HADGE 15
Yeso diŋ woselà?
Jar go de laa ɗuu Yeso ti wer sir ɓuy, amaa bay wo de koge de woore ga á diŋ woselà wa. Day ɗiggi jar ti Yeso sar sar debaŋ. Bible wãã ti ɓe na ga hãy lay so là?
1. Yeso diŋ woselà?
Yeso diŋ jee peele Baa maa de ẽgre ga le ciŋ. Jeofa joŋ ne go taŋgu fẽẽre lan wo ɓuy. Diŋ wersen ga à ɗen ga “jag fẽẽre maa de joŋgen wo mo deŋ ɓuy tuu” (Kolos wo 1:15). Bible wãã ga Yeso diŋ ‘Weel Baa maa boŋ’ werga diŋ se boŋ tu ga Jeofa joŋ de do ɓe mono (Jaŋ 3:16). Yeso hay tum joŋ joŋre ɓiŋ pan ɓe Jeofa, maa kayge ɓe joŋ fẽẽre lan wo ɓuy (Jaŋ Jag jõõ wo 8:30). Hãã go wara, Yeso mbe ɓiŋ Jeofa maŋ ɗa. À ɗen ga “Wããre” werga á wãɗ wããre maa jag Baa go.—Jaŋ 1:14.
2. Yeso a ti tamsir là maa maylà?
Kiŋgi go wara de daŋ ndar ɓoge, Jeofa hay joŋ fẽn mbudgi po. Á hay kol tenen Yeso go ɓil Mari mãy po maaga hay bay de ko jee twar wa ɗa mono. Diŋ de ɗeŋ maa sen so ga Yeso biŋ go jee taabay mono (Jaŋ Lug 1:34, 35). Jeofa ɓo’n le gesiŋ maaga á mo kol Mesi noga Krisi, lan mo yãã wer jar go ɓuy. a Profesi maa ɓil Bible ti Mesin bag wo jag go ti ɓe; nen maaga jar mo ko Yeso go ga á diŋ “Mesi, Weel Baa maa tenen no”—Matiye 16:16.
3. Yeso patala na genlà?
Blam húulí Yeso mono, Jeofa birn le go doo Nenterse nono, se kal ferge ciŋ. ‘Baa kol Yeso go kluu dedaŋ maysela maysela ɓuy’ (Filip wo 2:9). Patala la Yeso diŋ jobo maa kluu debaŋ, ga ya’ wer Jeofa mo tu.
FRUGGI NEN HADGE NO
Naa ko wee go de woore ga Yeso diŋ woselà, lan wer mayse ga á de el maaga naa mo kon là?
4. Yeso bay diŋ Baa maa de ẽgre daŋge ɓuy wa
Bible had ga koh de maaga Yeso mbe diŋ nenterse maa de ẽgre wo ciŋ laybla mono, á tum hoo sug ti Baa, Pan ɓe, Jeofa. Naa wãã doo sen wer maylà? Ko VIDEYO maa ko maaga Bible had ga Yeso bay dega’ de Baa maa de ẽgre daŋge ɓuyn wa mono.
Verse maa gesiŋ wo là kay wo naa maa koge ga Jeofa bay wo dega’ de Yeso wa. Jaŋ versen wo go boŋ boŋ ɓuy, ni ndal wee ti wiigi jag maa wer ɓaaran wo no.
Jaŋ Lug 1:30-32.
-
Jee peele Baan wãã na ga Yeso diŋ mayse Jeofa Baa “maa Ciŋ” là?
Jaŋ Matiye 3:16, 17.
-
Blam batem Yeso mono, gẽẽge maaga a le ciŋ wãã na ga hãylà?
-
Ndo ɗig na ga á hay diŋ gẽẽge woselà?
Jaŋ Jaŋ 14:28.
-
Wose kluu yoo pããbe wo de weeln là? Wose wãã wããre kẽẽ yoo ɓaara là?
-
Yeso hay ɗe Jeofa ga pan se. Sen had na ga hãylà?
Jaŋ Jaŋ 12:49.
-
Yeso ɗig na ga saara diŋ jobo boŋ de pan se yaw? Ndo ɗig na ga hãy lay là?
5. Mayse ngaɓ wo ne naa ga Yeso diŋ Mesi là?
Profesi maaga kay wo maa da’ wer ne Mesi, jee maaga Baa baa maa yãã wer jar téebeere wo go ɓuy mɓaara ɓil Bible deŋ. Ko VIDEYO maaga ngaɓ profesi maaga bag wo jag go ti Yeso de maaga á hay gesiŋ la mono.
Jaŋ profesi sen wo no, ni ndal wee ti wiigi jag maa blam wo la no:
Jaŋ Mise 5:1 maa ko ngeel maaga Mesin mo hay biŋ ni mono. b
-
Biŋgi Yeson bag mbe jag profesi maaga wãã ti ngeel biŋgi ɓen mbe we go yawlà?—Matiye 2:1.
Jaŋ Siŋ wora 34:21, Sakari 12:10 maa ko fẽẽre po wo ga Bible hay wãã ra go peel bol ti húulí Mesi mono.
-
Profesi sen hay bag wo jag mbaara we go yawlà?—Jaŋ 19:33-37.
-
Ndo ɗig ga Yeso hay mbe we de kããge maa joŋ mopo maaga profesi sen mo bag wo jag go yawlà?
-
Sen da wããge ne naa ti Yeso na ga hãylà?
6. Á de el maaga naa mo ko Yeso
Bible wãã ga á de el debaŋ maaga naa mo ko Yeso lan naa mo ko dage Baa ti ɓe. Jaŋ Jaŋ 14:6, 17:3, ni ndal wee ti wiigi jag maa blam la no:
-
Wer mayse ga á de el maaga naa mo ko Yeso naŋ ɗa là?
Yeso ɓo’ faage maa baa barge de Baa ne naa. Á hay had cwãy ti Jeofa, lan naa da’ tenen maa tum diŋ wer ɓe
NAA YAŊ LAƊGE GA: “Sedeewa Jeofa bay wo hã ɓil ti Yeso wa.”
-
Ndo fer ti ɓe na ga hãylà?
KLUURI HADGE NO
Yeso diŋ jee peele Baa maa de ẽgre le ciŋ. Á diŋ Weel Baa, diŋ Mesi.
Ferge ko nen hadge no
-
Wer mayse ga à ɗe Yeso ga “jag fẽẽre maa de joŋgen wo mo deŋ ɓuy tuu” là?
-
Yeso hay joŋ mayse taŋgu maaga á nduu gesiŋ la mo là?
-
À ko koge ga Yeso diŋ Mesi là?
MAA DA’ WER PA
Ko fẽẽre maa tigriŋ wo ti ɗuu maaga à ɗe Yeso ga Mesi mono
“Les prohéties messianiques prouvent-elles que Jésus était le Messie?” (ɓil jw.org)
Bible had ga Baa bay diŋ pan Yeso doo maaga jee taabay kol pan mbarga no wa.
“Pourquoi Jésus est-il appelé le fils de Dieu?” (ɓil jw.org)
Wer mayse ga naa wãã ga Bible bay had hadge maaga Baa boŋ jar nen ɓe swa’ dega’ wa là?
Ko maaga naw wãy po coo blam maaga á kiɗ wer ne wããre maa ti Yeso ɓil Bible mo ɗa.
“Une femme juive explique pourquoi elle a remis sa foi en question” (Réveillez-vous!, Mai 2013)
a Hadge 26 wo de 27 ngaɓ wo re maaga jar téebeere wo go de sãy yããge go ti, lan ɗeŋ maaga Yeso yãã ge ra go de ɓe mono.
b Ko ngeel laa wer maa ti tawgeti no 2 ga wãã ti profesi po ga hay ngaɓ wur maaga Mesin hay naa nen go ni peel bol mono.
