1. Yeso joŋ ge mayse yaŋ la maŋ là?

 NAA go ti wur maaga fẽẽre maa kluuri cor wo debaŋ! La maŋ, Yeso caa ge kiida wosela maaga gesiŋ la ɓuy yaŋ. Yeso ngaɓ naw maaga a taŋgu wur kiida sen de profesi po. Profesi sen ngaɓ go ga Yeso kol waŋ wo ciŋ, lan ga “taw ge ti tamsir”n kos we go. (Mat. 24:3) Profesi sen de wããge ɓil Matiye maa kluuri 24 lan 25, ɓil Mark 13, lan ɓil Lug 21.

2. Naa wãã ge yaŋ ɓil hadge sen la diŋ ti mayse là, day wer mayse ga á kay naa yaŋ là?

² Yeso joŋ joŋre de jag jõõ po wo swa’ maaga naa mo hay go de bag jag see naa see wur maa peel no. Á diŋ jag jõõ maa ti sããre wo de ɓẽẽre, ti mãyre maa de ko re wo lan maaga bay wo de ko re wa, lan ti solay boo biŋni. Jag jõõ sen kay wo naa maa koge ga Yeso caa ge kiida jar diŋ see fẽẽre maaga á joŋ wo ra mono. Ɓil hadge sen la, naa wãã yaŋ ti jag jõõ sen wo no, lan naa ko fẽn maaga naa had wer ɓaara mono. Jag jõõ maaga naa wãã ti sen taŋgu diŋ maaga wãã ti sããre wo de ɓẽẽre wo mono.

SÃÃRE WO DE ƁẼẼRE WO

3. Yeso caa ge kiida sããren wo de ɓẽẽren wo na hũnlà?

³ Ɓil jag jõõ maa ti sããre wo de ɓẽẽre wo mono, Yeso wãã ga se caa kiida jar téebeere wo diŋ see ɗiggi ɓaara maaga á ɗig wo ti wããre maa de cõõre no, lan ti maaga á kay wo hẽẽre se maa de sreŋge de nentersen wo yaw noga baywa yawlà. (Mat. 25:​31- 46) Ti wur “bon maa de hãã” mono, ngaɓ ga jobo diŋ sam yaw noga ɓẽẽ yawla diŋ se. Á caa ge kiida jar taŋgu durgi Armagedoŋ. (Mat. 24:21) Doo maaga jee koɗ fiiri caa ɓil sããre wo go de ɓẽẽre wo ne mono, Yeso caa ɓil jar maaga kay wo jar ɓe maa de sreŋge de nentersen wo de jar maaga bay wo kay rage wa mono.

4. Doo maaga naa da’ ɓil Esay 11:​3, 4 no mono, wer mayse ga naa mo hay go de bawge jag jiili naa ga Yeso caa ge kiida jar yaŋ ti ngeel ɓe là? (Ko foto maa nen lay.)

⁴ Profesi maa ɓil Bible wãã wo ga Yeso jee caa kiida maaga Jeofa baa ne joŋ ge diŋ jee caa kiida maa ti faage ɓe. (Jaŋ Esay 11:​3, 4.) Á ko seele jare, joŋre jare, wããre jare—kaŋ nen ta’ ga ɗeŋ maaga á joŋ wo hẽẽre ɓen wo go de woore. (Mat. 12:​36, 37; 25:40) Yeso ko ge yaŋ ga wose hay kay hẽẽre sen wo ti joŋre maa do ɓaaran la. a Ɗeŋ maa boŋn ga daŋgo maa kay hẽẽre Yeson wo diŋ joŋre siigi wããre Baa. Yeso caa ge kiida ɓaara yaŋ ga á wo diŋ “jar ma joŋ re de deele” wo, lan faage joŋ ge de ɓo’ge ne hara maa joŋge tenen ti’ ti tamsir la maa tum. (Mat. 25:46; Naa. 7:​16, 17) Sen mokay diŋ poɗge maa de woore ga á da’ wo wer de deele ɓaaran mono! De maaga á lag wo we de deele ti wur bon maa de hããn lan blam ɓe no, á da’ wo ɗuu ɓaara yaŋ de yerge ɓil “kefder ɗuu jar maa tenen” no.—Naa. 20:​15, NWT.

5. Saɓlaŋ sããren wo de ɓẽẽren had may ne naa là? Saɓlaŋ sen de maŋge diŋ se wose wo là?

⁵ Ɓo’ nen go ga ndo de deele lan ga ndo bay ndar gog wa. Jag jõõ maaga Yeso wãã ti sããre wo de ɓẽẽre wo wãã diŋ ti jar maaga joŋ wo tenen maa ɓaaran diŋ gesiŋ la mono. Á ɓo’ wo nen go ga saara de hã ɓil diŋ de kay hẽẽre Yeson wo ti joŋre siigi wããre no, lan de hoo sug ti ɓoɗge faage fẽẽre maaga wejõõ maa de deele de ti lay ga Yeso hay ne ɓoɗ ra mono. (Mat. 24:45) Amaa, jar maaga wo de gor tenen maa ɓaaran ciŋ hay kaŋ wo ɗiggi ɓaara ti ɓo’ge sug maa ɓil jag jõõ maaga Yeso wãã mo lay. Wer maylà? Werga Yeso ko seele ɓaara, joŋre ɓaara, lan wããre ɓaaran wo no. Á wo ti see ɓaara hay joŋ wo de deele lay. Diŋ wersen, Yeso wãã jag jõõ maa tigriŋ wo ɓog pa, ga ɓo’ge sug maa ɓil ɓaaran wãã diŋ ne jar maaga nenterse Baa de sreŋ rage mono. Naa da’ jag jõõ sen ɓil Matiye 25 pa. Naa mo ndal ti jag jõõ maaga wãã ti mãyre maaga wo de ko re de maaga bay wo de ko re wa mo ɗa.

MÃYRE MAA DE KO REN WO, LAN MAA BAY KO REN WO

6. Mãyre maa dween ngaɓ wo go ga saara de ko re na ngaɓge là? (Matiye 25:​6-10)

⁶ Ɓil jag jõõ maaga wãã ti mãyre wo mono, Yeso wãã ti maa po wo 10 ga raw wo caa peel war wãy po le de age ɓo’ wãy ti bii. (Mat. 25:​1-4) Á wo ɓuy hay wo de sãy kaŋ war wãy sen ti few dage wãy ɓe no. Yeso wãã ti maa po wo 5 wo de “ko re” maa 5 lan “bay wo de kore wa”. Mãyre maa de ko ren hay wo go de grag see ɓaara, lan hay wo go de pũygi. Á hay wo go de bag jag see ɓaara maa gor war wãy no, koh á mo hay a ba go de suŋ debaŋ. Doo sen nokay, saara hoo ger ɓaara maa de noo ɓil wo maa ler ngeel go. Á ɗaa wo noo maa tigriŋ le go do ni kay, maaga war wãyn yõõ ti le laybla’, noo mo taw go wa. (Jaŋ Matiye 25:​6-10.) De maaga war wãyn wo a ge le mokay, mãyre maa de ko ren laa wo wer ɓe kaŋge ɓe ti few dage wãy ɓe no. De maŋ sen lay, jar maaga nenterse Baa de sreŋ rage ga lag wo go de pũygi, lan de deele hãã ti wur a ge kris, à ko ge ra yaŋ de deele, saara joŋ yaŋ de kããge maa laage wer war wãy no: Yeso ti twaywaŋ b ɓen wo ciŋ. (Naa. 7:​1-3) Day  naa wãã ti mãyre maaga bay wo de ko re wa ga hãy laylà?

7. Re mayse da’ mãyre maa dwee de bay ko ren wo là, day wer maylà?

⁷ Sara de mãyre maa de ko ren wo mono, maa dwee lan wo ga bay wo de ko re wa, lag wo go de gragge maa caa peel war wãyn ga. Ger ɓaaran hay wo go de kos húulí, saara hay bay le de ɗaa noo maa tigriŋ maa kolge ɓil ger ɓaaran wo do ni wa. De maaga á laa wo ga war wãyn le de kos age maŋ mokay, saara raw rawge yee noo. War wãyn a mokay da’ ra bay de a ge wa ɗa. De ngar ngeel sen, “mayre ma dwee maga hay wo go de gragge la, raw wo laage de war wãy tiŋma so. À raw tẽg jag tiŋ go.” (Mat. 25:10) Blam sen, mãyre maa dwee maaga bay wo de ko re wa raw wo ɗuugi ga saara laa tiŋma, war wãyn raw wii rage ga: “Ndi bay de ko nday wa.” (Mat. 25:​11, 12) Mãyre sen hay bay wo go de grag see ɓaara peel bol maa gor war wãyn doo maaga ɓil ɓe da no wa. Sen had mayse ne jar maaga nenterse Baa de sreŋ rage là?

8-9. Hadge maa hõn ga jar maaga nenterse Baa de sreŋ rage da’ wo see jag jõõ mãyre maa hwaln wo là? (Ko foton lay.)

⁸ Hay go de gragge lan go de pũygi. Yeso hay bay wããge diŋ ga jar maaga nenterse Baa de sreŋ rage joŋ ge wo de caa ɓil ɓoge—maa po joŋ wo go de gragge maa gorge hãã go ti wur tawge fẽẽre no, lan joŋ wo ne ga na wa. Á hay wããge yaw diŋ ti fẽn maaga da’ ge ra, hayga á dur wo we maa lagge de deele hãã ti wur tawge tamsirn ga no. Hayga á lag wo we go de gragge ga no, á da’ wo poɗge ɓaaran ga. (Jaŋ 14:​3, 4) Á diŋ ɓo’ge sug maaga daŋgo. Koh naa mo hay ba gorge maa joŋ tenen wo ciŋ noga gesiŋ la yaw, naa ɓuy naa maa kaŋ ɗiggi ti ɓo’ge sug maaga Yeso ɓo’ ɓil jag jõõ maa ti mãyre maa hwaln wo no. Wosela ɓuy yoo naa hay joŋ go de pũygi, lan go de gragge go hãã ti wur tawge tamsir no.—Mat. 24:13.

⁹ Blam maaga á wãã ti jag jõõ maa ti mãyren wo maa ngaɓ de el gragge see go, lan pũygi go mono, Yeso wãã ti jag jõõ solay boo biŋni. Jag jõõ sen wãã diŋ ti hãge see go ti joŋre debaŋ.

 SOLAY BOO BIŊNI WO

10. Weere jõõre maa ɓogn ngaɓ wo go ga saara de deele na ngaɓge là? (Matiye 25:​19-23)

¹⁰ Ɓil jag jõõ solay boo biŋnin mono, Yeso hay wããge diŋ ti weere jõõre po wo ɓog ga hay wo de deele see pan tiŋ ɓaara no, lan ti maa po boŋ ga hay bay de deele wa. (Mat. 25:​14-18) Weere jõõre maa ɓogn ngaɓ wo go ga saara de deele de hã see ɓaara go maaga joŋre pan tiŋ ɓaaran mo see ciŋ. Taŋgu maaga á raw ti raŋge mono, se men solay boo biŋni ne hara do puri. Á ya’ wo joŋ trere de suŋgu no, lan saara joŋ joŋre de ɓe de ko re. Ɓo’ge ti ɓen so? De maaga pan tiŋ ɓaaran fer le liŋ mokay, se da’ ga á wo de da’ bii wer suŋgun ni doo maaga se hay hã ne hara no lay. Pan tiŋ ɓaaran joŋ suse’ ne hara debaŋ—kal ɗe rage le “joŋ fruygi ɓiŋ [ɓe].” (Jaŋ Matiye 25:​19-23.) Day naa wãã ti wejõõ maa de swa’n ga hãy laylà? Á joŋ mayse de suŋgu maaga pan tiŋ ɓen hay hã ne hẽn do mo là?

11. Re mayse da’ wejõõ maa de “cwããge”n là, day wer maylà?

¹¹ Wejõõ maa de swa’n hay da’ mbe suŋgu lay, amaa se hay de “cwããge.” Pan tiŋ ɓen hay gorge ga á mo joŋ joŋre de suŋgun de ko re. Amaa, se raw tee suŋgun nen sir gesiŋ. De maaga pan tiŋ ɓen fer le liŋ mokay, se fer ne hẽn diŋ suŋgu maaga pan tiŋ ɓen hay hã ne hẽn mo tawa tu. Ɗiggi wejõõ sen hay bay de woore wa. Nen maaga á hay wii fuggi ɓil do pan tiŋ ɓen ti maaga á da’ bii wer suŋgu maa ɓen ga mono, se raw wããge ne hẽn ga ndi de koge ga ndo diŋ jee maa de hãã debaŋ.” Joŋre wejõõ sen hay bay de woore nen pan tiŋn wa. Ni pa mono, à fer yãã suŋgu maa do ɓe no, lan à niin go see tiŋ.—Mat. 25:​24, 26-30.

12. Weere jõõre maa ɓog de deelen ngaɓ wara diŋ ti wose wo là?

¹² Weere jõõre maa ɓogn wo ngaɓ diŋ ti kretiyẽ maa de sreŋge de nenterse Baa ga wo de deele mono. Yeso Pan tiŋ, ɗe ra le “joŋ fruygi ɓiŋ [ɓe]”. Á da’ wo poɗge ɓaaran wo ciŋ, birgi maa taŋgu no. (Mat. 25:​21, 23; Naa. 20:5b) Amaa, jag jõõ wejõõ maa de ɓlaggen diŋ ɓo’ge sug maa kretiyẽ maaga wo de sreŋge de nenterse mono. De ɗeŋ maa hõnlà?

13-14. Jar maaga nenterse Baa de sreŋ rage da’ wo hadge mayse see jag jõõ solay boo biŋnin là? (Ko foton lay.)

 ¹³ Hay joŋ joŋre de baa wuu. Ɓil jag jõõ solay boo biŋnin wo de mãyre maa hwal, Yeso hay bay wããge diŋ ga kretiyẽ po maa de sreŋge de nenterse joŋ ge yaŋ de cwããge wa. Amaa, á hay ngaɓge diŋ fẽn maaga hres ge hayga jee sen bay we joŋ joŋre de baa wuu wa no. Á kãã wo maa sa’ see ɓaara see “ɗuu maaga Baa ɗe [ra] le, de far ge maaga á far [ra] le go mono” ga; lan á da’ wo faage maa laage ti twaywaŋ maa ciŋn ga.—2 Pi. 1:10.

¹⁴ Jag jõõ maaga Yeso wãã ti mãyre maa hwaln wo de solay boo biŋnin ɓo’ nen go cwãyn tu ga kretiyẽ maaga nenterse Baa de sreŋ rage joŋ wo go de gragge, lan go de pũygi. Á de hay joŋ wo de baa wuu ti joŋre pa. Day Yeso wãã fẽn maa tigriŋ maa ɓo’ sug kretiyẽ maaga nenterse Baa de sreŋ rage wo pa yawlà? Ãã! Naa da’ ɓo’ge sug sen ɓil wããre maaga á wãã ɓil Matiye 24:​40, 41 mono.

À “MAŊ GE” DIŊ WOSE LÀ?

15-16. Matiye 24:​40, 41 kay jar maaga nenterse Baa de sreŋ rage maa lagge go de gragge na kayge là?

¹⁵ Taŋgu maaga Yeso wãã jag jõõ se swa’n wo mono, á hay go de wããge ti caage kiida kretiyẽ maa de sreŋge de nentersen wo no. Kiida sen ngaɓ ga da’ge poɗgen cwãy diŋ wose woyoo ɓaara là. Á wãã ti werpiiri po wo ɓog ga hay wo joŋ joŋre ɓil pay; lan naare po wo ɓog ga wo de naŋ niini. Ti jag jõõ sen wo ɓog ɓuy, jar sen wo de joŋge diŋ fẽn sen boŋ. Amaa Yeso ga à kal “maŋ ge yoo ɓaara boŋ, men go boŋ lay”. (Jaŋ Matiye 24:​40, 41.) Blam sen, à baa yaŋ ne jar maa wer ɓen wo ga: “Lag we go de pũygi so, werga nday bay de ko wur maga Waŋ ɓayn fer le de ɓe mo wa.” (Mat. 24:42) Yeso wãã wããre maa de maŋ sen ɓil jag jõõ maa ti mãyre maa hwal wo no. (Mat. 25:13) Verse sen mbaara de tabge yawlà? Á ko wo doo ga saara mbaara de tabge nono. Diŋ jar maa de deele maaga nenterse Baa de sreŋ rage tawa, ga Yeso “[hoo] ra” maa rawge ti twaywaŋ maa ciŋn mono.—Jaŋ 14:3.

¹⁶ Le’ naa wa. Kretiyẽ maa de sreŋge de nenterse maa hõnla ɓuy ga le’ naa ti ɓaŋ nenterse joŋ yoo jar maaga “Baa hoo ra go” mo ga. (Mat. 24:31) Day jar maaga joŋ wo ti tamsir la mo lag wo go de pũygi lan de deele lay.

17. Hayga Jeofa yaŋ hoo jar maa rawge ciŋ ti wur maa ni naan la ɗa no, wer mayse ga ɗiggi naa mo hay hãy naa wa là?

¹⁷ Naa go de ko Jeofa de woore; naa de koge pa ga kiida maaga á caan ɓuy de deele. Hayga Jeofa yaŋ sreŋ jar de nenterse ɓen ti wur maa ni naan la ɗa no, sen mo hãy ɗiggi naa wa. c Naa fer ɗiggi ti jag jõõ maaga Yeso wãã ti jar joŋre maaga a wo le blam taw mono. (Mat. 20:​1-16) Jar maaga tõõ wo joŋre ɓil pay tlalumn go de law da’ wo solay dega’ dega’ de jar maaga tõõ wo joŋre taŋgu de jag toŋ mbuu mono. Doo sen no lay, nenterse Baa mo sreŋ ba kretiyẽ diŋ ti wur maa hõnla, á da’ poɗge say diŋ ga á oo de deele.

JOŊ HAYYA TI BOƊGE SUGGI WO

18-19. Naa had mayse ti jag jõõ sen wo là?

¹⁸ Hãã patala naa ko mayse là? Jag jõõ maaga wãã ti sããre wo de ɓẽẽre wo ngaɓ go ga jar maaga joŋ wo tenen tum ti tamsir la hay lag wo de deele peel Jeofa—matala, lan ti wur bon maa de hãã maaga le de a ge mono. Ti wur sen, Yeso caa kiida jar maa de deelen wo de hã “tenen maa tum” ne hara.—Mat. 25:46.

¹⁹ Naa wãã ti jag jõõ maa tigriŋ po wo ɓog ga ɓo’ wo sug jar maaga nenterse Baa de sreŋ rage mo ɗa. Ɓil Jag jõõ maaga wãã ti mãyre maa hwaln wo mono, maa po wo dwee yoo ɓaara hay wo de ko re. Á hay wo go de gragge  lan de pũygi, de bag jag maa gor war wãy no, hãã go de maaga á a. Amaa mãyre maa de bay ko ren hay bay wo go de gragge wa. Diŋ wersen so ga war wãyn laa yãã rage ti few dage wãyn ni ga mono. Naa lay naa mo hay lag go de pũygi hãã go ti wur maaga á a maa taw tamsir se maa de ɓlaggen go mono. Ni pa mono, ti jag jõõ maa ti solay boo ɓiŋnin mono, naa ko ni ga weere jõõre po wo ɓog hay wo de baa wuu ti joŋre. Á hã wo see ɓaara go ti joŋre maa ni pan tiŋ ɓaara no, lan saara co jag pan tiŋ ɓaara no. Amaa, à nii wejõõ maa de cwããgen go. Sen had mayse ne naa là? Naa mo hay hã see naa go ti joŋre maa ni Jeofan hãã go ti wur tawge tamsiri. Ti tawge ti ɓen, naa ko ga kretiyẽ maa de sreŋge de nenterse mo hay laa wo naa ti ɓaŋ nenterse wa, nen maaga Yeso mo “hoo ra” lan hã poɗge ɓaara maa ciŋn ne hara. De maaga á ɗig wo we ti naw maa peeln no, á ko wo see ɓaara go de ‘tayge ɓiŋ” Yeso wo ciŋ. Blam waŋ Armagedoŋ mono, á joŋ wo ti dage wãy maa ni wesamn, doo wãy Yeso nono.—2 Tes. 2:1; Naa. 19:9.

20. Jeofa joŋ ge mayse ne jar maaga kaŋ wo ɗiggi ti ɓoɗge sug ɓen là?

²⁰ Koh ba de maaga wur cagge kiidan mbe go de kosge mbaŋ laybla mono, naa bay maa naa jiili wa. Hayga naa lag we de deele no, Pan naa maa maa ciŋ de dagen hã “egre se ma de daŋ egren ɓuy” yaŋ ne naa nen maaga “Wel je táabay wo le fer ge, [naa] mo lag ge de el pel ɓe.” (2 Kor. 4:7; Lug 21:36) Koh naa mo hay ba gor tenen maa tumn diŋ gesiŋ la noga ciŋ, naa co ge jag pan naan say diŋ ga naa hoo sug we ti ɓoɗge sug maaga naa da’ ra ɓil jag jõõ maa ni Yeson wo no. Wer ɓil de el maa ni Jeofan ɗuu naa joŋ ge de “yerge ɓil kefder ɗuu jar” maa tenen no.—Dan. 12:1; Naa. 3:​5, NWT.