1-2. Mayse joŋ ga jar goŋ Baa mo hay wo de fruygi là? (Jag 1:​22-25)

 JEOFA wo de weel dage ɓen da wo ga naa mo hay de fruygi. Jee ‘waa siŋ 119:2 wãã ga: “Jar maaga ɗaw wo jag liŋgi faage seelen ɓen wo de da’ see ɓaara. Ga kiɗn wo de jag jiili ɓaara ɓuy mono.” Yeso wãã fẽn tigriŋ pa ga: “Woo ge diŋ jar maaga co’ wo sug wããre Baa, ɗawn wo ɓil ɓaara mo yaw no!”—Lug 11:28.

² Naa Sedeewa Jeofa, naa diŋ jar maa de fruygi. Wer mayse ne? Fẽẽre mbaara ngaɓa deŋ maaga ɓo’ wo nen go ne naa; amaa fẽn po maaga daŋgo diŋ ga naa jaŋ wããre Baa tum, lan naa dur go de ẽgre naa ɓuy maa joŋ joŋre de fẽn maaga naa had ne mono.—Jaŋ Jag 1:​22-25.

3. Naa da’ mayse wo wer maaga naa joŋ joŋre de yaŋ maaga naa da’ ɓil wããre Baa mo là?

³ Naa da’ fẽẽre ngaɓa de maaga naa “kol we go jar maa joŋ joŋre de wããre Baa no.” Ko ba ɗa, de maaga naa joŋ joŋre we de fẽn maaga naa hadn ɓil wããre Baa no, naa co jag Jeofa, lan se hã fruygi ne naa. (Ekl. 12:13) Ni pa, de maaga naa yaŋ joŋ joŋre de yaŋ maa ɓil Biblen no, naa joŋ jam de jar maa liŋ ni naa wo, lan de jar maa ti tayge naa wo lay. Maapo ga á diŋ fẽn maaga ndo yiŋ de ɓe nen naw ɓo cwãy. De daŋ sen pa mono, naa yãã go jag re maaga jar maaga bay wo hoo sug ti jag liŋgi maa ni Baan wa yiŋ wo de ɓaara mono. Se diŋ tee fẽn maaga Waŋ Dafid wãã mono. Blam maaga á wãã ti jag liŋgi wo de kiida maa ni Jeofan ɓil siŋ ɓen wo mono, á ɓo’ ti wããre ɓen go  ga: “Wosela maga hoo sug ti ɓaara, da’ see ɓe ni debaŋ.”—Siŋ. 19:​8-12.

4. Wer mayse ga kolge diŋ jee joŋ joŋre de wããre Baa diŋ joŋre maa de gayri là?

⁴ Cwãy tu, á bay tum gus ne naa maa joŋ joŋre de wããre Baa maaga naa jaŋn mo wa. Naa de hay kiɗ wur maa frug nen wããre Baa nen maaga naa mo ko fẽn maaga Baa da ga naa mo joŋ ne mono. Naa ko ɗeŋ po maaga kay wo naa maa jaŋ wããre Baa tum mo ɗa. Naa ko fẽn maaga kay naa maa ɗiggi ti fẽn maaga naa jaŋn, lan maa ko ɗeŋ joŋ joŋre de ɓe nen naw naa yaŋ lay.

MAŊ WUR GO KA’ MAA JAŊ WÃÃRE BAA

5. Joŋre maa hõn yãã wo daŋge wur maa do naan wo go là?

⁵ Joŋre do naa ngaɓa ga Bible wãã ga daŋ wo go. Ko ba ɗa, daŋge jar maa po wo yoo naa debaŋ joŋ wo joŋre maa ya’ re maa see ɓaara, lan maa liŋ ni ɓaara. (1 Tim. 5:8) Kretiyẽ maa po wo ngaɓa soɗ wo pããre ɓaara maa de cege noga maa de garge wo. Lan naa de hay ko ngar see naa nen maaga naa mo le’ cege wa, day se wii wur debaŋ. Ciŋ ti joŋre sen wo mo deŋ, joŋre maa tigriŋ wo de hãge ne naa do ti tayge naa pa. Joŋre maaga daŋgo ga naa de hay dur go de ẽgre naa ɓuy maa joŋge ɓe diŋ siigi wããre maa de cõõre no. Day de joŋre sen wo mo deŋ, naa joŋ joŋge maa da’ wur maa jaŋ wããre Baa tum, maa ɗiggi ti ɓe, lan maa joŋ joŋre de fẽn maaga naa jaŋn là?

6. Ndo joŋ joŋge maa ɓo’ jaŋge Bible go peel fẽẽren ɓuy là? (Ko foton lay.)

⁶ Jaŋge Bible diŋ “fen maaga sen de el daŋge” nen naa Kretiyẽ, diŋ wersen so ga naa de hay jaŋn tum mono. (Fil. 1:10) Maa wããge ti jobo maa de da’ see ɓe mono, siŋ maa taŋgun wãã ga: “Á da’ fruygi maa ɓen diŋ ɓil jag liŋgi maa ni Jeofa no, ɗig ti jag liŋgi ɓen de ceg lay de suŋ lay.” (Siŋ. 1:​1, 2, NWT) Sen da wããge ga naa mo maŋ wur go ka’ maa jaŋ wããre Baa. Wur maa de woore maaga daŋgo maa jaŋ Bible diŋ maa hõnlà? Yiŋgi jag ɓen diŋ ga wosela ɓuy de wur ɓe maa jaŋge. Amaa  fẽn maa de wooren diŋ ga wosela ɓuy mo hay joŋge ɓe tum tum. Hẽnbe po à ɗen ga Viktor wãã ga: “Ndi da jaŋ Bible maa ɓin de toŋ. Koh ndi mo hay ba diŋ jobo ga da urgi ciŋ de toŋ gus wa laybla no, á diŋ wur maa de woore nen ɓi werga ngarge jag bay de jag toŋ wa. Ɗiggi ɓi joŋ go de pũygi, day se go gus me maaga ndi mo hay de kaŋ ɗiggi ti jaŋge no.” Maapo ga se diŋ fẽn maaga de joŋ ndo mo lay. Wii jag see ɓo ga: ‘Wur maa de woore maaga daŋgo ne ndi maa jaŋ Bible na diŋ maa hõnlà?’

ƊIG TI FẼN MAAGA NDO JAŊN MONO

7-8. Maapo mayse maŋ wo jag naa go maa ko cõõre fẽn maaga naa jaŋ ɓil Bible là? Hã saɓlaŋ po ɗa.

⁷ De maaga ndo maŋ wur we maa jaŋ Bible no, ni ndo de hay joŋ hayya ne see ɓo ti fẽẽre maa tigriŋ wo. Á a ndo we go ti boŋ ga ndo jaŋ mopo, day naw blam mẽ’ ti ɓo bay ɗiggi ti ɓe wa so yaw? Sen diŋ fẽn maaga joŋ wosela ɓuy. Amaa, maapo ga sen a mbe naa de maaga naa jaŋ Bible mo lay. Maapo ga naa maŋ ɗiggi ga naa jaŋ Bible tum nen naw no kay no. Sen diŋ fẽn maa de woore. Naa de hay kaŋ fẽẽre peel maa joŋge, lan naa de hay dur maa bag jag ɓaara go. (1 Kor. 9:26) Amaa, jaŋge Bible tawa tu kãã maa kay naa ga. Naa mo joŋ fẽn maa tigriŋ ni hayga naa yaŋ de sãy da’ge wer Wããre Baa ti no.

⁸ Ɗig ti saɓlaŋ sen ɗa: Koo de sãy bii ti maaga se mo hay ka’ tenene. Amaa, hayga bii raa we debaŋ nen naw po ta’ no, bii maŋ go ti ngeel ɓuy. De maaga sen joŋ we no, bii kol bay kayge wa so. Á wii wur debaŋ maaga bii mo õg go, lan maaga koore mo da’ wo see ɓaara. Doo sen no lay, naa mo jaŋ Bible deparday, nen maaga naa da’ wur maa ɗiggi ti ɓe ga, lan maa joŋ joŋre de fẽn maaga naa jaŋ ga so na wa.—Jag 1:24.

9. Naa de hay joŋ joŋge hayga naa ko we ga naa jaŋ wããre Baa deparday là?

⁹ Day ndo da’ ga ndo jaŋ Bible deparday yaw? Ndo de hay joŋ na joŋge là? Jaŋn see ta’ see ta’a. Dur maa ɗiggi ti fẽn maaga ndo jaŋ ra mono. Sen mo hay joŋ de gayri see ɓo wa. Maapo ga ndo maŋ ɗiggi ga ndo ig jaŋge debaŋ, nen maaga ndo mo da’ nen maa ɗiggi ti ɓe ni lay. Noga pa, ndo maŋ ɗiggi ga ndo ig  jaŋge debaŋ ga, nen maaga ndo mo da’ wur debaŋ maa ɗiggi ti fẽn maaga ndo jaŋn mẽ’ mono. Viktor maaga naa hay wãã le go ti ɓe ciŋ la wãã ga: “Ndi joŋ ga ndi mo jaŋ jag de dogray, maapo ga chapitre 1. Wer maaga ndi tĩĩ jaŋge de toŋ so mono, ndi sii wur sen ɗiggi ti fẽn maaga ndi jaŋn mono.” Ndo mo hay ba jaŋge de ɗeŋ maa hõn laybla, á de el maaga ndo mo ɗig ti fẽn maaga ndo jaŋn mono.—Siŋ. 119:97; ko ngeel maa de gaɗge “ Wiigi jag maa ɗiggi ti Wããre Baa.”

10. Ngaɓ ɗeŋ maaga ndo joŋ maa joŋ joŋre de fẽn maaga ndo had ɓil Bible mo ɗa. (1 Tesalonig wo 5:​17, 18)

¹⁰ De maaga ndo jaŋ verse po wo ɓil Bible mono, ɗig ti ɗeŋ maaga ndo joŋ joŋre de ɓaara mono. De maaga ndo jaŋ wããre Baa mono, wii jag see ɓo ga: ‘Ndi joŋ joŋre de wããre maaga ndi jaŋn wara noga nen naw maa peeln na joŋge là?’ Naa ngaɓ ba doo ga ndo hay jaŋ 1 Tesalonig wo 5:​17, 18 ɗa. (Jaŋ ne.) Blam maaga ndo jaŋ verse se ɓogn wo mono, ndo mbo maa hayge mẽ’ wii jag see ɓo ga: Ndi mbi na de tosge tum yawlà? Tosge ɓin mbaara na kuɗum yawlà? Ni pa, ndo de hay ɗig ti fẽẽre maaga Jeofa joŋ ra de woore wo mono. Maapo ga ndo maŋ ɗiggi ga ndo joŋ suse’ ne Jeofa ti fẽẽre swa’a. Koh ndo mo ig ba mẽ’ ɗiggi ti fẽẽre maaga ndo da’ ɓil Bible, sen kay ndo maa laa wer wããre Baa, lan maa joŋ joŋre de ɓe. Ɗig ba ti fẽn maaga ndo da’ hayga ndo yaŋ joŋ joŋre tum de yaŋ sen de maaga ndo jaŋ verse maa tigriŋ wo we mo ɗa! Cwãy ndo kol ge diŋ jobo maa hoo sug ti wããre Baa de peel ni. Amaa, mayse hres hayga fẽẽre maaga ndo kaŋ ra peel maa joŋge yaŋ wo ngaɓa là?

KAŊ ƊIGGI DIŊ TI JOŊRE MAA DE NGAR ƁO

11. Wer mayse ga de ngar ngeel maa po ndo ko see ɓo go de hãyge là? Hã saɓlaŋ po ɗa.

¹¹ De maaga ndo jaŋ Bible mono, maapo ga ndo kal ko see ɓo go de gayri wer maaga ndo da’ ga ndo hay nen coo joŋre ɓo po wo ngaɓa mono. Ɗig ba mbo ti saɓlaŋ maa ta’ la ɗa: Jaŋge Bible ɓo maa waran baa yaŋ mo ti joŋge jar ti ɓaŋ. (Jag 2:​1-8) Ndo wo koge ga ndo mo hay coo ɗeŋ maaga ndo hay joŋ see jar mono; doo sen nokay ndo kal maŋ ɗiggi ga ndo mo hay coo ti ɓaŋ maa se no. Sen diŋ mopo maa de woore! Toŋ ɓe pa mono, ndo jaŋ verse po maaga ngaɓ wo de el maaga naa mo joŋ hayya ne see naa ti wããre maaga naa wãɗ ra mono. (Jag 3:​1-12) Day ndo wo koge ga de ngar ngeel maapo ndo mbo de wãɗ wããre maaga bay wo ti faage ɓe wa ɗa pa. Ndo maŋ ɗiggi so ga wããre maaga kal le go jag ɓo mo hay diŋ wããre maa jor glog jare. Jaŋge wããre Baa ɓo maa peeln ɓo’ sug ɓo maaga ndo mo joŋ hayya ne see ɓo ti dage fẽẽre maa ti tamsir wo. (Jag 4:​4-12) Ndo wo koge ga ndo mo joŋ hayya ne see ɓo debaŋ ti  fẽẽre maaga ndo joŋ ra, ko ra, lan laɗ ra mono. Maapo ga fẽẽre sen wo mo deŋ ɓuy raw wo ko moge de gayri debaŋ maa joŋge ti naw se maa naa no.

12. Hayga ndo da’ fẽẽre maaga ndo nen cooge ti ɓaara we nen jaŋge wããre Baa ɓon no, wer mayse ga ndo mo hay woo do go wa là? (Ko ngeel naa wer maa gesiŋn lay.)

¹² Hayga ndo ko we ga ndo de sãy coo seele ɓo ti ɓaŋ fẽẽre po wo no, woo do go wa. Fẽn sen ngaɓ ga ndo de fer ti see ɓo gesiŋ, lan ga ɗiggi ɓo de woore. Jobo maaga fer ti see ɓe gesiŋ lan de deele jaŋ Bible diŋ maa koge ga se mo coo ti ɓaŋ maa hõnla. a Hay de kaŋge ti ɓo lay ga heege “ɗiggi maa defay” ti ɓo diŋ mopo maaga ndo joŋ tum joŋge. (Kol. 3:10) Mayse kay ge ndo maaga ndo mo hay tum hoo sug ti wããre Baa là?

13. Ndo joŋ joŋge maaga fẽẽre maaga ndo kaŋ ra peel mo hay wo de ngar ɓo là? (Ko foton lay.)

¹³ Nen maaga ndo ɗig ga ndo joŋ joŋre de fẽẽre maaga ndo jaŋ ra wo mo ɓuy jag do kẽẽ boŋ mono, maŋ ɗiggi maa joŋ joŋre de maa po wo see ɓaara. (Jõõ. 11:2) Gus joŋ ɗeŋ maa kay la no: maŋ nen fẽẽre maaga ndo nen joŋ joŋre ti ɓaara wo go ta’a, blam maŋ boŋ noga ɓog yoo ɓaara maaga ndo joŋ sen wo go taŋgu ɗa; lan men lan wo blam kway. Ndo tõõ wer ɓe na ti maa hõnlà?

14. Ndo tĩĩ wer joŋge diŋ maa hõn yoo fẽẽre maaga ndo kaŋ ra peel ɓo maa joŋge là?

¹⁴ Ndo mbo de kããge maa tĩĩ wer ɓe ti maaga sen ɓo’ jag yaŋ go do ɓo gus mono. Noga tĩĩn ti ngeel maaga ndo de sãy cooge ti ɓaŋ sen debaŋ ɗa mono. Hayga ndo kaŋ mopo we peel ɓo maa joŋge no, kiɗ naage wer ɓe ɓil kefder naa wo, maapo ga ɓil Index des publications  des Témoins de Jéhovah, noga Guide de recherche pour les Témoins de Jéhovah. Tos ti fẽn maaga ndo de kaŋge ɓepeel maa joŋge, de wii Jeofa ga á mo hã “ɗiggi wo de ẽgre maa joŋge ɓe mo”. (Flp. 2:​13, NWT) Blam joŋ joŋre de fẽn maaga ndo hadn mono. Blam maaga ndo bag jag maa taŋgun we go no, maapo ga se jor glog ɓo maa bag jag maa tigriŋ pa.

“MEN WÃÃRE BAA COO NDO”

15. Ti ɓaŋ maa hõn ga jar maa ni Jeofan wo sar de jar maaga wãã wo ga saara de jaŋ Bible mo là? (1 Tesalonig wo 2:13)

¹⁵ Jar maa po wo go de dog jaŋ Bible ɓaale hwal de ti laybla ɓuy. Day, á mbaara de hã ɓil ti Bible cwãy yawlà? Á mbaara de joŋ joŋre de ɓe, noga de men Bible coo naw ɓaara yawlà? Baywa, daŋge jar bay joŋ joŋre de yaŋ maa ɓil Biblen wo wa! Jar maa ni Jeofan wo sara de jar sen wo. Doo kretiyẽ maa ti siyekle maa taŋgun wo le no lay mono, naa yãã Bible “doo ga á diŋ wããre Baa cwãy nono.” De daŋ sen ɓuy pa, naa dur go de ẽgre naa ɓuy maa joŋ joŋre de yaŋ maaga naa da’ ɓil Bible nen naw naa.—Jaŋ 1 Tesalonig wo 2:13.

16. Mayse kay naa maaga naa mo kol diŋ jar joŋ joŋre de Wããre Baa là?

¹⁶ Á bay tum ne naa gus maaga naa mo jaŋ Bible lan naa mo joŋ joŋre de ɓe wa. Maapo ga se joŋ see naa de gayri maa da’ wur maa jaŋ wããre Baa. Noga maapo ga naa jaŋn deparday debaŋ lan naa ɗaw mopo ti yoo fẽẽre maaga naa jaŋ ra mo ga. Noga naa ko see naa go de dawge ti holaŋ fẽẽre maaga naa nen cooge ti ɓaara nen naw naa mono. Ndo mo hay ba diŋ nen re maa hõnla, á ẽg ndo soɗge ga. De kayge maa ni Jeofan, ndo mbo de kããge maa naa blum ɓe. Naa mo hay go de baa wer see naa maa yãã kayge maa ni Jeofa no; nen maaga naa mo hay diŋ jar co’ sug wããre Baa tawa wa; amaa naa mo hay diŋ jar joŋ joŋre de ɓe. Sen go tinoo tu ga naa yaŋ jaŋ wããre Baa debaŋ, lan yaŋ joŋ joŋre de ɓe no, fruygi naa ya’ yaŋ ciŋ de peel ni debaŋ.—Jag 1:25.