Ɓlaggen tĩĩ wer ti tamsir la de maga Manhuli tĩĩ wer caa gete’ ma taŋgun mono. Le ti tĩĩgi wer mono, Manhuli hay diŋ jee peele Baa ma de ele, ama “à oo ti kidolgin ga.” (Jaŋ 8:44) À kiɗ ga goŋge Baa mo hay diŋ ma se. Satan kal caa gete’ ne Efa wãy ma taŋgun so, kal bawge ɓe de wããre ga à mo yã diŋ jag se, mo yãã jag Baa wa. Adam war Efa kal yã jag wãy ɓen la, à tob wo Baa go. Joŋre ɓaara sen mokay laa naa nen gayri wo de hulin mo ti’ so no.​—Jaŋ ɓil Tĩĩgi Were 3:1-6, 19.

De maga Manhulin jãã Efa ga à mo yã jag Baa wa mono, à tĩĩ mo ta’ diŋ wer ree ma kluu ma kaŋ wer jar tebeere ga à mo yã wo waŋ ma ni Baa wa so, mo ɓo’ wo jag Baa go. Ngaɓa jar tebeeren kal wo maŋ blam Manhuli ti joŋre ɓlagge ɓe no. Manhuli kal kolge diŋ “waŋ tamsir” mo ti’ so no.​—Jaŋ ɓil Jaŋ 14:30; 1 Jaŋ 5:19.

Joŋre maga Baa joŋra mo deŋ ɓuy wo bay ɗarge se. Jar tebeere maga Baa joŋra wo de jar Peele ɓen wo ɓuy hay wo de kããge ma yã jag Baa. (Dogge Jag Liŋgi 32:4, 5) Baa joŋ naa maga wosela ɓuy mo joŋ diŋ fen ma ɓil ɓe, joŋge de el no, noga joŋge ɓlagge no. Wosela ɓuy da Baa diŋ se ɓil ɓe, bay do hẽẽne jobo wa.​—Jaŋ ɓil Jag 1:13-15; 1 Jaŋ 5:3.

Baa men jar tebeere wo bo’ jag ɓe go bay ma tum wa. À joŋ sen wer mayla? À joŋ sen ma kaŋ nen naa ga jee tabay po boŋ bay de kããge ma hayge waŋ ma de el ti jar lan wo wa. (Eklesiyaste 7:29; 8:9) Wããre sen diŋ cwãy, werga kiŋgi go wara ndar hiira’( 6000) maga waŋre ma ti tamsir kãã wo ma caa wer durgin wo, ceegen wo,  noga joŋge kẽẽ de ɓlaggen go ti boŋ ga has.​—Jaŋ ɓil Jermi 10:23; Rom wo 9:17.

Waŋ mani Baa bay do ma jar tebeeren wo wa, jar maga yã wo ne da’ wo see ɓaara. (Esayi 48:17, 18) Jeofa caa ge wer waŋre ma ti tamsir wo go ɓuy la ga’ so. Gwa’ ti tamsir la diŋ jar maga yã wo waŋ mani Baa mo tawa.—Esayi 11:9.​—Jaŋ ɓil Danyel 2:44.

Ko filme Baa men gayrin ne naa ti hã patala wer mayla?

Satan wãã ga jobo boŋ bay de kããge ma joŋ peele ne Jeofa de koɗkoɗ wa. Laa wããre gete’ ma sen mo ka’ ɗa! Ndo yaŋ de kããge ma naa nen gete’ Manhulin go paŋ yawla? Baa men wur we ne naa maga naa mo maŋ go boŋ, noga naa maŋ waŋ mani Baa no, noga waŋ mani jar tebeeren wo no. Joŋre naa wo mo deŋ ɓuy kaŋ wo nen ga naa go de maŋge boŋ yaw.​—Jaŋ ɓil Job 1:8-12; Jag Jõõ wo 27:11.

Naa maŋ Baa ga à mo hay diŋ waŋ naa diŋ ga naa kiɗ cwãy ma ɓil Kefder Baa no day naa goŋ Baa ti faage wããre ɓen lay. (Jaŋ 4:23) Hayga naa bay we de sãy seege ti faage ma ni Manhulin wa no, mopo mo tab naa de wããre politik ma ti tamsir mo ti’ wa, de durgin wo wa, doga Yeso hay joŋ ne tawtaw no.​—Jaŋ ɓil Jaŋ 17:14.

Manhuli kol fẽẽre ma de ɓlaggen wo mo deŋ ɓuy go wara de el nen jare. Hayga naa bay we joŋ fẽẽre se deŋ wo wa no, mapo kããre naa wo de kawre naa fer wo fegge ti naa yaw. (1 Piyer 4:3, 4) Ama naa mo maŋ go boŋ. Naa maŋ na diŋ jar maga bay wo yã jag Baa wa mo yaw, noga naa yã diŋ jag jar maga yã wo jag Baa mo yawla? Naa yã jag liŋgi ma de el ma ni Baa wo yaŋ mbaara yawla? Hayga naa joŋ do sen nono, ni naa mbuɗ faale ne gete’ Manhuli maga wãã ga jobo yã jag Baa de koɗkoɗ ga mono.​—Jaŋ ɓil 1 Korente wo 6:9, 10; 15:33.

Dage maga Baa da jar tebeere wo kaŋ nen naa ga ɓlaggen wo de gayrin caa wo wer yaŋ go. Jar maga yã wo wããre sen mo kay we lagge wo yaŋ de ti tamsir la tenen ti’ tum.​—Jaŋ ɓil Jaŋ 3:16.