Ndo da Jeofa debaŋ, ndo dur debaŋ maaga ndo mo joŋ fẽn po maaga ma’ ɓil ɓe wa. Amaa de sen ɓuy, day maapo ɓlagge raw mbe go mo do. Ɓlagge maa po yaŋ wo kwũy dedaŋ lan wo no (1 Korente wo 6:9, 10). Hayga ndo joŋ ɓlagge maa kwũy we no, kaŋ go ti ɓo ga Jeofa bay go de men da ndo wa; á de sãy maaga se kay mo ti, lan de sãy fug ɓil go mo ti.

1. Naa joŋ diŋ mayse maaga Jeofa mo fug ɓil go ne naa ti là?

Jar maaga da wo Jeofa ko wo see ɓaara nen lawge de maaga á joŋ wo ɓlagge maa kwũy we no. Amaa Jeofa coɓ nen ɓaara. Á wãã ne jar maa ni ɓen wo ga: “Ɓlagge ɓayn mo hay ba wo de sẽẽ yiŋyiŋ yaw, á kol wo yaŋ go de puy doo húulì-baa nono” (Esay 1:18). Hayga naa yaŋ go de men joŋ ɓlagge sen cwãy cwãy no, Jeofa yõõ ti go ti ɓe hase. Naa men joŋ ɓlagge sen go na menge là? Naa law wer re maaga naa joŋ de ɓlagge debaŋ debaŋ mono, naa men joŋ fẽẽre maa de baywoore wo go, lan naa kam Jeofa maaga á mo fug ɓil go ne naa ti. Blam naa dur debaŋ maa men ɗiggi go ti fẽẽre maa de baywoore maaga hay kaŋ wo wer naa go joŋ ɓlagge sen mono, lan naa dur maaga naa mo see doo ga Jag liŋgi maa ni Baa maaga wo go de fããge, wãã wo ne naa no no—Jaŋ Esay 55:6, 7.

2. De maaga naa joŋ ɓlagge maa kwũy we no, Jeofa joŋ joŋre de jar maa peel tayge wo na joŋge maa kay naa là?

Hayga naa joŋ ɓlagge maa kwũy we no, Jeofa wãã ne naa ga naa mo “ɗe jar kluuri ma pel tayge jar ma wer kris wo le see [naa]” (Jaŋ Jag 5:14, 15). Jar maa peel taygen da wo Jeofa debaŋ, da wo hẽẽre ɓaaran wo debaŋ lay. Á wo de kããge maa kay naa maa ‘wũy holaŋ naa de Jeofa—Galad wo 6:1.

Hayga naa joŋ ɓlagge maa kwũy we no, jar maa peel tayge kay wo naa na kayge là? Jar maa peel tayge po wo ɓog noga swa’ joŋ wo joŋre de wããre maa ɓil Bible maaga naa mo ko ga fẽn maaga naa joŋ ne de ɓlagge. Á baa wo yaŋ ne naa, lan ngaɓ wo ɗeŋ maaga naa mo fer le’ge nen ɓlagge sen wa so ne naa. Hayga jobo joŋ ɓlagge maa kwũy we day bay we ko ɓlagge ɓen wa, bay we menge ɓe go wa lay no, jar maa peel tayge naa wo ne go ti tayge no. Sen maaga á mo hãy jar maa ti taygen wa.

 FRUGGI NEN HADGE NO

3. Yããge re ɓlagge naan see naa fer ‘wũy holaŋ naa de Jeofa

Ɓlagge maaga naa joŋ ra ɓuy cee wo Jeofa, diŋ wersen so ga naa wii fuggi ɓil do ɓe mono. Jaŋ Siŋ. 32:1-5, ni ndal wee ti wiigi jag maa blam la no:

• Wer mayse ga á de el maaga naa mo wãã fẽn maaga naa joŋ de ɓlagge ne Jeofa, naa mo yoŋ ne wa là?

 4. Jeofa ko decoo jar maaga joŋ wo ɓlagge mono

Jobo joŋ ɓlagge maa kwũy we, day bay we yãã jag liŋgi maa ni Jeofan wo wa no, à naa ne go ti tayge, naa see wer ɓe ga so lay. Jaŋ 1 Korente wo 5:6, 11, ni ndal wee ti wiigi jag maa blam la no:

• Doo defõõre maaga à ɓo’ ne mopo mono, seege wer jee maaga bay mbiɗ faale ne ɓlagge ɓen wa hãy taygen na hãyge là?

Ɗeŋ maaga Jeofa joŋ jar maaga joŋ ɓlagge de ɓe ɓo’ nen ga á ɗig de woore, ko decoo jare, lan de dage na ɓo’ge là?

 KLUURI HADGE NO

Hayga naa joŋ ɓlagge maa kwũy we, day naa yãã we ga naa joŋ mbe ne we, day naa men joŋge ɓe we go lay no, Jeofa fug ɓil go ne naa ti.

Ferge ko nen hadge no

• Wer mayse ga á de el maaga naa mo sii ɓlagge naan wo go ne Jeofa là?

• Naa joŋ joŋge maaga Jeofa mo fug ɓil go ne naa ti ti ɓlagge naan là?

• Hayga naa joŋ ɓlagge maa kwũy we no, wer mayse ga naa mo hay wii kayge jar maa peel taygen wo là?