1-2. Wer mayse ga Jeofa joŋ naa maaga naa mo ko see naa de fruygi de maaga naa hã fẽẽre ne jar mo là?

 MAAGA naa yaŋ hãge ne jar no, naa joŋ de fruygi dedaŋ jar maaga naa hã ne hara mono. Jeofa joŋ naa diŋ doo sen nono. (Joŋre 20:35) Sen da wããge ga à yaŋ hãge ne naa no, naa joŋ de fruygi ga yawlà? Baywa. Naa de koge ga à hã mopo we ne naa, naa joŋ de fruygi. Amaa, naa joŋ de fruygi debaŋ de maaga naa hã ne jar mono. Cwãy, á de woore ti maaga Jeofa joŋ naa de maŋ sen mono. Wer maylà?

² Wer maaga Jeofa joŋ naa doo sen so mono, naa de kããge maa ya’ wer fruygi naan ciŋ ni. Naa mbe de kããge maa ya’ wer fruygi naan ciŋ ni de hã fẽẽre ne jare. Á de woore debaŋ de maaga Jeofa joŋ naa doo sen no mono.—Siŋ. 139:14.

3. Wer mayse ga naa mbe maa ngaɓ Jeofa doo “Baa maa de fruygi” no là?

³ Wããre Baa hã bawge go ne naa jag jiili ga hãge fẽẽre ne jar hã fruygi ne naa; wersen, á ngel naa ti maaga Bible wãã ga Jeofa diŋ “Baa maa de fruygi” mo ga. (1 Tim. 1:11) Á tĩĩ hã fẽẽre ne naa taŋgu diŋ se. Pol wãã ga diŋ wer ɓe ga “naa jar téebeere tenen mo ti’ fiɗ se naa, seɗ ge mo sug sug diŋ nen doo ɓe.” (Joŋre 17:28) Ti cwãy ɓe mono, “fẽẽre ma de eln wo mo deŋ ɓuy, a wo le diŋ ciŋ” see Jeofa.—Jag 1:17.

4. Mayse kay naa maaga naa mo hay joŋ de fruygi de peel ni là?

⁴ Naa ɓuy naa de sãy ko cõõre fruygi maaga a le wer hãge ne jar mono. Naa joŋ sen de maŋ hãge maa ni Jeofa no. (Efe. 5:1) Ɓil hadge sen la, naa da’ wer yaŋ go ne saɓlaŋ Jeofa ti ɓaŋ hãge, lan ga, naa joŋ joŋge hayga naa ko we ga jar lan bay wo ko yaŋ maaga naa joŋ see ɓaara wa la. Sen kay naa maa ya’ wer hãge fẽẽre ne jar ciŋ ni, lan maaga naa mo hay de fruygi.

MAŊ SAƁLAŊ YAŊ MAA NI JEOFA NO

5. Fẽẽre maa hõn wo ga Jeofa hã ra ne naa là?

⁵ De ɗeŋ maa hõn wo ga Jeofa ɓo’ nen go ga se de yaŋ là? Naa  mo ko wee saɓlaŋ po wo mbag ɗa. Jeofa hã fẽẽre maaga naa de sãy ɓaara ti ne naa. Á bay de joŋge diŋ ga naw naan mo hay de woore tawa wa, amaa, á joŋ ga naa mo hay tum da’ fẽẽre maaga naa de sãy ɓaara wo ti. Ko ba ɗa, á joŋ ga naa mo hay da’ rege, hõõbe maa heege see, lan ngeel naw. (Siŋ. 4:8; Mat. 6:​31-33; 1 Tim. 6:​6-8) Jeofa hã fẽẽre maaga naa de sãy ɓaara ti ne naa diŋ do doole yawlà? Baywa has ɓuy! Á joŋ sen see naa diŋ wer maylà?

6. Naa had mayse see wããre maa ɓil Matiye 6:​25, 26 là?

⁶ Jeofa hã fẽẽre maaga naa de sãy ɓaara ti ne naa diŋ wer dage ɓe see naa. Ko wããre maaga Yeso wãã ɓil Matiye 6:​25, 26 mo ɗa. (Jaŋ ne.) Yeso maŋ saɓlaŋ fẽẽre maaga Jeofa joŋ ra mono. Yeso wãã ti weere dweere wo ga: “Á bay wo kab mopo wa, bay wo wee mopo wa, bay wo tay ti mopo ɓi boole wa lay.” Day naa ko maaga á wãã ti ɓe ni mo ɗa pa, á wãã ga: “amaa, hã rege ne hara diŋ Pan ɓay Baa.” Blam sen, Yeso raw wii rage ga: “Day nday de daŋ dweeren wo yaw.” Yeso hay da wããge na ga hãylà? Jeofa ko jar maa goŋge ɓen wo de daŋ hrog wo hãã tu. Hayga Jeofa yaŋ hã rege ne hrog wo no, naa mo hay go de bawge jag jiili naa ga á de kããge maa hãge ne naa lay! Jeofa hã fẽẽre maaga naa de sãy ɓaara ti ne naa de dage doo pan tiŋ maa de dage nono.—Siŋ. 145:16; Mat. 6:32.

7. Ɗeŋ maa boŋ ga naa kãã maa joŋ yaŋ see jar doo Jeofa no lay diŋ maa hõnlà? (Ko foton lay.)

⁷ Doo Jeofa no lay no, naa de kããge maa hã fẽẽre maaga jar lan wo de sãy ɓaara ti ne hara, werga naa da ra. Ko ba ɗa, ndo yaŋ de ko hẽnbe po noga mãygemanbe po ga go koŋne noga de sãy õõbe ti yawlà? Jeofa de kããge maa joŋ joŋre de ɓo maa kayge ɓe. Jar maa ni Jeofan wo go de koge ti ɓaŋ kayge hẽẽrebe wo, de maaga daɗge siri, maŋge bii. . . joŋ we no. Ko ba ɗa, kal cege ‘Kovid 19’ mono, hẽẽrebe hã wo rege, õõbe wo, lan fẽẽre maa tigriŋ wo ga hẽẽrebe maa ti tamsir wo krub ɓuy hay wo de sãy ɓaara ti ne hara. Jar maa po wo debaŋ yoo ɓaara kay wo de suŋgu ti joŋre siigi wããre Baa maaga go ti tamsir ɓuy mono. Sen ɓo’ faage maaga wo caa war hẽẽrebe maa ti tamsir wo krub ɓuy de maaga á wo nen re mono. Hẽẽrebe sen joŋ wo joŋre de wããre maa ɓil Hebre wo 13:16 ga wãã ga: “ti naa mo yõõ ti joŋre se kayn wo go wa. Werga joŋre maa doo kay nom kay, de cõõre jag Baa.”

8. De ɗeŋ maa hõn ga Jeofa kay naa de hã ẽgre ɓen ne naa là? (Filip wo 2:13)

⁸ Jeofa hã ẽgre. Jeofa fruy debaŋ ti maaga á ha ẽgre ɓe maa bay tawtin ne jar goŋge ɓen wo  mono. (Jaŋ Filip wo 2:13.) Ndo tos we go ti boŋ maa da’ ẽgre maa soɗ gayri po yawlà? Maapo ndo hay tos maa wii ẽgre maa joŋ fẽẽre maaga ndo de sãy joŋ rage ti nen siili mono. Maaga ndo tos Jeofa we maa da’ ẽgre ga á yiŋ jag wi ti ɓe no, ndo kãã maa wããge doo apotre Pol ga yer ga: “Ndi de kããge ma ɗaw see ɓi mbi soɗ bon ma honla ɓuy wer egre [jee] maga coɓ ndi mono.”—Flp. 4:13.

9. Naa joŋ joŋge maa maŋ saɓlaŋ Jeofa de joŋ joŋre de fẽẽre maa do naan wo maa kay jar là? (Ko foton lay.)

⁹ Naa bay de ẽgre maaga tawgeti ɓe baywa doo Jeofa no wa ; lan naa bay de kããge maa hã ẽgre ne jar doo ga á hã ne hara no wa pa. Amaa, naa mbe de kããge maa kay rage de ẽgre maaga á hã ne naa mo ane. Ko ba ɗa, naa mbe de kããge maa kay hẽẽrebe maa de garge noga de cege wo maa ‘wũy tiŋ ɓaara wo, noga maa woge yeɗ fẽẽre ne hara. Hayga ga á joŋ yaŋ no, naa mbe de kããge maa hã see naa go ti joŋre yogge tiŋ-Baa wo, lan ‘wũygi ɓaara. Hayga naa joŋ joŋre we de ẽgre naa maa joŋ fẽẽre sen wo no, naa joŋ fẽẽre maa de woore yaŋ wo ne hẽẽre naan wo debaŋ.

10. Naa joŋ joŋge maa coɓ jar lan wo de wããre maa jag naa là?

¹⁰ Ti ɓo mo hay yõõ go ga ndo de kããge maa coɓ hẽẽrebe wo de wããre maa jag ɓo wa lay. Ndo yaŋ de ko jobo maaga de sãy coɓge ti hayga ndo joŋ suse’ we ne hẽn ti fẽẽre maaga á joŋ ra mo yawlà? Ndo yaŋ de ko jobo maaga de sãy coɓge nen ti yawlà? Hayga yaŋ no, joŋ maa ɓo’ nen ne jee ɓen ga ndo de ɗiggi ti ɓe? Ndo mbo de kããge maa woge ko jee ɓe no, maa ɗege ɓe ti telefone, noga maapo yer leder ne hẽne, noga pa yer ‘message’ ne hẽne. Á bay maaga ndo mo wãã wããre ngaɓa naŋ wa. Maapo wããre maaga wãã de dage joŋ diŋ fẽn maaga hẽn naan joŋ de sãy ɓe ti, maa ooge de deele ti naw maa peel wo, noga maa ko see ɓe de woore jag re maaga se nen ɓe.—Jõõ. 12:25; Efe. 4:29.

11. De ɗeŋ maa hõn ga Jeofa joŋ joŋre de koge re ɓen là?

¹¹ Hã koge re ne jar diŋ Jeofa. Jag wãã ga: “Ama je maga koge re ɓe yaŋ depẽẽre yoo ɓay no, ni á mo wii Baa, ni Baa hã yaŋ ne je se no, werga á diŋ je hã fẽẽre ne jar ɓuy, hã go ɓil fehe.” (Jag. 1:5.) Doo maaga verse sen wãã ne mono, Jeofa bay ɗaw koge re ɓen maa ɓe tawa wa. Á hãn go ne jar ɓil fehe. Ko ba ɗa, de maaga á hã koge re ne jar mono, á hãn “go ɓil fehe.” Á da ti boŋ ga naa mo ko see naa de baywoore de maaga naa wii kayge do ɓe mo ga hase. Ba yaw mono, á jor glog naa maa wiigi ɓe.—Jõõ. 2:​1-6.

12. Ti joŋre maa hõn wo ga naa ɓes fẽn maaga naa kon ne jar lan wo là?

¹² Day naa lay là? Naa mbe de kããge maa ɓes  koge re naan ne jar doo Jeofa no lay yawlà? (Siŋ. 32:8) Jar maa ni Jeofan ɓes wo fẽẽre maaga saara hay hadn ne jar de ɗeŋ ngaɓa. Ko ba ɗa, seɓaa naa had ɗeŋ siigi wããre Baa ne jar maaga wo de tõõ wer sii wããre Baa defay mono. Jar maa peel tayge kay wo ‘assistants’ wo, lan hẽẽrebe maaga wo go de joŋ batem, maaga á mo bag wo jag joŋre maa do ɓaara ti taygen go de woore. Hẽẽre naa maaga ko wo boo tiŋ kay wo maa had hẽẽrebe lan wo maa joŋ joŋre ti booge tiŋ maaga à goŋ Baa wo ni.

13. Naa joŋ joŋge maa maŋ saɓlaŋ Jeofa ti ɗeŋ maaga á hã koge re ɓen ne jar mo là?

¹³ Dur maa joŋge doo Jeofa no lay de maaga ndo had jar mono. Fer ɗiggi ga Jeofa hã koge re ɓen go ne jar ɓil fehe. De maŋ sen lay, naa had fẽẽre maaga naa de ko rage wo go ne jar de koɗ lay. Naa mo joŋ hẽẽne maa had jar de koge re maa nen naan wo, werga ya’ la á coo wo go ti tu naa wa. Jar maa po ɗig wo ga werga jobo bay had saara wa mono, saara day had jar ga lay. Jar maa ni Jeofan hay ɗig wo de maŋ sen ga. Naa had jar de fẽẽre maaga naa de ko rage, lan ga naa de kããge maa joŋ rage go de fruygi. (1 Tes. 2:8) Naa ɗig ga á “hãn [wo] ne jar maga ndar wo gog gà day wo de see ɓaara de kããge ma had jar tigriŋ wo de ɓe lay mono.” (2 Tim. 2:​1, 2) Hayga wosela ɓuy yoo naa yaŋ had fẽn maaga se de koge ɓe ne jar no, naa ɓuy naa joŋ de koge re debaŋ lan de fruygi lay.

HAYGA JAR BAY WE KO DE EL YAŊ NAAN WA NO

14. Daŋge jar ɗig wo ti yaŋ maaga naa joŋ see ɓaara na ɗiggi là?

¹⁴ Hayga naa yaŋ joŋ de el see jare, debaŋ ɓe see hẽẽre naa wo no, daŋge ɓe á joŋ wo suse’ ne naa. Maapo á yer wo le ne naa maa joŋ suse’e, noga joŋ wo ne de ɗeŋ maa tigriŋ. (Kol. 3:15) De maaga á joŋ wo suse’ ne naa mono, naa joŋ go de fruygi maa joŋ fẽn maa tigriŋ ne hara pa.

15. De maaga jar bay we joŋ suse’ ne naa ti yaŋ maaga naa joŋ see ɓaara wa no, naa mo hay kaŋ go ti naa ga hãylà?

¹⁵ Amaa, day maa po, jar joŋ suse’ ne naa ti fẽn maaga naa joŋ see ɓaara mo ga. Day maa po, naa hã wur maa do naa, ẽgre naa, fẽẽre maa do naan wo go, amaa blam sen, naa wii jag see naa ga jee ɓen mbe de ɗiggi ti fẽn maaga naa de joŋge ɓe mo yawlà. Hayga sen joŋ we no, naa joŋ joŋge maaga fruygi maa jag jiili naan mo woo go wa là? Fer ɗiggi ti kluu wããre naa maa ɓil Joŋre 20:35 no. Naa joŋ de fruygi bay diŋ see wããre maaga à wãã ne naa mo wa. Naa mbe de kããge maa da’ fruygi wer hãge ne jare, koh jar mo hay ba wo ko de el yaŋ naan wa. De ɗeŋ maa hõnlà? Naa ko ɗeŋ po wo mbag ɗa.

16. Mayse kay naa maaga naa mo hay tum hãge ne jar go de fruygi là?

¹⁶ Fer ɗiggi ga ndo yaŋ hã fẽẽre ne jar no, ni ndo de joŋge doo Jeofa no lay. Á hã fẽẽre maa de woore wo ne jare, koh á mo kee ba wo yaŋ ɓen yaw noga baywa. (Mat. 5:​43-48) Jeofa de wããge ne naa ga naa hã fẽẽre we ne jar no, “[naa] mo ɗig ga á fern ge wo yaŋ le [ne naa] wa so,” ni naa “da’ poɗge yaŋ ge debaŋ.” (Lug 6:35) Woo do go wer maaga à bay tum joŋ suse’ mo ti fẽn maaga ndo joŋn see jar mo wa wa. Kaŋ go ti ɓo ga Jeofa ɓo’ ge bosa’ yaŋ mo ti tum ti de el maaga ndo joŋ maa kay jar mono, lan werga ndo diŋ “je maga hã go ɓil de fug [gi] feh mono”—Jõõ. 19:17; 2 Kor. 9:7.

17. Fẽn maaga daŋgo ga joŋ ga naa mo hãã fẽẽre ne jar diŋ maylà? (Lug 14:​12-14)

¹⁷ Fẽn maa tigriŋ ga naa joŋ maa maŋ saɓlaŋ Jeofa de maaga naa hã ne jar diŋ joŋge joŋre de wããre maaga Yeso wãã ɓil Lug 14:​12-14 mono. (Jaŋ ne.) Á bay diŋ ɓlagge ti maaga naa yãã waare jar, noga joŋ yaŋ de ɗeŋ maa  tigriŋ see jar maaga wo de kããge maa joŋ fẽn maa de maŋ sen see naa lay mo wa. Amaa, mayse hres de maaga naa ko we ga naa hã ne jar seɓaa de ɗiggi ga naa da’ mopo yaŋ do ɓaara lay là? Dur go ɓuy maa joŋ joŋre de fẽn maaga Yeso wãã mono. Naa mbe de kããge maa yãã waare jar maaga naa go de koge ga bay wo de mopo do maa hãge ne naa wa mono. Doo sen nokay, naa joŋ ge go de fruygi wer maaga naa de joŋge doo Jeofa no lay mono. Joŋge de maŋ sen kay naa maa joŋge de fruygi de maaga jar lan bay ɓaara go naa nen de el sen see naa wa mono.

18. Mayse kay naa maa kaŋ ɗiggi ti jar lan wo de woore là?

¹⁸ Ɗig ti jar debaywoore wa. (1 Kor. 13:7) Hayga jar lan ko wo yaŋ maaga naa joŋ see ɓaara we ga no, maapo naa wii jag see naa ga: ‘Á bay wo kee jar jag wa na keege yaw, mbala ti ɓaara yõõ go yawlà?’ Maapo, fẽẽre po yaŋ wo go maŋ jag ɓaara maaga á mo joŋ wo doo ga naa ɗig nono. Jar maa po mbaara de sãy joŋ suse’ ti, amaa, se joŋ ra de gayri. Maapo se joŋ see ne hara de woore ga de maaga à kay ra mono, debaŋ ɓe de maaga á hay wo we kay jar ɓaa no. Amaa, hayga naa yaŋ da hẽẽre naan wo cwãy no, naa ɗig ge ti ɓaara de baywoore ga, lan naa ya’ ge wer hãge ne jar de fruygi.—Efe. 4:2.

19-20. Mayse kay naa maaga naa mo hay de fruygi maa hã fẽẽre ne jar pa là? (Ko foton lay.)

¹⁹ Gor desãy. Ti ɓaŋ hãge mono, Waŋ Salomoŋ maa de ko ren wãã ga: “Ɓo’ mbo rege ɓon go nen bii, day dayge we no, ndo da’n ge mbo yaŋ.” (Ekl. 11:1) Wããre sen had naa ga day maa po jar joŋ suse’ ne naa naw go blam pur debaŋ.” Sen diŋ fẽn maaga hay da’ mãygemanbe po mono.

²⁰ Kiŋgi go wara puri, wãy jee raŋ tayge po yer wo ne mãygemanbe po maaga joŋ batem defay maa jor glog ɓe ga á mo hay oo de deele peel Jeofa. De ngar kiŋgi nenma’ blam sen, mãygemanben fer le ti ledern de wããge ga: “Amaa ndi de sãy wããge mo ti ga ndo bay de ko kayge maaga ndo hay kay me le nen kiŋgi maa glog wo le mo wa.” Se wãã ni pa ga: “Leder  ɓon hay diŋ leder maa de dage debaŋ, amaa, du’ jiili ɓi debaŋ diŋ wããre maa ɓil ɓe no, ndi yõõ ti ɓe go ti boŋ ga hase.” a Blam maaga á sii bon maaga se hay yiŋ de ɓaara ne hẽn mono, se wãã ga: “De ngar ngeel maa po wo, sãy men goŋ Jeofa go hay ti ɓi. Amaa, de maaga ndi ɗig we ti wããre ɓo maaga ndo yer le me no, se hã ẽgre me maaga ndi mo hay oo de deele.” Se wãã ni pa ga: “Mopo kay me go nen kiŋgi se maa nenma’ doo leder maaga ndo yer le me mo ga hase.” Ɗig ba mbo ti fruygi maaga wãy jee raŋ tayge sen hay de ɓe de maaga á da’ leder sen “naw go blam pur mo ɗa”! Naa lay, maapo à joŋ suse’ ne naa ti fẽn maaga naa joŋn go naw blam hãã, de wer ɗeŋ wo ngaɓa.

21. Wer mayse ga ndo go de baa wer see ɓo maa joŋ yaŋ see jar tum doo Jeofa no lay là?

²¹ Doo maaga naa hay wãã le go la no mono, Jeofa joŋ naa de ɗeŋ joŋre po sara debaŋ. Koh de maaga á co mbe jag naa de maaga à hã fẽẽre ne naa mo laybla no, naa joŋ de fruygi de peel ni debaŋ de maaga naa hã ne jar mono. Naa ko see naa de fruygi de maaga naa yaŋ de kããge maa kay hẽẽre naa Sedeewa Jeofa wo no. Lan naa joŋ de fruygi de maaga á joŋ wo suse’ we ne naa no. Amaa, á mo ko ba wo de el maaga naa joŋ see ɓaara yaw noga baywa, naa mbe maa joŋge go de fruygi ti maaga naa de joŋge diŋ fẽn maa ti ngeel ɓe mono. Kaŋ go ti ɓo ga fẽn maaga ndo hãn ɓuy, “Jeofa de kããge ma hãge mo dedaŋ seno.” (2 Kron. 25:9) Ndo kãã maa hã mopo ne jar lan wo dedaŋ maaga Jeofa hãn mo ti boŋ ga! De maaga Jeofa poɗ naa we no, se diŋ poɗge maaga tee ɓe baywa. Naa mo hay go de baa wer tum maa maŋ saɓlaŋ Pan naa maa ciŋ ga de yaŋ debaŋ mono.