HADGE 22
Ndo sii wããre maa de cõõre maa ni Baan go ne jar na siigi là?
De maaga ndo yaŋ frug nen cwãy wããre Baa no, maapo se a mbe ne ndo ti tu ga ‘Nen da ga jar mo hay laa wããre sen go ɓuy lay!’ Se ti ngeel ɓe ga naa wãã doo sen nono, werga jar ɓuy de sãy laa cwãy no. Amaa, maapo ga hẽẽne ba seɓaa joŋ mo ge maa sii wããre sen go ne jare. Naa ko ɗeŋ maaga naa ɗii go ne hẽẽne siigi wããren ti na ɗiigi là, blam ni naa tĩĩ wer sii wããre maa de cõõre maa ni Baan go de fruygi.
1. Ndo sii wããre Baa go ne jar maaga ndo de ko ra ge na siigi là?
Jar maa wer Yeson raw wo riŋgi ga : “Ma wùr, fẽẽre maga wùr ko ra, wùr laa ra, wùr men siɗ rage go ga” (Joŋre 4:20). Wããre Baa maaga á laa wo ne hay co jag ɓaara debaŋ. Saara kal ɗiggi ga saara mo hay siin go ne jar ɓuy hayga ẽgre saara kãã yaŋ no. Ɗiggi sen a we ne ndo ti ti boŋ lay yaw? Hayga yaŋ no, ni ndo kiɗ wur maa de woore maa sii fẽẽre maaga ndo laa ra go ne bar ɓo wo de jar maa liŋ ni ɓay wo. Amaa wãã ne de hooge sugi—Jaŋ Kolos wo 4:6.
Ɗeŋ po wo maa tĩĩ wer wããre
-
Tĩĩ wer sii wããre ne jobo maa liŋ ni ɓay, de wããge ga: “Ndi laa mopo nen naw maa renam la ga co jag ɓi debaŋ.”
-
Jaŋ verse po maaga coɓ bar ɓo po maaga de cege noga nen lawge.
-
Sii fẽẽre maaga ndo laa ra ti hadge wããre Baa ɓo, noga ti taygeti maa nen naw renam ne jee maaga nday joŋ joŋre de kããra ga hay wii jag ɓo we ti naw maa blam wo le mono.
-
Kaŋ nen ɓaara ti sid jw.org
-
Ɗe jar maa tigriŋ wo le maa age see ɓay ti hadge ɓay no, noga kaŋ nen ɓaara ti ɗeŋ maa wii hadge wããre Baa ɓil sid jw.org.
2. Wer mayse ga ɗiggi maa sii wããre de jar maa ti taygen wo diŋ ɗiggi maa de woore là?
Jar maa wer Yeson hay bay wo sii wããre maa de cõõren diŋ ne jar maaga saara de ko rage tawa wa. Yeso “raw lag rage wo pel ɓe ɓog ɓog ɓi leege wo de progren wo ɓuy” maa sii wããre maa de cõõre no (Lug 10:1). Ɗeŋ joŋge Joŋre siigi wããre sen hay kay jar ngaɓa debaŋ maa laa wããre maa de cõõre maa ni Baa no. Siigi wããre ɓaara wer kããran fruy ɓil ne jar maa wer Yeson wo debaŋ (Lug 10:17). Doo saara no lay, ndo mbo de ɗiggi ga ndo sii wããre de jar maa ti taygen wo lay yawlà?
FRUGGI NEN HADGE NO
Ko ɗeŋ maaga ndo ɗii go ne hẽẽne siigi wããre maa de cõõren ti, ni ndo ko fruygi maaga ndo da’ wer ɓe mo ɗa.
3. Jeofa joŋ ge yaŋ de ɓo
Jar maapo wo mbaara de sãy sii wããren ti, amaa joŋ wo hẽẽne jar de maaga à ko ra noga do maaga à wãã ti ɓaara mono.
-
Hẽẽne joŋ mo ti maaga ndo le’ we ga ndo sii fẽn maaga ndo laa ra ti hadge ɓon wo mono? Wer mayse là?
Ko VIDEYO, ni ndal wee ti wiigi jag maa blam la no.
-
Sedeewa Jeofa sen hay ɗii wo go ne hẽẽnen ti na ɗiigi là?
Jaŋ Esay 41:10, ni ndal wee ti wiigi jag maa blam la no:
-
Tosge kay ge mo na kayge de maaga hẽẽne siigi wããre Baa yaŋ joŋ mo ge là?
Ndo hay mbo go de koge ɓe no lay?
Sedeewa Jeofa po wo ngaɓa hay ɗig wo ga saara joŋ ti boŋ de kããge maa sii wããre maa de cõõren go ne jar ga. Sen diŋ tee saɓlaŋ Serje, ga hay bay ko see ɓe go halla wa, lan se hay nen ɓe de gayri debaŋ maaga se wãã wããre ne jare. Amaa blam se frug nen wããre Baa debaŋ. Se raw wããge so ga: “Koh de hẽẽne ɓin ɓuy, ndi le’ sii wããre Baa go ne jar ti fẽẽre maaga ndi laa ra ti hadge ɓin wo mono. Ndi wo koge so ga, siigi wããre go ne jar ti fẽẽre maaga ndi laa ti hadge ɓin coɓ me debaŋ nen maaga ndi mo ko see ɓi go has wa. Day se ya’ hãge ɓil ɓi ciŋ ni debaŋ lay.”
4. Hoo sug ti jare
De maaga ndo le’ bag jag see ɓo maa sii wããre maa de cõõren we no, ni ndo ɗig diŋ ti wããre maaga ndo wãã mo tawa wa, amaa ɗig ti ɗeŋ maaga ndo wããn ne jee ɓen wããge la lay. Jaŋ 2 Timote 2:24 lan 1 Piyer 3:15, ni ndal wee ti wiigi jag maa blam wo la no:
-
Ndo joŋ joŋre de verse sen wo joŋge de maaga ndo yaŋ sii wããre Baa ne jar là?
-
Jar maa liŋ ni ɓay noga kããre ɓo maapo yãã ge wo wããre ɓon ga, de sen ndo joŋ diŋ may ne? Day ni ndo joŋ may wa ne?
-
Wer may ga ɗawa diŋ ga ndo mo wii jag jar de hooge sug ti maaga ndo da ga jee ɓen mo joŋ doo ga ndo da ne mono là?
5. Siigi wããre maa de cõõren hã fruygi
Jeofa hay hã joŋre siigi wããre maa de cõõren ne Yeso. Day Yeso hay ko joŋre sen na koge ne? Jaŋ Jaŋ 4:34, ni ndal wee ti wiigi jag maa blam wo la no:
-
Rege hoole joŋ ga naa mo hay tenen ti’, lan hã fruygi ne naa lay. Wer mayse ga Yeso ngaɓ joŋge dage Baa,—de siigi wããre maa de cõõren—doo rege hoole ne là?
-
Fruygi maa hõn ga siigi wããre maa de cõõren a de ɓe ne ndo ne?
Yaŋ po wo
-
Ti taygeti wo mono, ɗaw wããre maaga kay wo ndo maa tĩĩ wer siigi wããre Baa ne jare.
-
kiɗ maaga ndo kal ti lakol maa had ɗeŋ siigi wããre Baa no. Lakol sen kay ndo maa sii fẽn maaga ndo laa ti hadge ɓon go ne jar maa tigriŋ.
-
Joŋ joŋre de ngeel maaga “Naa laa seɓaa ga” noga “Jobo wii jag ɓo yaŋ ga”, maa bag jag see ɓo go yiŋ jag ti wiigi jag wo.
MAAPO JOBO WII JAG ƁO YAŊ GA: “Ndo mbo na caw page?”
-
Ndo joŋ joŋre de fẽẽre maaga ndo laa ti hadge ɓon na joŋge maa tĩĩ wer had wããre Baa de ɓe là?
KLUURI HADGE NO
Siigi wããre maa de cõõre maa ni Baa ne jar hã fruygi debaŋ, day se bay diŋ mopo maa de gayri maa tĩĩ wer doo ga ndo hay ɗig ne wa.
Ferge ko nen hadge no
-
Wer mayse ga naa mo sii wããre maa de cõõren go ne jar ne?
-
Ndo joŋ joŋge maaga ndo sii wããren go ne jar de hooge sug ne?
-
Ndo joŋ joŋge maa ɗiigi go ne hẽẽne maaga joŋ ndo ti siigi wããre Baa wo mo ne?
MAA DA’ WER PA
Ko ɗeŋ siigi wããre maa de cõõre maaga ndo sii de hã Karte visite po wo 4 mo ta’ la ɗa.
Da’ge wer ne joŋre se maa 4 wo mo ta’ la, kay wo ndo maa sii wããre maa de cõõre maa ni Baa no.
“Es-tu prêt à devenir un pêcheur d’hommes?” (La Tour de Garde, septembre 2020)
Ko maaga saɓlaŋ jobo maa ɓil Bible hã ẽgre ne naa maa sii wããre maa de cõõren, koh ndo mo hay ba klee ɗa.
Kiɗ ɗeŋ maa sii wããre Baa ne jar maa liŋ ni ɓay maaga bay wo de ko Jeofa wa ɗa mono.
“Touchons le coeur de nos parents non-témoins” (La Tour de Garde, 15 mars 2014)
