Naa mo ɗig tu ga jar maa wer Yeso maa 70 hay bay wo ti wur maŋge Hoole Waŋ maa taŋgun ni wa, bay wer maaga á hay bay wo de cõõre jag Yeso wa na wa; noga á hay tob wo Yeso go na wa pa. Yeso da ga se mo hay ti wur sen de apotre ɓen wo tawa.

Jar maa wer ɓe maa 70 wo de apotre maa 12 ɓuy hay wo de cõõre jag Yeso. Taŋgu tu mono, Yeso hoo werpiiri maa 12 yoo jar maa wer ɓen wo. Á ɗe ra ga apotre wo. (Lug 6:​12-16) Yeso hay wo Galile de maaga “[á] raw tay ti jar ma wer ɓe ma hwal ti ɓog wo no,” lan “á raw laa rage wo ga á mo see wo siɗ wããre maa ti twaywaŋ mani Baan go ne jare, mo peɗ wo jar cegè wo go lay.” (Lug 9:​1-6) Blam de maaga á hay ɓi sir Jude mono, Yeso “raw far jar hwal hwal renam ti ɓog pa, raw lag rage wo pel ɓe ɓog ɓog.” (Lug 9:51; 10:1) Wersen, ti ngeel maaga Yeso hay sii wããre Baa ni mo ɓuy, jar maa wer ɓen hay wo ni.

Jar Jwif maaga kol wo go jar maa wer Yeso hay wo joŋ Few Pag nen kiŋgi tum. Maapo ga á hay wo joŋ few sen wo de jar maa ɓi feele ɓaara wo. (Laa. 12:​6-11, 17-20) De maaga wur húulí ɓe kos go mono, Yeso wo de jar maa wer ɓen hay wo Jerusalem. Amaa á hay bay de wiigi ne jar maa wer ɓe maaga hay wo ti sir Pèrè Galile wo de Jude ga á mo a wo le maaga saara mo joŋ Few Pag de kããra ɓuy wa. Sen go tinoo tu seŋ ga Yeso hay da ga se mo joŋ Few wur sen diŋ de apotre sen wo tawa. Á wãã ne hara ga: “Ndi de da ge debaŋ ga naa mo re hoole few Pag de kããra taŋgu joŋge bon ɓi no.”—Lug 22:15.

Á hay ti ngeel ɓe maaga Yeso joŋ doo sen ne no. Á hay go de kos húulí doo “wesam mani Baa ma taw ɓlagge jar ma ti tamsirn wo go.” (Jaŋ 1:29) Á de hay húu wo Jerusalem, sir maaga à hay sii jag de horog wo ne Baa ni ɓaa mono. Húulí Yeso yãã ge jar yaŋ go debaŋ de daŋ yããge maa ni jar Israyel wo le ɓaa, de maaga á hay wo re wesam, de law ti wur maaga Jeofa joŋ ga jar Jwif mo laa wo le go Ejipte mono. (1 Kor. 5:​7, 8) Fẽn maaga Yeso joŋn ɓo’ faage ne jar maa wer ɓe 12 wo maaga á mo kol wo go yoo jar maa tõõ wer tayge kretiyẽ maa taŋgu no. (Efe. 2:​20-22) Mopo maa de wooren diŋ ga ‘ville’ Jerusalem maa bay ɗagn de “ɓo’ wer de húulì hwal ti ɓoge”, ga “jar maga Wesam hoo ra go hwal ti ɓog lagge siɗ wããre ɓen go ɗúu ɓaara de yerge ti sen wo.” (Naa. 21:​10-14) Kaŋ nen ga á hay wo de joŋre maa de woore debaŋ nen naw maa peel maa joŋge ti joŋre maaga Baa de sãy joŋge ɓe ti mono. Sen kay naa maa koge wer mayse ga Yeso hay da ga se mo hay maŋ hoole Pagn de ɓaara tawa là; lan maŋge Hoole Waŋ maaga hay hresge blam ni pa mono.

Jar maa wer Yeso maa 70 hay bay wo ti rege hoole sen ni wa. Amaa, jar maa wer Yeso maaga lag wo de deele mo ɓuy de da’ wo wer maŋge hoole sen blam wur se no. Kretiyẽ maaga joŋ ge wo de sreŋge de nenterse Baa blam wo mo ɓuy laa ge wo yoo tayge maa ti twaywaŋ de Yeso, doo maaga á hay wãã ne apotre maa 12 wo ti Few Hoole Waŋ maa de law ti wur sen nono.—Lug 22:​29, 30.