HADGE 32

Twaywaŋ maa ni Baan go patala ti joŋre!

KAŊ NE

Twaywaŋ maa ni Baan tĩĩ wer joŋ joŋre le ciŋ hãã le nen kiŋgi maa 1914. Kiŋgi sen diŋ tĩĩgi wer wur tawgeti wããge re jar maa ni jar téebeere wo no. Naa kon tẽ’ là? Naa ko wee wããre maaga Bible hay go de wãã ra ge, fẽẽre maaga wo de hresge ti tamsir, lan joŋre jar téebeere wo ɗa.

1. Bible hay go de wãã mayse wo peel bol là?

Kefder Danyel hay go de wããge ga Twaywaŋ maa ni Baan tĩĩ wer joŋre ti tawgeti wur po maaga à ɗen ga “kiŋgi. . .renam” (Danyel 4:13, 14). Kiŋgi go blam sen kis kis puri, Yeso fer ɗe wur sen pa ga ‘Iggi maa jar maa ti tamsir wo,’ day se wãã ni pa ga á hay bay go de tawge wa ɗa (Lug 21:24, NWT). Doo maaga naa kon ge yaŋ peel la ne mono, kiŋgi maa renamn taw go nen kiŋgi maa 1914 no.

2. À de koge ti tamsir la na diŋ mayse wo hãã le ti kiŋgi maa 1914 là?

Jar maa wer Yeson wii wo jag ɓe ga: “Sii ne wùr ɗa la, re sen joŋ ge nà hun ɓa? Mayse kaŋ nen wùr ge ti wur age ɓon wo de tawge tamsirn mo la?” (Matiye 24:3). Yeso fer wããre ne hara ni ga de maaga se hay Waŋ we le ciŋ no, fẽẽre po hres wo yaŋ debaŋ doo durgi wo, koŋne wo, lan daɗge sir wo (Jaŋ Matiye 24:7). Bible hay go de wããge ti joŋre maa de ɓlagge maaga jar téebeere joŋn ge wo ti “wur naw ma blam wo “ no, diŋ wersen so ga “gaali [ . . . ] wo debaŋ” ti wur sen mono (2 Timote 3:1-5). Hãã le nen kiŋgi maa 1914 mono, naa de ko fẽẽre maa de maŋ sen wo nen joŋre jar téebeere wo.

3. Wer mayse ga tamsir kol go de gaali debaŋ hãã le ti wur maaga Twaywaŋ maa ni Baan tĩĩ wer joŋre mo là?

Blam maaga Yeso kol Waŋ ti Twaywaŋ maa ni Baan mono, se dur Manhúulí wo de jar peele ɓen wo le ciŋ. Á naa blum ɓaara. Bible wãã ga “à laa ra le go gesiŋ de jar peele ɓen wo ɓuy” (Naage nene 12:9, 10, 12). Ɓil Manhúulí de sõõge debaŋ, werga á de koge ga iggi la me koɗ Yeso caa ge wer se go. Diŋ wersen so ga se joŋ ga ɓlagge wo de gayri mo hay wo go ti tamsir krub ɓuy mono. Sen kay naa maa koge ga wer mayse ga tamsir go wara go de bagge de ɓlagge là! Twaywaŋ maa ni Baan taw ge fẽẽre maa de ɓlagge sen mo deŋ yaŋ wo go ɓuy.

FRUGGI NEN HADGE NO

Naa ko fẽn maaga kaŋ nen naa ga Twaywaŋ maa ni Baan tĩĩ wer joŋre nen kiŋgi maa 1914 mono, lan maaga á jor glog naa maa joŋ maylà ɗa.

4. Keege kiŋgi maa ɓil Biblen ɓo’ nen ga Twaywaŋ maa ni Baan tĩĩ wer joŋre nen kiŋgi maa 1914

KO VIDEYO.

VIDEYO: Twaywaŋ maa ni Baan tĩĩ wer joŋre nen kiŋgi maa 1914 (5:02)

Baa joŋ ga Nebukadnesare, waŋ Babilon mo lwa’ ti fẽn maaga joŋ ge wo yaŋ wurpo mono. Lwa’ge sen wo de naage wer ɓe maaga Danyel naa ne ngaɓ wo go ga lwa’gen hay bag jag go ti Nebukadnesare, lan ti Twaywaŋ maa ni Baan lay—Jaŋ Danyel 4:14. a

Jaŋ Danyel 4:17-23, blam, joŋ joŋre de foton wo maa yiŋ jag ti wiigi jag maa blam wo la no:

(A) Nebukadnesare ko mayse nen lwa’ge ɓen là?—Ko verse 17 lan 18.
(B) À hay joŋ koo se maa kluun na joŋge là?—Ko verse 20.
(C) Mayse hay hres ti tawgeti “kiŋgi [maa] renam” là?—Ko verse 26.

Mayse tay koo maa kluu nen lwa’gen wo de Twaywaŋ maa ni Baan là?

PROFESI NO (Danyel 4:17-33)

Wããge re jare

(A) Koo po kluu

Waŋn bay wãã re jar wa so

(B) “Caa we koon go” hãã “kiŋgi [mo] raw go ti ɓe renam”

Waŋn fer ti joŋre

(C) “Waŋ ɓon gwa’ ge mbe yaŋ ma ɓo”

Ti bagge jag profesi sen taŋgu mono . . .

(D) Koo maa kluun hay ngaɓge diŋ wose là?—Ko verse 22.
(E) Wããge re jar ɓen hay oo ɗa na ooge là?—Jaŋ Danyel 4:26-30.
(F) Re mayse hay da’ Nebukadnesare ti tawgeti “kiŋgi [maa] renam” là?—Jaŋ Danyel 4:31-34.

BAGGE JAG PROFESI NO: MAA TAŊGU NO

Wããge re jare

(D) Nebukadnesare, waŋ Babilone

Waŋn bay wãã re jar wa so

(E) Blam kiŋgi 606 T.W.N., Nebukadnesare hay fiɗ ti go, á hay bay de kããge maa wãã re sirn wa so hãã nen kiŋgi renam

Waŋn fer ti joŋre

(F) Nebukadnesare pẽẽ go, se fer wãã wããre sirn tigriŋ pa

Ti bagge jag profesi sen maa de ɓogn mono . . .

(G) Koo sen hay ngaɓge diŋ wose wo là?—Jaŋ 1 Kronig 29:23.
(H) Wããge re jar waŋ sen caa wer go na caage là? Mayse ngaɓ ne naa ga de maaga Yeso hay gesiŋ la wããge re jar sen hay go de caa wer ɗa là?—Jaŋ Lug 21:24.
(I) Waŋ sen hay fer ti joŋre na hunla, lan la genlà?

BAGGE JAG PROFESI NO: MAA DE ƁOG NO

Wããge re jare

(G) Waŋre maa Israyel hay wo wãã re jar diŋ ti tu Baa

Waŋn bay wãã re jar wa so

(H) À do’ sir Jerusalem go, wersen, à caa wer wããge re jar maa ni waŋre maa ɓi sir Israyeln wo go nen kiŋgi 2520

Waŋn fer ti joŋre

(I) Yeso le ciŋ, kol Waŋ Twaywaŋ maa ni Baa no

À kee kiŋgi maa renamn na keege là?

Verse po wo ɓil Bible kay wo naa maa laa wer verse maa tigriŋ wo. Ko ba ɗa, Naage Nene wãã ga kiŋgi swa’ de reda diŋ naw 1260 (Naage nene 12:6, 14). Kiŋgi renam diŋ naw 1260 ɓaale ɓoge. Kaŋ nen ga naw 2520. Ɓil Bible mono, ti verse maa po wo à ngaɓ naw de kiŋgi, kaŋ nen ga naw boŋ diŋ kiŋgi boŋ lay (Esekiyel 4:6). Kiŋgi maa renamn ɓil kefder Danyel diŋ tee sen lay. Sen da wããge ga kiŋgi maa renam ɓil profesi maa ni Danyel joŋ nen kiŋgi 2520.

5. Hãã le nen kiŋgi maa 1914 tamsir coo

KO VIDEYO.

VIDEYO: Hãã le nen kiŋgi maa 1914 tamsir coo (1:10)

Yeso hay go de wããge ga tamsir coo ge yaŋ blam maage se kol Waŋ mono. Jaŋ Lug 21:9-11, ni ndal wee ti wiigi jag maa blam la no:

Yoo fẽẽre sen wo la mono, ndo de ko maa hõn wo go de bag jag là?

Apotre Pol wãã ti joŋre jar téebeere maa ti wur naw maa blam taw wo no. Jaŋ 2 Timote 3:1-5, ni ndal wee ti wiigi jag maa blam la no:

Jar téebeere mbaara wara na de joŋ fẽẽre sen wo yawlà?

6. Waŋ Twaywaŋ maa ni Baa de jor glog naa maa joŋ maylà?

Jaŋ Matiye 24:3, 14, ni ndal wee ti wiigi jag maa blam wo la no:

Joŋre mayse ngaɓ wo go ga Twaywaŋ maa ni Baa go ti joŋre là?
Ndo joŋ joŋge maaga ndo mo joŋ joŋre sen lay là?

Twaywaŋ maa ni Baan go ti joŋre, day iggi la me’ koɗ se joŋ Waŋ yaŋ go ti tamsir la ɓuy. Jaŋ Hebre wo 10:24, 25, ni ndal wee ti wiigi jag maa blam la no:

Wosela ɓuy yoo naa joŋ na diŋ mayse de maaga naa de ko “wur maaga Yeso kris ferge” le là?

Hayga mopo yaŋ nen ɓo ga ndo de koge ga kay jar noga yãã ra go no, ndo joŋ joŋge là?

MAAPO JOBO WII JAG ƁO YAŊ GA: “Sedeewa Jeofa wãã wo ti kiŋgi 1914 debaŋ debaŋ diŋ wer may ɓa?”

Ndo fer ti wiigi jag sen na ga hãylà?

KLUURI HADGE NO

Profesi kee wo kiŋgi ɓil Bible, lan fẽẽre maaga wo de hresge ti tamsir ngaɓ wo ga Twaywaŋ maa ni Baa go ti joŋre. Naa ngaɓ go ga naa de hã ɓil ti ɓe go de sii wããre Baa go ti ɓe, lan de woge ti taygeti wo.

Ferge ko nen hadge no

Mayse hay hres ti tawge kiŋgi maa renam ga Bible hay wãã go ti ɓe peel bol ɓil kefder Daniyel là?
Mayse hã bawge go mo ga Twaywaŋ maa ni Baan tĩĩ wer joŋre nen kiŋgi 1914 là?
Ndo ngaɓ go ga ndo de hã ɓil ga Twaywaŋ maa ni Baan go ti joŋre patala na ngaɓge là?

Naw tawge hadge no:

Fẽn maa joŋge blam

Dur maa kol jee sii wããre Baa.

Maa tigriŋ:

Maa tigriŋ