HADGE 50
Nday joŋ joŋge maaga ti desãy mo hay ɓil feele ɓay là?—Maa de 2 no
Weere wo diŋ kado maaga Jeofa hã ne pããrebe wo. Á da ga pããreben mo soɗ wo ra de woore. Jeofa bag yaŋ ne hara maa kay rage ti joŋre se no. Jeofa ngaɓ fẽẽre maaga weere mo hay joŋ wo nen maaga feelen mo hay ti desãy.
1. Yaŋ maa hõn ga Jeofa baa ne pããrebe wo là?
Jeofa da ga pããrebe mo hay wo da weere ɓaara wo, lan mo hay wo da iggi see ɓaara debaŋ lay. Á da pa ga pããrebe mo koɗ wo weere ɓaaran wo jag re maa de baywoore wo, lan mo joŋ wo joŋre de jag liŋgi maa ɓil Biblen wo maa had rage (Jag jõõ wo 1:8). Á wãã ne pããrebe wo ga: “Had we ra, liŋ we ra doo maga Waŋkluu [Jeofa] kaŋ nen jar ni nono” (Jaŋ Efes wo 6:4). De maaga pããrebe yaŋ wo joŋ joŋre de jag liŋgi maaga Jeofa hã ne hara maa gẽẽ weere ɓaaran wo, lag wo ra we go ne jar peel ga no, se co jag Jeofa.
2. Yaŋ maa hõn ga Jeofa baa ne weere wo là?
Jeofa hã jag liŋgi ne weere wo ga: “Hay we yãɗ jag pan ɓay wo de man ɓay wo” (Jaŋ Kolos wo 3:20). Hayga weere yaŋ wo hoor sug ti pããre ɓaara wo, ga yãɗ wo jag ɓaara lay no, sen co jag Jeofa wo de pããre ɓaaran wo no (Jag jõõ wo 23:22-25). Yeso men saɓlaŋ maa de woore ne hara ti sen de maaga á hay diŋ mbarga ɗa mono. Koh de maaga pããre ɓe hay mbaara de ɓlagge see laybla’ mono, Yeso hay hoo sug ti ɓaara, hay yãã jag ɓaara lay—Lug 2:51, 52.
3. Ɓi feelen ɓuy baa barge de Jeofa na baage là?
Hayga ndo yaŋ de weere no, sen go tinoo tu ga ndo da ga á mo hay wo da Jeofa doo maaga ndo dan no lay no. Ndo bag jag ɗiggi ɓo sen go na bagge là? De joŋge doo maaga Bible wãã ga: “Ndo kal ge [wããre Jeofan] yaŋ ne weere ɓo wo ti. Ndo wãɗ ge ra yaŋ de maga ndo liŋ ni ɓo, de maga ndo ti raŋge, de maga ndo de suuli, de maaga ndo go de urgi ciŋ mono” (Dogge jag liŋgi 6:7). “Kalge” mopo ne jobo ti da wããge ga à mo hay dogge ɓe ne hẽn tum. Doo sen no lay mono, maaga weere ɓo mo ɗaw wo mopo ti mono, say ndo joŋ dogge ɓe ne hara tum. Jag liŋgi sen da wããge ga ndo mo hay tum kiɗ wur maa ndalge de weere ɓon wo ti Jeofa. Á de el maaga jar maa ɓi feelen wo ɓuy mo tay wo nen naw renam tum maa joŋ hadge wããre Baa maa ɓi feele ɓaara no. Hayga ndo yaŋ bay de weere wa no, á de el maaga ndo mo maŋ wur nen naw renam tum maa had wããre Baa boŋ ɓo.
FRUGGI NEN HADGE NO
Naa ko yaŋ maaga kay wo ndo maaga ɓi feele ɓo mo hay ti desãy, lan maaga jar maa ɓi feele ɓon mo ko wo see ɓaara go de yããge mo ɗa.
4. Gẽẽ wee weere ɓayn wo de dage
Gẽẽge mbarga bay gus wa. Day Bible kay ti ɓaŋ sen na kayge là? Jaŋ Jag 1:19, 20, ni ndal wee ti wiigi jag maa blam wo la no:
-
Pããrebe naa wo nen dage go see weere ɓaaran wo de maaga á le’ wo wãã wããre we ne hara na naage là?
-
Wer mayga pããbe mo liŋ mbarga de maaga ɓil ɓe yaŋ de sõõge wa là? a
5. Koɗ wee weere ɓay wo no
Maa koɗ weere wo mono, á de el debaŋ maaga ndo mo ndal de mbarga ɓo maa hõnla caw ɓuy ti maaga jee twar suu de maa twãy mono. Sen bay gus wa. Ko VIDEYO, ni ndal wee ti wiigi jag maa blam wo la no.
-
Wer mayse ga á bay gus maaga pããrebe mo ndal wo de weere ɓaara wo ti ɓaŋ suugi de kããra wa là?
-
Pããrebe maa po ndal wo de weere ɓaara wo ti ɓaŋ suugi de kããra na ndalge là?
Doo maaga á hay go de wããge ne mono, tamsir maa ni Manhúulín de ya’ge de ɓlagge de peel ni tum. Jaŋ 2 Timote 3:1, 13, ni ndal wee ti wiigi jag maa blam la no:
-
Jar maa de ɓlagge maaga verse maa 13 wãã ti ɓaara la diŋ jar maaga suɗ wo de kamliiri wo mono. Day so, wer mayse ga á de el debaŋ maaga pããrebe mo ndal wo de weere ɓaara wo ti ɓaŋ suugi de kããra là? Day wer mayse ga á mo had wo weeren wo, de ɗeŋ maaga á koɗ wo see ɓaara do jar maaga suɗ wo de kamliiri wo là?
Ndo hay mbo de koge ɓe?
Sedeewa Jeofa caa wo kefder wo de videyo wo ngaɓa maa kay pããrebe wo, maaga á mo had wo weere ɓaara wo ti ɓaŋ suugi de kããra, lan maa koɗ rage do jar maaga suɗ wo de kamliiri wo mono. Saɓlaŋ po wo gesiŋ mo ɗag la no:
-
Koɗ weere ɓay wo (videyo)
-
○ “Parler de sexualité à son enfant” (Réveillez-vous! No. 5 2016)
6. Hoo sug ti pan ɓo wo de man ɓo
Mbarga maa klee noga maaga de kalge ɓil jõõ, noga ɓil tigli ngaɓ go ga se hoo sug ti pããre se wo diŋ de ɗeŋ maaga á wãã wããre ne hara mono. Ko VIDEYO, ni ndal wee ti wiigi jag maa blam wo la no.
-
De maaga mbarga de ndalge de pan ɓe noga de man ɓe mono, wer mayse ga á de el maaga á mo wãã wããre ne hẽn de hooge sug là?
-
Nen wããre ɓe wo mono, mbarga ngaɓ go na ngaɓge ga se hoo sug ti pããre se wo là?
Jaŋ Jag jõõ wo 1:8, ni ndal wee ti wiigi jag maa blam la no:
-
Pããre mbarga baa wo yaŋ we ne hẽn no, á joŋ na joŋge là?
7. Hay wee far wur maa had wããre Baa ɓi feele ɓay
Ɓi feele maaga wo diŋ sedeewa Jeofa far wo wur maa had wããre Baa liŋ ni ɓaara. À joŋ hadge maa ɓi feele na joŋge là? Ko VIDEYO, ni ndal wee ti wiigi jag maa blam wo la no.
-
Jar maa ɓi feele joŋ wo joŋge maaga saara mo hay tum joŋ hadge wããre Baa maa ɓi feele ɓaaran là?
-
Pããrebe joŋ wo joŋge maaga hadge wããre Baa maa ɓi feelen mo hay de cõõre là?—Ko foto maa ti tĩĩgi wer hadge no.
-
Mayse joŋ ga day maapo, hadge wããre Baa maa ɓi feele ɓayn joŋ ga là?
Le ɓaa mono, Jeofa hay wãã ne weere Israyel wo ga á mo hay wo tum ndalge ti wããre Baa liŋ ni ɓaara. Jaŋ Dogge Jag liŋgi 6:6, 7, ni ndal wee ti wiigi jag maa blam la no:
-
Ndo joŋ joŋre de jag liŋgi sen na joŋge là?
Yaŋ maa joŋ hadge wããre Baa maa ɓi feele:
-
Kne’ wee nen hadge maaga à joŋ ra ti taygeti wo mono.
-
Jaŋ wee wããre po maaga co jag ɓay ɓil Bible, ni nday ndal wee ti ɓe.
-
Hayga nday yaŋ de kamliiri no, telesarje noga imprime wee mopo maa were wo ti ngeel joŋre maa wer sarsar wo ɓil jw.org.
-
· Hayga nday yaŋ de weere maaga wo de laage ɓil jõõre noga ɓil tigliiri no, ndal wee de ɓaara ti artikle maa ti ngeel maa jõõre wo de tigliiri wo ɓil jw.org.
-
Bir wee jag fẽn po maa ɓil Bible de weere ɓay wo.
-
Ko wee videyo maa ɓil jw.org wo, ni nday ndal wee ti ɓaara.
NAA YAŊ LAƊGE GA: “Joŋren raw wo do, wur maa lagge had wããre Baa de weere wo bay da’ge wa.”
-
Ndo ɗig na ga hãylà?
KLUURI HADGE NO
Jeofa da ga pããrebe mo hay wo da weere ɓaara wo, mo had wo ra, mo koɗ wo ra; á da ga weere mo hay hoo wo sug ti pããre ɓaara wo, mo yãã wo jag ɓaara; lan se da ga jar maa ɓi feele mo tay wo see kããra maa joŋ hadge maa ɓi feele ɓaara no.
Ferge ko nen hadge no
-
Pããrebe had wo weere ɓaara wo na hadge là, á koɗ wo ra na koɗge lay là?
-
Weere ngaɓ wo go ga saara hoo sug ti pããre saara wo na ngaɓge là?
-
Wer mayse ga á de el maaga jar maa ɓi feele mo hay wo far wur nen naw renam tum maa joŋ hadge wããre Baa maa ɓi feele là?
MAA DA’ WER PA
Nday joŋ joŋge maa gẽẽ weere ɓay wo de woore là?
« Six valeurs à transmettre aux enfants » (Réveillez-vous! n° 2 2019)
Bible kay jar maaga wo de soɗ pããre ɓaara maaga wo go de garge na kayge là?
« Prendre soin de ses parents âgés : qu’en dit la Bible ? » (article jw.org)
Blo po hay bay de ko ɗeŋ maa gẽẽ mbarga de woore wa, day se kol go diŋ pããbe maa ti ngeel ɓe.
Pããbe joŋ ga mbarga mo ko see ɓe go see se mbaŋ na joŋge là?
« Comment un père peut-il rester proche de son fils ? » (La Tour de Garde, 1er novembre 2011)
a Ɓil Bible mono, “liŋgi” da wããge ga had mbarga no, noga koɗ ne, ga kay ne maaga á mo coo ɗiggi ɓe, noga maaga á mo men joŋre po maa de baywoore go. Á bay da wããge ti boŋ ga pããreben mo joŋ wo mbargan de ɓlagge wa.—Jag jõõ wo 4:1.
