HADGE 14

Baa da ga goŋ se na de ɗeŋ maa hõnlà?

KAŊ NE

Doo maaga naa laa le ti hadge maa glogn la ne mono, Jag-Baa bay wo de cõõre jag Baa ɓuy wa. Amaa naa mbe de kããge maa goŋ jee joŋ naan doo ga á da nono. “Goŋge” noga “jag-Baa” maa hõn ga co jag ɓe so là (Jag 1:27)? Naa ko maaga wããre Baa had ti ɓe mo ɗa.

1. Naa da’ ɗeŋ goŋge Baa maa ti ngeel ɓen na genlà?

Naa da’ ɗeŋ goŋge Baa maa ti ngeel ɓen ɓil Bible. Yeso wãã ne Baa nen tosge ga: ‘Wããre ɓon diŋ cwãy’ (Jaŋ 17:17). Jag-Baa maa po men wo wããre maa ɓil Biblen go ti jeŋ, day had wo diŋ ɗiggi jar téebeere wo de fẽẽre maa ti wer ɓaara wo. Jeofa bay de sãy jar maaga “ɓo’[wo] jag liŋgi” ɓen go wa (Jaŋ Mark 7:9). Ba yaw mono, naa fruy Jeofa de maaga naa jaŋ wããre ɓen, blam naa joŋ joŋre de yaŋ maaga naa da’ ra ɓil ɓe ni lay mono.

2. Naa goŋ Jeofa na goŋge là?

Jeofa diŋ jee joŋ naa no, jee maaga naa nen goŋge diŋ se boŋ tu (Naage nene 4:11) Sen da wããge ga naa mo da Jeofa, naa mo goŋ ne, joŋ joŋre de koore maa de ceɗge wo wa, noga foto wo wa.—Jaŋ Esay 42:8.

Maaga Jeofa mo yãã goŋge naa mono, daga á mo hay “bay ɗage de cõõre jag ɓe” (Rom wo 12:1). Sen da wããge ga naa mo hay seege wer de deele wããre maa ɓe no. Jobo maaga yaŋ da Jeofa no, hoo sug ti jag liŋgi ɓe maa ti ɓaŋ dage wãy noga dage ware. Jee ɓen ɗee go see fẽẽre maa de baywoore wo doo ɗadge cugi, ɗaage fẽẽre maa taɗ see ge wo, noga taɗge go de yii wo. a

3. Naa mo tay de jar tigriŋ wo maa goŋ Jeofa wer maylà?

Taygeti naa maa nen naw renam kay wo naa maa “togoɗ Jeofa. . . yoo tayge jar ma de deelen wo” (Siŋ wora 111:1,2, NWT). Naa togoɗ Baa na de ‘waage siŋ ne hẽne (Jaŋ Siŋ wora 104:33). Jeofa wii naa ga naa mo wo ti taygeti werga á da naa. Á de koge ga taygetin kay wo naa maa da’ tenen maa tum. Ti taygeti naan wo mono, naa jor glog kããra.

FRUGGI NEN HADGE NO

Naa ko wer mayse ga Jeofa bay de sãy maaga goŋ se de koore maa de ceɗge wo ti wa là. Day ni naa mo ko ɗeŋ maa togoɗ Baa ma ti ngeel ɓen lay.

4. Naa joŋ wee joŋre de koore wo de foto wo maa goŋ Baa wa

Naa ko tẽ’ ga sen bay de cõõre jag Baa wa là? Ko VIDEYO ni ndal wee ti wiigi jag maa blam la no.

VIDEYO: Baa mbe de dage ga goŋ se de koore maa de ceɗge noga foto wo yawlà? (3:26)

Re mayse hay da’ jar maaga hay wo goŋ Baa le ɓaa de koore wo mo là?

Jar maa po ɗig wo ga saara yaŋ goŋ Baa de koore wo no, saara ko see saara go see ɓe mbaŋ debaŋ. Amaa sen bay go ya’ ra ge see Baa hãã wa yaw? Jaŋ Laage go 20:4-6 wo de Siŋ wora 106:35,36, ni ndal wee ti wiigi jag maa blam wo la no:

Fẽẽre maa de baywoore noga foto maa hõn wo ga jar goŋ Baa de ɓaara seɓaa là?
Jeofa ɗig ti fẽẽre sen wo mo deŋ na ga hãylà?
Ndo ti see ɓo ndo ɗig ti ɓaara na ga hãy lay là?

5.Goŋge Jeofa boŋ tu yãã naa go jag hadge maaga bay wo ɓil Bible wa

Ko maaga goŋge Jeofa ti ngeel ɓe yãã naa go jag hadge maaga bay wo ɓil Bible wa mo ɗa. Ko VIDEYO.

VIDEYO: Cwãy pogn le go (5:16)

Jaŋ Siŋ wora 91:14, ni ndal wee ti wiigi jag maa blam la no:

Jeofa ga se joŋ mayse yaŋ ne naa hayga naa goŋ we diŋ se boŋ tawa tu là?

6. Naa goŋ Jeofa ti taygeti naa wo no

Ti taygeti naan wo mono, naa togoɗ Jeofa, naa jor glog kããra de wããre wo de ‘waage siŋ. Jaŋ Siŋ wora 22:23, ni ndal wee ti wiigi jag maa blam wo la no:

Wããre maaga ndo laa ra ti taygeti seɓaa mbaara de fruy mo ge yawlà?
Ndo bay de sãy maaga ndo bag jag see ɓo go maa wããge boŋ wa an yawlà?

7. A co jag Jeofa de maaga ndo yaŋ wãã fẽẽre maaga ndo laa ra ti hadge ɓon ne jar maa tigriŋ wo mono

Ɗeŋ wããge ti fẽẽre maaga ndo laa ra mbaara ngaɓa deŋ. Jaŋ Siŋ wora 9:2; 34:2, ni ndal wee ti wiigi jag maa blam la no:

Fẽn maa hõn ga ndo laa ɓil Bible ga ndo de sãy wããge ɓe ne jar maa tigriŋ wo ti lay là?

NAA YAŊ LAƊGE GA: “Jag-Baa wo ɓuy de woore.”

Ndo ɗig na ga hãy là?

KLUURI HADGE NO

Naa co jag Jeofa de maaga naa yaŋ goŋge diŋ se boŋ tawa tu, naa yaŋ togoɗge ɓe ti taygeti wo, lan naa yaŋ wãã fẽẽre maaga naa laa ra ne jar tigriŋ wo lay no.