Gragge, caage ti noga deege ti co wo jag naa sar sar ɓuy. Hayga naa hoo sug we ti jag liŋgi maa ɓil Biblen wo no, naa ɗig ge diŋ fẽn maaga co jag naa tawa ga, amaa ti maaga co jag Jeofa mo lay. Naa ko wee jag liŋgi po wo ti ɓaŋ sen ɗa.

1. Jag liŋgi maa hõn kay wo naa ti ɓaŋ heege õõbe, caage ti noga deege ti là?

Naa hay “lag õõbe ti naa diŋ ti faage ɓe, de sõõre nen lay, ti ngel ɓe lay,” lan naa mo hay joŋ go de yogge, de gragge de woore, nen maaga jar mo ko ga naa “hor [ . . . ] sug ti Baa de el [e]” (1 Timote 2:9, 10). Ko jag liŋgi po wo 4 mo ti’ la ɗa: (1) Gragge naan mo hay “ti faage ɓe.” Doo maaga naa ko ti taygeti wo ne mono, sedeewa Jeofa grag wo sar sare, amaa õõbe maaga á heer wo, ti maaga naa car wo noga deer wo, ɓo’ wo nen go ga á hoo wo sug ti Baa. (2) Heege õõbe “de sõõre nen” da wããge ga ngeel sõõre ɓo mo hay gwa’ go tinoo ta’ maa kaŋ taw jar ɗig ɗiggi figliw wa, lan mo hay ɓo’ nen ga ndo da wããge ga wii ga ndo wa lay. (3) Naa ngaɓ go ga naa heer õõbe ti, caa ti noga dee ti “ti ngeel ɓe” na ngaɓge là? Diŋ ga naa yaŋ bay we yãã wer heerge õõbe wo de caage ti, noga deege ti maaga wo go de dusgi ti tamsir wara mo ti’ wa no. (4) Gragge naan de hay naa nen “horge sug ti Baa” maaga naa de goŋge ɓe go, nen maaga jar mo ko ga naa de goŋge diŋ Baa maa cwãy no—1 Korente wo 10:31.

2. De maaga naa le’ hee õõbe see naa mono, wer mayse ga naa de ɗig go ti hẽẽre naa wo ɗa là?

Á mbe cwãy ga wosela ɓuy ko woore õõbe maaga se hee ti diŋ se. Amaa naa de hay ɗig go ti maaga gragge naan joŋ ge see ne jar na joŋge la lay. Naa dur maaga naa mo joŋ fẽn maa cee ɓil ne jobo wa, amaa naa “joŋ [diŋ] joŋre maga joŋ de el see je ma ɓiŋ [naa] mbaŋ, maga á mo ya’ wer hãge ɓil ɓe ne Baa de egre”—Jaŋ Rom wo 15:1, 2.

3. Gragge naa jãã jar le maa da’ wer ne Jeofa na jããge là?

Á mbe cwãy ga naa da ga naa mo grag de woore, amaa hayga naa yaŋ rawge diŋ ti taygeti noga ti siigi wããre Baa no, naa de dur maaga á mo hay de woore debaŋ pa yaw. Naa bay dage ga gragge naan mo maŋ jag jar go co’ sug wããre maa de cõõren wa. Ba yaw mono, naa da ga gragge naan mo jãã jar le see Baa maaga naa de goŋge ɓe mono, “ma togoɗ hadge mani Baa je yãã naa go no.”—Tid 2:10.

 FRUGGI NEN HADGE NO

4. Gragge naa ɓo’ nen go ga naa hoo sug ti Jeofa

Wer mayse ga naa da ga naa mo hay de gragge de woore là? Jaŋ Siŋ wora 47:3, ni ndal wee ti wiigi jag maa blam wo la no:

• Naa diŋ jar joŋ joŋre ti tu Baa. De maaga naa le’ gragge mono, naa de hay ɗig ɗiggi là?

• Ndo ɗig na ga á mbe ti ngeel ɓe ga naa mo grag go de woore de maaga naa yaŋ rawge ti taygeti, noga ti siigi wããre Baa mo yaw? Wer mayse là?

 5. Hẽẽge õõbe ti, caage ti noga deege ti?

Ko VIDEYO.

Õõbe naan mo hay ba wo suŋgu pur noga mẽ’ẽ, woore ɓen diŋ ga á mo hay go de yogge, de baage see joŋre maaga naa de joŋge ɓe mono. Jaŋ 1 Korente wo 10:24 lan 1 Timote 2:9, 10. Ni ndal wee ti wiigi jag maa blam wo la no. Wer mayse ga naa day hee õõbe maaga . . .

• go de hrosge, de clerge noga de ɗag debaŋ ga là?

• baŋ naa, noga go yeelãlã ga là.

Kretiyẽ bay wo maa hoo sug ti jag liŋgi maa ni Moyisn naŋ wa, amaa jag liŋgi sen kay wo ra maa ko ɗiggi Jeofa ti fẽẽre ngaɓa debaŋ. Jaŋ Dogge jag liŋgi 22:5, ni ndal wee ti wiigi jag maa blam la no:

• Heege õõbe, cẽẽge ti, noga deege ti maa po yaŋ coo jee ɓen go. Jee ɓen joŋ tware, à kol koge ɓe go twãy, noga joŋ twãy à kol koge ɓe go tware. Wer mayse ga naa bay maa joŋge doo sen ne wa là?

Jaŋ 1 Korente 10:32, 33 lan 1 Jaŋ 2:15, 16, ni ndal wee ti wiigi jag maa blam wo la no:

• Wer mayse ga naa de ɗig go de woore ti maaga gragge naa dayla ma’ ɓil jar maa ɓi leege naa wo, noga jar maa ti tayge naa wo là?

• Ɓaŋ ɓay mono, jar da gragge debaŋ diŋ de õõbe maa ẽse wo là?

• Maa po yaŋ nen ɓo ni ga baa see krétiyẽ wo ga yaw? Wer maylà?

 KLUURI HADGE

Maaga naa yaŋ gragge, caa ti naa noga dee ti naa de woore no, ni naa go de ngaɓge diŋ ga naa hoo sug ti Jeofa debaŋ, lan ti jar lay.

Ferge ko nen hadge no

• Wer mayse ga gragge naa, caage ti naa noga deege ti naa wo de maŋge see Jeofa là?

• Verse maa hõn kay wo naa ti ɓaŋ gragge là?

• Gragge naa de maŋge see goŋge maaga naa goŋ Jeofa ti maylà?