HADGE 60
Hay tum ya’ wer barge ɓo de Jeofa ciŋ ni
Ndo had fẽẽre ti Jeofa nen hadge Bible sen la debaŋ. Fẽẽre maaga ndo had ra ya’ wo wer dage ɓo see Jeofa ciŋ ni, joŋ wo ga ndo mo hã see ɓo go ne hẽn nen tosge, blam sen ndo joŋ batem go. Day hayga ndo yaŋ bay we de joŋ sen wa ɗa no, maapo ga ndo de ɗiggi ga ndo joŋ ge ne go la mbaŋ. Amaa gẽẽge ɓo go ciŋ ti nentersen taw bay ɗiŋ de batem wa. Hay tum ya’ wer barge ɓo de Jeofa ciŋ ni. Ndo joŋ na joŋge là?
1. Wer mayse ga ndo mo hay tum ya’ wer barge ɓo de Jeofa ciŋ ni là?
Naa mo dur debaŋ maa ya’ wer barge naa de Jeofa ciŋ ni. Wer maylà? Sen werga naa “mo cel go bas see naa wa” (Hebre wo 2:1). Mayse kay naa maaga naa mo hay tum de deele peel Jeofa là? Diŋ siigi wããre Baa, lan diŋ joŋre maa wer sar sar wo ga naa joŋ ra ne Jeofa mono (Jaŋ Filip wo 3:16). Goŋge Jeofa diŋ joŋre maaga daŋgo nen naw naan ɓuy!—Siŋ wora 84:11.
2. Ndo mo hay tum joŋ mayse maa tigriŋ wo pa là?
Hadge ɓon go de tawge, amaa ndo de tĩĩ wer maŋ blam Yeso na mo kay ɗa no. Bible wãã ga naa mo “laa . . . joŋre ma defay ti [naa]” (Efes wo 4:23, 24). Ndo joŋ sen na joŋge là? Hay tum frug nen wããre Baa, hay tum woge ti taygeti wo. Ndo yaŋ joŋge doo sen ne no, ndo da’ wer yaŋ go ne Jeofa de woore, lan ne joŋre ɓe maa de wooren wo lay. Dur maa joŋge diŋ fẽẽre maaga Jeofa wii ra do ɓo mono, nen maaga seele ɓo mo co jag ɓe, lan ndo mo fruy ɓil ɓe.
3. Jeofa kay mo na kayge maaga ndo mo gẽẽ go ciŋ là?
Bible wãã ga: “Baa . . . de see ɓe kol we ge yaŋ go ti ngel ɓe keɗed. Kol we yaŋ kiŋkiŋ, hã egre yaŋ we, lag we yaŋ ciŋ ti glog tiŋ maa de booge kiŋkiŋ no” (1 Piyer 5:10). Ɓlagge jãã jag wosela yoo naa ɓuy. Amaa Jeofa hã fẽẽre maaga naa de sãy ɓaara ti ne naa maa naa blum jãdge sen wo no (Siŋ wora 139:23, 24). Á wãã ga se hã ɗiggi wo de ẽgre maa joŋ fẽẽre maa ti ngeel ɓe yaŋ wo ne naa—Jaŋ Filip wo 2:13.
FRUGGI NEN HADGE NO
Naa ko maaga ndo joŋ joŋge maaga ndo mo hay tum ya’ge see Jeofa là, lan bosa’ maaga ndo da’ wer barge ɓo de Jeofa diŋ mayse wo là.
4. Hay tum ndalge de bar ɓo maaga daŋgo mono
Wer tosge wo de hadge Bible, ndo baa barge de Jeofa. Ndo joŋ joŋge maaga á mo hay wo tum kay ndo maa ya’ wer barge ɓo de Jeofa ciŋ ni là?
Jaŋ Siŋ wora 62:9, ni ndal wee ti wiigi jag maa blam la no:
-
Ndo wii Jeofa nen tosge diŋ ti mayse ga ya’ barge ɓo yaŋ de ɓe ciŋ ni là?
Jaŋ Siŋ wora 1:2, ni ndal wee ti wiigi jag maa blam la no:
-
Ndo kol jaŋ Bible na jaŋge maaga barge ɓo de Jeofa mo ya’ ciŋ ni là?
Ndo joŋ na joŋge maaga fruggi nen Bible mo kay ndo debaŋ là? Naa ko yaŋ po wo la maa kay moge ɗa. Ko VIDEYO, ni ndal wee ti wiigi jag maa blam la no.
-
Ndo joŋ joŋre de yaŋ maa hõn wo ɓil videyo sen la là?
-
Ndo da frug nen Bible ti maylà?
5. Dur maa kaŋ mopo peel ɓo maa joŋge ne Jeofa
Ndo yaŋ tum kaŋ mopo peel ɓo maa joŋge ne Jeofa no, ndo gẽẽ go ciŋ ti nenterse gusi. Ko VIDEYO, ni ndal wee ti wiigi jag maa blam la no.
-
Kameron hay tum de ɗiggi maa joŋ fẽẽre ne Jeofa jiili. Á da’ fruygi maa hõn wo wer sen là?
Wosela ɓuy bay de kããge maa rawge ti sir maa tigriŋ sii wããre Baa wa. Amaa wosela ɓuy mbe de kããge maa ɗiggi go de woore ti joŋre po maaga se joŋ ge ne ne Jeofa. Jaŋ Jag jõõ wo 21:5, blam ni ndo ɗig ti fẽẽre po maaga ndo de ɗiggi ga ndo joŋ ge ra ne Jeofa . . .
-
ti tayge ɗa.
-
ti ɓaŋ siigi wããre Baa ɗa.
Yaŋ maa ɓil verse sen la kay ge ndo maa bag jag ɗiggi ɓo sen wo go na kayge là?
Á bay ba de woore maaga ndo mo . . .
-
‘wũy nen tosge ɓon wo wa?
-
Jaŋ Bible go ɓuy wa?
-
Ko jar maa ti tayge ɓon wo go ɓuy wa?
-
Tõõ wer had Bible ne jobo wa?
-
Maŋ servis piyoniye nen few boŋ, noga mo kol piyoniye permanaŋ wa?
-
Kol jee kay jar maa peel tayge wo, noga jee maa peel tayge, hayga ndo yaŋ twar no wa?
6. Hay mbo tenen caw tum!
Jaŋ Siŋ wora 22:27, ni ndal wee ti wiigi jag maa blam la no:
-
Ndo joŋ joŋge maaga ndo mo hay tenen caw tum là?
KLUURI HADGE NO
Hay tum ya’ wer barge ɓo de Jeofa ciŋ ni, ɗig ti joŋre maaga ndo joŋ ge ra yaŋ ne Jeofa mono. Ni ndo joŋ yaŋ tenen caw tum.
Ferge ko nen hadge no
-
Wer mayse ga ndo go de bawge jag jiili ɓo ga Jeofa kay mo yaŋ maaga ndo mo hay goŋge ɓe de deele là?
-
Ndo ya’ wer barge ɓo de Jeofa ciŋ ni na ya’ge là?
-
Ndo yaŋ de ɗiggi maa joŋ mopo ne Jeofa tum jiili no, sen kay mo na kayge là?
MAA DA’ WER PA
Co jag Jeofa debaŋ diŋ maylà? Diŋ mopo maaga naa joŋ go tinoo hã’ ɓaale boŋ tu maa ngaɓge ga naa de deele peel ɓe yaw, noga diŋ maaga naa tum de deele peel ɓe mono?
Jobo maaga de joŋ joŋre ne Jeofa de deele bas mbe fruygi maaga se da’ ti joŋre ne hẽn go de ngar ngeel po lay. Day á joŋ joŋge maaga se fer da’ge ɓe ne?
Retrouve de la joie grâce à l’étude et à la méditation (5:25)
Ɗig ti maaga joŋge fẽẽre maa ti nenterse tĩĩ wo biŋgi mo ɓil na biŋgi là, lan ndo bag jag ɓaara go na bagge la ɗa.
Wer mayse ga á de el maaga krétiyẽ mo hay go de ruggi ti wããre Baa là; day ndo rug go na ruggi là?
