Twaywaŋ maa ni Baan go ti joŋre. Á coo ge fẽẽre yaŋ debaŋ ti tamsir la mbaŋ. Naa ko fẽẽre po wo de woore ga Twaywaŋn bag ge jag ɓaara yaŋ go ɗa.

1. Twaywaŋ maa ni Baan fer ge jam wo de deele le ti tamsir la na ferge là?

Yeso, Waŋ Twaywaŋ maa ni Baan caa ge wer jar debaycõõre wo de ngomna maa ti sir lan wo go ɓuy nen durgi Armagedoŋ (Naage nene 16:14,16). Ti wur sen mo kay, fẽẽre maaga Bible hay go de wããge ti ɓaara ɓuy bag ge wo jag go ti ngeel ɓaara: “Ig la me’ koɗ mono, je debaycõõren joŋ ge gà so” (Siŋ wora 37:10). Wer Twaywaŋ maa ni Baan mono, Yeso joŋ ge yaŋ ga jam wo de deele mo bag wo tamsir go ɓuy.—Jaŋ Esay 11:4.

2. De maaga dage Baa joŋ we go gesiŋ la no, sirn kolge na kolge là?

Wer joŋre Twaywaŋ maa ni Baan mono, “sirn joŋ ge diŋ ma jar ma keɗed wo no, day á lag ge wo ni hãã diŋ ma tum” (Siŋ wora 37:29). Ɗig ɗa, hayga wosela ɓuy ti tamsir la hay we de deele, ga jar ɓuy da Jeofa, lan da kããra lay no! Jobo le’ ge cege ga so, wosela ɓuy joŋ ge tenen caw tum.

3. Twaywaŋ maa ni Baan joŋ ge na mayse blam maaga à caa wer jar debaycõoren wo we go là?

Blam maaga á caa wer jar debaycõõren wo we go no, Yeso joŋ Waŋ nen kiŋgi 1.000. Ti wur sen mono, Yeso wo de jar maa 144.000 ga joŋ ge wo ti jeŋ ɓe, kay ge wo jar téebeere wo maaga á mo kol wo go bay ɓlagge see. Ti tawgeti kiŋgi maa 1.000 mono, sirn kol ge go diŋ paradis, go de baage de jar maaga wo de fruygi, ga wo de da’ ti see ɓaara wer hooge sug ti jag liŋgi maa ni Jeofan wo mono. Blam sen mo kay, Yeso fer wããge wããre fẽẽren ɓuy ne Pan ɓe Jeofa. Ɗuu Jeofa joŋ ge go ‘de fããge’ ti wur sen de daŋ maa ɓaan ɓuy (Matiye 6:9, 10, NWT). Jeofa naa ge nen yaŋ go ti wur sen diŋ Waŋ maa ti ngeel ɓe, ga ɗaw jar maa ɓen wo do mono. Jeofa caa ge wer Manhúulí, sõõre wo de jar maaga maŋ wo wer ɓaara giŋ Waŋ maa ni Baan yaŋ go ɓuy (Naage nene 20:7-10). Fẽẽre maa de woore maaga Twaywaŋ maa ni Baan hã ge ra ne naa joŋ wo maa tum.

 FRUGGI NEN HADGE NO

4. Twaywaŋ maa ni Baan caa ge wer ngomna maa ti tamsir lan wo go ɓuy

“Je táabay hay waŋ ti kan ɓe je táabay ma ɓo’ ge ɓe nen coocoo” (Eklesiyaste 8:9). Jeofa caa ge wer joŋge jar de gurn yaŋ go de Twaywaŋ maa ɓe no.

Jaŋ Daniyel 2:44 lan 2 Tesalonig wo 1:6-8, ni ndal wee ti wiigi jag maa gesiŋ la wo no:

• Jeofa wo de Weel ɓe Yeso joŋ ge wo ngomna wo de jar maa wer ɓaaran wo joŋge là?

• Fẽẽre maaga ndo laa ra ti Jeofa wo de Yeso hã bawge go ne ndo jag jiili ga joŋre ɓaaran joŋ ge ti ngeel ɓe, lan de deele lay na hãge là?

5. Yeso diŋ Waŋ maaga tee ɓe bay wa

Werga Yeso diŋ Waŋ Twaywaŋ maa ni Baan so mono, á joŋ ge fẽẽre maaga jar maa gesiŋ wo la da’ wo see ɓaara wer ɓaara yaŋ debaŋ. Ko VIDEYO maa koge ga Yeso de sãy kay jar ti, lan maa koge ga Pan ɓe de hã ẽgre ne hẽn maa joŋge ɓe.

De maaga á hay gesiŋ la mono, Yeso ngaɓ fẽẽre maaga Twaywaŋ maa ni Baan bag ge jag ɓaara yaŋ go ne naa. Yoo fẽẽre maa blamn wo mo ti’ la ndo de sãy maaga maa hõn mo bag jag go ti taŋgu là? Jaŋ verse maa wer ɓaaran ga ngaɓ wo bagge jag fẽẽre sen wo go mono.

6. Twaywaŋ maa ni Baan a ge de ngeel maaga tee ɓe bay wa ne naa

 KLUURI HADGE NO

Twaywaŋ maa ni Baan bag jag fẽẽre maaga Jeofa hay wãã ga se joŋ ra yaŋ go ɓuy. Á kol ge tamsir go ɓuy diŋ paradis, go de baage de jar maaga wo de deele, ga goŋ wo Jeofa yaŋ maa tum.

Ferge ko nen hadge no

• Twaywaŋ maa ni Baan fãã ge ɗuu Jeofa go na fããge là?

• Wer mayse ga naa hã ɓil ga Twaywaŋ maa ni Baan bag ge jag fẽẽre maaga Bible wãã ra go ɓuy là?

• Fẽn maa hõn ga ndo da ga Twaywaŋ maa ni Baan mo bag jag ɓe go taŋgu lan wo ɓuy là?