HADGE 59
Ndo mbo de kããge maa soɗ bon wo no
Hunla hunla kretiyẽ wo ɓuy yiŋ gi wo de bone. Sen de hay joŋ hẽẽne ne naa yaw?
1. Wer mayse ga à joŋ ge bon naa là?
Bible wãã go celel tu ga: “Jar maga da wo ga saara mo see ti faage Baa de deele de tayge de Yeso Kris mokay, à joŋ ge coo ɓaara yaŋ” (2 Timote 3:12). À hay joŋ bon Yeso werga á hay bay joŋ fẽẽre maa ti tamsir maa ni Manhúulin wo wa. Naa bay diŋ jar maa ti tamsir wa lay, diŋ wersen so ga ngomna wo de jag-Baa maa ti tamsir wo la joŋ ge wo bon naa mono. Sen mo ngel naa wa.—Jaŋ 15:18, 19.
2. Naa bag jag see naa go see joŋge bonn na bagge là?
Naa kaŋ wee ɗiggi naa go ti Jeofa de woore patala ɓaa tu. Hay tum tos Jeofa, hay jaŋ wããre ɓen tum lay. Hay woge ti taygetin wo tum pa. Joŋge fẽẽre sen wo mo deŋ kay wo naa maa soɗ bon ma hõnla ɓuy, koh hay ba maaga a wo le see jar maa liŋ ni naa wo mono. Apotre Pol jee maaga à hay joŋ bon ɓe debaŋ yer ga: “Baa Waŋkluu [Jeofa] diŋ je kay mege; ndi joŋ hẽẽne ga so has”—Hebre wo 13:6.
Hayga naa yaŋ da sii wããre Baa debaŋ no, naa joŋ yaŋ de coɓge debaŋ. Siigi wããre Baa had naa maa kaŋ ɗiggi naa ti Jeofa, lan maaga naa mo hay joŋ hẽẽne jar téebeere wo wa (Jag Jõõ wo 29:25). Doo sen ne kay, koh jar kluuri sirn mo maŋ ba wo jag naa go ti siigi wããre Baa, naa joŋ ge hẽẽne ga, naa joŋ ge mbe tum sii wããre no—1 Tesalonig wo 2:2.
3. Naa da’ mayse de maaga naa lag we ngiŋ jag joŋge bon wo là?
Á mbe cwãy ga naa bay de sãy bon ti wa, amaa de maaga naa dur jag ɓe de ɗiggi maa de woore mono, hãge ɓil naa kol de ẽgre. Naa ko we ga Jeofa kay naa de maaga naa hay go de gayri no, naa kol ko see naa go ti jeŋ ɓe mbaŋ (Jaŋ Jag 1:2-4). Maaga Jeofa ko naa nen bon mono, se joŋ see ne hẽn de baywoore debaŋ, amaa de maaga naa soɗ bon mono, se co jag ɓe. Bible wãã ga: “Hayga nday joŋ bon we diŋ wer fen maga nday joŋ ne de el no, sen de woore nen Baa debaŋ” (1 Piyer 2:20). Poɗge maaga Jeofa poɗ wosela ɓuy maaga oo de deele jag bon diŋ tenen maa tum ti sir la, sir maaga fẽn maaga hãy goŋge Baa maa ti ngeel ɓen joŋ ge ni ga mono—Matiye 24:13.
FRUGGI NEN HADGE NO
Mayse kay naa maa soɗ bon maaga à joŋ naa de ɓe mo là? Jeofa poɗ ge naa na poɗge là?
4. Ndo mbo de kããge maa soɗ bon maaga a wo le see jar maa ɓi feele ɓo wo mono
Naa de sãy goŋ Jeofa ti nen ti desãy. Amaa Yeso ɓo’ sug naa ga maapo jar maa ɓi feele naa kaŋ ge wo ne naa nene. Jaŋ Matiye 10:34-36, ni ndal wee ti wiigi jag maa blam la no:
-
Maaga jobo maŋ we ga se goŋ Jeofa no, maapo ga jar maa liŋ ni ɓaara joŋ wo joŋge là?
Maa ko saɓlaŋ ti ɓaŋ sen mono, Ko VIDEYO, ni ndal wee ti wiigi jag maa blam la no:
-
Hayga jar maa ɓi feele ɓo wo noga bar ɓo po bay we dayge ga ndo mo kol sedeewa Jeofa wa no, ndo joŋ joŋge là?
Jaŋ Siŋ wora 27:10, lan Mark 10:29, 30. Blam maaga nday jaŋ verse maa hõnla ɓuy we go no, ni nday ndal wee ti wiigi jag maa blam la no:
-
Hayga jar maa liŋ ni ɓay wo, noga bar ɓo po yaŋ wo kaŋge mo nen ga ndo mo goŋ Jeofa wa no, verse sen kay ndo na kayge là?
5. Hay tum goŋ Jeofa, koh à mo hay ba joŋ bon ɓo
Á wii coɓge do naa maa goŋ Jeofa de maaga jar yaŋ kiɗgi ga saara maŋ jag naa go no. Ko VIDEYO, ni ndal wee ti wiigi jag maa blam la no.
-
Videyon jor glog ɓo na jorge là?
Jaŋ Joŋre 5:27-29 lan Hebre wo 10:24, 25. Blam maaga nday jaŋ verse maa hõnla ɓuy we go no, ni nday ndal wee ti wiigi jag maa blam la no:
-
Koh à mo maŋ ba jag naa go ga naa mo sii wããre Baa wa so, ga naa mo joŋ taygetin wo wa so, wer mayse ga á de el maaga naa mo hay mbe tum goŋ Jeofa là?
6. Jeofa kay ge ndo yaŋ maa soɗ ren wo no
Sedeewa Jeofa maa kiŋgi sar sare, ga a wo le ti sir sar sare mbaara tum goŋ Jeofa de deele, koh de maaga à mbe de joŋ bon ɓaara mono. Maa ko fẽn maaga hay kay ra mono, Ko VIDEYO, ni ndal wee ti wiigi jag maa blam la no.
-
Mayse kay Sedeewa Jeofa maa ɓil videyo sen wo la maa soɗ bon là?
Jaŋ Rom wo 8:35, 37-39 lan Filip wo 4:13. Blam maaga nday jaŋ verse maa hõnla ɓuy we go no, ni nday ndal wee ti wiigi jag maa blam la no:
-
Verse sen hã bawge go ne ndo jiili na hãge ga ndo mbo de kããge maa ooge jag re maa hõnla ɓuy là?
Jaŋ Matiye 5:10-12, ni ndal wee ti wiigi jag maa blam la no:
-
Wer mayse ga ndo mbo de kããge maaga ndo joŋ de fruygi koh à mo hay ba joŋ bon ɓo là?
À hay joŋ bon sedeewa Jeofa wo miliyoŋ pur debaŋ. Saara lag de deele peel Jeofa ɓuy jag bon sen wo no. Ndo mbo de kããge maa goŋ Jeofa nen bon lay!
NAA YAŊ LAƊGE GA: “Tee bon maa hã’ soɗ doo ɓi ga.”
-
Ndo kay jobo maaga wãã doo sen ne na de verse maa hõn wo là?
KLUURI HADGE NO
Durgi maaga naa dur maa goŋ Jeofa co jag ɓe debaŋ. Wer kayge maa ɓen mono, naa mbe de kããge maaga naa soɗ bon maa hõnla ɓuy.
Ferge ko ne hadge no
-
Wer mayse ga à joŋ bon krétiyẽ wo là?
-
Ndo bag jag see ɓo go see joŋge bon patala ɓaa na bagge là?
-
Mayse hã bawge go mo jag jiili ga ndo mbo de kããge maa goŋ Jeofa koh nen wer bon maa hõnla ɓuy ne?
MAA DA’ WER PA
Sedeewa Jeofa po jõõ joŋ daŋgay wer maaga á laa dayge maŋ soode ga. Jeofa kay ne na kayge ne?
À hay kaŋ ne blo po wo de wãy ɓe nen ga á mo goŋ wo Jeofa wa nen kiŋgi puri. Mayse kay ra ne?
Tĩĩ wer had soɗ bon go patala ɓaa.
« Prépare-toi dès maintenant à la persécution » (La Tour de Garde, juillet 2019)
Naa de hay ko jar maa liŋ ni naa wo na koge là, lan naa mo joŋ mayse maaga naa mo hay tum jam de ɓaara, mo hay goŋ Jeofa de deele là?
« La vérité apporte, ‘‘non pas la paix, mais l’épée’’ » (La Tour de Garde, octobre 2017)
