1. Wer mayse ga naa wãã ga naa go ti wur maa de woore debaŋ là?

 NAA go wara ti wur maa de woore debaŋ! Wããre maaga Baa wãɗ ra wo go de bag jag tum nen naa. Ko ba ɗa “waŋ maa ɓaŋ gloŋhweeden” wo de “waŋ maa ɓaŋ ni wãyban” wo ti waŋ ti holaŋ kããra maa wãã wããre tamsiri. (Dan. 11:​40, ngeel naa wer maa gesiŋ ɓil NWT.) Naa go de koge ga wããre maa de cõõre maa ti twaywaŋ maa ni Baan go de siigi dedaŋ maa ɓaan ɓuy, day jar miliyoŋ pur yãã wo ne de woore. (Esa. 60:22; Mat. 24:14) Day naa tum de da’ rege maa ti nenterse debaŋ “ti wur [ɓe]” lay. —Mat. 24:​45-47.

2. Naa mo hay joŋ go de bawge jag jiili ti maylà, day naa hay de koge ga hãylà?

² Jeofa tum de kay naa maaga naa mo laa wer go ne fẽẽre maaga naa de gor rage mono. (Jõõ. 4:18; Dan. 2:28) Naa mo hay go de bawge jag jiili naa ga, ti wur maaga bon maa de hããn tõõ wer mokay, naa joŋ ge yaŋ go de ko fẽẽre maaga naa de sãy ɓaara ti maa soɗ bon sen de deele, lan maa da’ see naa de tay jag boŋ ti wur se de gayri no. Amaa, naa mo hay go de koge ga fẽẽre po hres ge wo yaŋ wo ti naw maa peeln ga naa bay de ko sen wo wa. Ti hadge sen la naa wãã ge taŋgu ɗa diŋ ti fẽẽre maaga naa hay wããɗ ra go ti wur bon maa de hãã no, ga à fer ko nen ti ɓaara mono. Blam ɓe, naa cegaɗ ge yaŋ ti fẽẽre po wo ga naa go de ko rage ti naw maa peel no, lan ti deŋ maaga Pan naa maa ciŋn joŋ ge yaŋ mono.

 FẼN MAAGA NAA BAY DE KO SEN WA MONO

3. Naa hay wãã ti wur maaga jar da’ nen maa tayge de naa maa hã ɓil ti Jeofa ga so na ga hãylà, day wer mayse ga naa hay ɗig ne là?‵

³ Le ɓaa naa hay wããge ga de maaga wur bon maa de hããn tõõ wer mokay, jee maaga bay de ko Jeofa wa coo ge ɗiggi maa goŋge ɓe ga so lay, yãã go jag Armagedoŋ ga lay. Naa wãã sen diŋ wer maaga naa hay ɗig ga fẽẽre maaga hay hres wo ti maŋge bii maa ni Nowen ɓuy, fer ge wo hresge pele. Ko ba ɗa, naa hay ɗig ga doo maaga Jeofa hay ma’ jag dagen go taŋgu maaga bii maŋgen tõõ ne lay mono, á “ma’ ge jag tiŋ” go ne fẽẽre maa ti tamsir maa ni Manhúulin nene de maaga bon maa de hããn tõõ wer mono, maa maŋ jag jar maa po wo go maa da’ yããge go.—Mat. 24:​37-39.

4. Wer mayse ga naa mo wãã ga fẽẽre maaga hay hres wo le ti wur maa ni Nowen diŋ saɓlaŋ maaga bag wo jag ti wur maa ni naan la pa wa là?

⁴ Á mbe ti ngeel ɓe maa wããge ga fẽẽre maaga hay hres wo le ti wur bii maŋgen mo ɓuy ngaɓ wo diŋ fẽẽre maaga hres ge wo ti wur naw maa peeln yawlà? Baywa. Wer may ne? Werga Bible bay wããge no wa. a Á mbe cwãy ga Yeso ngaɓ “wur maa ni Nowe” no de wur age ɓe, amaa á bay de wããge diŋ ga tee fẽẽre maaga hay hres wo le ti wur maa ni Nowen bag ge wo jag yaŋ wo debaŋ ti naw maa peeln pa wa. Á bay de wããge ga doo maaga Jeofa hay ma’ jag tiŋ dagen go no mono, á “ma’ ge jag tiŋ” go ne fẽẽre maa ti tamsir maa ni Manhúulin nene mo wa pa. Sen bay da wããge ga naa had mopo  see wããre maa ti Nowen wo de maŋge biin ga na wa pa.

5. (a) Nowe naa nen hãge ɓil ɓen go taŋgu bii maŋgen na naage là? (Hebre wo 11:7; 1 Piyer 3:20) (b) Siigi wããre maa ni Nowen de maŋ maa ti wur maa ni naan la na maŋge là?

⁵ De maaga Nowe laa wããre ɓo’ge sug maaga Jeofa ɓo’ sug ɓe mono, á naa nen hãge ɓil ɓen go de ceɗ dage no. (Jaŋ Hebre wo 11:7; 1 Piyer 3:20.) Doo sen no lay, jar maaga wo de laa wããre maa de cõõre maa ti twaywaŋn mo hay joŋ wo joŋre de fẽẽre maaga á laa wo ne mono. (Joŋre 3:​17-20) Piyer wii ga Nowe hay diŋ “je sii wããre.” (2 Pi. 2:5) Amaa, doo maaga naa hay kon le go ti hadge maa glog no mono, naa bay de koge ga Nowe hay sii mbe wããren we go ne jar maa ti tamsir wo ɓuy taŋgu bii maŋgen yawla wa. Wara naa dur maa sii wããren go ne jar maa ti tamsir wo ɓuy, day naa joŋn go de fruygi lay. Amaa, koh ba mbe de durgi naan ɓuy laybla, naa kãã maa sii wããren go ne wosela boŋ boŋ ɓuy taŋgu tawge tamsirn ga. Wer maylà?

6-7. Wer mayse ga naa wãã ga naa kãã maa sii wããre maa de cõõren go ne jar ɓuy taŋgu tawge tamsirn ga là?

⁶ Ɗig ba ti maaga Yeso wãã ti siigi wããre naan mo ɗa. Á wãã go peel bol ga wããre maa de cõõre maa ti twaywaŋn joŋ yaŋ go de siigi “maga wer jag jar ɓuy mo laa wo sedewa sen go de sug ɓaara ɓuy.” (Mat. 24:14) Profesi sen go de bag jag wara dedaŋ maa ɓaan ɓuy. Wããre maa ti twaywaŋn go de dusgi ti wer jag dedaŋ 1000, lan daŋge jar maa ti tamsir ɓuy wo mbaara de kããge maa laa wããre sen wer sid jw.org.

⁷ Amaa, Yeso wãã ne jar maa wer ɓen wo ga á “kãã wo ma raŋ jag sir” go ɓuy ga, kaŋ nen ga á kãã wo maa sii wããren go ne wosela boŋ boŋ ɓuy taŋgu maaga se a mo ga. (Mat. 10:23; 25:​31-33) Wããre Yeson wo go de bag jag cwãy poɗag ti wur maa ni naan la no. Jar wara miliyoŋ pur wo ti ngeel maaga wããren bay go de siigi ni de woore wa, werga à go de maŋ jag ɓe ni. De daŋ sen ni pa mono, tum nen weel boo boŋ, jar biŋ kis kis puri. Naa dur go de ẽgre naa ɓuy maa sii wããre maa de cõõren go “ne wer jar wo ɓuy, ɓĩĩni jar wo ɓuy, de jag jar wo” (Naa. 14:6). Amaa, naa bay de kããge maa sii wããren go ne jar boŋ boŋ ɓuy taŋgu maaga tawge tamsir a mo wa.

8. Naa de hay wii jag see naa ti caage kiida maaga Jeofa caan ge wo ti naw maa peeln ga hãylà?(Ko foton wo lay)

⁸ Day naa wãã ti jar maaga maapo ga hay da’ wo nen maa laa wããren go taŋgu maaga wur maa de hããn tõõ wer ga na ga hãylà? Jeofa wo de weel ɓe, maaga á baa maa caa kiida caa ge wo kiida ɓaara na caage là? (Jaŋ 5:​19, 22, 27; Joŋre 17:31) Verse kluu hadge naan wãã ga Jeofa “bay de da ge ga jobo mo bas go boŋ wa”. Amaa, ga á “da ɓen ga jar ɓuy mo da’ wo faage ma coo ɗiggi ɓaara ma de ɓlaggen de deele tigriŋ.” (2 Pi. 3:9; 1 Tim. 2:4) Koh de maaga naa mbe go de ko fẽẽre sen wo ti Jeofa mo laybla no, á bay go de wããge ne naa ti ɗeŋ maaga se caa ge kiida jar maaga da’ wo nen maa laa wããre ti ɓe ga mo wa. Kidolgi, á bay maaga se wãã fẽn maaga se go de joŋge ɓe, noga maaga se joŋ ge ne ne naa wa.

9. Jeofa naa nen mayse go ne naa ɓil Bible là?

⁹ Jeofa naa nen fẽẽre po maaga se joŋ ge ra ne naa ɓil wããre ɓe no. Ko ba ɗa, Bible wãã ne naa ga Jeofa fer ge “jar maga bay wo de deele wa” ga hay da’ wo nen maa coo seele ɓaara sen ga le go ciŋ tenene. (Joŋre 24:15; Lug 23:​42, 43) Sen kaŋ wer naa maa wii jag see naa ti wiigi jag maa tigriŋ wo de woore pa.

10. Naa de hay wii jag see naa ga hãy pa là?

¹⁰ Jar maaga húu gi wo go ti wur bon maa de hããn mo ɓuy joŋ wo go de caa wer diŋ maa tum, fer wo le go birgi ga so yaw? Bible wãã go de woore tu ga jar maaga caa wo hee de Jeofa,  lan ga taw wo go ti waŋ Armagedoŋ bir gi wo le go ga. (2 Tes. 1:​6-10) Day naa wãã ti jar maaga húu gi wo go ti wur bon maa de hããn do cege noga do tããbe, noga joŋ wo ‘accidents’; noga pa wer maaga jar maa tigriŋ ‘war ra go ga hãy laylà? (Ekl. 9:11; Sak. 14:13) Á joŋ ge mbe yaŋ ga jar sen joŋ wo yoo “jar maaga bay wo de deele wa” ga fer ge wo le go tenen ti sir maa defayn mo yawlà? Naa bay de ko sen wa.

FẼN MAAGA NAA DE KO SEN MONO

11. Jeofa caa kiida jar wo ti waŋ Armagedoŋ diŋ see maylà?

¹¹ Naa de ko fẽẽre debaŋ ti fẽẽre maaga hres ge wo wo peel mono. Ba doo maaga ti Armagedoŋ, à caa ge kiida jar yaŋ diŋ see fẽn maaga á hay wo joŋ hẽẽre Yeson wo de ɓe mono. (Mat. 25:40) Jar maaga à caa kiida ɓaara doo sããre no diŋ jar maaga hay wo kay jar maaga nenterse Baa de sreŋ rage wo de Yeso mono. Naa de koge pa ga jar maa po wo yoo hẽẽre Krisn joŋ ge wo ti tamsir la ɗa blam tĩĩgi wer wur bon maa de hãã no, lan raw ge wo ciŋ taŋgu tĩĩgi wer Armagedoŋ. De maaga hẽẽre krisn yaŋ wo gesiŋ la ɗa no, jar maa de deelen joŋ mbaara nen kay rage ɗa, lan kay wo ti joŋre maaga á wo de bag jag ɓe mo lay. (Mat. 25:​31, 32; Naa. 12:17) Wããre sen wo de el wer maylà?

12-13. Jar maa po ɗig wo ɗiggi blam maaga saara ko tawge ‘Babilon maa kluu’ mo là?(Ko foton wo lay)

¹² Koh blam tĩĩgi wer bon maa de hããn mono, maapo ga jar maaga ko wo tawge “Babilon maa kluu” fer ge wo yaŋ ɗiggi ti fẽẽre maaga Sedeewa Jeofa hay wãã wo go ti ɓaara mono. Jar maa po wo yoo jar maaga ko ge wo tawge “Babilon maa kluu” go le’ ge wo hã ɓil ti Jeofa yawlà?—Naa. 17:5; Ese. 33:33.

¹³ Sen joŋ ge de maŋ tee maaga hay hres Ejipte ti kal maa ni Moyisn mono. Fer ɗiggi ga ‘ngaɓa wer jar de tay nen sar sar’ maŋ wo blam weere Israyel wo de maaga á wo go de men Ejipte mono. Maapo jar maa po wo yoo jar sen le’ wo hã ɓil ti Baa de maaga á ko wo Ɓulfuŋ maa hwaln go bag jag mono. (Laa. 12:38) Hayga fẽn se kayn hres we blam tawge Babilon maa kluun no, naa ɗig ge ga de maaga jar tay  le yoo naa go naw mẽ’ taŋgu wur naw maa blam tawn bay ti ngeel ɓe wa yawlà? Sen go tinoo tu ga baywa! Naa da ga naa mo hay joŋ doo Pan naa maa ciŋ ga diŋ, “Baa ma ko decoo jare, bay sõõ ɓil gus wa, de el debaŋ, bay ndar gog wa lay” mono. b—Laa. 34:6.

14-15. Naw jobo maa tum joŋ diŋ see ngeel maaga á húu ni noga ngeel maaga á ni mo yawlà? Naa wer ɓe. (Siŋ wora 33:​4, 5)

¹⁴ Day maa po hẽnbe po wãã ga: “hayga jobo ɓi húu we go taŋgu wur bon maa de hããn no, sen ɗawa, werga á bir yaŋ le go ti wur birgi no.” Sen go tinoo tu ga ɗiggi maa de woore wo le wer wããre maa de maŋ sen wo no. Amaa, tenen jobo maa tum joŋ bay diŋ see wur ɓe maaga á húu mo wa. Jeofa diŋ jee caa kiida maaga keɗede—ɗiggi Ɓe maaga á far ra tum wo de deele, lan ti ngeel ɓe. (Jaŋ Siŋ wora 33:​4, 5.) Naa mbe nen joŋge go de bawge jag jiili ga “je maga caa kiida tamsir ɓuy” joŋ ge ɓen diŋ fẽn maa ɗeger no.—Tĩĩ. 18:25.

¹⁵ Á ti ngeel ɓe pa ga naa wãã ga naw jobo maa tumn joŋ bay diŋ se ngeel maaga á hay ni mo wa. Jeofa caa ge kiida jar maa miliyoŋ pur doo “ɓẽẽre” wo, diŋ werga á gẽẽ wo ti sir maaga á da’ wo nen maa laa wããren ni ga ti boŋ ga. (Mat. 25:46) Jee caa kiida maa ti ngeel ɓe ti tamsir ɓuyn ko decoo jar sen wo dedaŋ maaga naa ɗig ga naa ko decoo ɓaara mono. Naa bay de da’ faage maaga Jeofa see ge de fẽẽren seege la ti wur bon maa de hãã wa. Maapo ga fẽẽre maaga á ko wo hresge ti wur bon maa de hããn jor glog ɓaara maa hã ɓil ti Jeofa de maaga  á naa nen ɗuu ɓe we go ne jar maa ti tamsir wo ɓuy no.—Ese. 38:16.

16. Naa go de ko mayse ti Jeofa là? (Ko foton lay)

¹⁶ Wer hadge wããre Baa naan, naa laa ga tenen jee táabay diŋ fẽn maaga daŋgo nen Jeofa. Á hã tenen weel ɓen go maaga naa mo da’ tenen maa tum. (Jaŋ 3:16) Naa ɓuy naa ko dage maaga Jeofa da naa de ɓe mono. (Esa. 49:15) Á go de ko ɗuu wosela yoo naa boŋ boŋ ɓuy. Á go de ko naa de woore debaŋ nen maaga, koh naa mo húu ba go, se fer bir naa le go, werga fẽẽre maaga naa hay joŋ rage de maa see naan ɓuy wo de kaŋge ti ɓe, lan fẽẽre maaga naa hay ɗig rage mo ɓuy! (Mat. 10:​29-31) Naa mbe nen kaŋ ɗiggi ga Pan dage naa maa ciŋn caa kiida wosela ɓuy yaŋ ti ngeel ɓe keɗede, werga á de ko re, de deele, lan ko decoo jar lay.—Jag. 2:13.

17. Naa wãã ge mayse yaŋ wo ti hadge maa peeln wo la là?

¹⁷ Laage wer ne fẽẽre sen wo mo deŋ kol joŋre siigi wããre Baa naan diŋ fẽn po maaga go nen joŋge deparday dedaŋ maa ɓaan ɓuy. Wer mayse ga naa wãã ne là? Mayse srog glog naa maa sii wããren go bay laa do gesiŋ là? Naa wãã yaŋ go ti ɓaara de woore ti hadge maa peel no.