽẽre sen wo no, se hã bawge go ne ndo jag jiili ga Jeofa joŋ yaŋ mbe tum kay moge nen ren wo ɓuy.

9. Naa de hay ɗig ga hãy de maaga naa yaŋ nen re wo là? (Jag Jõõ wo 27:11)

⁹ De maaga Jeofa kol we nen naa doo Baa maa tenen no, se kay naa yaŋ maa ɗiggi de woore nen ren wo no. De ɗeŋ maa hõnlà? Naa le’ ko re maa see naan wo doo re maa ti holaŋ Jeofa wo de Manhúulí ne no. Manhúulí ɗig ga de maaga naa jo bon we debaŋ no, naa men goŋ Jeofa yaŋ go. (Job 1:​10, 11; Jaŋ Jag Jõõ wo 27:11.) Amaa de maaga naa soɗ re naa wo we de woore no, ni naa go de ngaɓge ga naa da Jeofa, lan ga Manhúulí diŋ jee gete’e. Patala ndo nen re po doo maaga ngomna maŋ jag ɓo go maa goŋ Jeofa noga re coo coo po, noga jar maaga ndo sii wããre Baa ne hara bay wo co’ sug ɓo wa, noga re maa tigriŋ yawlà? Hayga yaŋ no, fer ɗiggi ga ndo fruy ɓil Jeofa debaŋ de maaga ndo soɗ re sen mono. Fer ɗiggi pa ga Jeofa kay mo yaŋ tum maaga ndo mo soɗ re sen wo de ɗeŋ maa de woore. (1 Kor. 10:13) Á hã ge ẽgre yaŋ ne ndo maa soɗ ren wo tum.

BAA MAA TENENN POƊ GE NDO YAŊ

10. Jeofa joŋ ge mayse yaŋ ne jar maaga wo de goŋge ɓe mo là?

¹⁰ Jeofa poɗ jar maaga joŋ wo joŋre ne hẽn tum. (Heb. 11:6) Á hã jam wo de jiili maa de suuli ne naa patala, lan hã ge tenen maa tum ne naa wo peel pa. Naa kaŋ wee ɗiggi naa go sog boŋ tu ga Jeofa de sãy poɗ naa ti, lan ga á de kããge maa joŋge ɓe. Day bawge jiili  sen kay naa maaga naa mo lag tum goŋge ɓe doo maaga jar maa de deele maaga hay wo le goŋge ɓe ɓaa hay wo de jor glog joŋ sen lay mono. Se diŋ fẽn maaga Timote hay joŋn le ti siyekle maa taŋgun mo lay.—Heb. 6:​10-12.

11. Mayse hay jor glog Timote maa hã see ɓe go ti joŋre maa ti taygen debaŋ là? (1 Timote 4:10)

¹¹ Jaŋ 1 Timote 4:10. Timote hay go de bawge jag jiili ga Jeofa poɗ se yaŋ. Diŋ wersen so ga, á hay go de hã see ɓe maa joŋ joŋre maa de gayri ti joŋre maa ni Jeofan mono. Á hay joŋ sen na de ɗeŋ maa hõn ne? Apotre Pol hay jor glog ɓe maaga á mo gẽẽ go ciŋ ti ɓaŋ siigi wããre, lan ti hadge ɓe ne jare. Timote mo hay hã saɓlaŋ maa de woore ne hẽẽrebe maa ti taygen wo, klee noga kluu ɓuy. Lan joŋre maa de gayri hay wo de hãge ne hẽn do debaŋ pa, doo baage yaŋ maaga go pah de dage ga hẽẽrebe hay wo de sãy ɓaara ti mono. (1 Tim. 4:​11-16; 2 Tim. 4:​1-5) Timote hay go de bawge jag jiili ɓe ga koh jar mo maŋ ba wo joŋre maaga se joŋn go diŋ mopo wa, noga mo kee ba wo ne wa, Jeofa poɗ ge mbe se yaŋ.—Rom. 2:​6, 7.

12. Wer mayse ga jar maa peel tayge ya’ wo wer joŋ joŋre ti tayge là? (Ko foton lay.)

¹² Jar maa peel tayge mo hay wo de koge wara ga Jeofa de ko saara, lan de kee joŋre saaran lay. Ciŋ ti joŋre koɗge sããre maa ni Jeofan wo pa mono, jar maa peel tayge wo ngaɓa debaŋ had wo wããre Baa, siin wo ne jare, kay wo ti booge tiŋ wo, lan caa wo war hẽẽre naa wo de maaga á yaŋ wo nen re maa doo bii maŋge, leege, noga daɗge sir wo no. Jar maa po joŋ wo joŋre ti kayge hẽẽrebe wo ti “Groupes de Visites aux malades,” noga ti “Comités de Liaison Hospitaliers,” Jar maa peel tayge maaga joŋ wo joŋre sen wo de koge ga taygen bay maa jar téebeere wo wa, amaa diŋ maa Jeofa. Diŋ wersen so ga á joŋ wo ne go de ɓil ɓaara ɓuy, lan de kaŋge ti ɓaara ga Jeofa poɗ ge saara yaŋ.—Kol. 3:​23, 24.

13. Jeofa ɗig ti durgi naa maaga naa dur ti tayge maa ɓen na ɗiggi là?

 ¹³ Jar joŋ go ɓuy diŋ jar maa peel tayge ga. Amaa, naa mbe de kããge ɓuy maa hã mopo ne Jeofa. Baa naan de fruygi debaŋ wer maaga naa joŋ joŋre ne hẽn de ngar ẽgre naa mono. Á ko ‘offrandes’ maaga naa hã maa joŋ joŋre tayge maa ɓen, koh á mo hay ba mẽ’ẽ. Á co jag ɓe de maaga naa hoo do ciŋ maa fer wããre ti taygeti mono, koh naa mo hay ba depãy; day se co jag ɓe pa de maaga naa men ɓlagge go ne hẽẽre naa wo mono. Koh ndo mo ɗig ba ga fẽn maaga ndo joŋ ne Jeofa bay pur doo maaga ndo hay da ne wa laybla no, hay go de bawge jag jiili ɓo ga fẽn maaga ndo joŋn de cõõre jag ɓe. Á da mo wer se no, lan se poɗ ge mo yaŋ.—Lug 21:​1-4.

HAY SEE BAA MAA TENENN MBAŊ

14. Lagge maŋ see Jeofa kay naa maa lagge de deele na kayge là? (Ko foton lay.)

¹⁴ Hayga Jeofa yaŋ cwãy nen naa no, á kol yaŋ go ne naa gus maa lagge de deele peel ɓe. Se diŋ fẽn maaga Josef hay joŋ mono. Á laa dayge joŋ figliw ga. Baa hay nen ɓe diŋ jobo maa cwãy, lan á hay bay de sãy maaga se mo joŋ mopo maaga co jag ɓe ga wa. (Tĩĩ. 39:9) Maaga Jeofa mo hay diŋ jobo maa cwãy nen naa mono, naa mo hay kiɗ wur maa tosge ɓe, lan maa jaŋ wããre ɓe no. Diŋ de ɗeŋ maa sen so ga barge maa ti holaŋ naa de ɓe gẽẽ ciŋ mono. De maaga holaŋ naa yaŋ de woore de Jeofa doo Josef ne no, naa joŋ de sãy joŋ mopo maaga co jag ɓe ga ti ga.—Jag 4:8.

15. Naa had mayse see re maaga hay da’ jar Israyel wo de maaga á hay wo ti puuli mo là? (Hebre wo 3:12)

¹⁵ Jar maaga yõõ wo ti go ga Jeofa diŋ Baa maa tenen mono, á joŋ go gus ne hara maa men Jeofa go. Naa ko we fẽn maaga hay da’ jar Israyel wo ti puuli mo ɗa. Á hay wo de koge ga Jeofa yaŋ; amaa saara tõõ mbrawge ga á de kããge maa hã fẽẽre maaga saara de sãy ɓaara ti ne saara. Kol wo go wii jag see ɓaara ga: “[Jeofa] yaŋ mbe yoo wùr la pa yaw baywa yawla?” (Laa. 17:​2, 7) Ɓo’ge ti ɓen so diŋ ga saara mbiɗ wer see Jeofa. Sen go tinoo  tu ga naa bay de sãy maŋ saɓlaŋ ɓaara maa de baywooren ti wa.—Jaŋ Hebre wo 3:12.

16. Maapo mayse liw hãge ɓil naa là?

¹⁶ Tamsir joŋ ga á mo kol ne naa de gayri maa goŋ Jeofa. Jar maa po bay wo yããge ga Baa yaŋ wa. Jar maaga bay wo goŋ Jeofa wa ko wo see ɓaara seɓaa joŋ naw ɓaaran de woore. De maaga naa ko sen hresge mono, sen liw hãge ɓil naa. Koh naa mo hay ba de koge ga Baa yaŋ, maapo ga naa tĩĩ wer ɗiggi ga á mbe de kay naa cwãy yawla. Jee yer siŋ maa 73 hay ɗig de maŋ sen lay. Á hay ko jar maa ti jeŋ ɓe maaga bay wo hoo sug ti Jeofa wa wo de joŋ naw ɓaaran de woore. Ɓo’ge ti ɓen so, á tõõ wer wii jag see ɓe ga goŋge Jeofa mbe ɗiŋ ɗiggi maa de woore yawlà.—Siŋ. 73:​11-13.

17. Mayse kay ge naa yaŋ maa joŋge maŋ see Baa là?

¹⁷ Mayse kay jee yer siŋ sen maa coo ɗiggi ɓe ne? Á tĩĩ wer ɗiggi ti re maaga da’ jar maaga yõõ wo ti Jeofa go mono. (Siŋ. 73:​18, 19, 27) Á ɗig ti fẽẽre maa de woore maaga jar maaga goŋ wo Jeofa da’ wo ne mo lay. (Siŋ. 73:24) Naa lay, naa mo hay ɗig ti busa’ maaga Jeofa kaŋ ne naa ti mo lay. Tab busa’ sen wo de naw ɓo maaga ndo mo hay joŋ ne, hayga ndo mo hay we bay joŋ joŋre ne Jeofa wa no. Hayga ndo joŋ we doo sen nono, se kay mo maa ya’ wer joŋ joŋre ne Jeofa, lan maa wããge doo jee yer siŋ ga: “Maa ɓin mono, woge ɓiŋ [Baa] diŋ daʼge ɓi no.”—Siŋ. 73:28.

18. Wer mayse ga naa mo hay joŋ hẽẽne do ngeel maa peeln wa là?

¹⁸ Naa yiŋ mbe go ne re maaga daɗ wo naa ti wur naw maa glogn la wo ɓuy werga naa diŋ jar “ma joŋ peele ne Baa maa tenen maa cwãyn mono.” (1 Tes. 1:9) Baa naan diŋ jobo maa cwãy ga ko decoo naa, lan kay ge naa yaŋ tum. Á hay ɓo’ nen go ne jar goŋge ɓe maa ɓaan wo le ga se kay ra, day á joŋ tee sen wara lay. Ig la mẽ’ naa yiŋ gi de wur bon maa de hãã ga le’ ge go ti tamsir la ɓuy mono. Naa soɗ ge ne de see naa tawa ga. Jeofa joŋ ge yaŋ see naa. (Esa. 41:10) Da ga wosela ɓuy yoo naa de kaŋ ɗiggi ɓe ti Baa wããge ga :“Baa Waŋkluu diŋ je kay mege, Ndi joŋ hẽẽne ga so has!”—Heb. 13:​5, 6.