HADGE 21
Sedeewa Jeofa sii wo wããre maa de cõõre maa ni Baan go na siigi là?
Iggi la me’ koɗ Jeofa caa ge wer re maa see naan yaŋ wo go ɓuy de twaywaŋ ɓe no. Wosela ɓuy mo hay laa wããre maa de cõõre se no. Yeso wãã ga jar maa wer sen mo sii wo wããre sen go ne jar ɓuy (Matiye 28:19, 20)! Sedeewa Jeofa hoo wo sug ti jag liŋgi sen na hooge là?
1. Matiye 24:14 go de bag jag wara na bagge là?
Yeso hay wãã go peel bol ga : “À wo yaŋ go sii Wããre ma de Cõõre maaga wãã ti twaywaŋ mani Baan go ti tamsir krub ɓuy” (Matiye 24:14). Sedeewa Jeofa joŋ wo joŋre sen go ɓil fehe. Wùr go de sii wããre sen wara ti tamsir krub ɓuy de daŋ wer jag 1000. Joŋre sen wii wuri, wii ẽgre debaŋ. Kay wùr jag ɓe diŋ Jeofa.
2. Sedeewa Jeofa joŋ wo joŋge maa sii wããren go ne jar ɓuy là?
Wùr sii wããre ti ngeel maaga wùr da’ jar ni ɓuy. Doo Krétiyẽ maa taŋgun wo no mono, wùr sii wããre go ‘jag-tiŋ jag-tiŋ’ (Joŋre 5:42). Ɗeŋ siigi wããre sen kay wùr maaga wùr mo yiŋ de jar milyoŋ pur nen kiŋgi tum. Wùr sii wããre ti ngeel maaga ngaɓa ni debaŋ, do ngeel lumo wo. Wùr tum de beg ɗeŋ maa sii wããre ne jar ti Jeofa lan maa wããge ne hara ti fẽẽre maaga á bag jag ɓaara go mono.
3. Joŋre siigi wããre maa de cõõren diŋ nen do woselà?
Joŋre siigi wããre maa de cõõren diŋ nen do krétiyẽ maa ti ngeel ɓen wo ɓuy. Wùr bay joŋ hrag de joŋre sen wa. Wùr sii wããre sen go de ẽgre wùr ɓuy werga wùr de koge ga á yãã tenen jar go (Jaŋ 1 Timote 4:16). À bay poɗ wùr ti joŋre sen wa, werga Bible wãã ga: “Nday da’ fen sen de koɗ ha se, hãn we go de koɗ hase lay” (Matiye 10:7, 8). Jar bay yãã wããre sen ɓuy wa. Amaa de sen ɓuy wùr bay men siigi wããre sen wa, werga joŋre wùr ngaɓ ga wùr hoo sug ti Jeofa, lan fruy ɓil ɓe.
FRUGGI NEN HADGE NO
Ko joŋre maaga Sedeewa Jeofa joŋ wo ti tamsir la krub ɓuy mono, lan ko maaga Jeofa kay ra mo ɗa
Siigi wããre go ti wer sir ɓuy: (A) Kosta Rika, (B) Eta-Zuni, (C) Beneŋ, (D) Taylande, (E) Yap, (F) Suede
4. Wùr dur maa sii wããren go ne jar ɓuy
Sedeewa Jeofa dur wo maa sii wããre maa de cõõren go ti wer sir ɓuy. Ko VIDEYO, ni ndal wee ti wiigi jag maa blam la no.
-
Fẽn mayse ngris mo ti joŋre siigi wããre sedeewa Jeofan wo là?
Jaŋ Matiye 22:39; Rom wo 10:13-15, ni ndal wee ti wiigi jag maa blam la wo no:
-
Siigi wããre wùr ngaɓ go ga wùr da kããre wùr jar téebeere wo na ngaɓge là?
-
Jar maaga sii wo wããre maa de cõõren wo nen Jeofa ẽla?—Ko verse 15.
5. Wùr diŋ jar joŋre de kããra de Baa
Saɓlaŋ po wo pur debaŋ ngaɓ wo go ga Jeofa peel wùr ti joŋre siigi wããre no. Ko ba ɗa, ti sir Nouvelle-Zelande, hẽn wùr po ga à ɗen ga Pol hay sii wããre Baa ti wurpo de law law, se kal yiŋgi de wãy po. Wãyn hay tos Baa de jag toŋ ti wur sen no, ɗe ɗuu Jeofa nen tosge ɓe no, kam ne ga á mo ɓo’ jobo le yiŋgi de se ɗa la. Pol ga: “Blam tosge ɓen nen boore swa’a mono, ndi nduu ma’ do jag tiŋ ni ɓe.”
Jaŋ 1 Korente wo 3:9, ni ndal wee ti wiigi jag maa blam la no.
-
Saɓlaŋ maa de maŋ maa ni Pol wo mokay ngaɓ wo go ga Jeofa de kalge peel wùr ti siigi wããren na ngaɓge là?
Jaŋ Joŋre 1:8, ni ndal wee ti wiigi jag maa blam la no:
-
Wùr de sãy kayge Jeofa ti maa sii wããren go wer maylà?
Ndo hay mbo de koge ɓe no lay?
Nen naw renam tum wùr had ɗeŋ maa sii wããre Baa ti taygeti wùr po boŋ. Ndo wo we go ti taygeti sen wo ti boŋ yaw? Day ndo ɗig ti hadge ɗeŋ siigi wããre Baan ga hãy ne?
6. Wùr hoo sug ti jag liŋgi Baa maa ti siigi wããre no
Blam húulɩ́ Yeso maŋ mono, jar hee ɓen hay le’ wo ga saara maŋ jag jar maa wer Yeson wo go ti siigi wããre Baa. Krétiyẽ maa taŋgun raw wo ‘peel jar caa kiida wo wer wããre maa de cõõre no’ (Filip wo 1:7, NWT). Sedeewa Jeofa joŋ wo wara do sen no lay. a
Jaŋ Joŋre 5:27-42, ni ndal wee ti wiigi jag maa blam la no:
NAA YAŊ LAƊGE GA: “Wer mayse ga Sedeewa Jeofa raŋ wo tiŋ jar de siigi wããre Baa maa ɓaaran là?”
-
Ndo fer ne jee ɓen ti ɓe ga hãy ne?
KLUURI HADGE NO
Yeso hã jag liŋgi ne jar maa wer ɓen wo ga á mo sii wo wããre maa de cõõren go ti tamsir krub ɓuy. Wùr de kããge maa joŋ joŋre sen wer kayge maa ni Jeofa no.
Ferge ko nen hadge no
-
Wùr sii wããre maa de cõõre go ti tamsir krub ɓuy na siigi là?
-
Siigi wããre wùr ngaɓ go ga wùr da kããre wùr jar téebeere wo na ngaɓge là?
-
Ndo ɗig na ga siigi wããre diŋ joŋre maa hã fruygi mbe yawlà ? Wer may ne?
MAA DA’ WER PA
Ko maaga sedeewa Jeofa sii wo wããre Baa ɓil sir maa kluuri wo ɗa.
Paris: Témoignage public spécifique aux grandes villes (5:11)
Sedeewa Jeofa wo de sii wããre ne jar maaga men wo tiŋ ɓaara go do re wo mono.
Ils étanchent la soif spirituelle d’hommes et de femmes réfugiés (5:59)
Ko wãy po de ngaɓ fruygi maaga se da’ wer maaga se sii wããre Baa tum mo ɗa.
Ko bawge jar caa kiida maaga joŋ ga wùr mo hay tum sii wããre Baa.
“Les prédicateurs se défendent devant les tribunaux” (Le royaume de Dieu en action!, chapitre 13)
a Wãã ga wùr mo sii wããren diŋ Baa. Diŋ wersen so ga Sedeewa Jeofa bay wo gorge ga ngomna mo hã faage ne saara ɗa wa.
