HADGE 35
Naa joŋ joŋge maa far ɗiggi maa de woore wo là?
Naa ɓuy naa yiŋ de re po maaga wii wo maŋge ɗiggi do naa. Ɗiggi maaga naa far ra mo ɓuy, maapo saara kay naa, noga ɓlag wo naa. Maapo ndo ɗig ga ndi laa tiŋ ɓi na nen genlà, ndi joŋ joŋge maa da’ solay là, noga ndi da diŋ jee maa ẽlà. Hayga naa maŋ ɗiggi maa de woore wo we no, naa joŋ yaŋ de fruygi day naa co jag Jeofa lay.
1. Naa joŋ joŋre de Bible na joŋge maa far ɗiggi maa de woore wo là?
Taŋgu maaga naa maŋ ɗiggi ti re po mono, daga naa mo tos Jeofa maaga á mo kay naa day kiɗ wer mo maaga Bible wãã ti re sen mo lay no (Jaŋ Jag jõõ wo 2:3-6). Ndo da’ re maa po wo Jeofa go de hã jag liŋgi ti ɓaara de woore. Ti ngeel maa se doo sen, ɗiggi maaga daŋgo diŋ ga naa de hoo sug ti ɓaara.
Hayga Bible bay we go de hã jag liŋgi ti fẽn po de woore wa no, naa joŋ na joŋge là? Jeofa ɓod ge nen naa yaŋ “ti faage maaga [naa] nen seege ni mono” (Esay 48:17). Sen joŋ na joŋge ne? Wããre maa ɓil Bible po kay wo naa yaŋ ti se no. Wããre maa kay naa sen wo diŋ cwãy maa ɓil Bible ga ngaɓ wo nen naa ti ɗiggi Jeofa. Naa ko ɗiggi Baa ti re po de maaga naa jaŋ Bible we no. Hayga naa ko ɗiggi Jeofa we go no, naa kãã yaŋ maa maŋ ɗiggi maaga co jag ɓe.
2. Taŋgu maaga ndo le’ we maŋ ɗiggi ti re po no, ndo de ɗig go ti mayse wo peel bol ɗa là?
Bible wãã ga: “Je ma de ɗeŋn ko ngel kaŋ ɓaale ɓe” (Jag jõõ wo 14:15). Kaŋ nen ga de maaga naa le’ we maŋ ɗiggi ti re po no, daga naa mo ɗig go ti ɓe de woore ɗa. De maaga ndo de ɗiggi ga ndi joŋ na joŋge là mono, wii jag see ɓo ɗa: ‘Wããre maa ɓil Bible maa hõn wãã wo ti ɓe là? Ɗiggi maa hõn ga ndi maŋn we joŋ yaŋ ga ndi mo hay jam nen ɗiggi ɓi là? Ɗiggi ɓi maaga ndi far ra joŋ see ne jar lan wo na joŋge là? Ndo de wii jag se ɓo debaŋ na diŋ ga ɗiggi ɓi sen mbe de cõõre jag Jeofa yawlà?’—Dogge jag liŋgi 32:29.
Jeofa de kããge maa wããge ga fẽn maa kay de el, maa kay bay de el wa. Hayga naa da’ wer we go de woore ne jag liŋgi ɓen wo de wããre maa kay naa maa ɓil kefder ɓen wo no, lan naa yaŋ hoo sug ti ɓaara lay no naa had ɗiggi naa yaŋ de woore. Ɗiggi naa diŋ mo maaga le jiili naa ga wãã ne naa ga mo maa kay de el maa kay bay de el wa mono (Rom wo 2:14, 15). Hayga naa had ɗiggi naa sen we de woore no, á kay naa yaŋ maa far ɗiggi maa de woore wo lay.
FRUGGI NEN HADGE NO
Naa ko maaga wããre maa ɓil Bible wo de ɗiggi naa kay wo naa de maaga naa le’ we maŋ ɗiggi ti mopo mo ɗa.
3. Men Bible ɓod nen ɓo ti faage
De maaga naa le’ we maŋ ɗiggi no, wããre maa ɓil Bible kay wo naa na kayge là? Ko VIDEYO, ni ndal wee ti wiigi jag maa blam wo la no.
-
Jeofa hã kado maa de woore maa hõn ne naa là?
-
Wer may ga Jeofa joŋ naa nen maaga naa mo maŋ ɗiggi naa de se naa tu là?
-
Á hã mayse ne naa maa maŋ ɗiggi maa de woore là?
Maa ko saɓlaŋ wããre po maa kay naa ɓil Bible mono, jaŋ Efes wo 5:15, 16. Blam ɓe ni ndal wee ti maaga ndo joŋ joŋge “maa joŋ joŋre de wur maa do ɓon de woore” maa . . .
-
jaŋ Bible tum tum là.
-
iggi se wãy ɓo, war ɓo, weere ɓo wo, noga pããre ɓo wo là.
-
woge ti taygeti wo là.
4. Had ɗiggi ɓo maa maŋ ɗiggi maa de woore
Hayga jag liŋgi yaŋ go de wããge ti mopo de woore no, se go gus maaga naa mo maŋ ɗiggi maa de el ti ɓe. Amaa, hayga jag liŋgi bay we go de wããge ti ɓe de woore wa lay, naa joŋ joŋge là? Ko VIDEYO, ni ndal wee ti wiigi jag maa blam wo la no.
-
Ɓil videyon mono, mãygeman naa sen hay joŋ na joŋge maa had ɗiggi ɓe de woore nen maaga se mo maŋ ɗiggi maaga co jag Jeofa là?
Wer may ga naa mo wii jar lan wo ga á mo maŋ wo ɗiggi go ti tu naa wa là? Jaŋ Hebre wo 5:14, lan ni ndal wee ti wiigi jag maa blam wo la no:
-
Koh de maaga á mbe go gus maaga naa mo wii ɗiggi jar lan wo ti maaga á hay joŋ wo ti tu naa joŋge là mo laybla no, naa hay kiɗ maa laa wer mayse go de see naa tu ɗa là?
-
Kefder maa hõn wo ga kay wo naa maa had ɗiggi naa nen maaga naa mo far ɗiggi maa de woore wo là?
Doo maaga karte ɓod nen naa ti faage maaga naa de sãy woge ni no mono, ɗiggi naa kay naa maa maŋ ɗiggi maa de woore wo lay
5. Hoo sug ti ɗiggi jar lan wo
Werga naa sar sar mono, naa ɗig ti fẽẽre wo na sar sar lay. Wersen so, naa ngaɓ go ga naa hoo sug ti ɗiggi jar lan wo na ngaɓge là? Naa ko saɓlaŋ po wo ɓog ɗa:
Maa taŋgu no: Mãygeman naa po maaga da heer paŋtaloŋ wer debaŋ, raw ti tayge maa tigriŋ. Ti tayge maa sen wo ni mono, joŋre ɓe sen bay de cõõre jag mãyregemaare naa wo wa.
Jaŋ Rom wo 15:1 wo de 1 Korente wo 10:23, 24, ni ndal wee ti wiigi jag maa blam wo la no:
-
Hayga verse se ta’n yaŋ wo de du’ jag jiili mãygeman naa sen no, á joŋ joŋge là? Hayga fẽn po bay we de coge jag jobo wa day se de cõõre jag ɓo no, ndo joŋ joŋge là?
Maa de ɓog no: Weegeman naa po go de koge ga Bible bay go de maŋ jag joge yii wa, amaa se ga se jon ga. À raw ɗege ɓe wo ti ngeel ɓil nen po maaga se da’ hẽẽre naa po wo de jo yii ni.
Jaŋ Eklesiyaste 7:16 wo de Rom wo 14:1, 10, blam ɓe ndal wee ti wiigi jag maa blam wo la no:
-
Hayga verse se ta’n yaŋ wo de du’ jag jiili weegeman naa sen no, á joŋ joŋge là? Hayga fẽn po bay we de cõõre jag ɓo wa day se de cõõre jag jar lan wo no, ndo joŋ joŋge là?
Mayse kay wo ndo maa far ɗiggi maa de woore wo là?
1. Wii Jeofa ga á mo kay ndo maa maŋ ɗiggi maa de woore.—Jag 1:5.
2. Kiɗ wer ne wããre maaga kay ndo ti re sen ɓil Bible, lan ɓil kefder naan wo noga ko videyo naa maaga wãã wo ti re se no. Ndo mbo de kããge maa wii jobo maaga go de ruggi ti wããre Baa maaga á mo kay mo pa.
3. Ɗig go de woore: ɗiggi ɓi sen joŋ se me na joŋge là, day á joŋ se ne jar lan wo na joŋge lay là.
NAA YAŊ LAƊGE GA: “Ndi joŋ diŋ ɗiggi ɓi, riŋ ga á joŋ see ne jar lan wo joŋge laybla sen diŋ re ɓaara?”
-
Wer may ga naa de hoo sug ti ɗiggi Baa, ti ɗiggi jar lan wo lay là?
KLUURI HADGE NO
De maaga naa le’ we maŋ ɗiggi ti fẽn po no, da ga naa mo ko ɗiggi Jeofa go de woore ti ɓe ɗa, day pa na mo ɗig go de woore ga re sen mbe na de cõõre jag jar lan wo lay yaw noga baywa yawlà. Hayga naa joŋ we doo sen ne no, naa maŋ ɗiggi maa de woore yaŋ.
Ferge ko nen hadge no
-
Ndo joŋ joŋge maa maŋ ɗiggi maaga co’ jag Jeofa là?
-
Ndo joŋ joŋge maa had ɗiggi ɓo de woore là?
-
Ndo joŋ joŋge maa ɓo’ nen go ga ndo hoo sug ti ɗiggi jar lan wo là?
MAA DA’ WER PA
Ndo far ɗiggi maa de woore maaga ya’ holaŋ bay ciŋ se kẽẽ de Baa ni na farge là?
« Prenons des décisions qui honorent Dieu » (La Tour de Garde, 15 avril 2011)
Jeofa baa yaŋ ne naa de ɗeŋ maa hõn wo là?
Ko fẽẽre maaga kay wo blo po maa maŋ ɗiggi maa de woore nen re po maa de gayri mo ɗa.
Naa maŋ ɗiggi maaga co wo jag Jeofa de maaga jag liŋgi bay go de wããge ti fẽn sen de woore wa na maŋge là?
« Vous faut-il un commandement pour tout ? » (La Tour de Garde, 1er décembre 2003)
