1-2. Bosa’ maa hõn wo ga jobo da’ blam hãge see ɓe ne Jeofa wo de batem là?

 ƁIL naa joŋ go de fruygi debaŋ de maaga naa joŋ batem go, lan naa kol go diŋ jee maa yoo tayge maa ni Jeofan mono. Wããre maaga Dafid jee yer siŋ wãã ga: “Je maga ndo go de maŋge ɓe, ga ndo yaʼn le mono go de daʼ see ɓe. Maga á mo lag wo ɓi feele mani ɓo no, wùr kãã ge yaŋ go de fruygi mani ɓo no, de debay ɗag ma ɓi tiŋ ɓo no” co yaŋ jag jar se maaga Jeofa de hoo rage mono—Siŋ. 65:5.

² Jeofa bay baa wosela hãy ɓuy koɗ le ɓi feele maa ɓen wa. Doo maaga naa hay ko le go ti hadge maa blamn ne mono, á hoo diŋ jar maaga ngaɓ wo go ga saara de sãy baa barge de ɓe ti mono. (Jag 4:8) De maaga ndo hã see ɓo go ne Jeofa lan ndo joŋ batem we go lay no, ni ndo de baa barge maa de woore de Jeofa. Ni ndo go de bawge jag jiili ga blam batem ɓo mono, á “buŋ gi jag ngel ma ciŋ yaŋ go ma cwaa bosaʼ ma kluu ne [ndo] ti.”—Mal. 3:10; Jer. 17:​7, 8.

3. Joŋre mayse de hãge ne kretiyẽ maaga wo go de hã see ɓaara ne Jeofa, lan wo go de joŋ batem là? (Eklesiyaste 5:​4, 5)

³ Batem diŋ tĩĩgi wer naw ɓon ti joŋre maa ni Jeofan ɗa. Blam maaga ndo joŋ batem we go no, ni ndo de sãy durgi go de ẽgre ɓo ɓuy maa bag jag hãge see ɓo no, koh jag re, noga liwgi wo. (Jaŋ Eklesiyaste 5:​4, 5.) De maaga ndo go jee maa wer Yeso so mono, ndo maŋ saɓlaŋ ɓe, lan ndo hoo sug ti jag liŋgi ɓen de deele. (Mat. 28:​19, 20; 1 Pi. 2:21) Hadge sen la kay mo yaŋ maa bag jag ɗiggi ɓo sen go.

 HAY TUM “MAŊ BLAM” YESO KOH JAG RE WO DE LIWGI WO

4. Ti ɓaŋ maa hõn ga jar maa wer Yeson maŋ wo “koo maa ɓal jar[n]” soole là? (Lug 9:23)

⁴ Ɗig ga Blam batem ɓo, ndo yiŋ de re ga so na wa. Diŋ wersen so ga Yeso wãã go ne jar maa wer ɓen wo de woore ga á maŋ ge wo “koo maa ɓal jare” no yaŋ soole ɓaara. Á soɗ wo koo sen diŋ “ti naw tum.” (Jaŋ Lug 9:​23, NWT.) Yeso hay da wããge na ga jar maa wer sen joŋ ge wo bon tum yawlà? Baywa. Á hay da wããge ne hara diŋ ga ciŋ ti bosa’ maaga á da’ wo mono, á yiŋ ge wo de bone. Bon maa po wo yoo ɓaara joŋ ge wo de gayri debaŋ.—2 Tim. 3:12.

5. Bosa’ maa hõn wo ga Yeso ngaɓ ne jar maaga hã wo see ɓaara go ne Jeofa mo là?

⁵ Maapo ndo go de yiŋgi de bon maaga a le see jar maa liŋ ni ɓay wo, noga ndo hay men horog ɓo po wo go wer twaywaŋ maa ni Baa no. (Mat. 6:33) Hayga á yaŋ doo sen nono, Jeofa de ko fẽẽre maaga ndo men ra go wer se mo ɓuy no. (Heb. 6:10) Maapo ga ndo go de da’ wer ne cwãy wããre maaga Yeso wãã ga: “hayga jobo men tiŋ ɓe we go noga weregeman ɓe wo, mayregeman ɓe wo, man ɓe, pan ɓe, weere ɓe wo, payre ɓe wo wer ɓi, wer Wããre ɓi ma de cõõren lay no, je sen da’ ge yaŋ de daŋ sen ɓaale kis nen naw ɓe maga á patala ni mono, tiŋri, weregamanbe, mayregemabe, de maabe, weere de payre wo, da’ bon lay, day kolge yaŋ tenen caw tum ti wur naw ma blam tawn pa.” (Mark 10:​29, 30) Bosa’ maaga ndo da’ ra wo de daŋ fẽẽre maaga ndo men ra go wer twaywaŋ maa ni Baan mono.—Siŋ. 37:4.

6. Wer mayse ga ndo mo hay tum dur ɗiggi “fẽẽre ma slag nen se wo” blam batem ɓo là?

⁶ Ndo joŋ de sãy dur “fẽẽre ma slag nen se wo” ti blam batem ɓo pa. (1 Jaŋ 2:16) De sen ɓuy, ndo joŋ ge ɓo tum diŋ ti wer maa ti mnaysee maa ni Adam no. De ngar ngeel maa po ndo ɗig tee ɗiggi maa ni Apotre Poln ga wãã ga: “Le nen ɓil ɓi, jag liŋgin de cõõre jag ɓi debaŋ. Ama ndi wo da’ jag liŋgi ma po ɓil ɓi la ni de durgi de ɗiggi ɓi, á raw sa’ mege, kol me go diŋ gebee ɓlagge ma see ɓi no.” (Rom. 7:​22, 23) Maapo ndo ko see ɓo go de wooge wer maaga ndo de durgi jag ɗiggi maa de baywoore po wo mono. Amaa, hay tum ɗiggi ti fẽn maaga ndo wãã ne Jeofa ti wur maaga ndo hã see ɓo go ne hẽn mono. Ni ndo da’ ẽgre yaŋ maa dur ɗiggi se maa de baywooren wo no. Cwãyn so diŋ ga hãge see ɓo maaga ndo hã go ne Jeofa kol naw ɓon yaŋ go gus de maaga ndo yiŋ we de re no. Sen joŋ na joŋge ne?

7. Hãge see go ne Jeofa nen tosge kay naa na kayge maa ooge de deele là?

⁷ De maaga ndo hã see ɓo go ne Jeofa mono, ndo men ɗig ti see ɓo go. Sen da wããge ga ndo men fẽẽre maaga bay wo de cõõre jag Jeofa wa mo ɓuy go. (Mat. 16:24) Wersen, de maaga naa da’ liwgi we no, naa yõõ ti ɗiggi debaŋ ga naa joŋ ge na joŋge la ga. Ndo joŋ go de ɗig maaga ndo joŋ joŋge la peel bole—kaŋ nen ta’ ga ooge de deele peel Jeofa. Ndo joŋ ge go de baa wer see ɓo maaga ndo mo hay de cõõre jag Jeofa. De maŋ sen mokay ndo joŋ ge doo Job ne no. Koh de maaga á hay yiŋ mbe de re maa de gayri debaŋ laybla mono, se wãã go de bawge jag jiili ɓe ga: “Ndi wãã ge mbi tum ga ndi de deele!”—Job 27:5.

8. Hãge see maaga ndo hã ne Jeofa nen tosge kay mo na kayge maa ooge de deele jag liwgi là?

⁸ De maaga ndo yaŋ ɗiggi tum ti tosge maaga ndo tos wur maaga ndo hã see ɓo go ne Jeofa mono, ndo da’ ẽgre yaŋ maa ooge de deele jag liwgin wo no. Ko ba ɗa, ndo slag ɓo nen yaŋ ti wãy noga war jobo yawlà? Baywa hase! Ndo hay go de wããge ne Jeofay ga ndo joŋ fẽn maa de maŋ sen ga. Hayga ndo men ɗiggi maa de baywoore wo we gẽẽge ne ndo  ɓil ga no, ndo joŋ ge bon blam maa men rage go ga. Ndo “mbuɗ faale” yaŋ go ne “faage mani jar hãyhãyn wo no. NWT”—Jõõ. 4:​14, 15.

9. Ɗiggi ti tosge maaga ndo tos wur maaga ndo go de hã see ɓo ne Jeofa kay mo na kayge maa ɓo’ Twaywaŋ maa ɓen go peel fẽẽren ɓuy là?

⁹ Ndo ɗig ge na ɗiggi de maaga à wii mo we ti joŋre po maaga joŋ ga ndo da’ nen maa woge ti taygeti tum ga so là? Ndo go de ko fẽn maaga ndo joŋ ge mono. Taŋgu maaga à hã joŋre sen ne ndo mono, ndo joŋ ge nen maŋ ɗiggi maaga ndo yãã joŋre sen ga go peel bole. Ndo joŋ ge de sãy ko maaga ndo de maŋge diŋ ɗiggi maa de baywoore noga de woore yawla ti. Hayga ndo ɗig we ti maaga Yeso hay go de baa wer see ɓe maaga se mo hay de cõõre jag Pan ɓe mono, ndo men ge fẽẽre maaga ndo go de koge ga bay wo de cõõre jag Baa wa wo yaŋ go deparday tu seŋ.—Mat. 4:10; Jaŋ 8:29.

10. Jeofa kay ge ndo na de ɗeŋ maa hõn blam batem ɓo maa “maŋ blam” Yeso là?

¹⁰ Fẽn maaga ndo joŋ de maaga ndo yaŋ nen re, noga de maaga liwgi da’ mo we ɓo’ nen go ga ndo de sãy “maŋ blam” Yeso ti yaw noga baywa yawlà. Hay go de bawge jag jiili ɓo ga Jeofa kay mo yaŋ maa maŋ blam Yeso tum. Bible wãã ga: “Baa maga ndar gog gà men ge jããge ma de raw egre ɓay age ti ɓay gà day nen jãɗgen ma lam we gen ɓuy, á kneʼ faage ma tigriŋ maga nday mo daŋ go, nday mo ẽg ne lay.”—1 Kor. 10:13.

NAA MAŊ BLAM YESO TUM NA MAŊGE LÀ?

11. Ɗeŋ maa boŋ maaga daŋgo maa maŋ blam Yeso diŋ maa hõnlà? (Ko foton lay.)

¹¹ Yeso hay joŋ joŋre ne Baa go de jiili ɓe ɓuy, lan se hay see ɓe maŋ nen tosge. (Lug 6:12) Cwãy tu, mo maa boŋ ga ndo joŋ blam batem ɓo maa seege tum wer Yeso diŋ joŋge fẽẽre maaga ya’ mo yaŋ see Jeofa mono. Bible  wãã ga: “Ane, ti ngel maga naa day go ni ga jag naa leʼ go ti sen mono, naa hoo we ɓaale naa boŋ ma seege.” (Flp. 3:16) Day maa po, ndo laa mbaa hẽẽrebe maaga maŋ wo ga saara joŋ joŋre de peel ni ne Jeofa mono . Maapo ga á joŋ wo Lakol maa Jar maaga Sii wo wããre maa ti Twaywaŋ, noga raw wo ti ngeel maaga à de sãy jar kayge wo ti ni. Hayga ndo yaŋ de kããge maa joŋ fẽẽre sen wo lay no, dur go de ẽgre ɓo ɓuy maa bag jag ɓaara go. Jar maa ni Jeofan wo de sãy ya’ wer siigi wããre ɓaaran ciŋ ni. (Joŋre 16:9) Day ndo joŋ joŋge hayga patala ndo bay we de kããge maa bag jag fẽẽre sen wo go wa ɗa là? Ɗig ga ndo bay go de day jar maaga wo de kããge maa bag jag ɓe go wa na wa. Ɗeŋ maa de wooren diŋ ga ndo mo hay tum durgi. (Mat. 10:22) Ti ɓo mo yõõ go ga ndo joŋ ɓil go ne Jeofa feh debaŋ de maaga ndo joŋ fẽn maaga ndo de kããge maa joŋge ɓe mo wa. Á diŋ fẽn maa de woore debaŋ ga ndo maŋ blam Yeso blam batem ɓo de ɓe.—Siŋ. 26:1.

12-13. Ndo joŋ joŋge hayga ndo bay we ko see ɓo de fruygi ti joŋre maa ni Jeofan wa là? (1 Korente wo 9:​16, 17) (Ko ngeel maa de gaɗge “ Men ɗeen go wa.”)

¹² Day hayga de ngar ngeel po, ndo yaŋ ɗiggi ga ndo bay tos Jeofa go de jiili ɓo ɓuy wa so, noga ga ndo bay da sii wããre Baa doo maaga ndo hay ɓaa no wa so là? Day hayga jaŋge wããre Baa ɓon bay we kay ndo doo maa taŋgun ne wa so lay là? Hayga fẽẽre sen wo mo ɗeŋ hres wo we blam joŋge batem ɓo no, wãã go tu ga nenterse Jeofa bay see ɓo wa so na wa. Wer maaga naa de ɓlagge see ɓuy so mono, ɗiggi naa coor wo tum sar sare. Hayga sãy joŋge fẽẽre sen mo ɗeŋ bay wo we a ge ne ndo ti wa so no, ni ndo mo ɗig ti saɓlaŋ apotre Pole. Koh de maaga Pol hay mbe de sãy joŋ fẽẽre doo Yeso ti no mono, á hay de koge ga de ngar ngeel maa po ta’, sãy joŋ fẽẽre maaga se de sãy joŋ rage ti joŋ wo ti se ga. (Jaŋ 1 Korente 9:​16, 17.) Á wãã ga: “[Hayga] ndi bay  joŋge ɓe de dage ɓi wa, ndi joŋ diŋ doo ga á de kaŋge me ti kaŋge nono.” Sen da wããge pa ga Pol hay go de baa wer see ɓe maa sii wããren go, koh á mo hay ba nen ngeel maa ẽla.

¹³ Doo sen ne lay, men ɗiggi ɓo maa ti mnaysen maŋ ɗiggi ti tu ɓo wa. Hay go de maŋ ɗiggi maa joŋ fẽẽre maa de woore wo, koh ndo mo hay ba de ɗiggi maa joŋ rage wa. Hayga ndo yaŋ tum joŋ fẽẽre maa ti ngeel ɓaara wo no, maapo ga ɗiggi ɓo coo ge yaŋ. Koh mo a ba ndo diŋ re ma ẽla, tosge, siigi wããre Baa, fruggi nen wããre Baa lan woge ti taygeti kay wo ndo yaŋ maa seege wer Yeso blam batem ɓo. Joŋge fẽẽre sen tum joŋ ge diŋ fẽn po maa coɓ nen hẽẽre ɓo wo.—1 Tes. 5:11.

“LAM WEE SEE ƁAY TUM . . . KO SEE ƁAY TUM”

14. Ndo mo hay raŋ nen mayse tum là, day wer maylà? (2 Korente wo 13:5)

¹⁴ Blam batem ɓo mono, á de el maaga ndo mo hay raŋ nen ɗiggi ɓo tum. (Jaŋ 2 Korente wo 13:5.) Hay tum wii jag see ɓo ti naw ɓo maa koge ga ndo mbo de tosge, jaŋ wããre Baa, lan frug nen ɓe, woge ti taygeti lan ti siigi wããre Baa tum yawlà. Joŋ nen maaga fẽẽre sen wo mo deŋ mo ya’ wo wer kay moge ciŋ de peel ni. Ndo joŋ sen de wii jag see ɓo ga: ‘Ndi mbi de kããge maa naa wer hadge maa mẽ’ mẽ’ wo ne jar yawlà? Ɗeŋ po yaŋ wo maaga kol siigi wããre Baa ɓin de cõõre jag ɓi yawlà? Tosge ɓin mbaara go pah pah, lan ngaɓ wo mbaara go ga ndi mbi de deŋ see ɓi see Jeofa yawlà? Ndi mbi na de woge ti taygeti wo tum yawlà? Ndi joŋ joŋge maa bag jag see ɓi go maa fer wããre ti taygeti, lan maaga ndi mo hay ɗegeɗ co’sug ti taygeti wo là?’

15-16. Saɓlaŋ hẽn naa Robert had mayse ne ndo ti ooge de deele jag liwgi là?

¹⁵ Á de el maaga naa mo hay raŋ nen ɗiggi naa wo ti ɓaŋ hugli naa wo de woore. Hẽn naa po à ɗen Robert wãã ti ɓaŋ sen ga: “De maaga kiŋgi ɓi hay de ngar 20 mono, ndi hay joŋ joŋre tum nen naw nen reda siili no. Wur po blam joŋre mono, wãy po maaga wur joŋ joŋre de kẽẽ wii me ga wùr mo see ni se. Se wãã me ga de maaga ‘wur joŋ we go ɓog no’ ni ndi mo suu de se. Taŋgu ɗa mono, ndi wãã ɓi go ne hẽn bay go de caa see wa ga baywa, amaa, blam sen mokay ndi naa wer ɓe go ne hẽn de woore ga wer mayse ga ndi day ga là.” Robert oo ge mbe ngiŋ jag liwgi se no, day sen hay de woore debaŋ. Blam mokay, se fer ɗiggi ga se de hay kne’ re sen de woore de daŋ sen de ɗeŋ maa tigriŋ. Á wãã ga: “Ndi wãã baywa go ne hẽn de caa see, lan deparday doo maaga Josef joŋ see wãy Potifar no ga. (Tĩĩ. 39:​7-9) Á hay hoo nen ɓi do, lan hay gaali see ɓi maa wããge ga ndi dayga. Re sen kay me maa koge  ga ndi de ya’ wer hãge ɓil ɓi ciŋ see Jeofa ni.”

¹⁶ Ndo da’ wer fẽn maaga ndo raŋ nen ɗiggi ɓo de see ɓo tu doo maaga Robert hay joŋ no lay. Koh de maaga ndo mo kal ba ti go jag jãɗge se no, wii jag see ɓo blam ga, ‘Á hay wii wur do ɓi gemãy maaga ndi mo yiŋ jag ga baywa là?’ Hayga ndo yaŋ de koge ga ndo joŋn ɗawa de daŋ maa seɓaan no, ni ndo mo caa kiida see ɓo wa. Hay de fruygi ti maaga ndo go de koge ga ndo de hugli ti ɓaŋ sen wo mono. Sii hugli sen ne Jeofa nen tosge, lan joŋ fẽn maaga hã ẽgre yaŋ mo maa hoo sug ti jag liŋgi ɓe maa ti ɓaŋ suugi de kããran mono.—Siŋ. 139:​23, 24.

17. De ɗeŋ maa hõn ga ɗuu Jeofa de joŋ go de fããge noga de demge ti re maaga da’ Robert mo là?

¹⁷ Fẽẽre po yaŋ wo maaga naa had see saɓlaŋ Robert pa. Á ya’ wer wããge de peel ni pa ga : “Blam maaga ndi laa dayge yãã fẽn maaga á wii me ti ɓe ga mono, á wãã me ga, ndo yãã go jag rew!’ Ndi wãã ne hẽn ga á hay da wããge ga hãyla. Se fer me ni ga bar se po maaga hay bay sedeewa Jeofa wa so, hay wãã ne se ga sedeewa Jeofa maa jõõre wo ɓuy joŋ wo fẽẽre maa de baywoore freŋ, ga á yiŋ wo we de re maa de maŋ sen wo no, á leɗ wo go gesiŋ. Se hay wãã ne bar se sen ga se liw ge ndi yaŋ ɗa. Ɓil ɓi joŋ go de fruygi debaŋ ti maaga ndi fãã ɗuu Jeofa go mono.”

18. Ndo go de baa wer see ɓo maa joŋ mayse blam batem ɓo là? (Ko ngeel maa de gaɗge “ Hadge po wo ɓog ga co wo yaŋ jag ɓo”.)

¹⁸ De maaga ndo hã see ɓo we go ne Jeofa, lan joŋ batem we go no, ni ndo go de ngaɓge ga ndo de sãy fãã ɗuu ɓe go ti koh jag re maa hõnla ɓuy. Day, hay go de bawge jag jiili ɓo ga Jeofa de ko re maaga ndo yiŋ de ɓaara, lan ga ndo oo yaŋ ngiŋ jag re maaga daɗ wo ndo mo ɓuy no. Á ɓo’ ge bosa’ yaŋ ne ndo ti ti durgi ɓo maaga ndo dur maa ooge peel ɓe de deele mono. Hay de kaŋ ɗiggi ti nenterse ɓe maa bay ɗag no, á hã ge ẽgre yaŋ mo maa joŋge ɓe. (Lug 11:​11-13) De kayge maa ni Jeofan, ndo joŋ yaŋ mbo de kããge maa maŋ blam Yeso blam batem ɓo.