Jobo maaga ndo dan debaŋ húu we go ti boŋ yawlà? Nen ngeel se maa de gayri doo kay, ndo kal wii jag see ɓo ga: ‘Mayse joŋ blam maaga jobo húu go mo là? À fer yaŋ mbe yiŋgi de jar húulin wo wurpo pa yawlà?’ Nen hadge sen la, lan ti maa peel ɓen la mono, ndo da’ yiŋgi jag maaga Bible fer ti wiigi jag sen wo yaŋ.

1. Mayse joŋ blam húulí là?

Yeso ngaɓ húulí de le’ge naa. Jobo yaŋ go de le’ naa de woore no, á ko fẽẽre maaga wo de hresge ti jeŋ ɓe mo ga. Day húulí de maŋ le’ge naa na ti maylà? De maaga jobo húu we go no, mopo cee ne noga co jag ɓe ga so. Werga á go de húulí, á ko see ɓe ga se go boŋ ga, koh de maaga á hay mbe da bar ɓe wo, de jar maa liŋ ni ɓaara wo debaŋ de maaga á hay tenen caw ɗa mono. Bible wãã ga “Jar ma de húulín. . .bay wo de ko mopo wa hase”—Jaŋ Eklesiyaste 9:5.

2. De el koge cwãy maa ti húulín wo diŋ maylà?

Jar debaŋ joŋ wo hẽẽne húulí—koh do jar maaga wo go de húulí mono! Amaa fẽn maaga Bible wãã ti húulí hã coɓge yaŋ mo. Yeso wãã ga: “Wããre ma cwãy. . .yãã wee go” (Jaŋ 8:32, NWT). Jag-Baa po wo debaŋ had wo ga fẽn po yaŋ ti hõõgesee jee táabay gwan tenen blam húulí ɓe, amaa Bible bay hadge doo sen ne wa. Jobo bay jo bon blam húulí ɓe wa. Jar maaga wo go de húulí kãã wo maa joŋ naa de ɓlagge ga, werga á bay wo de ko mopo wa. Á bay de el maaga joŋ siigi jag ne jar húulí wo, ga maa woo jiili ɓaara wa, á bay de el maaga tos ti ɓaara wa lay.

Jar po wo debaŋ wãɗ wo ga saara wãɗ wããre de jar húulí wo. Amaa sen diŋ gete’e. Doo maaga naa hay wãã ne le go la ne mono, jar húulín “bay wo de ko mopo wa hase.” Jar maaga ɗig wo ga saara de wãɗ wããre de jar saara maaga wo go de húulí wãɗ wo wããre diŋ de sõõre maaga kol wo see ɓaara go doo jar maaga huɗ wo go nono. Koge cwãy ti húulí yãã naa go jag joŋge hẽẽne do sõõre wo. Jeofa fuŋ sug naa ti wãɗge wããre de sõõre wo, werga á de koge ga á joŋ wo naa de ɓlagge—Jaŋ Dogge jag liŋgi 18:10-12.

3. Cwãy maa ti jar húulí wo no

Go ti wer sir ɓuy, hadge maa ti fẽẽre maaga hres wo blam húulí raw wo wer sar sar pur debaŋ. Day hadge sen bay wo diŋ cwãy ɓuy wa.

• Doo maaga ndo de koge ɓe ne mono, jar ɗig ti fẽn maaga hres blam húulí na ga hãylà?

 4. Koge cwãy maa ti jar húulín wo kay naa

Koge cwãy maa ti jar húulín wo kay naa maaga naa mo joŋ hẽẽne do ɓaara wa. Jaŋ Eklesiyaste 9:10, ni ndal wee ti wiigi jag maa blam la no:

• Jar húulí mbaara de kããge maa joŋ naa de ɓlagge yawlà?

Hayga naa yaŋ hã ɓil ti wããre maa ɓil Biblen wo no, naa joŋ siigi jag noga goŋ jar húulín wo ga. Jaŋ Esay 8:19, lan Naage nene 4:11, ni ndal wee ti wiigi jag maa blam la no:

• Ndo ɗig ga á joŋ see ne Jeofa na joŋge de maaga á ko jobo goŋ húulí noga joŋ siigi jag maa wii bosa’ do ɓe là?

5. Cwãy maa ti jar húulín coɓ wo naa

Jar po debaŋ hay wo ɗiggi ga saara joŋge bon blam húulí saara wer ɓlagge maaga saara joŋ ra mono. Amaa hayga naa yaŋ go de koge ga jobo joŋ bon blam húulí ɓe ga, koh jobo maaga hay joŋ ɓlagge debaŋ no, sen kay naa yaŋ. Jaŋ Rom wo 6:7, ni ndal wee ti wiigi jag ma blam la no:

• Hayga á doo maaga Bible wãã nono, ga húulí bud jobo go, noga pog ne le go jag ɓlagge no, ndo ɗig na ga jobo joŋ mbe bon yaŋ blam húulí ɓe wer ɓlagge maaga se hay joŋ ra yawlà?

Hayga naa da’ wer we go ne Jeofa de woore no, naa ko yaŋ ga á bay joŋ bon jar blam húulí ɓaara wa. Jaŋ Dogge jag liŋgi 32:4, lan 1 Jaŋ 4:8, blam ni ndal wee ti wiigi jag maa blam wo la no:

• Baa maaga joŋre ɓe de maŋ maa ti verse sen wo la yãã yaŋ mbe ga jar húulí mo hay wo ti bon nen wùu yawlà?

• Ndo ko na ga cwãy maa ti jar húulín wo coɓ nen jar yaw baywa? Wer maylà?

 KLUURI HADGE NO

De maaga jobo húu we go no, tenen ɓe bay wa so. Jar húulí bay wo ti bon wa, saara kãã maa joŋ jar maa tenenn wo de ɓlagge ga lay.

Ferge ko nen hadge no

• Mayse hres blam maaga jobo húu we go là?

• Cwãy maa ti húulín kay naa na kayge là ?

• Cwãy maa ti húulín coɓ naa na coɓge là?