De maaga naa yaŋ yoo kããra de hẽẽre naa wo no, naa ko see naa doo maaga waŋ Dafid wãã ga: “Á de ele, á de cõõre maga hẽẽrebe mo hay wo de lagge de tiŋ, de tayge see kããra” (Siŋ. 133:1)! Laage jagn joŋ de see ɓe ga. Wosela yoo naa ɓuy dur maaga jag naa mo hay tum boŋ.

1. Fẽn maaga daŋgo ti tayge maa ni Baan diŋ maylà?

Ndo wo we ti taygeti ɓil tiŋ-Baa sedeewa Jeofa wo ɓi sir waare no, maapo ga jag maaga à de wããge ɓe ndo laa mbo ne ga, amaa ti fẽẽre maa po wo debaŋ mono, ndo ko see ɓo doo ga ndo ɓi sir ɓo ne no. Wer maylà? Werga genla ɓuy, kefder maaga wùr joŋ joŋre de ɓaara maa frug nen Bible wo diŋ sen boŋ. Lan wùr dur maaga wùr mo hay naa nen dage go see kẽẽ ti holaŋ kããra pa. Koh wùr mo hay ba genla, wùr ɗe [. . . ] ɗuu Jeofa ɓuy, [. . . ] joŋ peele ne hẽn go de tay jag boŋ—Sofoni 3:9 NWT.

2. Ndo joŋ joŋge maaga jag mo hay boŋ ti taygen là?

“Baa we wùu da kããra de jiili ɓay ɓuy” (1 Piyer 1:22). Ndo joŋ joŋre de yaŋ sen na joŋge là? Kaŋ ɗiggi debaŋ diŋ ti fẽẽre maaga jar lan joŋ wo de ɓlagge mo wa, amaa kaŋ ɗiggi ɓo debaŋ diŋ ti joŋre ɓaara maa de wooren wo no. Hay iggi debaŋ diŋ see jar maaga joŋre ɓay de laa kẽẽ, noga ga da wo diŋ fẽẽre maaga ndo da ra lay mo tawa wa, amaa ig see hẽẽrebe maaga joŋre ɓaara sara de ɓon mo lay. Naa dur debaŋ pa maa naa ɗiggi caage kiida jar peel bol go jiili naa.—Jaŋ 1 Piyer 2:17. a

3. Ndo joŋ joŋge de maaga jag ɓo kal we ɓil kẽẽ de hẽnbe po là?

Jag naa mbe boŋ, amaa ane naa diŋ jar téebeere maa de ɓlagge. De ngar ngeel maa po wo mono, naa joŋ fẽn maaga co jag kããra ga, noga naa ma’ ɓil kããra. Day Wããre Baa wãã ne naa ga “hay we go fug ɓil ne kããra ti tum”, se wãã ni pa ga: “Doo maaga Jeofa fug ɓil go wee ti ne mono, joŋ wee kããra doo sen ne lay” (Jaŋ Kolos wo 3:13, NWT). Naa joŋ fẽẽre maaga sõõ wo ɓil Jeofa tum, day se fug mbe ɓil go ne naa ti. Wersen, á da ga naa mo hay go fug ɓil ne hẽẽre naa wo ti lay. Hayga ndo ko we ga ndo ma’ ɓil jobo no, joŋ nen maaga ndo mo kne’ holaŋ ɓay.—Jaŋ Matiye 5:23, 24. b

 FRUGGI NEN HADGE NO

4. Hay caa kiida jar go peel bol wa

Naa de sãy da hẽẽre naa wo ti ɓuy. Amaa maapo se joŋ de gayri see naa maaga naa mo yãã jar maaga bay wo ti wer maa ni naan wa see naa. Mayse kay naa ti sen là? Jaŋ Joŋre 10:34, 35 ni ndal wee ti wiigi jag maa blam la wo no:

• Jeofa yãã jar maa ti wer maa hõnla ɓuy wo le see ɓe maaga á mo hay wo diŋ sedeewa se. Yããge jar maaga bay wo ti wer maa ɓon wa see ɓo joŋ see mo na joŋge là?

• Wããre maaga à de wãɗge ti wer jar maa tigriŋ wo ni ɓay, ga ndo da menge ɓe go diŋ maa hõnlà?

Jaŋ 2 Korente wo 6:11-13, ni ndal wee ti wiigi jag maa blam la no:

• Ndo ɗig ga ndo tĩĩ wer baa barge de jar maaga bay wo ti wer maa ɓon wa na tĩĩgi là?

5. Fug ɓil go ne jar ti, lan joŋ ga jam mo hay lay

Jeofa bay joŋ ɓlagge nen maaga se wii fuggi ɓil do naa wa. Á fug ɓil go ne naa ti de koɗ koɗe. Jaŋ Siŋ. 86:5, ni ndal wee ti wiigi jag maa blam wo la no:

• Kluu fuggi ɓil maaga Jeofa fug go ne naa ti gemãy là?

• Wer mayse ga ndo joŋ suse’ ne Jeofa ti fuggi ɓil sen là?

• Ti mayse wo ga maapo se joŋ de gayri maaga jag mo hay boŋ là?

Naa joŋ joŋge maaga naa mo hay joŋge doo Jeofa ne lay là, lan maaga jag naa mo hay tum boŋ de hẽẽre naa wo là? Jaŋ Jag jõõ wo 19:11, ni ndal wee ti wiigi jag maa blam la no:

• De maaga jobo sõõ ɓil we mo ti, noga ma’ ɓil ɓo we no, ndo joŋ joŋge maa ham jag wããren go gesiŋ là?

 Day maa po naa ma’ ɓil jare. Hayga sen nduu we no, naa joŋ joŋge là? Ko VIDEYO, ni ndal wee ti wiigi jag maa blam wo la no.

• Ɓil videyon mãygeman naan joŋ joŋge maaga jam mo hay là?

 KLUURI HADGE NO

Ndo joŋ ga jag mo hay ti taygen boŋ diŋ de fuggi ɓil go ne jar ti, lan de naage nen dage go see hẽẽreben wo ɓuy.

Ferge ko nen hadge no

• Ndo joŋ joŋge maa men caa kiida jar peel bol go là?

• Hayga jag ɓo kal we ɓil kẽẽ de hẽnbe po no, ndo joŋ joŋge là?

• Wer mãyse ga ndo da fug ɓil go ne jar ti doo Jeofa ne lay là?