Húulí diŋ re maa de gayri ga hã lawge debaŋ. Diŋ wersen so ga Bible ɗe húulí ga jee hee mono (1 Korente wo 15:26). Ɓil Hadge 27, naa hay laa ni ga Jeofa naa ge blum jee hee se no. Á wãã doo sen ne so mono, day á joŋ ge de jar maaga wo go de húulí na joŋge lay là? Nen Hadge sen la, ndo laa wer yaŋ ne fẽẽre maa de woore daŋ go ga Jeofa joŋ ge ra yaŋ: Á fer jar yaŋ le go miliyar pur ti tamsir la maaga á mo hay wo tenen ti’ tum. Á birgi ra le go! Ndo mbo de ɗiggi ga sen joŋ ge mbe yaŋ cwãy an yawlà? Á bir ra le go maa lagge la genla, ciŋ yaw gesiŋ là?

1. Jeofa de sãy joŋ mayse ti ne jar naa maaga húu wo go là?

Jeofa de gorge de bay yõõ ti maa fer ra ge le go ciŋ tenene. Job blo po de hã ɓil hay go de baw ge jag jiili ɓe ga Baa yõõ ti se wo go ɓi tuu ni de maaga se húu gi we go mo ga. Á wãã ne Baa ga: “Ndo ɗe ge ɗúu yaŋ, day ndi yiŋ gi jag yaŋ”—Jaŋ Job 14:13-15.

2. Naa ko koge ga jar húulín fer wo yaŋ le go birgi là?

De maaga Yeso hay gesiŋ la mono, Baa hay hã ẽgre ne hẽn maa bir jar go. Yeso hay bir mãy po go kiŋgi 12, lan weel wãy dwuri po go pa (Mark 5:41, 42; Lug 7:12-15). Blam sen, bar Yeso Lasar hay húu go pa. Koh ba de maaga Lasar hay go de ɓo’ge ɓi tuu naw naa laybla’ mono, Yeso hay bir mbe le go ciŋ. Blam maaga á tos Baa go tos mokay, Yeso ɗe ɗúu kloŋ ga: “Lasar, kal le go!” day “je húulín raw kal ge le go”—ciŋ tenene (Jaŋ 11:43, 44)! Ɗig ba mbo ti fruygi maaga jar maa liŋ ni Lasar wo de bar ɓen joŋ wo mo ɗa!

3. Jar ɓay maa de húulín fer yaŋ mbaara go bir gi pa yawlà?

Bible wãã go de woore ga: “Á laa ge jar . . . go wurpo ciŋ tenen” (Joŋre 24:15). Jar maaga Yeso hay bir ra le go ɓaa hay bay wo de rawge ciŋ wa (Jaŋ 3:13). Á bir ra le go tenen diŋ ti tamsir la, day saara hay de fruygi wersen debaŋ. Doo sen no lay mono, Yeso bir ge jar yaŋ le go wurpo ciŋ miliyar pur maaga á mo fruy wo ti paradis gesiŋ là. Á wãã ga “jar ma de húulí ma ɓi tuun wo ɓuy”—koh de jar maaga à hay go de yõõ ti ti ɓaara, ga hay mbaara de ɗawge ti Baa,—bir ge wo le go ɓuy.—Jaŋ 5:28, 29.

 FRUGGI NEN HADGE NO

4. Yeso ngaɓ go ga se de kããge maa bir jar húulín wo le go

Naa da’ wer go de woore ne fẽn maaga Yeso joŋ see bar ɓe Lasar mo ɗa. Jaŋ Jaŋ 11:14, 38-44, ni ndal wee ti wiigi jag maa blam wo la no:

• Mayse ngaɓ go ne naa ga Lasar hay go de húulí cwãy là?—Ko verse 39.

• Hayga Lasar de hay we de rawge ciŋ no, ndo ɗig ga Yeso de fer mbe ne yaŋ le go gesiŋ la yawlà?

Ko VIDEYO.

5. Jar bir ge yaŋ le go ngaɓa debaŋ!

Jaŋ Siŋ wora 37:29, ni ndal wee ti wiigi jag maa blam la no:

• Jar maa miliyar pur ga bir gi wo le go joŋ ge wo la genlà?

Yeso bir ge le go bay diŋ jar maaga hay wo goŋ Jeofa mo tawa wa. Jaŋ Joŋre 24:15, ni ndal wee ti wiigi jag maa blam la no:

• Ndo de sãy maaga wose mo bir le go ti là?

• Kaŋge ɗiggi ti birgi jar húulí wo le go hã coɓge ne pããre Felisite wo na hãge là?

 KLUURI HADGE NO

Bible wãã ga jar fer yaŋ le go birgi miliyar puri. Jeofa da ga á mo fer wo le go tenene, day se hã ẽgre ne Yeso maa bir rage le go.

Ferge ko nen hadge no

• Á joŋ see ne Jeofa wo de Yeso na joŋge ti ferge jar húulín wo le go tenen là?

• Jar maa miliyar pur bir ge wo le go na maa rawge ciŋ yaw mbala maa lagge ti tamsir la yawlà? Ndo wãã doo sen wer mayselà?

• Mayse hã bawge go ne ndo jag jiili ga jar ɓo maaga wo go de húulí fer wo yaŋ le go tenen là?