Wiigi jag jar jaŋ kefdern wo
De maaga Siŋ wora 12:8 wãã ga “Ndo koɗ ge ra yaŋ,” “ra” wãã diŋ ti “jar maa de gayren wo” yaw (ferse 6), noga ti “wããre mani Jeofa” yawlà (ferse 7)?
Fẽẽre maaga hay hres wo le ti wur maaga à yer versen ngaɓ wo go ga versen hay wããge diŋ ti jar téebeere wo.
Ɓil Siŋ wora 12:2-5 mono, naa jaŋ ga “Jar ma bay ndar gogn wo go de yeɗ nen yoo jar téebeere wora.” Blam sen se wãã ɓil Siŋ wora 12:6-8 ga:
“ ‘Wer maga à de joŋ coo jar ma de gayren wo mono,
Day pa jar coocoon wo jag ndumgi,
Patalam no,’ [Jeofa] ga ndi ur go ciŋ.
‘Ndi nduu de pẽẽge ne jar maga à ɓod egre ne hara ti mono.’
Wããre mani [Jeofa] wo diŋ wããre ma bay ɗage;
Diŋ boo solay maga go de lamge nen siri, ga go de dog jiigi ɓaale renam.
Ndo [Jeofa]! Ndo koɗ ge ra yaŋ;
Ndo ɗaw ge wùr yaŋ see wer jar sen wo ma tum.”
Verse maa 6 wãã diŋ ti fẽẽre maaga Jeofa joŋ ge ra yaŋ maa kay jar maa de gayren wo mono. Á yãã ge ra go.
Verse 7 wãã pa ga “Wããre mani [Jeofa] wo diŋ wããre ma bay ɗage,” doo “boo solay maga go de lamge nen siri.” Wããre sen ngaɓ diŋ fẽn maaga wããre Baa joŋ see ne naa joŋge la mono—Siŋ. 18:30; 119:140.
Blam sen verse maa 8 wãã ga: “Ndo [Jeofa]! Ndo koɗ ge ra yaŋ, Ndo ɗaw ge wùr yaŋ see wer jar sen wo ma tum.” Sen da wããge ga à koɗ ge yaŋ diŋ woselà?
Jar maa po ɗig wo ga verse maa 8 wãã diŋ ti “wããre maa ni Baa” no. Wer mayse ne? Werga naa da’ wããre sen ɓil verse maa 7 no. Kaŋ nen ga Baa joŋ ga caa wer wããre sen go wa. Naa de koge ga Baa joŋ ga caa wer Bible go wa, koh de maaga jar hee ɓen hay dur wo go ɓuy maaga saara hay caa wer ɓe go mono.—Esa. 40:8; 1 Pi. 1:25.
Amaa, fẽn maaga naa da’ ɓil verse maa 6 diŋ cwãy lay. Jeofa hay koɗ “jar maa de gayren wo” de “jar maaga à ɓoɗ egre ne hara ti mono,” day se koɗ ge ra yaŋ, lan kay ge ra yaŋ ti naw maa peeln pa.—Job 36:15; Siŋ. 6:4; 31:1, 2; 54:7; 145:20.
Day “ra” maa ɓil verse maa 8 wãã diŋ ti maylà?
Naa frug wer wããre maa ɓil Siŋ sen we go de woore no, naa da’ ga “ra” wãã diŋ ti jar téebeere wo
Siŋ wora 12:2 wãã diŋ ti jar maaga caa wo gete’ mono. Verse maa de 3 wãã ga Jeofa taw jar maaga wãɗ wo wããre maa de baywoore ti jar wo go. Siŋ sen hã bawge go ne naa jag jiili ga naa mbe maa kaŋ ɗiggi ti Baa maa joŋ joŋre maaga kay jar maa ti tayge maa ɓe no, werga wããre ɓen bay ɗage.
Wersen, verse maa 8 wãã ga Jeofa koɗ ge ra yaŋ, lan ɗaw ge “ra” yaŋ do, kaŋ nen ga jar maaga wo de joŋ bon do jar maa debaycõõren wo mono.
Wããre maaga à koln go ga “ra” de maŋ maa ɓil kefder Masored maa jag Hebre no. Bible maaga à yern de jag Greg ga ɗen ga ‘La Septante’ “joŋ joŋre” de ra ɓaale ɓog ɓil verse maa de 7 no, ga wãã diŋ ti jar maa de deele maa de gayrin wo lan jar maaga à joŋ bon ɓaara mono. Ti tawgeti verse maa 8 mono, La Septante wãã ga Baa koɗ ge “wosela ɓuy” maaga de deelen yaŋ do jar maa de baycõõren wo no. (Siŋ. 12:8, 9) Ɓil ‘copies’ Bible ‘Targoums’ maa jag ‘araméen’ mono, Verse maa 8 wãã ga: “Ndo, O Waŋkluu, ndo koɗ ge jar maa de deelen wo yaŋ, ndo ɗaw ge ra yaŋ do jar maa de ɓlagge maa waran wo maa tum.” ‘Copies’ sen wo ɓuy ɓo’ wo nen go de woore ga Siŋ wora 12:8 bay wããge diŋ ti wããre maa ni Baan wa.
Wersen, verse sen hã wo kaŋge ɗiggi gorge ne “jar maaga wo de deele mono”: ga Baa kay ge ra yaŋ.
