HADGE 6
Jar Hulin Fer Yaŋ Mbaara Go Birgi Pa Yawla?
1.Wããre ma de cõõre ti jar hulin wo diŋ ma hunla?
De maga Yeso ndu Betani ɓiŋ Jerusalem ɓaŋ mono, bar ɓe Lasar hay go de huli naw naa yaw. Yeso raw wo ɓiŋ tipaalen ni de Marta wo de Mari mãyregeman Lasar wo no. Jar kal tayge ti ngeel ni puri. Yeso kal bir jee hulin le go, ndo ko mbo fruygi maga Marta wo de Mari joŋ wo ne we de maga à ko wo weegeman ɓaaran le go kalge tenen ɓil tu hulin we yawla?—Jaŋ ɓil Jaŋ 11:21-24, 38-44.
Marta hay go de koge ga jar hulin fer wo yaŋ go birgi. À hay go de koge ga Jeofa ferge bir jar hulin wo go tenen ti’ ti tamsir la.—Jaŋ ɓil Job 14:14, 15.
2. Jar hulin wo genla?
Baa wii Adam ga: “Ndo diŋ ɓurgi day ndo ferge diŋ nen ɓurgi.”—TĨĨGI WERE 3:19.
Baa joŋ jar tebeere wo diŋ de beɗef siri. (Tĩĩgi Were 2:7; 3:19) Nenterse po bay nen nãy naa jar tebeere wa. Naa diŋ mnãyse, mopo bay se naa ga joŋ ge yaŋ caw blam huli naa wa. De maga naa hu go mono, ɗiggi naa taw go wur seno. Wersen, Lasar wãã mopo ti boŋ ti ree ma blam huli ɓen ga has werga ɗiggi ɓe hay go de maŋ jage.—Jaŋ ɓil Siŋ Wora 146:4; Eklesiyaste 9:5, 6, 10.
Baa joŋ bon jar nen wuu blam huli ɓaara yawla? Werga Wããre Baa kaŋ nen naa ga ɗiggi jar hulin wo go de maŋ jag mono, hadge wããre nen wuu diŋ gete’e ma cer Baa de koɗkoɗe. Wããre hadge maga Baa joŋ bon jar nen wuu diŋ hadge ma kaŋ ɗag ne Baa see.—Jaŋ ɓil Jermi 7:31.
Ko filme Jar hulin wo genla?
3. Jar hulin wãɗ wo wããre de jar tebeere wo yawla?
Jar hulin wãɗ wo wããre ga, co’ wo sug wããre ga lay. (Siŋ Wora 115:17) Ama jar peele Baa mapo ɓlag wo go, kol wo sõõre go, saara kol se ɓaara go do jar huli wo ma wãɗ wããre de jar tebeere wo. (2 Piyer 2:4) Jeofa bay de dage ga jar tebeere mo wiɗ wo jag jar huli wo wa.—Jaŋ ɓil Dogge Jag Liŋgi 18:10, 11.
4. Wose birgi go la?
Jar milyoŋ pur maga wo go de huli fer wo yaŋ le go tenen ti’ ti tamsir la. Hayba de jar maga bay wo de ko Baa wa, jar maga hay joŋ wo ree de deele ga fer wo yaŋ go birgi ɓuy.—Jaŋ ɓil Lug 23:43; Joŋre 24:15.
Jar maga bir wo le go had wo cwãy mani Baa yaŋ, day saara naa nen hãge ɓil ɓaaran ne Yeso yaŋ go, saara yã jag ɓe yaŋ lay. (Naage Nene 20:11-13) Jar maga bir wo le go, day joŋ wo joŋre ma de el joŋge wo yaŋ ti’ tenen ti tamsir la ma tum.—Jaŋ ɓil Jaŋ 5:28, 29.
5. Birgi jar hulin kaŋ nen naa ti Jeofa ga hãyla?
Baa da jar maga huɗ wo go debaŋ werga à ɓo’ Weel ɓen le go hugi wer naa ɓuy. Birgi jar hulin kaŋ nen naa ti maga Baa da jar tebeeren wo debaŋ mono. De maga jar hulin fer wo le go birgi mono, ndo joŋge de sãy yiŋgi de wose yoo ɓaara mo la.—Jaŋ ɓil Jaŋ 3:16; Rom wo 6:23.
