HADGE 17

Seele Yeso wo de joŋre ɓe hay wo ẽlà?

KAŊ NE

De maaga naa kiɗ wer we ne fẽẽre maaga Yeso wãã ra noga joŋ ra de maaga á hay gesiŋ la mono, naa da’ wer go ne joŋre maaga ya’ naa see ɓaara de pan ɓe. Joŋre maa hõn wo ga ya’ naa le see ɓe so là? Day naa joŋ doo Yeso nen naw naa na joŋge lay là?

1. Wer mayse ga à wãã ga Yeso de maŋ pan ɓe là?

De maaga Yeso hay le ciŋ mono, á ko joŋre pan ɓe nen kiŋgi miliyar pur debaŋ, day se had fẽẽre see ɓe debaŋ lay. Ɗiŋ wersen so ga, ɗiggi ɓe wo de joŋre ɓe ɓuy kol wo go doo maa ni pan ɓen no lay mono (Jaŋ 5:19). Joŋre Yeso de maŋ maa ni pan ɓen taw taw tu hãã nen maaga se kol wããge ga: “Wosela maga ko me we, de ko pan ɓi” (Jaŋ 14:9). Hayga ndo ko joŋre Yeso we go de woore no, ni ndo ko Jeofa yaŋ go de woore lay. Koge de coo maaga Yeso ko de coo jar ngaɓ go diŋ koge de coo maaga Jeofa ko de coo ɓo mo lay.

2. Yeso ngaɓ go ga se da Jeofa na ngaɓge là?

Yeso wãã ga: “Ama daga jar ma ti tamsir mo ko wo ga ndi de da pããbe no, ndi joŋ diŋ doo ga pããben wãã me nono” (Jaŋ 14:31). De maaga á hay gesiŋ la mono, Yeso naa nen dage ɓe maa kluu maaga á hay de ɓe see pan ɓe go diŋ de hooge sug ti ɓe koh nen re maa de gayri wo. Yeso naa nen dage ɓen go see pan ɓe pa diŋ de wããge ti ɓe de woore ne jare, lan kay jar maaga á mo kol wo bar Baa lay—Jaŋ 14:23.

3. Yeso ngaɓ go ga se da jar na ngaɓge là?

Bible wãã ga Yeso “hay da’ cõõre see [ɓe] yoo jar téebeere wo” (Jag jõõ wo 8:31). Á naa nen dage sen go diŋ de jorge glog jare, de kay jare, bay gor mopo do ɓaara wa. Fẽẽre mbuɗgi maaga á joŋ ra ngaɓ wo go bay diŋ ẽgre ɓen tawa wa, amaa diŋ koge decoo maaga á hay ko decoo jar de ɓe mo lay (Mark 1:40-42). Á hay joŋ jar de ele, hay bay joŋ jar ti ɓaŋ wa pa. Wããre ɓe hay hã ẽgre, hã ɗiggi maa de woore ti naw maa peel ne jar maaga hay wo co’ sug ɓe mono. Yeso hay go de hã see ɓe maa joŋ bone lan maa húugi go werga á da jar ɓuy. Amaa se da debaŋ diŋ jar maaga hoo wo sug ti hadge ɓen mono—Jaŋ Jaŋ 15:13, 14.

FRUGGI NEN HADGE NO

Patala naa wãã debaŋ ti jonre Yeso, lan naa ko ɗeŋ maaga naa da jare, lan joŋ ɓil de el se ɓaara doo Yeso no lay mono.

4. Yeso da pan ɓe

Sablaŋ Yeso had naa de ɗeŋ maa da Baa. Jaŋ Lug 6:12; Jaŋ 15:10; 17:26. Jaŋ versen wo go boŋ boŋ ɓuy, blam ni ndal wee ti wiigi jag ma gesiŋ la no:

Naa ngaɓ go ga naa da Jeofa doo Yeso no lay na ngaɓge là?

Yeso hay da pan ɓe maa ciŋ debaŋ day se hay tosge ɓe tum lay

5. Yeso ko decoo jare

Yeso hay ɗiggi ti re maa se jar de daŋ maa see ɓe no. Koh á mo hay ba go de gayri, se hay joŋ joŋre de wur wo de ẽgre ɓen diŋ maa kay jare. Jaŋ Mark 6:30-44, ni ndal wee ti wiigi jag maa blam la wo no:

Nen wããre sen la Yeso ngaɓ ga se de ko decoo jar na ngaɓge là?—Ko verse 31, 34, 41, lan 42.
Mayse hay jor glog Yeso maa kay jar là?—Ko verse 34.
Yeso hay joŋ fẽẽre doo pan ɓe nono, sen had mayse ne ndo ti Jeofa là?
Ti ɓaŋ maa hõn wo ga naa ko decoo jar doo Yeso no lay là?

6. Do Yeso hay hãge

Do Yeso hay hãge koh de maaga á hay bay mbe de fẽẽre do pur wa, day se jor glog naa maaga do naa mo hay hãge lay. Jaŋ Joŋre 20:35, ni ndal wee ti wiigi jag maa blam la no.

Yeso wãã ga naa da’ fruygi diŋ de joŋge mayselà?

Ko VIDEYO ni ndal wee ti wiigi jag maa gesiŋ la no.

VIDEYO: ‘Fruygi a debaŋ diŋ wer hãge’—À caa see ɓe (4:00)

Ti ɓaŋ maa hõn wo ga do naa mo hay hãge koh de maaga fẽẽre bay mbe do naa pur wa là?

Ndo hay mbo go de koge ɓe no lay?

Bible had naa ga naa mo tos Jeofa de ɗuu Yeso (Jaŋ Jaŋ 16:23, 24). De maaga naa tos we de ɗuu Yeso no, ni naa de ngaɓ ge ga naa de ko de el kayge maaga Yeso kay naa maa baa barge de Jeofa mono.

NAA YAŊ LAƊGE GA: “Baa bay kaŋ ti ti bon maaga naa nen ɓe mo wa”