HADGE 54

Joŋre maa nen do “wejõõ maaga de deele, de ko re lay” no

KAŊ NE

Yeso diŋ Waŋ tayge jar maa wer ɓen wo no (Efes wo 5:23). Patala Yeso wo go ciŋ. Á de hã joŋre ne Weejõõ maaga de deele, de ko re lay do, maa koɗ jar maa wer ɓe maa gesiŋ lan wo no (Jaŋ Matiye 24:45). Yeso de hã kluu ne “wejõõ” se no. Diŋ wersen so ga á de kããge maa kay jar maa wer Yeson wo no. Weejõõ sen joŋ ge mbe tum hoo sug ti Yeso, lan seege de hẽẽre Yeson wo no. Weejõõ sen diŋ woselà? Á see de naa na seege là?

1. ‘Wejõõ maga de deele de ko re layn’ diŋ woselà?

Le hãã ɓaa tu mono, Jeofa hay hoo jare, noga baa jobo maa koɗ tayge maa ɓe no (Malasi 2:7; Hebre wo 1:1). Blam húulí Yeso mono, hay gwan seege de tayge jar maa wer Yeson wo diŋ apotre wo de jar maa peel tayge maa Jerusalem wo no (Joŋre 15:2). Wara lay mono, jar maa peel tayge po wo mbage, ga à ɗe ra ga “tayge jar maa peel sedeewa Jeofa wo”, hã wo rege maa ti nenterse ne jar maa wer Yeson wo no, lan see wo de joŋre siigi wããre Baa no. “Wejõõ maga de deele, de ko re lay” na diŋ jar sen wo no (Matiye 24:45a). Nenterse Baa de sreŋ jar sen wo ɓuy. Blam maaga á húu wo go mono, saara raw ciŋ ɓiŋ Yeso maa lagge waŋre ti twaywaŋ no.

2. Rege maa ti nenterse maaga Weejõõ maa de deelen hãn diŋ maylà?

Yeso wãã ga “weejõõ maa de deelen” hã ge rege ne jar maa wer sen wo “ti wur ɓe” (Matiye 24:45b). Rege maa kidol hã ẽgre ne naa, kay naa maaga naa mo hay holaŋ. Rege maa ti nentersen—kaŋ nen ga hadge maaga a wo le ɓil Wããre Baa—hã ẽgre maaga naa de sãy ɓe ti ne naa maaga naa mo hay de deele peel Jeofa, maa bag jag joŋre maaga Yeso hã ne naa do go (1 Timote 4:6). Naa re rege maa ti nenterse sen ti taygeti naa maaga naa joŋ ra nen naw renam tum mono, ti taygeti maa kleere wo, lan ti taygeti maa kluuri wo. Naa da’ ra ɓil kefder maaga ndar wo wer Bible mono, lan ɓil videyo wo lay. Rege sen kay naa maa ko dage Jeofa, lan maa ya’ barge maa ti holaŋ naan de ɓe ciŋ ni.

FRUGGI NEN HADGE NO

Wer mayse ga naa de sãy maaga weejõõ maaga de deele, de ko re lay—kaŋ nen ga tayge jar maa peel sedeewa Jeofan wo no, mo kay naa là?

Jar maa peel sedeewa Jeofan hã wo rege maa ti nenterse ne sedeewa Jeofa maa ti tamsir wo ɓuy, hã jag liŋgi ne hara, bag wo yaŋ maa kay rage ne hara

3. Jar maa ni Jeofan mo hay wo hãy hãy wa

Wer jag liŋgi maaga Yeso hã ne hara mono, Jar maa peel Sedeewa Jeofan ko wo nen joŋre sedeewa Jeofan wo ɓuy. Yeso hay seege de kretiyẽ maa taŋgun wo na doo sen no lay. Ko VIDEYO.

VIDEYO: Jeofa kne’ tayge maa ɓe no (6:18)

Jaŋ 1 Korente wo 14:33, 40, ni ndal wee ti wiigi jag maa blam la no:

Verse sen ngaɓ wo go ga Jeofa de sãy maaga Sedeewa sen mo hay wo go hãy hãy wa na ngaɓge là?

4. Weejõõ maaga de deele, de ko re lay see de joŋre siigi wããre Baa no

Joŋre maa kluu maaga kretiyẽ maa taŋgun hay wo joŋge ɓe debaŋ diŋ siigi wããre Baa. Jaŋ Joŋre 8:14, 25, ni ndal wee ti wiigi jag maa blam wo la no:

Hay hã jag liŋgi ti ɗeŋ siigi wããre Baa ne kretiyẽ maa taŋgun wo diŋ wose là?
Piyer wo de Jaŋ joŋ wo joŋre de jag liŋgi maaga apotre maa lan hã wo ne hara na joŋge là?

Joŋre maaga daŋgo, ga jar maa peel sedeewa Jeofan wo de seege de ɓe diŋ siigi wããre Baa. Ko VIDEYO.

VIDEYO: Ɗiggi ɓaara de kaŋge diŋ ti joŋre siigi wããre Baa no (1:24)

Yeso wãã ga joŋre maaga daŋgo diŋ siigi wããre Baa no. Jaŋ Mark 13:10, ni ndal wee ti wiigi jag maa blam la wo no:

Wer mayse ga siigi wããre Baa diŋ joŋre maaga daŋgo nen tayge jar maa peel sedeewa Jeofan wo là?
Wer mayse ga ko nen ti joŋre sen ga go ti tamsir krub ɓuy diŋ “weejõõ maaga de deele, de ko re lay[n]” là?

5. Weejõõ maa de deelen ɓod faage ɗeŋ fẽẽre ne naa

Weejõõ maa de deele de ko re layn hã jag liŋgi ne sedeewa Jeofa maa ti tamsir wo ɓuy ti ɗeŋ siigi wããre Baa no. Á joŋ joŋge maa hã jag liŋgi ne naa là? Naa ko saɓlaŋ see maaga apotre hay wo joŋge ɓaa mo ɗa. Jaŋ Joŋre 15:1, 2, ni ndal wee ti wiigi jag maa blam wo la no:

Jag kretiyẽ maa taŋgun hay bay wo laage wa ti mayse là?
Pol, Barnabas de jar lan raw kne’ re sen na peel wose wo là?

Jaŋ Joŋre 15:12-18, 23-29, ni ndal wee ti wiigi jag maa blam la no:

Taŋgu maaga á maŋ wo ɗiggi sen mono, apotren joŋ wo mayse maaga á mo hay ti dage Baa là?—Ko verse 12, 15, lan 28.

Jaŋ Joŋre 15:30, 31 lan 16:4, 5, ni ndal wee ti wiigi jag maa blam la wo no:

Kretiyẽ maa taŋgun joŋ wo joŋre de jag liŋgi maaga apotre hã wo ne hara na joŋge là?
Jeofa ɓo’ bosa’ ne yããge jag ɓaaran ti na ɓo’ge là?

Jaŋ 2 Timote 3:16 lan Jag 1:5, ni ndal wee ti wiigi jag maa blam la no:

Mayse kay tayge jar maa peel sedeewa Jeofan wo wara de maaga á tay wo far ɗiggi wo mo là?

NAA YAŊ LAƊGE GA: “Ndo yaŋ yãã jag tayge jar maa peel sedeewa Jeofan wo no, ni ndo de goŋge diŋ jar téebeere wo.”

Mayse baw ndo go jiili ga de koɗ rage diŋ Yeso là?

KLUURI HADGE NO

Tayge jar maa peel sedeewa Jeofan wo diŋ “weejõõ ma de deele de ko re lay”, ga Yeso baa ne mono. Á hã jag liŋgi wo de rege maa ti nenterse ne sedeewa Jeofa maa ti tamsir wo krub ɓuy.

Ferge ko nen hadge no

Baa “weejõõ ma de deele de ko re lay[n]” diŋ wose là?
Tayge jar maa peel sedeewa Jeofan koɗ wo naa na koɗge là?
Ndo mbo de hã ɓil ga tayge jar maa peel sedeewa Jeofan wo diŋ “wejõõ ma de deele de ko re lay” no?

Naw tawge hadge no:

Fẽn maa joŋge blam

Doo maaga 2 Tesalonig wo 3:1 jor glog naa ne mono, tos Jeofa tum maaga á mo ɓo’ bosa’ ne tayge jar maa peel sedeewa Jeofan wo ti.

Maa tigriŋ:

Maa tigriŋ