1. Ɗiggi maa hõn ga jar goŋ Baa po maa de deele dur wo jag ɓe là?

 NAA de fruygi de maaga naa laa ga tayge jar maa wer Jeofan wo de cõõre jag ɓe mono! Bible wãã ga: “[Jeofa] joŋ fruygi ti jar ɓen wo no.” (Siŋ. 149:4) Amaa de ngar ngeel maa po, jar maa po joŋ wo go de woo do, saara wii jag see ɓaara boŋ boŋ ɓuy ga ‘Ndi mbi na de cõõre jag Jeofa ɗa pa yawlà?’ Koh jar maa ɓil Bible po ga wo de deele hay wii wo jag see ɓaara doo sen no lay.—1 Sam. 1:​6-10; Job 29:​2, 4; Siŋ. 51:11.

2. Wose wo de cõõre jag Jeofa là?

² Bible ngaɓ go de woore tu ga jar maa de ɓlagge see mbaara de kããge maaga saara joŋ de cõõre jag Jeofa lay. Sen joŋ doo sen ne joŋge là? Naa de hay joŋ joŋre de hãge ɓil naa ti Yeso lan joŋ batem go. (Jaŋ 3:16) Diŋ de ɗeŋ maa sen ga naa ngaɓ go ne jar ga naa men joŋ fẽẽre maa de ɓlaggen wo we go, lan ga naa go diŋ maa joŋ dage Baa lay so. (Joŋre 2:38; 3:19) Ɓil Jeofa joŋ go de fruygi ne naa ti debaŋ de maaga naa joŋ fẽẽre sen wo maa kolge go bar ɓe mono. De maaga naa dur we go de ẽgre naa ɓuy maa bag jag hãge see naa go ne hẽn no, naa joŋ de cõõre jag ɓe, lan se ko naa doo bar ɓe wo nono.—Siŋ. 25:14.

3. Naa wãã yaŋ ti mayse wo ɓil hadgen la là?

³ Amaa wer mayse ga jar maa po ɗig wo ga saara bay de cõõre jag Baa wa là? Jeofa ɓo’ nen go ga naa de cõõre jag ɓe na ɓo’ge là? Lan kretiyẽ joŋ go de bawge jag jiili ɓe ga se de cõõre jag Jeofa na joŋge là?

WER MAYSE GA JAR MAA PO ƊIG WO GA SAARA BAY DE CÕÕRE JAG JEOFA WA LÀ

4-5. Koh de maaga naa ɗig mbe ga naa bay go diŋ jar po halla wa laybla mono, naa mo hay go de bawge jag jiili naa ti maylà?

⁴ Hãã le ti kleere naa, jar ngaɓa yoo naa hay ɗig wo ga saara bay diŋ mopo nen Jeofa wa. (Siŋ. 88:15) Hẽnbe po ga à ɗen ga  Adriyan wãã ga: “Ndi hay tum ko see ɓi bay go halla wa. Yoo fẽẽre maaga gwan ti ɓi diŋ ga ndi hay tosge ga jar maa liŋ ni wùr mo da’ wo paradis, koh de maaga ndi hay go de bawge jag jiili ɓi ga ndi bay maa da’ge ɓe wa mono.” Tony, maaga gẽẽ ɓil feele maa ti jag-Baa ga, wãã ga: “Pããre ɓi wãã wo me ti boŋ ga saara da me ga, noga ɓil saara de fruygi ne ndi ti ga. Sen hay ɗig mege jag jiili ga fẽẽre maaga ndi hay joŋ rage mo ɓuy bay wo de cõõre jag ɓaara wa.”

⁵ Hayga de ngar ngeel maa po naa yaŋ ɗiggi ga naa bay we go diŋ jar po halla wa no, ni naa mo ɗig ga diŋ Jeofa ti see ɓe ga jãã naa le see ɓe. (Jaŋ 6:44) Á ko fẽẽre maa de el wo see naa, ga maapo ga naa ti see naa naa kon ga, lan se de ko jiili naa. (1 Sam. 16:7; 2 Kron. 6:30) Diŋ wersen so ga naa de hay kaŋ ɗiggi ti ɓe de maaga á wãã ga naa de el nen se mono.—1 Jaŋ 3:​19, 20.

6. Pol hay ɗiggi ti ɓlagge ɓe maa ɓaan wo naa ɗiggi là?

⁶ Taŋgu maaga naa da’ cwãy mono, jar maa po wo yoo naa hay joŋ wo fẽẽre maaga fer wo gay ɗiggi ɓaara. (1 Pi. 4:3) Koh kretiyẽ maa de deele mbaara de durgi jag ɗiggi ɓlagge wo wara lay. Ndo lay, mopo de ɗig moge ga Jeofa bay go de fug ɓil mo ti wa ɗa yawlà? Hayga á yaŋ ne no, coɓ see ɓo de kaŋ ɗiggi ga jar maa joŋ joŋre ne Jeofa de deele hay dur wo ɗiggi maa de maŋ sen lay. Ko ba ɗa, apotre Pol hay ko see ɓe go de coocoo de maaga á hay ɗiggi ti ɓlagge maa see ɓen mono. (Rom. 7:24) Day, Pol hay men ɓlagge maaga se hay joŋ rage go, lan joŋ batem go. Amaa ane, á hay ko see ɓe go doo “je ma de pẽẽre go yoo jar peele Yeson wo ɓuy” lan doo jee maa de ɓlagge “daŋge” ɓuy yoo ɓaara nono.—1 Kor. 15:9; 1 Tim. 1:15.

7. Naa mo hay kaŋ go ti naa ti ɓlagge naa maa ɓaan wo ga hãylà?

⁷ Pan naa maa ciŋ wãã ga se men ɓlagge naa go ne naa hayga naa men joŋ ɓlagge naa wo we go no. (Siŋ. 86:5) Day hayga naa yaŋ de koge ga fẽn maaga naa joŋn bay ti ngeel ɓe wa no, ni naa kaŋ wee ɗiggi ga Jeofa wãã diŋ cwãy, lan ga á fug ɓil go ne naa ti.—Kol. 2:13.

8-9. Naa joŋ joŋge maa naa blum ɗiggi maaga naa ɗig ga naa kãã maa joŋ mopo maaga naa co jag Jeofa ti boŋ ga na joŋge là?

⁸ Naa ɓuy naa de sãy joŋ joŋre ne Jeofa ti hayga ẽgre naa yaŋ de kããge no. Amaa, jar maa po ɗig wo ga saara kãã maa joŋ mopo go ti boŋ nen maaga saara joŋ de cõõre jag Jeofa ga. Mãygemanbe po à ɗen ga Amanda wãã ga: “Ndi hay ɗiggi seɓaa ga joŋge joŋre de ẽgre ɓi ɓuy ne Jeofa diŋ sen boŋ de joŋge joŋre ne Jeofa de peel ni. Ndi hay kiɗgi ga ndi joŋ joŋre de daŋ maaga ẽgre ɓi de kããge maa joŋge ɓe mono. De maaga joŋren see we ga no, ndi ɗig ga ɓil Jeofa bay go me ti feh wa dega’ doo maaga ndi ɗig ti see ɓi no lay.”

⁹ Naa joŋ joŋge maa naa blum ɗiggi maaga naa joŋ mopo go ti boŋ maa coge jag Jeofa ga là? Kaŋ ti ɓo ga Jeofa bay jobo maa graŋ wa. Á gor mopo ti boŋ do naa de daŋ maaga ẽgre naa kãã maa joŋge ɓe mo ga hase. Fẽn maaga naa joŋ ne hẽn ɓuy co jag ɓe de maaga naa yaŋ go joŋge ɓe go de ẽgre naa ɓuy no. Ɗig wee ti saɓlaŋ jar maa ɓil Bible ga hay joŋ wo joŋre go ne Jeofa de jiili ɓaara ɓuy ɗa lay. Saɓlaŋ Pole. Á hay de baa wuu joŋ joŋre maa ni Jeofan nen kiŋgi puri: raŋ kelew meder ndar puri, lan caa tayge ngaɓa lay. Amaa, de maaga á hay yiŋ de re, ga se hay bay sii wããre doo maa ɓaan wa so mono, Jeofa hay tobn go yawlà? Baywa. Á hay tum joŋ fẽn maaga ẽgre ɓe kãã maa joŋge ɓe mono, lan Jeofa hay ɓo’ bosa’ ne hẽn ti. (Joŋre 28:​30, 31) Doo sen ne lay, maapo ga fẽn maaga naa de kããge maa joŋge ɓe ne Jeofa coo de ngar ngeel maa po wo. Amaa, co jag ɓe diŋ fẽn maaga jor glog naa joŋ joŋre ne hẽn mono. Naa ko  maaga Jeofa ɓo’ nen go ne naa patala ga naa de cõõre jag see mo ɗa.

JEOFA NGAƁ GO GA NAA DE CÕÕRE JAG SE NA NGAƁGE LÀ?

10. De ɗeŋ maa hõn ga naa “laa gẽẽge” Jeofa ɓo’ nen dage ɓen go see naa là? (Jaŋ 16:27)

¹⁰ Á hã Bible ne naa. Jeofa kiɗ ɗeŋ maa ɓo’ nen go ne jar maa ɓen wo ga se da ra, lan ga ɓil se go feh ne hara ti. Wããre Baa ngaɓ fẽẽre po wo ɓog ga á wãã ne Yeso ga se da ne lan ga á diŋ mbarga dage se, se de sãy ɓe ti debaŋ. (Mat. 3:17; 17:5) Ndo de sãy maaga Jeofa mo ɓo’ nen go mo ga se de sãy ɓo ti lay yaw? Jeofa bay wãã re le ne naa le ciŋ ɓaa wa, amaa, á wãã wããre ne naa diŋ de Bible. Hayga naa jaŋ wããre maa de dage maaga Yeso hay wããge ɓe ne jar maa wer ɓen wo we no, sen doo ga Jeofa de wãã wããre sen diŋ ne naa nono. (Jaŋ Jaŋ 16:27.) Joŋre Yeso hay diŋ doo maa ni pan ɓen ne dege’ dege’ tu. Wersen, de maaga naa jaŋ ga Yeso hay naa nen dage ɓen go see jar maa wer ɓe maa ti mnaysee wo, amaa, ga wo de deele mono, sen doo ga de wãã wããre sen ne naa diŋ Jeofa nono.—Jaŋ 15:​9, 15.

11. Wer mayse ga yiŋgi de gayri bay da wããge ga naa bay de cõõre jag Jeofa wa so na wa là? (Jag 1:12)

¹¹ Á hã mo maaga naa de sãy ɓe ti ne naa. Jeofa go de gorge maa kay naa, ba doo maaga á hã fẽẽre maaga naa de sãy ɓaara ti ne naa. Day maapo, Jeofa men ɓe bon da’ naa doo maaga á hay joŋ see Job no lay koɗ no. (Job 1:​8-11) Joŋge bonn bay da wããge ga Baa bay de sãy naa ti wa so na wa. Ba yaw mono, á hã faage ne naa maaga naa mo naa nen dage naa maa kwũyn wo de kaŋge ɗiggi naa ti ɓen go see ɓe. (Jaŋ Jag 1:12.) Day nen bon sen mono, naa ko go de woore so ga Jeofa da naa, lan ga á kay naa maa soɗ re naa wo no.

12. Naa had mayse see saɓlaŋ Dimitri là?

¹² Naa maŋ saɓlaŋ blo po wo Asie ga à ɗen Dimitri ɗa. Á hay bas joŋre ɓen go, lan laa da’ joŋre maa tigriŋ ga nen few puri. Á maŋ ga se kaŋ ɗiggi se ti Jeofa de ya’ wer sii wããre de peel ni. Few go blam puri, se laa da’ joŋre ga. Blam se raw le’ cege hãã nen maaga se bay kããge maa urgi ciŋ wa. Dimitri le’ ɗiggi ga se joŋ bay diŋ war maa ti ngeel ɓe wa, lan ga maapo ga se bay de cõõre jag Jeofa wa so. Amaa wurpo de law, mãy ɓe yer verse maaga naa da’ ɓil Esay 30:​15, ga wãã ga: “Egre ɓayn joŋ ge nà diŋ de maga nday lag eŋ, day nday kaŋ ɗiggi ɓay we go sog boŋ ti Baa mono.” Á hã leder sen ne Dimitri lan wãã ga: “Baba, de maaga jiili ɓo caa we go no, ɗig ti verse sen mokay la  no.” Dimitri wo koge so ga Jeofa mbe tum kay ɓi feele se debaŋ, ga Á hã rege, õõbe wo de tiŋ naw ne saara tum koh nen cege sen ɓuy. Á wãã pa ga: “Fẽn maaga ndi hay nen joŋge ɓe diŋ ga ndi mo hay eŋ, day, ndi mo kaŋ ɗiggi ɓi diŋ ti Baa ɓin tum.” Hayga ndo yaŋ nen re maa de maŋ sen no, kaŋ ɗiggi ɓo ga Jeofa de ko decoo ɓo, lan ga á kay ndo maaga ndo mo soɗ bon ɓon lay.

13. Jeofa joŋ joŋre de wose wo maa ɓo’ nen go ga naa de cõõre jag se là, day de ɗeŋ maa hõnlà?

¹³ Á hã hẽẽrebe wo ne naa. Jeofa ngaɓ go ga naa de cõõre jag se de fẽẽre maaga hẽẽre naa joŋ wo ne naa mono. Ko ba ɗa, maapo á jor glog hẽẽre naa wo maaga á mo coɓ wo nen naa de wããre de wur maaga naa de sãy ɓe ti. Mãygeman naa po wo Asie ko fẽn sen de maaga á hay nen lawge debaŋ mono. Á bas joŋre ɓen go lan se le’ cege. Blam sen, war ɓe joŋ ɓlagge maa kwũy, lan se bas joŋre ɓe maa doo jee maa peel taygen go pa.” Á wãã ga: “Ndi hay bay koge ga wer mayse ga re sen da’ wo me la wa. Ndi hay ɗig ga maapo ga re sen da’ me diŋ werga ndi hay joŋ ɓlagge po, lan ga ndi bay de cõõre jag Jeofa wa so. Mãygeman naan kem Jeofa maaga á mo ɓo’ nen go ne se ga se de cõõre jag ɓe. Á hay joŋ sen na de ɗeŋ maylà? Á wãã ga: “Jar maa peel tayge ndal wo de ɓi, lan kay wo ndi maa koge ga Jeofa da me.” Blam sen, se wii kayge do Jeofa pa. Á wãã ga: “Wur sen tu, hẽẽre naa maa twerpiiri wo de maa tnaare maa ti tayge ɓo’ wo leder le me maa coɓ nen ɓi. De maaga ndi jaŋ leder sen mono, ndi ko ga Jeofa hay laa tosge ɓi no.” Cwãy tu, maapo ga Jeofa ɓo’ nen go ga naa de cõõre jag Se diŋ de wããre maa de dage maaga hẽẽre naa wãã wo ne naa mono.—Siŋ. 10:17.

14. De ɗeŋ maa hõn pa ga Jeofa ɓo’ nen go ne naa ga naa de cõõre jag se là?

¹⁴ Jeofa ngaɓ go ga naa de cõõre jag se diŋ de yaŋ maaga hẽẽre naa baa wo ne naa ti wur  maaga naa de sãy ɓe ti mono. Ko ba ɗa, ti wur maa ni apotre wo le mono, Jeofa joŋ joŋre de Pol maaga á mo yer leder 14 maa kay tayge kretiyẽ wo. Wããre maa ɓil ɓaaran hay wo diŋ yaŋ maaga á hay wo nen laage ɓe, amaa de dage. Wer mayse ga Jeofa joŋ ga Pol mo baa yaŋ maa de maŋ sen ne hara là? Jeofa diŋ pããbe maa de ele, ga liŋ weere ɓe maaga “a da” ra wo mono. (Jõõ. 3:​11, 12) Wersen, hayga à baa yaŋ we ne naa ga a le ɓil Bible no, naa mo kaŋ go ti naa ga sen diŋ fẽn maaga ngaɓ go cwãy ga naa co jag Jeofa, amaa bay diŋ ga naa co jag ɓe ga na wa. (Heb. 12:6) Mayse ngaɓ go pa ga naa de cõõre jag Jeofa là?

FẼẼRE MAAGA NGAƁ WO GO PA GA NAA DE CÕÕRE JAG JEOFA MONO

15. Jeofa hã ẽgre nenterse ɓe maa bay ɗagn diŋ ne wose wo là, day wer mayse ga á kaŋ ɗiggi ti naa là?

¹⁵ Jeofa hã nenterse ɓe maa bay ɗagn ne jar maaga wo de cõõre jag ɓe mono. (Mat. 12:18) Naa mbe nen wii jag see naa ga: ‘Ndi mbi go na de naa nen joŋre maa ti nenterse po boŋ nen naw ɓin yawlà?’ Ndi mbi de koge ga ndi gor desãy see jar patala de daŋ maaga ndi hay taŋgu maaga ndi ko Jeofa mo yawlà? Cwãy tu, de maaga naa ya’ wer joŋge joŋre maa ti nenterse de peel ni de woore mono, naa joŋ go de bawge jag jiili ga naa de cõõre jag Jeofa!—Ko ngeel maa de gaɗge “ Le’ge maa ti nenterse diŋ . . “

16. Jeofa joŋ joŋre de wose wo maa sii wããre maa de cõõren go là, day sen joŋ see ne ndo na joŋge là? (1 Tesalonig wo 2:4)

¹⁶ Jeofa de fruygi maa hã joŋre siigi wããre ɓen ne jar maaga co wo jag ɓe, maaga á mo sii wo wããre maa de cõõren go. (Jaŋ 1 Tesalonig wo 2:4.) Ko maaga mãygeman naa po ga à ɗen ga Joselin da’ wer maaga se sii wããre maa de cõõren go ne jar mo ɗa. Wurpo, Joselin pũy le go de caa jiili debaŋ.” Á wãã ga “Ndi ko see ɓi doo ga ndi bay go halla wa, lan doo ga ẽgre ɓi bay maa joŋ joŋre po wa nono. Amaa ndi hay diŋ piyoniyẽ permanaŋ, day, wur sen hay diŋ wur siigi wããre ɓi. Wersen, ndi tos Jeofa, lan ndi raw sii wããre Baa.” Wur sen de toŋ tu, Joselin yiŋ de Mari, wãy po ga yãã hadge Bible de ɓe. Few mẽ’ blam tĩĩgi wer hadge sen mono, Mari wãã ga wur maaga se yiŋ de Joselin mono, se hay tos Baa maaga á mo kay se, lan blam sen Joselin a le ma’ jag tiŋ se tu lay. De maaga Joselin fer ɗiggi ti fẽn sen mono, se wãã ga: “Á joŋ see me doo ga Jeofa de wããge me ga: ndo de cõõre jag ɓi  nono.” Á mbe cwãy ga jar ɓuy bay co’ sug siigi wããre maaga naa siin mo wa. Amaa, naa go de bawge jag jiili ga sen fruy Jeofa debaŋ de maaga naa dur maa sii wããre Baa ne jar mono.

17. Ndo had mayse see wããre maaga Vicky wãã ti raŋsoŋ mo là? (Siŋ. 5:13)

¹⁷ Jeofa fug ɓil go ne jar maaga wo de cõõre jag ɓe ti wer raŋsoŋ. (1 Tim. 2:​5, 6) Day, mayse joŋ hayga naa yaŋ ɗiggi ga naa bay de cõõre jag Jeofa wa, koh de maaga naa mbe de hã ɓil ti raŋsoŋ, lan go de joŋ batem ɓuy mbe mo là? Ɗig ndo ga naa bay maa kaŋ ɗiggi ti see naa wa, amaa naa mo kaŋ ɗiggi diŋ ti Jeofa. Jar maaga hã wo ɓil ti raŋsoŋ wo de deele nen ɓe, lan á wãã ga se ɓo’ bosa’ yaŋ ne hara ti debaŋ. (Jaŋ Siŋ wora 5:13; Rom. 3:26) Ɗiggi ti raŋsoŋ kay Vicky. Wurpo blam maaga á hay ɗig debaŋ ti raŋsoŋ mono, se wãã ga: “Jeofa hay go kiɗgi ɓaa tu maa ngaɓge me ga se da me. . . Sen doo ga ndi hay wããge ne hẽn ga: ‘Ndo kãã maa da jobo maa doo ndi ne ti boŋ ga. Húulí weel ɓon kãã maa fas ɓlagge maaga ndi joŋ ra wo mo go ga.” De maaga Vicky hay mbe tum ɗiggi ti raŋsoŋ mono, se tĩĩ wer koge ga Jeofa de da se ge. Naa lay naa ko ga Jeofa da naa, lan ga naa de cõõre jag ɓe hayga naa yaŋ ɗiggi ti raŋsoŋ tum no.

18. Naa joŋ go de bawge jag jiili naa ti mayse hayga naa yaŋ da pan naa maa ciŋn tum là?

¹⁸ Koh de maaga naa mbe de durgi maa hoo sug ti yaŋ maaga naa had ra ti hadge sen la laybla mono, maapo jiili naa joŋ tum caa kiida naa, hãã nen maaga naa joŋ ɗiggi ga naa bay de cõõre jag Jeofa wa.” Hayga á yaŋ nono, fer ɗiggi ga Jeofa da “jar [maga] da wo se mo ɓuy no.” (Jag. 1:12) Wersen, hay tum ya’ see ɓo see Jeofa, lan kiɗ tum diŋ ɗeŋ maaga á ngaɓ ne ndo ga ndo de cõõre jag se mono. Yõõ ti go ti boŋ ga Jeofa “bay go se jar hãã wa hase” wa.—Joŋre 17:27.