1-2. Jobo joŋ mayse go taŋgu maaga se joŋ batem go là?

 NEN kiŋgi maa dwee glog wo le la mono, jar de daŋ miliyoŋ hay kol wo go sedeewa Jeofa de joŋ batem. Jar debaŋ yoo ɓaara ko wo cwãyn “le ti klee” ɓaara ɓaa doo Timote, jee maa wer Yeso le ti wur maa ni jar peele Yeson wo no lay. (2 Tim. 3:​14, 15) Jar maa po ko wo Jeofa go kluuri, maa po wo de maaga á wo go de garge mono. Le la mbaŋ, wãy po ga hay had wããre Baa de sedeewa Jeofa wo, joŋ batem go de maaga kiŋgi ɓe 97 mono!

² Hayga à yaŋ had wããre Baa mo noga pããre ɓo yaŋ wo diŋ sedeewa Jeofa no, ndo mbo de ɗiggi ga ndo mo joŋ batem go yawlà? Sen diŋ ɗiggi maa de woore debaŋ! Taŋgu maaga ndo joŋ batem go mono, ndo mo hay hã see ɓo go ne Jeofa nen tosge ɗa. Hadge sen la naa wer wããre maaga à wãã ga hãge see go ne Jeofa mono. Sen kay ndo yaŋ pa maa koge ga wer mayse ga ndo mo joŋ hẽẽne maa hã see ɓo go ne Jeofa nen tosge lan maa joŋ batem go wa là.

HÃGE SEE GO NE JEOFA DA WÃÃGE GA HÃYLÀ?

3. Hã saɓlaŋ jar po ɓil Bible ga hay hã wo see ɓaara go ne Jeofa mo ɗa.

³ Ɓil Bible, hãge see go ne Jeofa da wããge ga caage see go ti nen maa joŋ joŋre ne Jeofa. Jar Israyel hay wo go diŋ jar maa Baa. Amaa, jar maa po yoo ɓaara hay wo de hã see ɓaara ne Jeofa de ɗeŋ maa tigriŋ sara. Ko ba ɗa, Aaron hay kaŋ “klaŋ hayle go sag sag [maa] joŋre” ti ɓe—mblaaga boo biŋni nen peel jugu moobe no. Mblaaga boo biŋni sen hay ngaɓge ga á  hay go sag sag maa joŋ joŋre doo jee sii jag maa kluu nono. (Lef. 8:9) Jar Nasiriyad hay wo go de hã see ɓaara ti joŋre ne Jeofa de ɗeŋ maa tigriŋ sar lay. “Nasiriyad,” a le see wããre maa jag hebre nazir ga da wããge ga, “go de caage boŋ,” noga “go de hã see ɓe.” Jar Nasiriyad de hay joŋ wo naw ɓaaran doo maaga jag liŋgi maa ni Moyis hay wããge ne hara nono.—Kee. 6:​2-8.

4. (a) Ti ɓaŋ maa hõn ga jar maaga wo go de hã see ɓaara ne Jeofa wo go de caage ti nen maa joŋ joŋre ne Baa là? (b) “Men[ge] ɗig ti ti see ɓe go” da wããge ga hãylà? (Ko foton lay.)

⁴ De maaga ndo hã see ɓo we go ne Jeofa no, ni ndo de maŋge ga ndo kol jee maa wer Yeso, lan ga bagge jag dage Baa diŋ fẽn maaga daŋgo nen naw ɓo mono. Hãge see ɓo go ne Baa wii ga ndo mo joŋ mayse là? Yeso wãã ga: “Wosela da we ga se maŋ blam ɓi, á mo men ɗig ti ti see ɓe go.” (Mat. 16:24) Jag greg maaga à koln go ga “men ɗig ti ti see ɓe go” da mbe wããge pa ga “naw ɓo bay maa ɓo wa so.” Hayga ndo hã see ɓo we go maa joŋre ne Jeofa no, ndo de hay men fẽẽre maaga co wo jag ɓe ga mo ɓuy go. (2 Kor. 5:​14, 15) Sen da wããge ga ndo mo ɗee go see “Joŋre maaga naa wo nen ɗiggi je tabay go,” doo figliw wo ne mono. (Gal. 5:​19-21; 1 Kor. 6:18) Hooge sug ti jag liŋgi sen kol wo naw ɓon de gayri yawlà? Baywa, hayga ndo yaŋ da Jeofa, lan ga ndo yaŋ go de bawge jag jiili ɓo ga jag liŋgi ɓen wo diŋ maa kay moge no. (Siŋ. 119:97; Esa. 48:​17, 18) Hẽnbe po à ɗen ga Nikola wãã ga: “Maapo ga ndo ko jag liŋgi maa ni Jeofan doo glig maa de kii ti daŋgay ga maŋ jag ɓo go joŋ fẽẽre maaga sãy ɓaara ti ɓo, noga doo kaw mingir maaga yãã ndo go jag re nono.”

5. (a) De ɗeŋ maa hõn ga jobo hã see ɓe go ne Jeofa là? (b) Sara ti holaŋ hãge see go ne Jeofa wo de Joŋge batem diŋ maylà? (Ko foton lay)

⁵ Naa hã see naa go ne Jeofa na hãge là? Ndo wãã ne hẽn nen tosge ga ndo goŋ ge diŋ se boŋ  tu, lan ga ndo kaŋ ge dage ɓen yaŋ go peel fẽẽren ɓuy nen naw ɓo. Cwãy tu, ndo wãã ne Jeofa ga ndo joŋ ge yaŋ tum dage ɓe go de “jiili ɓo ɓuy, de maysee ɓo ɓuy, de ɗiggi ɓo ɓuy, de egre ɓo ɓuy lay.” (Mark 12:30) Hãge see sen joŋ diŋ ti flaŋ ɓo de Jeofa tawa tu. Amaa, maa batem, sen ndo joŋn go nen jar poɗag ɓuy; sen ɓo’ nen go ne jar ga ndo go de hã see ɓo go ne Jeofa. Hãge see ɓo go diŋ mopo maaga daŋ go, day ndo de ɓo’ nen go ne Jeofa ga ndo hoo ge sug yaŋ ti ɓe; lan Jeofa de gorge diŋ ga ndo mo bag jag ɓe go.—Ekl. 5:​4, 5.

WER MAYSE GA NDO MO HàSEE ƁO GO NE JEOFA LÀ?

6. Wer mayse ga jobo maŋ ga se hã see se go ne Jeofa là?

⁶ Fẽn maaga mo hay srog glog ɓo taŋgu hã see ɓo go ne Jeofa diŋ dage. Dage sen bay diŋ jag jiili ɓo tawa wa. Amaa, dage sen gẽẽ ciŋ ni diŋ wer maaga ndo had fẽẽre maa da’ “koge re maa ti ngeel ɓe” ti Jeofa, lan ti fẽere maaga á joŋ ge ra yaŋ wo peel mono. (Kol. 1:9) Fruggi nen wããre Baa hã bawge yaŋ go mo jag jilli ga (1) Jeofa yaŋ cwãy, (2) À yer Bible diŋ de ẽgre nenterse Baa, lan (3) Á joŋ joŋre de tayge maa ɓen maa bag jag ɗiggi ɓe go.

7. Naa de joŋ mayse go taŋgu maaga na hã see naa go ne Jeofa là?

⁷ Jar maaga hã wo see ɓaara go ne Jeofa wo de ko hadge maa kluuri maa ɓil Bible wo, lan hoo wo sug ti jag liŋgi maa ni Baan lay. Á dur wo de ngar ẽgre ɓaara maa sii wããre sen go ne jar lay. (Mat. 28:​19, 20) Dage ɓaara see Jeofa gẽẽ ciŋ, lan ɗiggi ɓaara maa kwũyn diŋ goŋge Jeofa. Ndo ɗig bay de maŋ sen wa ane yawlà? Hayga dage sen yaŋ ɓil ɓo no, hãge see ɓon go lan joŋge batem bay diŋ maa fruy ɓil jee had  Bible mo, noga maa fruy ɓil pããre ɓo wo wa. Lan pa bay diŋ werga kããre ɓo lan wo de joŋge doo sen no lay koɗ wa.

8. Koge de el fẽẽre maaga Jeofa joŋ see ɓo kay ndo maaga ndo mo hã see ɓo go ne hẽn na kayge là? (Siŋ Wora 116:​12-14)

⁸ Hãge see ɓo go ne Jeofa diŋ mopo maaga gẽẽ ne ndo ɓil de maaga ndo yaŋ ɗiggi ti fẽẽre maaga á joŋ ra ne ndo mo ɓuy no. (Jaŋ Siŋ Wora 116:​12-14.) Bible wãã go pah tu ga jee hã “fẽẽre maa de eln wo mo ɗeŋ ɓuy” diŋ Jeofa. (Jag 1:17) Kado maa kluu yoo fẽẽre se de eln wo ɓuy diŋ maaga á hã Weel ɓe Yeso go húugi ti tu naa mono. Ko ba mbo woore kado sen ɗa! Diŋ wer ransoŋ ga holaŋ ɓay joŋ de woore de Jeofa mono. Lan ndo de kããge maa joŋge tenen caw tum. (1 Jaŋ 4:​9, 10, 19) Hãge see ɓo go ne Jeofa diŋ ɗeŋ maa boŋ yoo maa ngaɓa wo ga ndo ngaɓ ga ndo joŋ suse’ ne hẽn ti dage ɓe maaga á naa nen ɓe go see ɓo mono; lan ti bosa’ maa tigriŋ ga á kaŋ ra ne ndo ti mono. (Dog. 16:17; 2 Kor. 5:15) Kefder Hay mbay tenen ti’ tum! wãã ti ɓe go de woore ɓil hadge maa 46, point maa 4 no, de videyo maa weere boore 3 ga kluu ɓen ga Offrons des cadeaux à Dieu mono.

NDO MBO GO DE BAG JAG SEE ƁO MAA HÃ SEE ƁO GO NE JEOFA LAN MAA JOŊ BATEM GO YAWLÀ?

9. Wer mayse ga à bay joŋ doole jobo maa hã see ɓe go ne Jeofa wa là?

⁹ Maapo ndo ɗig ga ndo bay go de bag jag see ɓo maa hã see ɓo go ne Jeofa lan maa joŋ batem go wa ɗa. Maapo ga ndo de sãy coo seele ɓo po ti nen naw ɓo maa joŋ dage Jeofa, noga maapo ga ndo de sãy maaga hãge ɓil ɓo mo ya’ ciŋ ni ɗa. (Kol. 2:​6, 7) Jar maaga à de had Bible ne hara gẽẽ wo go ciŋ jag do kããra ɓuy ga, lan weere joŋ wo go de bag jag maa hã see ɓaara ne Jeofa lan maa joŋ batem nen kiŋgi po boŋ ɓuy ga lay. Kiɗ maa koge ga ndo de gẽẽge ciŋ ti wããre Baa yaw baywa yawla see fẽn maaga ndo de kããge maa joŋge ɓe mono, amaa bay de ngaɓ jag see ɓo de jobo maa tigriŋ wa.—Gal. 6:​4, 5.

10. Ndo joŋ mayse hayga ndo yaŋ ɗiggi ga ndo bay go de bag jag see ɓo maa hã see ɓo ne Jeofa lan maa joŋ batem go wa ɗa là? (Ko ngeel maa de gadge “ Maa jar maaga pããre ɓaara wo diŋ sedeewa Jeofa mono” lay.)

¹⁰ Koh ndo mo ko ba ga ndo bay go de bag jag maa hã see ɓo go ne Jeofa wa ɗa laybla no, ni ndo kiɗ maa bag jag joŋre sen go. Tos maaga Jeofa mo kay mo maa coo joŋre ɓo po wo nen naw ɓo. (Fil. 2:13; 3:16) Hay go de bawge jag jiili ɓo ga á laa tosge ɓon yaŋ day kay mo yaŋ lay.—1 Jaŋ 5:14.

WER MAYSE GA JAR MAA PO BAA WO SEE ƁAARA MAA HÃ SEE ƁAARA GO NE JEOFA LAN MAA JOŊ BATEM GO LÀ

11. Jeofa kay ge naa na kayge maa lagge de deele peel ɓe là?

¹¹ Jar maa po ga wo go de bag jag maa hã see ɓaara ne Jeofa lan maa joŋ batem baa wo see ɓaara. Maapo saara wii jag see ɓaara ga: ‘Day hayga blam ndi joŋ ɓlagge maa kwũy we, lan à sa’ me we lay là?’ Hayga hẽẽne sen yaŋ joŋ ndo no, hay go de bawge jag jiili ɓo ga Jeofa hã fẽn maaga ndo de sãy ɓe ti ɓuy yaŋ ne ndo maaga “seele ɓay mo hay doo mani Waŋkluun wo nono nen maaga nday mo hay de cõõre jag ɓe ti fẽẽren wo ɓuy.” (Kol. 1:10) Á hã ge ẽgre yaŋ ne ndo maa joŋ fẽẽre maa ti ngeel ɓaara wo pa. Á hay naa nen ɓe go de ɗeŋ maaga á hay joŋge see jar maa tigriŋ wo ngaɓa mono. (1 Kor. 10:13) Diŋ wersen so ga jar bay joŋ fẽẽre maa nen sa’ge debaŋ ti tayge kretiyẽ wa so mono. Jeofa kay jar maa ɓen wo maaga á mo hay wo de deele.

12. Naa joŋ joŋge maaga naa mo joŋ ɓlagge maa kwũy wa là?

¹² Jar téebeere maa de ɓlagge see wo ɓuy daɗ wo jãɗge maa joŋ fẽẽre maa de baywoore  wo. (Jag. 1:14) Amaa, ndo maŋ ga ndo laa do go jag jãɗgen, noga baywa yawla diŋ ndo. Cwãyn diŋ ga soɗ ɗeŋ maaga ndo joŋ naw ɓon joŋge la diŋ ndo. Jar maa po ɗig wo ga naa bay de kããge maa maŋ jag ɗiggi naa wo de fẽẽre maaga naa joŋ ra go wa. Amaa, se bay doo sen ne wa. Ndo mbo de kããge maa had maŋ jag ɗiggi ɓo maa de baywooren wo go. Day koh ɗiggi joŋge fẽẽre maa de baywoore po mo a ba wo ne ndo ti, ndo mbo de kããge maa maŋge ga ndo joŋn ga. Ɓo’ge ti ɓen so, tos Jeofa tum tum. Hay tum frug nen Wããre Baa boŋ ɓo. Wo ti taygeti wo tum. Sii wããre Baa ne jare. Joŋge fẽẽre sen wo mo deŋ tum hã ẽgre mo maa ooge de deele peel Jeofa. Day hay de kaŋge ti ɓo tum ga Jeofa kay ge ndo yaŋ maa joŋ rage.—Gal. 5:16.

13. Saɓlaŋ maa de woore maa hõn ga Josef men ne naa là?

¹³ Á joŋ yaŋ go ne ndo gus maa bag jag hãge see ɓon go, hayga ndo ɗig we go peel bol ti fẽn maaga ndo joŋ ge ti wur maaga re da’ ndo we no. Bible ngaɓ jar ngaɓa maaga joŋ wo doo sen ne no, koh de maaga á hay mbaara diŋ jar téebeere maa de ɓlagge see wo mono. Ko ba ɗa, wãy Potifar hay kiɗ ɗeŋ ɓaale ngaɓa maaga Josef mo suu de se. Amaa Josef hay bay de dawge ti fẽn maaga se joŋ ge jag re sen mo wa. Bible wãã ga: á “day ga” lan wii ne hẽn ga: “Ndi joŋ ge ɓlagge ma se kluu mokay joŋge see Baa ɓin ne?” (Tĩĩ. 39:​8-10) Sen go tinoo tu ga, Josef hay go de ko fẽn maaga se joŋ taŋgu maaga re sen a mono. Sen joŋ go see ɓe gus de maaga á yiŋ de re sen mono.

14. Naa joŋ joŋge maa ɗeege go see joŋre maa de baywoore wo là?

¹⁴ Naa oo jag re doo Josef no na ooge lay là? Ɗig go ti fẽn maaga ndo joŋ ge ne patala ɓaa see re maaga da’ ge ndo wo peel mono. Had wãã baywa deparday tu ti fẽẽre maaga co wo jag Jeofa ga mono, day kaŋ ba ti wo ni me’ wa ɓuy yaw. (Siŋ. 97:10; 119:165) Sen kay ndo maa ooge de deele jag re wo. Ndo joŋ yaŋ go de ko fẽn maaga ndo wãã ge ne go peel bole. Ndo joŋ ge go de bag jag see ɓo peel bole lay.

15. Jobo ngaɓ go ga se “de kiɗ” Jeofa cwãy na ngaɓge là? (Hebre wo 11:6)

¹⁵ Maapo ga maa ɓon ndo de koge ga ndo de da’ cwãy, lan ga ndo de sãy goŋ Jeofa go de jiili ɓo ɓuy ti; amaa fẽn po de baa ti ɓo maaga ndo mo hã see ɓo go ne Jeofa, lan maa joŋ batem go ɗa. Ndo mbo de kããge maa joŋ tee fẽn maaga Waŋ Dafid hay joŋ mo lay. Wii Jeofa  ga : “Er mbo ndi O Baa, day ko jag jiili ɓi, lam mbo ndi. Ko mbo ngel maga ndi de kaŋ ɗiggi ni mono. Ko nen ɓo, hayga ndi yaŋ de maŋge diŋ faage ma de ɓlagge no, ni ndo koɗ me diŋ ti faage maga sen wo de ɓi ti ngel maga sen taw go gà mono.” (Siŋ. 139:​23, 24) Jeofa kaŋ bosa’ ne jar maaga “kiɗn wo” ti mono. Durgi maaga ndo dur maa hã see ɓo go ne Jeofa, lan maa joŋ batem ngaɓ wo go ga ndo de kiɗgi ɓe cwãy.—Jaŋ Hebre wo 11:6.

HAY TUM YA’GE SEE JEOFA

16-17. Jeofa jãã jar maaga pããre ɓaara wo diŋ sedeewa Jeofa le see ɓe na jããge là? (Jaŋ 6:44)

¹⁶ Yeso wãã ga jãã jar maa wer sen wo le diŋ Jeofa. (Jaŋ Jaŋ 6:​44, NWT.) Ko ba ɗiggi se kuɗum debaŋ, lan ɗeŋ maaga se de maŋge see ɓo lay mo ɗa. Jeofa ko fẽn maa de woore see wosela ɓuy maaga se ɗen le see ɓe. Á ko jee sen doo jee maaga go “sag sag” maa ɓe, noga “fẽn maaga daŋ go nen ɓe” nono. (Dog. 7:6; ngeel naa wer maa gesiŋ, ɓil NWT.) Jeofa ko ndo na doo sen no lay.

¹⁷ Maapo ga pããre ɓo wo diŋ sedeewa Jeofa wo. Maapo ga ndo ɗig ga ndo de goŋ Jeofa diŋ werga pããre ɓo goŋ wo ne, amaa bay diŋ werga á ɗe mo le wa. Amaa Bible wãã ga: “Yaɗ we see Baa, ni Baa yaʼ yaŋ see ɓay lay.” (Jag 4:8; 1 Kron. 28:9) De maaga ndo maŋ we ga ndo ya’ see Jeofa no, á yiŋ jag de ya’ge le see ɓo lay. Jeofa bay ko ndo doo jobo maa yoo kããra no koɗ wa. Á jãã wosela le ɓoŋ ɓoŋ ɓuy see ɓe—koh jar maaga pããre ɓaara wo diŋ sedeewa Jeofa mono. De maaga jobo maa de maŋ sen ɗig we ga se ya’ see ɓe see Jeofa no, Jeofa yiŋ jag ne hẽn doo maaga naa ko le ɓil Jag 4:8 la nono.—Tabn de 2 Tesalonig wo 2:13.

18. Naa wãã yaŋ ti mayse ɓil hadge maa peel wo la là? (Siŋ Wora 40:8)

¹⁸ De maaga ndo hã see ɓo we go ne Jeofa lan joŋ batem we go lay no, ni ndo de joŋge doo Yeso no lay. Á wo see pan ɓe de dage ɓe maa joŋ joŋre maaga pan ɓe wiin do ɓe ɓuy mono. (Jaŋ Siŋ Wora 40:8; Heb. 10:7) Ɓil hadge maa peel wo la, naa wãã ge yaŋ ti fẽn maaga kay ndo yaŋ maa ya’ wer joŋ joŋre de deele ne Jeofa blam batem ɓo mono.