Jeofa bay diŋ Baa maa de hãy hãy wa (1 Korente wo 14:33). Diŋ wersen so ga jar maa ni ɓen bay wo joŋ joŋre ɓaara de hãy hãy wa lay mono. Jeofa see de tayge jar maa wer Yeson wo na seege là? Wosela ɓuy yoo naa joŋ maaga tayge maaga se ni mo hay seege de woore na joŋge là?

1. Waŋ tayge jar ma wer Yeson wo diŋ woselà?

“Kris diŋ waŋ tayge jar ma wer ɓen wo no” (Efes wo 5:23). Le ciŋ ɓaa à de wãã wããre joŋre jar maa ni Jeofan wo no. Yeso hay “weejõõ maga de deele, de ti lay”—maaga à ɗen pa ga Tayge Jar maa peel Sedeewa Jeofa wo (Jaŋ Matiye 24:45-47). Á hã jag liŋgi ne tayge sedeewa Jeofa maaga wo go ti sir kruɓ ɓuy, doo apotre wo de jar maa peel tayge maa ɓaa, ga hay wo Jerusalem no lay (Joŋre 15:2). Amaa á bay wo diŋ waŋre tayge jar maa wer Jeofan wo wa. Á men wo Jeofa ɓod faage fẽẽren ne hara, lan oo wo diŋ ti wããre maa ɓil Biblen lay. Day saara hoo sug ti jag liŋgi maa ni Yeson wo tum lay.

2. Jar maa peel tayge wo diŋ wose wo là, lan joŋre ɓaara diŋ maylà?

Jar maa peel tayge wo diŋ werpiiri maaga wo go de ruggi ; á had wo wããre Baa ne tayge maa ni Jeofa no; kay wo ra, coɓ wo ra lay. À bay poɗ rage ti joŋre ɓaaran wo wa. Amaa, á joŋ wo doo sen ne diŋ de joŋ joŋre go “peel Baa de jiili ɓaara ɓuy; werga á bay wo da’ solay ni wa, amaa á joŋ wo . . . ne go ɓil sog boŋ” (1 Piyer 5:1, 2, NWT). Werpiiri maa po joŋ wo joŋre ti jeŋ jar maa peel tayge wo no. À ɗe ra ga jar maa kay jar maa peel tayge wo. Á wo de kããge maa joŋ joŋre de woore maaga wur po mono, à kol ra go jar maa peel tayge lay.

Hoo jar maa raŋ tayge maa ti progren wo diŋ tayge jar maa peel Sedeewa Jeofa wo no. Jar raŋ tayge bag wo yaŋ ne taygen wo, hã wo jag liŋgi ne hara, lan coɓ wo ra lay. Doo maaga Bible wãã ne mono, á bag wo jar maa peel taygen wo de jar maa kay ra ge wo.—1 Timote 3:1-10, 12; Tid 1:5-9.

3. Sedeewa Jeofa maa hõnla ɓuy, joŋre mayse de hãge ne hẽn do là?

Wosela ɓuy ti tayge “togoɗ ɗuu Jeofa” de fer wããre ti wiigi jage, de sii wããre peel jar ti taygeti, de ngaɓge ɗeŋ maaga á sii wããre, lan de ‘waa siŋ. Á mo sii wããre ne jar maaga bay wo de ko Jeofa wa de ẽgre ɓe ni lay.—Jaŋ Siŋ wora 148:12, 13, NWT.

 FRUGGI NEN HADGE NO

4. Yeso diŋ waŋ maaga ko decoo jare

Yeso ɗe naa le see ɓe go ɓil feh. Jaŋ Matiye 11:28-30, ni ndal wee ti wiigi jag maa blam la no:

• Yeso diŋ Waŋ maa ẽlà, day á da ga naa mo hay ẽlay là?

5. Jar maa peel tayge wo diŋ saɓlaŋ

1. Jar maa peel tayge dur wo maa ya’ see ɓaara see Jeofa tum, lan kay wo jar maa ɓi feele ɓaara wo maa jonge doo saara no lay

2. Jar maa peel tayge teŋ wo nen wosela ɓuy ti tayge

3.   Jar maa peel tayge sii wo wããre Baa tum

4. Jar maa peel tayge wo diŋ jar had wããre Baa. Saara tor tiŋ-Baa, joŋ wo joŋre maa tigriŋ wo wer sar sar pa

6. Á de woore maaga naa mo joŋ joŋre de jar maa peel taygen wo

Bible ngaɓ ne naa ga wer mayse ga á de woore maaga naa mo joŋ joŋre de jar maa peel tayge wo la. Jaŋ Hebre wo 13:17, ni ndal wee ti wiigi jag maa blam la no:

• Wer mayse ga Bible wãã ga naa mo hoo sug ti jar maa peel taygen wo go de jiili naa ɓuy là?

Jaŋ Lug 16:10, ni ndal wee ti wiigi jag maa blam la no:

• Wer mayse ga á de el maaga naa mo hoo sug ti jar maa peel taygen wo, koh ti fẽẽre maa mẽ’ mẽ’ wo là?

 KLUURI HADGE NO

Yeso diŋ waŋ tayge krétiyẽ wo. Naa joŋ joŋre de jar maa peel tayge wo de fruygi werga á ko wo decoo naa, lan ngaɓ wo saɓlaŋ maa de woore ne naa lay.

Ferge ko nen hadge no

• Wose diŋ waŋ tayge krétiyẽ wo là?

• Jar maa peel tayge kay wo taygen na kayge là?

• Sedeewa Jeofa maa hõnla boŋ boŋ ɓuy joŋ joŋre mayse là?