HADGE 40
Naa joŋ joŋge maaga naa mo hay go de fããge nen Jeofa là?
Naa ko ba doo maaga maabe po maa de dage go de grag mbarga ɓe maa woge ti lakol ɗa. Á dur go de ẽgre ɓe ɓuy maaga á mo hay go de yogge de woore, lan ga õõbe ɓe mo hay go de yogge de woore, day mo hay de heege de woore lay. Sen joŋ ga mbargan mo hay jam, lan ngaɓ go ne jar ga pããre ɓe wo de ko de el ɓe. Doo sen no lay, pan dage naa maa ciŋn, Jeofa da ga naa mo hay go de fããge ti hõõgesee lay nen ɗiggi lay. De maaga naa yaŋ go de fããge no, da’ge ɓen diŋ maa naa, lan naa maŋ ɗuu Jeofa ciŋ.
1. Naa joŋ joŋge maaga naa mo hay go de fããge ti hõõgesee là?
Jeofa wãã ne naa ga: “Lag we bay ɗag” (1 Piyer 1:16). Maaga naa mo hay go de fããge mono, ni naa mo hay go de yogge ti hõõgesee lan nen ɗiggi lay. Naa joŋ go de yogge ti hõõgesee diŋ de yogge tum, lan de joŋge ga õõbe naa, tiŋ naa lan mooda naa mo hay wo go de yogge de woore. Naa mo hay kayge maaga tiŋ-Baa naa mo hay go de yogge de woore lay. Hayga naa lag we go de yogge ti hõõgesee no, ni naa de maŋ ɗuu Jeofa ciŋ—2 Korente wo 6:3, 4.
2. Naa men joŋre maa hõn wo go maaga naa mo hay go de yogge là?
Bible wãã ne naa ga “naa mo fãã we ɗag maa ti hõõgese naa wo go. . . naa fãã ɗiggi naa wo go ɓuy” (2 Korente wo 7:1) Diŋ wersen so ga naa mo dur go de ẽgre naa ɓuy maaga naa mo ɗee go see fẽẽre maaga ɓlag wo hõõgesee naa noga dem wo ɗiggi naa. Ɗiggi naa de hay de woore nen Jeofa. Diŋ wersen so ga naa dur go de ngar ẽgre naa maa nii ɗiggi maa de baywoore wo wo go ti naa (Siŋ. 104:34). Naa mo hay de ko koɗ jag naa lay—Jaŋ Kolos wo 3:8.
Mayse joŋ ga naa mo hay go de fããge ti hõõgesee noga nen ɗiggi pa là? Fẽẽre maa doo cugi noga drooge dem wo hõõgesee naa. Daga naa mo ɗee go see ɓaara hãã. Jee maaga bay ɗaa cug wo de drooge wa joŋ tum jam debaŋ, lan ngaɓ go ga se de hoo sug ti tenen maaga Baa hãn ne naa de koɗ mono. Naa joŋ go de fããge nen ɗiggi pa diŋ de men joŋ fẽẽre maa doo koge “pornografi” noga “masturbation” wo go (Siŋ wora 119:37; Efes wo 5:5). Á bay gus maaga naa mo men fẽẽre sen mo deŋ wo go wa, amaa naa kãã mbe yaŋ de kayge maa ni Baan ane—Jaŋ Esay 41:13.
FRUGGI NEN HADGE NO
Naa ko wee wer mayse ga naa yaŋ go de fããge ti hõõgesee naa maŋ ɗuu Baa ciŋ la, lan naa ko ɗeŋ maa men joŋ fẽẽre maaga dem wo hõõgesee naa wo de ɗiggi naa wo go.
3. Naa yaŋ go de fããge ti hõõgesee no, se maŋ ɗuu Jeofa ciŋ
Naa ko ɗiggi Jeofa ti fããgen diŋ de frugge nen jag liŋgi ɓe maaga á hãn ne jar Israyel wo ɓaa mono. Jaŋ Laage go 19:10 lan 30:17-19, ni ndal wee ti wiigi jag maa blam wo la no:
-
Verse sen wo la ngaɓ wo ɗiggi Jeofa ti fããge maa ti hõõgesee na ga hãylà?
-
Joŋre maa de woore maa hõn kay wo ndo maaga ndo mo hay go de fããge ti hõõgesee là?
Maaga ndo mo hay go de fããge ti hõõgesee mono, á wii naw wo de durgi debaŋ. Amaa naa mbe de kããge maaga naa joŋ mbe yaŋ go de fããge koh naa mo hay ba le gene noga naa mo hay de coo noga bay wa yaw. Ko VIDEYO, ni ndal wee ti wiigi jag maa blam la no.
-
Hayga fẽẽre naa yaŋ wo go de bag jag de woore lan ga naa go de fããge ti hõõgesee lay no, jar maaga naa sii wããre Baa ne hara wãã wo ti naa ga hãylà?
4. Naa blum ɗiggi maa de baywoore wo no
Jeofa de kããge maa kay naa maa men joŋre maa de baywoore maa hõnla go ɓuy
Jobo maaga ɗaa cugi noga drooge de koge de woore ga á de gayri maaga se mo men go. Hayga ndo yaŋ nen ngeel sen no, mayse kay ndo maa menge ɓe go là? Ɗig ti ɓlagge ɓe maaga á joŋ ne ndo ti hõõgesee mono. Jaŋ Matiye 22:37-39, ni ndal wee ti ɗeŋ maaga ɗaage cug noga drooge hãy barge maa ti holaŋ naa de . . .
-
Jeofa.
-
Jar maa ɓi feele naa wo de jar leege naa wo.
Kiɗ ɗeŋ maa men joŋre maa de baywoore wo go. a Ko VIDEYO.
Jaŋ Filip wo 4:13, ni ndal wee ti wiigi jag maa blam la no:
-
Tosge tum, fruggi nen wããre Baa tum, lan woge ti taygeti tum kay jobo maa men joŋre maa de baywoore wo go na kayge là?
5. Dur maa men ɗiggi wo de joŋre maa de baywooren wo go.
Jaŋ Kolos wo 3:5, ni ndal wee ti wiigi jag maa blam wo la no:
-
Naa ko koge ga pornografi, yerge ɗiggi figliw ne kããra ti telefon, lan masturbation wo diŋ joŋre maa de baywoore nen Jeofa na koge là?
-
Ndo mbo de ɗiggi ga Jeofa joŋ mbe ni de maaga wãã ga naa mo hay go de fããge nen ɗiggi mo yawlà? Wer mayse là?
Ko ɗeŋ maaga ndo blaw go de ɗiggi maa baywooren wo no. Ko VIDEYO.
Yeso joŋ joŋre de saɓlaŋ po maa ngaɓ fẽn maaga naa mo joŋ nen maaga naa mo lag go de fããge nen ɗiggi. Jaŋ Matiye 5:29, 30, ni ndal wee ti wiigi jag maa blam la no:
-
Yeso hay bay da wããge ga naa mo joŋ see naa de ɓlagge wa, amaa naa mo ɗig deparday tu maa cooge. Naa joŋ mayse maa nii ɗiggi maa de baywooren wo go ti naa là? b
Hayga ndo yaŋ durgi maa men ɗiggi maa de baywooren wo go no, se diŋ joŋre maa de woore nen Jeofa debaŋ. Jaŋ Siŋ wora 103:13, 14, ni ndal wee ti wiigi jag maa blam la no:
-
Hayga ndo yaŋ durgi maa men joŋre po maa de baywoore go no, verse sen la kay wo ndo kayge maa ya’ wer durgi là?
Ya’ wer durgi hayga ndo le’ we no!
Maapo mopo a ne naa ti ga á joŋ do naa blam maaga naa dur go debaŋ maa menge ɓe go mo ga so. Amaa ɗig ti wããre maa ta’ la ɗa: Bay diŋ werga jee ɗee ma’ ɓaale noga le’ ga á wãã ga se bas go ti ɗee tu wa, á fer tĩĩ wer ɗee ɓuy ga. Doo sen no lay, ndo fer we go joŋ fẽn maaga ndo hay durgi ga ndo mo men go pa no, se bay da wããge ga á joŋ do ɓo ga so na wa, noga ga durgi maaga ndo hay dur go de koɗe na wa. Le’ge bay diŋ ɓlagge wa—á diŋ re maaga jar ɗee wo ɓuy yiŋ wo de ɓe. Laa do go gesiŋ wa hase! Ndo ɗii mbo yaŋ go ne joŋre maa de baywooren wo ti de kayge maa ni Jeofa no.
NAA YAŊ LAƊGE GA: “Ndi go de kolge diŋ gebee ɓe, á men go do ɓi ga so.”
-
Ndo joŋ joŋre de verse maa hõn maa ngaɓge ne jee ɓen ga de ẽgre maa ni Jeofan á men joŋre se de baywooren yaŋ go là?
KLUURI HADGE NO
Naa co jag Baa de maaga hõõgesee naa, ɗiggi naa, seele naa yaŋ wo de woore noga go de fããge no.
Ferge ko nen hadge no
-
Wer mayse ga á de woore de maaga naa yaŋ go de fããge là?
-
Ndo joŋ joŋge maaga ndo mo hay go de fããge ti hõõgesee là?
-
Ndo joŋ joŋge maaga ɗiggi ɓo wo de seele ɓo mo hay wo tum de woore là?
MAA DA’ WER PA
Mayse go gus maa joŋge hayga ndo yaŋ de sãy maaga ndo mo hay go tum de fããge koh ndom hay ba de coo là?
Ko ɗeŋ maa gus maaga ndo joŋ maa men ɗaage cug go mono.
Ko re maaga a wo le wer pornografi mo ɗa.
“La pornographie—Inoffensive ou dangereuse?” (La Tour de Garde, 1er août 2013)
Ko maaga blo po men ko pornografi go blam maaga se hay kol go gebee ɓe mo ɗa.
“J’ai échoué bien des fois avant de réussir” (La Tour de Garde, no. 4 2016)
a Artikle “Comment arrêter de fumer” ngaɓ yaŋ po wo maaga kay wo jobo maa men ɗaage cug go.
b Maa da’ ẽgre maa ɗiigi go ne “masturbation” ti mono, ko ““Comment arrêter de me masturber?” ɓil kefder Les jeunes s’interrogent—Réponses pratiques, Volume 1, chapitre 25.
