HADGE 21
SIŊ 107 Imitons l’amour de Dieu
Ndo joŋ joŋge maa da’ wãy noga war maaga nday lag yaŋ de kããra là?
“Wose da’ ge wãy ma de tin la? Yoo ɓe de daŋ yoo redew wo wo go hãã.”—JÕÕ. 31:10.
FẼN MAA KLUU ƁIL HADGE SEN LA
Naa ko wããre maa ɓil Bible maaga kay wo naa yaŋ maa da’ wãy noga war maaga joŋre naa laa kẽẽ yaŋ mono, lan ga jar maa ti tayge joŋ wo joŋge maa kay rage là.
1-2. (a) Kretiyẽ mo hay ɗig wo go ti mayse de woore taŋgu maaga saara tĩĩ wer ndal kããra là? (b) “Nday” da wããge ga hãylà? (Ko “wããre maa de naa were.”)
NDO de sãy da wãy noga da war ti yawlà? Koh mbe de maaga dage kããra bay mbe diŋ fẽn maaga hã ti desãy wa mo laybla no, kretiyẽ maa jõõre wo de maa de tããrebe ga bay wo de da naare wa ɗa ngaɓa wo de gorge debaŋ maa da’ jee teɓog ɓaara. Taŋgu maaga nday le’ ndal a kẽẽ mono, holaŋ ɓo mo hay de sa’ge de Jeofa kwũy, ndo mo hay go de ko joŋre ɓo wo de woore, lan ndo mo hay de kããge maa da’ suŋgu maa ya’ haaje maa ɓi feele wo. (1 Kor. 7:36) Hayga ndo joŋ we doo sen ne no, sen go gus maaga feele ɓon joŋ yaŋ ti desãy.
2 Amaa, á bay tum gus maaga ndo mo da’ wãy noga war maaga nday lag yaŋ de kããra wa. (Jõõ. 31:10) Day koh de maaga ndo mo da’ ba jobo maaga ndo hay de sãy ko joŋre ɓe ti laybla mono, maapo se joŋ gus maaga nday mo tĩĩ wer nday b de kããra tu ga. Ti hadge sen la, naa wãã yaŋ ti fẽn maaga kay kretiyẽ maaga bay wo de naare noga de war wa ɗa maa da’ jobo maaga á lag wo yaŋ de kããra, lan maaga á mo tõõ wo wer nday de kããra mono. Naa ko yaŋ pa ga jar maa ti tayge joŋ wo joŋge maa kay jar maaga wo de sãy da wãy noga da war ti là.
MAYSE KAY MO MAA DA’ JOBO MAAGA NDAY LAG YAŊ DE KÃÃRA LÀ?
3. Fẽẽre maa hõn wo ga kretiyẽ mo hay ɗig wo go ti ɓaara de woore taŋgu maaga á le’ wo we ga saara kiɗ wãy noga war là?
3 Hayga ndo yaŋ de sãy da war noga da wãy ti no, á de el maaga ndo mo da’ wer go ne fẽn maaga ndo dan see jee ɓen ɗa taŋgu maaga nday ti wer nday c de kããra kway. Bay we wa no, ndo men jee maaga ndo nen dage ɓe mo go, raw ge diŋ see jee maaga bay nen maa ɓo wa mono. Ti ngeel ɓe jee maaga ndo dan mo hay go de joŋ batem. (1 Kor. 7:39) Amaa, jar maaga wo go de joŋ batem joŋ wo go ɓuy diŋ jar maaga nday da kẽẽ ɓuy ga. Wii jag see ɓo ga: Ndi de sãy joŋge ti nen naw ɓi diŋ mayse wo là? Joŋre maa hõn wo ga ndi gor see jee maaga ndi de sãy dage ɓe ti mo là? Fẽẽre maaga ndi gor ra see jee ɓen mbaara diŋ ɗiggi maa de woore mbe yawlà?’
4. Wer mayse ga jar maa po tos wo Baa maa kiɗ jee teɓog ɓaara là?
4 Hayga ndo yaŋ de sãy da war noga wãy ti no, sen go tinoo tu ga ndo hay tos ti ɓe. (Flp. 4:6) Jeofa bay go de ngaɓ wãy noga war ne jobo wa. Amaa á de ko fẽẽre maaga ndo de sãy ɓaara ti wo de ɗiggi ɓo, lan se kay ndo ti ɗeŋ kiɗgi ɓe. Hay tum wãã ɗiggi ɓo ne hẽne. (Siŋ. 62:9) Tos maaga ndo mo hay gorge de sãy lan maa da’ koge re. (Jag 1:5) Jaŋ, d hẽn naa po ga bay de da wãy wa ɗa wo Etasuni ngaɓ fẽn maaga se hay wãã rage nen tosge ɓe ga: “Ndi wãã joŋre maa de woore maaga ndi gor ra see wãy ɓi ne Jeofa. Ndi tos maa yiŋgi de jobo maaga joŋre wùr laa kããra yaŋ mono. Ndi wii Jeofa pa ga á mo kay me maa had joŋre maaga kol me yaŋ diŋ war maa ti ngeel ɓe mono.” Taniya mãygeman naa po wo Sri lanka wãã ga: “De maaga ndi de kiɗ jee maaga co jag ɓi mono, ndi wii Jeofa ga á mo kay me maa ooge de deele, de kaŋ ɗiggi de woore, lan de fruygi lay.” Koh ndo mo da’ ba wãy noga war gus wa laybla no, Jeofa de wããge ga se joŋ yaŋ tum de kaŋ ɗiggi ti fẽẽre maaga ndo de sãy ɓaara ti ɓuy mono.—Siŋ. 55:23.
5. Kretiyẽ maaga bay wo de naare noga de war wa ɗa yiŋ wo de jar maaga da wo Jeofa na la genlà? (1 Korente wo 15:58) (Ko foton lay)
5 Bible jor glog naa ga naa mo “Joŋ we joŋre Waŋkluun tum tum daŋge daŋge”. (Jaŋ 1 Korente wo 15:58.) Hayga ndo kaŋ ɗiggi ɓo we diŋ ti joŋre maa ni Jeofan no, lan yaŋ iggi debaŋ see hẽẽrebe maa tnaare wo de maa twerpiiri wo no, ndo da’ nen yaŋ maa ndalge de jar maaga joŋre ɓaara wo de woore, lan ndo yiŋ yaŋ de jar maaga bay wo de naare noga de war wa ɗa ga dur wo debaŋ maa goŋ Jeofa doo ndo no lay yaŋ. Day hayga ndo dur we de ngar ẽgre ɓo maaga ndo mo hay de cõõre jag Jeofa no, ndo da’ ge fruygi maa ti ngeel ɓen yaŋ.
Hayga ndo yaŋ kaŋ ɗiggi ɓo diŋ ti joŋre maa ni Jeofa no, day ga ndo yaŋ da iggi see hẽẽrebe maa wer sar sar wo no, ndo yiŋ yaŋ de jar maa tigriŋ wo ga joŋ wo de sãy da naare noga da war ti (Ko paragraf 5)
6. De maaga kretiyẽ le’ wo kiɗ jee teɓog ɓaara we no, á mo hay ɗig wo go ti mayse ɗa là?
6 Joŋ hayya ne see ɓo, men kiɗgi wãy noga warn go diŋ fẽn maaga daŋgo nen naw ɓo wa. (Flp. 1:10) Ndo da’ ti desãy maa ti ngeel ɓen bay diŋ werga ndo de wãy, de ware noga baywa na wa. (Mat. 5:3) Day de maaga ndo yaŋ bay de wãy noga de war wa no, ndo joŋ de wur do debaŋ maa bag jag siigi wããre Baa ɓon go. (1 Kor. 7:32, 33) Joŋ joŋre de wur maa do ɓon de woore. Jesika, mãygeman naa po maaga da war go de ngar kiŋgi 40 wãã ga, “Ndi hay hã see ɓi go ti joŋre maa ni Jeofa no, se kay me maaga ndi mo hay de fruygi koh de maaga ndi hay ɓi de sãy da war go ti mono.”
MAŊ WUR MAA KO JEE ƁEN GO DE WOORE
7. Wer mayse ga á de el maaga ndo mo ko joŋre jobo go taŋgu ɗa blam maaga ndo wãã ɗiggi ɓo ne hẽn kway là? (Jag Jõõ wo 13:16)
7 Ndo joŋ diŋ mayse de maaga ndo ɗig we ga jobo joŋ yaŋ diŋ wãy ɓo noga war ɓo là? Ndo bay ba nen wãã fẽn maaga ndo dan ne jee ɓen deparday tu wa? Bible wãã ga jee maa de ko ren ɗig go ɗa taŋgu maaga se joŋ mopo kay. (Jaŋ Jag Jõõ wo 13:16.) Á de el maaga ndo mo ko jee ɓen go de yoŋre ɗa, blam ni ndo mo wãã ɗiggi ɓo ne hẽn kay. Acwin ga wo Pays-Bas wãã ga “dage gẽẽ ciŋ deparday tu, amaa, maapo se yee nen go deparday tu lay. Hayga ndo maŋ wur we go de woore maa ko jee ɓen no, ndalge kẽẽ ɓayn joŋ ge de oole diŋ nen ɗiggi tawa maa naw mẽ’ koɗ ga”. De daŋ sen ɓuy pa, hayga ndo maŋ wur we go maa ko jee ɓen de woore no, maapo ndo wo da’ge ga jee ɓen bay maaga ndo dan wa.
8. Kretiyẽ maaga bay de wãy wa ɗa joŋ joŋge maa ko joŋre jee maaga joŋre ɓaara laa kããra là? (Ko foton lay)
8 Ndo joŋ joŋge maa ko joŋre jobo go de yoŋre ɗa là? De maaga naa ti taygeti, noga laa go iggi mono, maapo ndo ko fẽẽre yaŋ see jee ɓen ti ɓaŋ nenterse, joŋre ɓe maa po wo, lan seele ɓe wo yaŋ. Ndo ko yaŋ pa ga bar ɓe wo diŋ jar maa ẽse wo la, lan ga á da wããge debaŋ diŋ ti mayse là? (Lug 6:45) Fẽẽre maaga á de ɗiggi ga se joŋ ra mbaara de tabge de ɓon yawlà? Ndo mbo de kããge maa wii jag jar maa peel tayge ɓen wo noga kretiyẽ maaga wo go de ruggi ga wo go de koge ɓe de woore mono. (Jõõ. 20:18) Ndo mbo nen wii jag jar ti seele jee sen wo de joŋre ɓe wo pa. (Rud 2:11) De maaga ndo de ko joŋre jee sen ɗa mono, joŋ hayya ne see ɓo maaga á mo joŋ sõõre do ɓo wa. Hay hoo sug ti ɗiggi ɓe, ti fẽẽre maa po wo see ɓe ga ndo bay nen wii wer sen wo wa mono.
Taŋgu maaga ndo wãã ɗiggi ɓo ne jobo ga ndo de sãy ɓe ti mono, ko joŋre ɓe go de yoŋre ɗa (Ko paragraf wo 7-8)
9. Taŋgu maaga ndo wo wii jee maaga joŋre ɓay de laa kẽẽ mono, ndo mo hay go de bawge jag jiili ɓo ga hãylà?
9 Ndo ig ko joŋre jobo gemãy blam maaga ndo wãã ɗiggi ɓo ne hẽn là? Hayga ndo raw we see jee ɓen deparday tu no, maapo se ɗig ga ndo bay go de ɗiggi de woore taŋgu maaga ndo maŋ ɗiggi sen wa. (Jõõ. 29:20) Maa po pa mono, hayga jobo ko we go ga ndo de sãy se ti, day ga ndo ig go debaŋ maa wããge ɓe ne hẽn no, se ɗig ga taŋgu maaga ndo maŋ ɗiggi sen mono, ndo hay de mbrawge jag jiili debaŋ. (Ekl. 11:4) Ɗig ndo ga, taŋgu maaga ndo wii jobo mono, ndo bay maaga ndo joŋ go de bawge jag jiili ɓo ga ndo da ge ne naŋ na wa. Amaa, ndo de hay joŋ mbo go de bawge jag jiili ɓo an ga, ndo go de bag jag see ɓo maa da wãy noga da ware, day ga jee ɓen joŋ ge yaŋ diŋ jee maaga nday lag de kẽẽ.
10. Ndo joŋ joŋge de maaga ndo ko we ga jobo de sãy ɓo ti, day ga ɗiggi ɓay bay sen boŋ wa là?
10 Day hayga ndo ko we ga jobo de sãy da’ wer ne ndo ti laylà? Hayga á bay we diŋ jee maaga ndo de sãy dage ɓe ti wa no, ngaɓn go ne hẽn nen joŋre ɓo. Á bay de el maaga ndo mo joŋ doo ga nday da ge kẽẽ yaŋ paga baywa na wa.—1 Kor. 10:24; Efe. 4:25.
11. Ti sir maa po wo ga à kiɗ wãy noga war ne jobo kiɗgi mono, à mo hay ɗig go ti fẽẽre maa hõn wo de woore là?
11 Ti sir maa po wo, kiɗ war noga wãy ne jobo diŋ pããrebe wo, noga jar maaga wo go kluuri. Ti sir maa po wo pa mono, kiɗ wãy noga war ne jobo diŋ jar maa ɓi feele ɓe wo noga bar ɓe wo. Saara joŋ maaga á mo yiŋ wo, maa koge ga á mbaara de cõõre jag kããra yawlà. Hayga à wãã we mo ga ndo mo joŋ nen maaga mãy wo de jee twar mo yiŋ wo maa ko joŋre kããra, noga ga ndo mo kay jar po wo maaga á mo da wo kããra no, ɗig go ti fẽn maaga de cõõre jag wosela yoo ɓaara ɓog ɓuy. Hayga ndo ɗig we ga ndo yaŋ de da’ jobo maaga bar ɓo po noga mbarga ɓo po mo da ne no, kiɗ maa ko jee ɓen go de woore, ko joŋre ɓe go de woore, day kon go de woore ga á mbe de da Jeofa cwãy yawlà. Barge maa de woore de Jeofa de daŋ suŋgu, lakol maaga jee ɓen joŋ, noga pa coo coo ɓe no, noga horog maaga á de ɓe mono. Kaŋ go ti ɓo ga, maŋ ɗiggi diŋ jee maaga ndo de kiɗ wãy noga kiɗ war ne hẽn mono, bay diŋ ndo wa.—Gal. 6:5.
NDO TĨĨ WER NDAY DE JOBO NA TĨĨGI LÀ?
12. Hayga ndo yaŋ de sãy maaga nday mo hay nday de jobo ti no, ndo joŋ joŋge maa wããge ɓe ne hẽn là?
12 Hayga ndo yaŋ de sãy maaga nday mo hay joŋ nday de jobo ti no, ndo joŋ joŋge maaga ndo wããn ne hẽn là? e Maapo ndo wããn go ne hẽn tinoo, noga ti telefone. Wãã go ne jee ɓen de woore ga á de cõõre jag ɓo, lan ga ndo de sãy maaga nday mo hay nday de kããra ti. (1 Kor. 14:9) Maapo ni ndo men wur ne hẽn maa yiŋ jag mo. (Jõõ. 15:28) Day hayga jee ɓen day we ga no, hoo sug ti ɗiggi ɓe se no.
13. Ndo joŋ joŋge de maaga jobo wãã we mo ga se de sãy ɓo ti maa nday là? (Kolos wo 4:6)
13 Ndo joŋ joŋge hayga jobo wãã we ne ndo ga ndo de cõõre jag see là? Jee ɓen dur debaŋ maaga se a wãã ɗiggi ɓe mo mono; wersen, fer wããre ne hẽn de hoo sugi day desãy lay. (Jaŋ Kolos wo 4:6.) Hayga ndo yaŋ de sãy maaga á mo men wur mo mẽ’ maaga ndo ɗig ɗa no, wããn ne hẽne. Amaa, ig debaŋ maa yiŋ jag ne hẽn wa. (Jõõ. 13:12) Hayga ndo bay we de sãy maaga nday mo hay nday de kããra ti wa no, wãã ɗiggi ɓo ne hẽn desãy, amaa go pah tu. Ko maaga Hans, hẽn naa po Autriche, fer wããre ne mãygeman naa po ga hay de sãy ɓe ti mo ɗa: “Ndi wãã ɗiggi ɓi ne hẽn desãy, amaa go paha. Ndi wãã ɗiggi ɓi go ne hẽn deparday tu, werga ndi hay bay de sãy maaga á mo ɗig ga ndi joŋ ge yaŋ de sãy see ti wur po wa. Diŋ wersen ga ndi laa wãã mopo, noga joŋ mopo maaga á mo ɗig ga ndi de ferge coo ɗiggi wa mono.” Amaa ane, hayga ndo da we ga nday mo hay nday de kããra no, ni nday mo ndal go taŋgu ti maaga nday seege de ɓe seege la mono. Fẽn maaga ndo gor see jee lan maapo joŋ mbe sar sar diŋ see ngeel maaga jee ɓen gẽẽ ni mono, noga diŋ see ɗeŋ maaga à gẽẽn le de ɓe mono.
JAR MAA TIGRIŊ JOŊ WO JOŊGE MAA KAY JAR MAAGA BAY WO DE NAARE NOGA DE WAR WA LÀ?
14. Naa teŋ nen jar maaga bay wo de naare noga de war wa ɗa de wããre maa jag naa na teŋge là?
14 Naa joŋ joŋge maa kay kretiyẽ maaga wo de sãy maaga saara da’ war noga da wãy ti là? Ɗeŋ po boŋ ga naa kay ra diŋ ga naa mo joŋ hayya ne see naa ti wããre maaga naa wãã ne hara mono. (Efe. 4:29) Naa mbe maa wii jag see naa ga: ‘Ndi pa’ jar maaga wo de sãy da ware noga da wãy ti yawlà? De maaga ndi ko mãygemanbe po wo de weegemanbe po we wãã wããre de kããra no, ndi hay ɗig go tu ga á wo de sãy kããra ti yawlà ?’ (1 Tim. 5:13) De daŋ sen ɓuy pa mono, naa mo hay joŋ nen maaga kretiyẽ maaga bay wo de wãy noga de war wa mo ɗig wo ga mopo go de gwa’ge see saara wa. Hans, maaga naa wãã le go ti ɓe ciŋ la wãã ga: “Hẽẽrebe maa po wãã wo ga : ‘Ndo bay klee wa so lay; wer mayse ga ndo da wãy ga là?’ Wããre maa doo kay kay joŋ wo nen maaga jar maaga bay wo de da wãy noga da war wa ɗa ko wo see ɓaara go halla ga, day ko wo see ɓaara de joŋ doole maa rawge kiɗ jee teɓog ɓaara.” Ɗawa yaw diŋ ga naa mo hay joŋ suse’ ne hara!—1 Tes. 5:11.
15. (a) Doo maaga naa da’ ɓil Rom wo 15:2 no mono, naa mo hay ɗig go ti mayse taŋgu maaga naa kay jobo maa kiɗ wãy noga war là? (b) Ndo da’ hadge maa hõn de woore ti videyo sen là? (Ko foton lay)
15 Day hayga naa yaŋ ɗiggi ga hẽnbe po wo de mãygemanbe po lag wo yaŋ de kããra de woore laylà? Bible wãã ga naa mo hay hoo sug ti ɗiggi jar lan wo lay. (Jaŋ Rom wo 15:2.) Jar ngaɓa maaga bay wo de da wãy noga war wa bay wo de sãy maaga à mo kiɗ wãy noga war ne saara kiɗgi wa. Day naa hay hoo sug ti ɗiggi ɓaara se no. (2 Tes. 3:11) Jar maa po wo mbaara de sãy kayge ti, amaa hayga jee ɓen bay we de wii naa wa no, ni naa mo hee see naa ni joŋ krambaane wa f. (Jõõ. 3:27) Jar maa po wo de sãy maaga kay saara diŋ de deŋ maa tigriŋ. Lydi, mãygemanbe po wo Alemãy wãã ga: “Maapo diŋ ga ndo ɗe hẽnbe wo le de mãygemanbe yoo jar ngaɓa. Joŋ nen maaga á mo hay yiŋ wo de kããra, day men ra de kããra maaga á mo hay ko wo joŋre kããra de see ɓaara.”
Kretiyẽ da’ wo nen maa yiŋgi de kããra ti ngeel maaga ngaɓa yaŋ ni mono (Ko paragraf 15)
16. Kretiyẽ maaga bay wo de naare wa ɗa mo hay kaŋ wo go ti ɓaara ga hãylà?
16 Naa ɓuy—naa mo hay ba de wãy, de ware, noga baywa yaw—naa joŋ mbe de fruygi! (Siŋ. 128:2) Day hayga ndo yaŋ de sãy da wãy noga da war ti, day ga ndo bay de da’ jobo maaga nday da kããra wa ɗa no, kaŋ ɗiggi ɓo go diŋ ti jonre ne Jeofa. Sin Yi, mãygemanbe po wo Macao wãã ga: “Hayga ndo tab wur maaga nday joŋ ne de jee teɓog ɓon we de maa ti paradisn no, wur maaga ndo bay de wãy noga de war wa go mẽ’ debaŋ. Fruy de wur sen debaŋ day joŋ joŋre de ɓe de woore.” Day mayse hres de maaga ndo da’ jobo maaga joŋre ɓay laa kẽẽ, day ga nday tõõ wer ko joŋre kããra we là? Ti hadge maa peeln wo la mono, naa ko yaŋ ga ndo joŋ joŋge maaga ndo yaŋ nday de jobo, à mo see ti ngeel ɓe la.
SIŊ 137 Naare maa de hã ɓil wo, kretiyẽ maa tenaare wo
a Maa kay moge maa koge ga ndo mbo go de bag jag see ɓo maa joŋ nday de jobo yawla mono, ko article: “Fréquenter (partie 1) : Suis-je prêt ?” ɓil jw.org
b WÃÃRE MAA DE NAA WERE: Ti hadge sen la, lan ti maa peeln mono, “Nday de jobo” noga “ndalge kẽẽ” wãã diŋ ti naw maaga jee twar wo de mãy joŋ wo maa ko joŋre kããra go de woore maaga saara lag mbe yaŋ wãy wo de war yawlà mono. Ɓil sir maa po wo mono, à wãã ga ‘yiŋgi de jobo’, ‘hadge ko joŋre jobo’, noga ‘dage jobo’. Jee twar wo de mãy tĩĩ wo wer nday de kããra de maaga wosela ɓuy yoo ɓaara wãã ne kẽẽ ga ‘ndo de cõõre jag ɓi’, day saara see de ɓe hãã wur maaga saara yãã kããra go maa dage mono; noga wur maaga á maŋ wo ɗiggi ga saara mo hay nday wa so mono.
c Ɓil paragrafn wo mono, à wãã diŋ ne maa twerpiiri wo. Amaa, mãyregemaarebe mbaara de kããge maa joŋ joŋre de yaŋ sen wo lay.
d Á coor ɗuu maa po wo.
e Ti wer maa po wo mono, debaŋ ɓe diŋ jee twar wo see mãy wiigi ɓe ga saara mo tõõ wer nday. Amaa mãy mbe de kããge maa woge wii jee twar lay. (Rud 3:1-13) Maa ko maaga á joŋ joŋge la mono, Ko artikle “Les jeunes s’interrogent. . . Comment lui dire ce que je ressens pour lui ?” ɓil Réveillez-vous! du 22 Octobre 2004.
