HADGE 38
Naa mo ko tenen diŋ kado maaga daŋgo
De maaga naa tenen mono, naa de kããge maa joŋ fẽẽre maa de woore wo ngaɓa day fruy wer ɓaara lay. Koh de maaga naa mbe de yiŋgi de re po wo mo laybla no, naa mbe de kããge maa da’ fruygi wer fẽẽre maapo wo. Naa ɓo’ nen go ne Jeofa ga naa da tenen maaga á hãn ne naa na ɓo’ge là? Day re maa kluu maaga naa da tenen wer ɓe diŋ maylà?
1. Wer may ga naa de ko tenen diŋ fẽn po ga daŋgo là?
Naa ko tenen diŋ fẽn po ga daŋgo werga á diŋ kado maaga Jeofa, Pan naa maa de dagen hãn ne naa mono. Á diŋ “Kããge tenen” no werga joŋ fẽẽren ɓuy diŋ se (Siŋ wora 36:10). “Á diŋ jee hã tenen ne jar ɓuy no, jee hã ɓodge ẽgre ne jar ɓuy, de fẽẽren wo ɓuy” (Joŋre 17:25, 28, NWT). Maaga naa mo hay tenen ti’ mono, Jeofa hã fẽẽre maaga naa de sãy ɓaara ti ne naa. Á taw de sen tawa ga, á dur maaga naa mo hay de fruygi nen naw naa pa—Jaŋ Joŋre 14:17.
2. Naa ɓo’ nen go ne Jeofa ga naa da tenen maaga á hãn ne naa na ɓo’ge là?
Jeofa tĩĩ wer koɗ naa le hã de maaga naa le ɓil man naa ɗa. Dafid jee goŋ Baa po, wãã ne hẽn nen tosge ɓe ga: “De maaga ndi hay mbi diŋ mopo de boo ti gulumtum ti’ koɗ mono, nen ɓo hay go de ko mege” (Siŋ wora 139:16). Tenen naa daŋgo de el nen Jeofa (Jaŋ Matiye 10:29-31). Á cee Jeofa debaŋ de maaga à ‘war jobo go noga jobo ‘war see ɓe go mono a (Laage go 20:13). Á cee Jeofa debaŋ pa de maaga naa bay we koɗ tenen naa de woore wa noga tenen jar lan wo wa no. De maaga naa yaŋ kiɗ ɗeŋ koɗ tenen naa de woore, day kiɗ ɗeŋ maa koɗ tenen jar lan wo de woore lay no, ni naa go de ɓo’ nen so ga naa da tenen maaga Baa hãn ne naa debaŋ so.
FRUGGI NEN HADGE NO
Naa ko fẽẽre po maaga ɓo’ wo nen go ga naa da tenen maaga Baa hãn ne naa mo ɗa.
3. Koɗ see ɓo nen maaga ndo mo hay jam
Werga naa go de hã see naa ne Jeofa ga naa joŋ diŋ dage ɓe tum mono, naa joŋ joŋre go de tenen naa ɓuy maa joŋ peele ne hene. Sen doo ga naa joŋ siigi jag go de hõõgesee naa ne Baa nono. Jaŋ Rom wo 12:1, 2, blam ɓe ndal wee ti wiigi jag maa ta’ wo la no:
-
Mayse de hay jor glog naa maa koɗ see naa nen maaga naa mo hay jam là?
-
Ndo koɗ see ɓo maaga ndo mo hay jam na de ɗeŋ maa hõn wo là?
4. Ndo le’ we joŋ maysela ɓuy, koɗ see ɓo de woore nen maaga mopo mo joŋ mo noga jee tigriŋ de ɓlagge wa
Bible jor glog naa ga naa mo ɗee go se fẽẽre maaga kaŋ wo taw naa go mono. Ko VIDEYO maa ko fẽẽre maaga naa de hay joŋ ra maa koɗ see naa de jar lan wo lay mo ɗa.
Jaŋ Jag jõõ wo 22:3, blam ɓe ndal wee ti ɗeŋ po maaga kay wo maa koɗ see naa de maaga naa . . .
-
liŋ ni naa.
-
ti ngeel joŋre naa wo.
-
de joŋ espor.
-
ti felew, moto, mooda, noga à de maŋ naa ti ɓaara laybla.
5. Hoo sug ti tenen mbarga maaga le ɓil ɗa mono
Dafid wãã ga Jeofa tĩĩ wer koɗ naa le hãã de maaga naa le ɓil mããre naa wo ɗa mono. Jaŋ Siŋ wora 139:13-17, blam ɓe ndal wee ti wiigi jag maa blam la no
-
Nen Jeofa mono, tenen jee táabay tĩĩ wer na de maaga á le ɓil ɗa mo yaw mbala de maaga á go de biŋgi mono?
Jag liŋgi maaga Jeofa hay hãn ne weere Israyel wo ɓaa ɓaa hay koɗ tenen wãy de ɓiili wo de mbarga maa ɓil ɓen ɓog ɓuy. Jaŋ Laage go 21:22, 23, blam ɓe ndal wee ti wiɗgi jag maa blam la no:
-
Le ɓaa ɓaa mono, de maaga do jobo baa wãy de ɓiili we, day mbargan húu we go no, Jeofa hay ko re sen na koge là?
-
Day hayga jobo ĩĩ mbarga maaga le ɓil ɗa we go re’ no, sen joŋ see ne Jeofa na joŋge lay? b
-
Ndo ɗig ti ɗiggi Baa sen mokay na ga hãylà?
Maapo wãy po maaga mbe go de koge ga tenen jee táabay diŋ fẽn maaga daŋgo ɗig ga se de ɓo’ ɓiilin go maa yã tenen ɓe go. Jaŋ Esay 41:10, blam ɓe ndal wee ti wiigi jag maa blam wo la no:
-
Hayga à yaŋ jor glog jobo ga á mo ɓo’ ɓiili go no, á de mbiɗ nen wii kayge na se wo là? Wer may?
NAA YAŊ LAƊGE GA: “Á diŋ mbarga ɓe, á da ga se ɓo’n go yaw sen diŋ re ɓe.”
-
Mayse ɓo’ nen mo ga Jeofa ko tenen wãy de ɓiili wo de mbarga maa ɓil ɓen ɓog ɓuy diŋ fẽn maaga daŋgo là.
KLUURI HADGE NO
Bible had naa ga tenen diŋ kado po maa de woore debaŋ ga Jeofa hãn ne naa. Wersen so, da ga naa mo da tenen naa, da tenen jar lan wo lay, hoo sug ti tenen naa, hoo sug ti tenen jar lan wo lay, koɗ tenen naa de woore, day koɗ tenen jar lan wo de woore lay.
Ferge ko nen hadge no
-
Wer mayse ga tenen jee táabay diŋ fẽn maaga daŋgo nen Jeofa là?
-
De maaga jobo taw naw jee táabay go re’ mono, á joŋ see ne Jeofa na joŋge là?
-
Mayse co jag ɓo ti kado se ga Jeofa hã ne naa ga diŋ tenen mo là?
MAA DA’ WER PA
De ɗeŋ maa hõn ga naa joŋ suse’ ne Jeofa ti tenen maaga á hãn ne naa mo là?
Baa fug mbe ɓil go ne wãy maaga ɓo’ ɓiili go ti lay yaw? Da’ yiŋgi jag ti ɓe ti
Maa ga Baa ko tenen diŋ fẽn po maaga daŋgo mono, sen kay naa jag hrag wo de espor maa de bay ngar wo na kayge là.
Hayga jobo yaŋ ɗiggi ga se ‘war see ɓe go no, Bible kayn na kayge là?
« Je veux mourir—Est-ce que la Bible peut m’aider si j’ai des idées suicidaires ? » (article jw.org)
a Jar maaga jiili ɓaara go de carge mono, Jeofa ko decoo ɓaara (Siŋ wora 34:18). Á de ko re maaga hã wo lawge ne jobo nen maaga se ɗig ga se ‘war see se go mono day se da ga se kay ne. Maa ko maaga kayge ɓen coɓ mo coɓge la mono, jaŋ article « Je veux mourir—Est-ce que la Bible peut m’aider si j’ai des idées suicidaires ? » maaga naa da’ ti ngeel Maa da’ wer pa maa ɓil hadge sen la mono.
b Jar maaga hay ɓod wo ɓiili go mo law wo debaŋ wa—Jeofa de sãy fug ɓil go ne hara ti. Maa ko fẽn maaga Jeofa de gorge ɓe mono, jaŋ article «L’avortement : qu’en dit la Bible ?» ti ngeel Maa da’ wer pa maa ɓil hadge sen la no.
