1-2. (a) Ngeel maa hõn ga Pol hay nen ɓe de maaga á yer leder ne jar Efes wo mo là? (b) Wiigi jag maa hõn wo ga naa ko yaŋ ɓil hadgen la là?

 DE MAAGA á hay ti daŋgay Rom mono, apotre Pol hay de sãy jor glog hẽẽre ɓe maa wer krisn wo ti. Á hay bay de kããge maa woge ko rage de see ɓe deŋ wa, se yer leder wo ne hara. Á yer leder maa po boŋ ne jar Efes wo de ngar kiŋgi maa 60 noga 61 N.W.N.—Efes. 1:1; 4:1.

² Pol joŋ daŋge kiŋgi ɓe maa 10 wo Efes sii wããre maa de cõõre no, lan hadge ɓe. (Joŋre 19:​1, 8-10; 20:​20, 21) Á hay da hẽẽre ɓen wo debaŋ, lan se hay de sãy kay rage maa lagge de deele peel Jeofa ti. Day wer mayse ga á yer wo ne kretiyẽ maaga nenterse Baa de sreŋ rage ti suŋgu wo de poɗag là? Day kretiyẽ wo ɓuy had wo mayse see yaŋ sen là? Naa ko wee yiŋgi jag ti wiigi jag sen wo ɗa.

YÃÃ WO LE GO JAG SUŊGU KOL WO GO NEN POƊAGE

3. Pol joŋ joŋre de wããre maa hõn ɓil leder maaga á ɓo’ ne jar efes wo mo là?

³ Pol hay yer ne kretiyẽ maa Efes wo ga: “Nday hay le nen suŋgu ɓaa bay caa nene, amaa patala nday go nen poɗag.” (Efe. 5:8) Pol joŋ joŋre de wããre nen suŋgu wo de poɗag maa ɓo’ nen ga jar Efes hay coo wo seele ɓaara sara de maaga á hay wo ɓaa mono. Naa ko wee wer mayse ga Pol wãã ga jar Efes wo “nen suŋgu” la ɗa.

4. Ti baŋ maa hõn wo ga jar efes hay wo ti jag-baa maa nen suŋgu là?

⁴ Á hay wo nen suŋgu werga á hay bay wo goŋge diŋ Baa maa cwãyn wa. Taŋgu maaga á kol wo go kretiyẽ mono, jar Efes hay  wo hã ɓil ti hadge maaga bay wo ti ngeel ɓe wa, lan ti sogway (maji). Tiŋ Baa Artemis hay ɓil prog maa Efes no, jar maa ti wur sen hay wo ɗiggi ga á diŋ fẽn maa boŋ ga daŋgo yoo fẽẽre maa de woore maa renam ti tamsir la wo mo ɓuy no. Jar hay rawge ɓil tiŋ-baa sen maa goŋ koore wo. Jar maaga hay wo ceɗ baa Artemis wo de koore tiŋ-baa sen hay wo da’ suŋgu debaŋ. (Joŋre 19:​23-27) De daŋ sen ni pa mono, jar debaŋ yoo jar Efes hay wo joŋ sogway debaŋ.—Joŋre 19:19.

5. Ti baŋ maa hõn wo ga jar efes hay wo nen suŋgu wer figliw là?

⁵ Á hay wo nen suŋgu wer figliw. Jar efes hay wo go de koge debaŋ ti ɓaŋ figliw lan ti seele ɓaara maa de bay ngar no. À hay laa wããre maa de bay ngar wo ɓil tiŋ theâtre, lan ti few jag-baa jar efesn wo debaŋ. (Efe. 5:3) “Re soore” hay bay joŋ jar efes po wo wa ngaɓa. Wããre sen da wããge ga “jiili ɓaara hay bay ndar rage de maaga á joŋ wo figliw we mo wa”. (Efe. 4:​17-19) Taŋgu maaga á had wo caa ɓil fẽẽre maa de woore wo de maa de ɓlagge wo mono, ɗiggi jar efes hay bay wo ruu rage wa, lan á hay bay wo de koge ga Jeofa caa kiida saara wa. Wersen Pol hay mbe maa wããge ti ɓaara ga “ɗiggi ɓaara go ne lurum lurum no, á wo go waare see tenen maa ni Baa no”.

6. Wer mayse ga Pol yer ne kretiyẽ maa Efes wo ga á wo go “patala nen poɗag” là?

⁶ Amaa, jar maa po wo yoo jar efes wo debaŋ hay men wo ngeel maa de suŋgun go. Pol yer ga “patala nday go nen poɗag go de caa nen werga nday tay we go de waŋkluu.” (Efe. 5:8) Á hay wo hoo sug ti wããre Baa, ga hay diŋ doo poɗag maa koɗ rage no mono. (Siŋ. 119:105) Jar efes men wo jag-baa ɓaara maaga bay ti ngeel ɓe wa wo de joŋre ɓaara maa de ɓlaggen wo go. Saara kol “joŋ see ɓaara doo ga Baa joŋ no lay no” lan dur wo go de ẽgre ɓaara ɓuy maa goŋ Jeofa lan maaga saara mo hay de cõõre jag ɓe.—Efe. 5:​1, NWT.

7. Ti ɓaŋ maa hõn ga naa patala doo Kretiyẽ maa Efes maa ti wur sen wo ne lay là?

⁷ Doo sen no lay, naa hay nen suŋgu ti jag-baa maaga bay wo ti ngeel ɓe wa, lan nen suŋgu nen joŋre naa wo, de maaga naa hay bay de da’ cwãyn wa ɗa mono. Jar maa po wo  yoo naa hay wo joŋ few jag-baa maaga bay wo ti ngeel ɓe wa ; maa po hay wo joŋ figliw. Amaa, de maaga naa had jag liŋgi maa ni Jeofan ti fẽn maaga bay ti ngeel ɓe wa wo de maaga ti ngeel ɓe mono, naa coo seele naa. Naa tĩĩ wer joŋ naw naan doo maaga á da ga naa mo joŋn nono. Ɓo’ge ti ɓen so diŋ ga naa da’ fẽẽre maa de woore wer ɓe ni debaŋ. (Esa. 48:17) Amaa, wara re daɗ wo naa ceɓ debaŋ. Naa mo hay men nen suŋgu maaga naa hay men le go glog, lan naa go maa “seege doo weere maa nen poɗag wo nono.” Naa joŋ sen na de ɗeŋ maa hõn ne?

ƊEE WEE GO SEE NEN SUŊGU NO

8. Jar efes mo hay men wo mayse go doo maaga naa da’ ɓil Efes wo 5:​3-5 ne là?

⁸ Jaŋ Efes wo 5:​3-5. Maaga á mo lag wo go hãã see suŋgun nen joŋre ɓaara mono, kretiyẽ maa efes de hay wo tum ɗeege go see fẽẽre maaga bay wo de cõõre jag Jeofa wa mono. Sen hay bay da wããge diŋ ti joŋre figliw tawa wa, amaa, wããre maa de bay ngar wo lay. Pol fer ɓo’ sug jar efes wo ga á mo hay ɗee wo go see fẽẽre sen wo mo deŋ no, hayga á yaŋ wo de sãy “lagge ti twaywaŋ mani Krisn wo de Baa” ti no.

9. Wer mayse ga naa mo ɗee go see fẽẽre maaga srog wo glog naa joŋ figliw ɓuy là?

⁹ Naa lay, naa de hay tum durgi maaga naa mo ɗee go see “joŋre ma de bay ngar ma nen suŋgun” wo mo deŋ no. (Efe. 5:11) Sen diŋ cwãy tu ga, jobo yaŋ koge, laage noga yaŋ wãã fẽẽre maaga wo de yeeɗe no, se joŋ go gus ne jee sen maaga á mo joŋ fẽẽre sen wo no. (Tĩĩ. 3:6; Jag. 1:​14, 15) Ɓi sir po, hẽẽre naa wo ngaɓa kol wo go “barge” de ndalge de kããra ɓil ‘réseaux sociaux’. Maa po wo yoo ɓaara ngaɓa tõõ wo wer ndalge diŋ ti fẽẽre maa ti nenterse wo. Amaa mẽ’ mẽ’ mokay, saara kol go ndalge diŋ ti fẽẽre maaga bay wo de cõõre jag Jeofa wa. Saara le’ wããge diŋ ti ɓaŋ figliw. Jar ngaɓa yoo ɓaara wãã wo go glog ga wããge ti fẽẽre se de bay ngarn hay jor glog saara maa joŋ figliw.

10. Manhúulí joŋ na joŋge maa baa bii naa là? (Efes wo 5:6)

¹⁰ Tamsir maa ni Manhúulin kiɗ ga se baa bii naa, de hã ɗiggi ne naa ɓil ga fẽn maaga Jeofa ɗen ga figliw lan ɗag wo de ele. (2 Pi. 2:19) Sen ngel naa ga! Ɗeŋ Manhúuli maa boŋ ga á joŋ joŋre de ɓe maa baa bii jar ɓaa tu diŋ ga se hãy jar téebeere wo maaga á mo ko wo caage ɓil fẽẽre maa de eln wo de maa de ɓlaggen wo wa. (Esa. 5:20; 2 Kor. 4:4) Se diŋ wersen so ga ti filme wo ngaɓa, ti tele lan ti sid interned wo, à laa ni debaŋ diŋ fẽẽre maaga bay wo tabge de jag liŋgi maa ni Jeofan wa mono! Manhúuli da ga se hã ɗiggi ne naa ɓil ga joŋge fẽẽre maa de yeeɗe wo de figliw maaga wo go de dusgi ti tamsir maa debalan mo ti’ bay wo diŋ ɓlagge wa, amaa, ga á fruy wo ɓili, lan re bay le wer ɓaara wa.—Jaŋ Efes wo 5:6.

11. Re maaga da’ Aŋjela ngaɓ ga naa mo hay hoo sug ti yaŋ maaga naa da’ ɓil Efes wo 5:7 na ngaɓge là? (Ko foton lay.)

¹¹ Dage Manhúuli diŋ ga naa mo hay diŋ see jar maaga maŋ wo jag naa go hoo sug ti jag liŋgi maa ni Jeofan mono. Wersen Pol jor glog hẽẽre ɓe maa Efesn wo ga: “Tay we de jar se kay wo wa hase,” kaŋ nen ga jar maaga joŋ wo fẽẽre maaga bay wo de woore nen Baa wa mono. (Efe. 5:7) Naa mo kaŋ go ti naa ga bar naa bay wo diŋ jar maaga naa sii see ɓaara mo tawa wa. Amaa jar maaga naa ndal de kããra ti Interned wo ni lay, re maaga jar efes maa ɓaan hay bay wo de koge ɓe ti wur sen wa mono. Aŋjela, a ga wo ɓil sir Asie, ko ga ‘réseaux sociaux’ diŋ mopo maa de hãã debaŋ, hayga naa joŋ joŋre we de ɓe de woore ga no. Á wãã ga:  “Maa po á joŋ diŋ rew maaga mẽ’ mẽ’ le’ coo ɗiggi ɓo. De ngar ngeel maa po ta’ se hay bay hãy ndi wa so de maaga ndi baa barge de jar maaga bay wo hoo sug ti jag lingi maa ɓil Bible wa mono. Ndi tõõ wer ɗiggi ga joŋge fẽẽre maaga co wo jag Jeofa ga bay diŋ ɓlagge wa.” Amaa jar maa peel tayge maa de dage ɓil kay wo Aŋjela maa coo seele ɓe. Á wãã ga: “Patala ndi bay baa ɗiggi ɓi go de fẽẽre maa ti réseaux sociaux wo wa so, amaa diŋ de fẽẽre maa ti nenterse wo.”

12. Mayse kay naa maa hoo sug ti jag liŋgi maa ni Jeofan ti fẽẽre maa de el wo de maa de ɓlagge wo là?

¹² Naa mo hay dur jag ɗiggi maa ti tamsir ga joŋge figliw bay diŋ ɓlagge wa mono. Naa de koge ga á bay cwãy wa. (Efe. 4:​19, 20) Á de woore maaga naa mo wii jag see naa ga: ‘Ndi ɓi na de durgi maa ɗeege go see tayge maaga kay wo ga de jar maa ti ngeel joŋre ɓi wo, kããre ɓi maa ti lakol wo, noga jar maaga bay wo hoo sug ti jag liŋgi maa ni Jeofan wa mo yawlà? Ndi mbi na de hoo sug ti jag liŋgi maa ni Jeofan wo de coɓge koh de maaga jar maa po wãã wo ga ndi bay yãã ɗiggi maaga jar lan ɗig wo ti sen wa mo yawlà?’ Doo maaga naa da’ ɓil 2 Timote 2:​20-22 mono, naa de sãy joŋ hayya ne see naa de maaga naa le’ we kiɗ barge ti tayge no. Naa kaŋ wee go ti naa ga jar maa po kay wo naa maaga naa mo lag de deele ti joŋre maa ni Jeofan ga.

JOŊ WEE SEE ƁAY “DOO JAR MAA NEN POƊAG” NONO

13. “Joŋge see doo jar ma nen poɗag” da wããge ga hãylà”? (Efes wo 5:​7-9)

¹³ Pol jor glog kretiyẽ maa Efes wo ga á mo hay wo ɗeege go diŋ see ngeel maa nen suŋgun tawa wa, amaa á mo hay wo tum “joŋ see [ɓaara] diŋ doo jar ma nen poɗag” wo nono. (Jaŋ Efes wo 5:​7-9.) Sen da wããge ga hãy ne? Ga naa mo hay joŋ see naa tum doo kretiyẽ maa ti ngeel ɓe wo nono. Ɗeŋ po maa bag jag joŋre sen go diŋ jaŋge wããre Baa wo de fruggi nen ɓe, lan de jaŋ kefder naa maaga naa wo wer Bible mono. Á de el debaŋ maaga naa mo kaŋ ti ti sablaŋ wo de hadge maa ni Yeso Kris, “je ler ngel go ne jar ma ti tamsir la wo ti” no.—Jaŋ 8:12; Jõõ. 6:23.

14. Nenterse maa bay ɗagn kay naa na kayge là?

¹⁴ Naa de sãy maaga nenterse Baa mo kay naa maa ya’ wer seege doo “jar ma nen poɗag”  wo nono. Wer mayse ne? Werga á bay gus maaga naa mo lag bay ɗag ti tamsir maa wara nen figliw mo ti’ wa. (1 Tes. 4:​3-5, 7, 8) Nenterse Baa de kããge maa kay naa maa ooge jag ɗiggi jar maa ti tamsir ga bay wo ko fẽẽren doo ga Jeofa ko ra ne wa mono. Nenterse Baa de kããge maa kay naa pa maa joŋ “wer de el ma honla ɓuy, joŋge joŋre ti ngel ɓe keɗed keɗede.”—Efe. 5:9.

15. De ɗeŋ maa hõn ga naa da’ nenterse maa bay ɗagn là? (Efes wo 5:​19, 20)

¹⁵ Ɗeŋ maa boŋ ga naa da’ nenterse maa ni Baan diŋ de wiigi ɓe nen tosge. Yeso wãã ga Jeofa hã ge nenterse maa bay ɗagn “ne jar maga wiɗn wo” mono (Lug 11:13) Day naa da’ nenterse Jeofa de maaga naa togoɗ ne ti tayge naan wo pa. (Jaŋ Efes wo 5:​19, 20.) Nenterse maa ni Baan kay naa maaga naa mo hay de cõõre jag Jeofa.

16. Mayse kay naa maa maŋ ɗiggi de ko re là? (Efes wo 5:​10, 17)

¹⁶ De maaga naa yaŋ de ɗiggi po de woore maa maŋge no, ni naa mo hay er wer “fẽẽre maga sen coo wo jag Waŋkluu”, lan ni naa mo joŋ de maŋ se no. (Jaŋ Efes wo 5:​10, 17.) De maaga naa kiɗ jag liŋgi po wo we ga de tabge de re maaga naa nen ɓe no, ni naa kiɗ wee ɗiggi Jeofa ti ɓe. Blam ɓe, de maaga naa joŋ joŋre we de jag liŋgi maa ɓen wo no, se joŋ go ne naa gus maa maŋ ɗiggi maa de woore.

17. Naa joŋ joŋre de wur maa do naan de ko re na joŋge là? (Efes wo 5:​15, 16) (Ko foton lay.)

¹⁷ Pol baa yaŋ ne kretiyẽ maa Efesn wo pa ga á mo joŋ wo joŋre de wur maa doo ɓaaran de ko re. (Jaŋ Efes wo 5:​15, 16.) “Je ɓlagge,” jee hee naa Manhúulí, joŋ ga naa mo hay de joŋre maa ti tamsir wo la do debaŋ nen maaga naa mo da’ wur maa goŋ Baa wa. (1 Jaŋ 5:19) Sen joŋ go gus ne kretiyẽ wo maaga á mo laa wo fẽẽre maa doo suŋgu, lakol noga joŋre wo go peel joŋre maa ni Jeofa no. Hayga sen yaŋ a ge no, sen ngaɓ go ga ɗiggi maa ti tamsir de hãy ɗiggi ɓo. Á mbe cwãy ga fẽẽre sen  bay wo de ɓlagge wa, amaa á mo kol wo go diŋ fẽẽre maaga daŋ wo go nen naw naa wa hase. Maaga seele naa mo hay “doo jar maa nen poɗag” wo ne mono, naa de hay “yõɗ ti see naa go ga ti’ wa,” de kaŋ ɗiggi ti fẽẽre maaga daŋ wo go cwãy mono.

18. Donald joŋ mayse maa joŋ joŋre de wur maa do ɓen de woore là?

¹⁸ Kiɗ ɗeŋ maaga ndo mo hã see ɓo go ti joŋre maa ni Jeofan nen naw ɓon ɓuy. Ko maaga hẽn naa Donald, ga wo ɓil sir Afrique du Sud joŋ mo ɗa. Á wãã ga: “Ndi ɗig ti naw ɓi, ndi kal kem Jeofa maaga á mo kay me maa sii wããre Baa debaŋ. Ndi tos maa kiɗ joŋre maaga men wo me sii wããre Baa de peel ni mono. Jeofa kay me maa da’ joŋre maaga ndi hay kiɗgi ɓe mono. Wùr de wãy ɓi ɓog ɓuy, wùr tĩĩ joŋre doo piyoniyẽ permanaŋ nono.”

19. Naa joŋ joŋge maaga naa joŋ tum seege “doo jar maa nen poɗag” wo no là?

¹⁹ Sen go tinoo tu ga leder maaga Pol ɓo’ ne kretiyẽ maa Efes wo kay ra maa lagge de deele peel Jeofa. Leder sen kay naa wara lay. Doo maaga naa hay ko le go ciŋ no mono, sen kay naa maa da’ barge wo de hrag maa de woore wo. Á jor glog naa maa ya’ wer frug nen wããre Baa tum ciŋ ni, nen maaga poɗag maa ɓil wããre Baa mo ɓo’ nen naa ti fẽẽre maaga naa joŋ ra mo ɓuy. Lan leder sen ngaɓ woore nenterse Baa, maaga kay naa maa had joŋre maa de woore wo mono. Joŋge joŋre ti fẽẽre maaga Pol yer ra kay naa maa maŋ ɗiggi de ko re, ɗiggi maaga de tabge de ɗiggi maa ni Jeofan mono. Hayga naa joŋ fẽẽre sen wo we no, naa joŋ yaŋ de kããge maa men nen suŋgun go, lan see yaŋ tum nen poɗag no!