HADGE 43
Krétiyẽ mo hay ko wo yii na koge là?
Go ti tamsir krub ɓuy, ɗiggi jar ti yii sar sare. Á co jag jar maa po wo de maaga á jo wo yii de bar ɓaara wo tum tum mono. Jar maa po maŋ wo ɓaaran ga saara jo yii ga. Maa po jon wo nen maaga say saara taa go ɗa. Day ɗiggi Baa ti yii na ga hãylà?
1. Joge yii diŋ ɓlagge yawlà?
Bible bay maŋ jag jar go ti joge yii wa. Ba yaw mono, de maaga á wãã ti fẽẽre maa de woore maaga Baa hã ra ne naa mono, yii yoo ɓaara ni lay. Á wãã ti ɓe ga: “yii maga fruy ɓil je táabay” (Siŋ wora 104:14, 15). Jar jag-Baa maa de deele po wo ɓil Bible ngaɓa hay wo jo yii maa taɗ jare—1 Timote 5:23.
2. Bible baa yaŋ maa hõn wo ne jar maaga jo wo yii mo là?
Jeofa maŋ go diŋ jag joge yii maa debaŋ, lan taɗge go de ɓe (Galad wo 5:21). Wããre ɓen wãã ga: “Hay yoo jar maaga jo wo yii debaŋ wa” (Jag jõõ 23:20, NWT). Day hayga naa maŋ we ga naa jo—koh de yoŋre laybla’ no—ni naa mo jon nen maaga naa ɗig de woore ga so wa, ga naa ɗaw jag naa ga so, naa joŋ fẽẽre de woore ga so noga maaga naa joŋ jam ga so wa. Hayga naa kãã we maa ɗaw see naa see joge yii ga no, ɗawa ɓen ni naa kiɗ wee ɗeŋ maa men joge ɓe go ɓuy de nen seŋ.
3. Naa hoo sug ti ɗiggi jar lan ti ɓaŋ yii na hooge là?
Wosela ɓuy maŋ ɗiggi ga se jo yii yaw baywa yawla diŋ se de see ɓe. Faage bay de ɓo’ge ne naa maa caa kiida jee maaga jo yii de ngar ẽgre ɓe mo wa, lan naa mo srog glog jee maaga bay de sãy jo yii ti wa joge ɓe wa lay (Rom wo 14:10). Hayga yii maaga ndo jon yaŋ kaŋ wer hẽn ɓon joŋ ɓlagge no, ndo mbo de kããge maaga ndo maŋ ga ndo jo ga so (Jaŋ Rom wo 14:21). Naa kiɗ wee diŋ “fẽn maa de el ti see [naa] doga wa. Amaa wosela mo kiɗ fen ma de el diŋ ne kan ɓe”—Jaŋ 1 Korente wo 10:23, 24.
FRUGGI NEN HADGE NO
Naa ko wããre Baa maaga kay wo naa hayga naa maŋ we ga naa jo yaw baywa yawla, lan jo gemãy la hayga naa maŋ we ga naa jo ɓe no. Naa kiɗ wer ne fẽn maaga naa joŋ hayga naa yaŋ go gebee yii no.
4. Ɗig diŋ ndo ga ndo jo yaw baywa yawla
Yeso hay ɗiggi ti yii na ɗiggi là? Maa ko ɗiggi ɓe ti yii mono, naa ko wee fẽn mbudgi ɓe maa taŋgun ɗa. Jaŋ Jaŋ 2:1-11, ni ndal wee ti wiigi jag maa blam wo la no:
-
Nen fẽn mbuɗgi sen la, naa had mayse see ɗiggi Yeso ti yii, lan ti jar joge ɓen wo là?
-
Doo maaga Yeso hay bay go de maŋ jag joge yii wa mono, Krétiyẽ mo hay ko wo jee maaga maŋ ga se jo yii na koge là?
Amaa, bay diŋ ga faage de ɓo’ge ne Krétiyẽ maa jo yii ga á kon de woore maaga se jon mbe tum koɗ wa. Jaŋ Jag jõõ wo 22:3, lan ni naa ko ɗeŋ maaga wããre sen la kay naa ti joŋre po wo mo ta’ la ɗa:
-
Ndo yaŋ ya’ moda noga joŋ joŋre de masiŋ no.
-
Ndo yaŋ de ɓiili no.
-
Hayga dogda baa yaŋ we ne ndo ga ndo mo jon wa no.
-
Hayga á yaŋ de gayri ne ndo maa ko maaga ndo mo jon gemãy la no.
-
Hayga jag liŋgi bay we ɓo’ faage ne ndo maa jo yii wa no.
-
Hayga ndo yaŋ jeŋ jobo maaga maŋ ɓen ga se jo yii ga wer maaga á hay a de re ne se ti ɓaa debaŋ no.
Ndo mbo nen hoo yii ti few wo, doo few dage wãy noga war yawlà? Maa ko fẽn maaga kay ndo maaga ndo mo joŋ joŋge la mono, Ko VIDEYO.
Jaŋ Rom wo 13:13 lan 1 Korente wo 10:31, 32. Blam maaga nday jaŋ verse maa hõnla ɓuy we go no, ni ndal wee ti wiigi jag maa blam la no:
-
Verse sen kay wo ndo na kayge maa maŋ ɗiggi maaga co jag Jeofa là?
Krétiyẽ maa hõnla ɓuy maŋ ga se jo yii yaw bay wa yawla diŋ se de see ɓe. Koh á mo jon ba de ngar ngeel maa po ta’, ti wur maa po wo se maŋ ga se jo mbe ga lay
5. Ɗig ti maaga ndo jon gemãy la mono
Hayga ndo ɗig we ga ndo jo yii no, ni ndo ɗig ga koh de maaga Jeofa mbe de ɓo’ faage ga jo mbe laybla no, á maŋ jag joge ɓe maa pur purn go. Wer maylà? Jaŋ Ose 4:11, 18, ni ndal wee ti wiigi jag maa blam la no:
-
Re mayse joŋ de maaga jobo jo yii we debaŋ là?
Mayse kay naa maa men joge yii maa pur pur go là? Naa de sãy maaga naa hay de ko ngar hugli naa noga ngeel maaga ẽgre naa taw ni mono. Jaŋ Jag jõõ wo 11:2, ni ndal wee ti wiigi jag maa blam la no:
-
Wer mayse ga á de woore maaga ndo mo ngaɓ daydáy yii maaga ndo jon go ta’ là?
6. À naa blum gebee yii naage là?
Ko fẽn maaga kay blo po maaga á mo men jo yii go debaŋ mo ɗa. Ko VIDEYO, ni ndal wee ti wiigi jag maa blam wo la no.
-
Ɓil videyon mono, joge yii pur pur hay hãy ɗeŋ joŋre Dimitri na hãyge là?
-
Á hay mbe ne hẽn gus maaga á mo men jo yii go yawlà?
-
Á joŋ joŋge maaga se mo naa blum gebee yii là?
Jaŋ 1 Korente wo 6:10, 11, ni ndal wee ti wiigi jag maa blam wo la no:
-
Re maa hõn ga jar taɗge de yii yiŋ wo de ɓe ne?
-
Mayse ngaɓ ga jee taɗge go de yii men mbe joge ɓe go lay là?
Jaŋ Matiye 5:30, ni ndal wee ti wiigi jag maa blam la no:
-
Caage do ngaɓ diŋ durgi maaga ndo dur maaga ndo mo hay de cõõre jag Jeofa mono. Ndo joŋ joŋge là, hayga á yaŋ de gayri ne ndo maa naa blum joge yii maa debaŋ là? a
Jaŋ 1 Korente wo 15:33, ni ndal wee ti wiigi maa blam la no:
-
Jar maaga nday see wer kẽẽ srog wo glog ɓo jo yii debaŋ na de ɗeŋ maa ẽlà?
NAA YAŊ LAƊGE GA: “Joge yii diŋ ɓlagge yawlà?”
-
Ndo fer ti ɓe na ga hãylà?
KLUURI HADGE NO
Jeofa joŋ yii maaga á mo hã fruygi ne naa, amaa se maŋ jag joge ɓe maa debaŋ, lan taɗge de ɓe go.
Ferge ko nen hadge no
-
Bible wãã ti yii na ga hãylà?
-
Re maa wer joge yii debaŋ diŋ may wo là?
-
Naa hoo sug ti ɗiggi jar lan ti ɓaŋ joge yii na hooge là?
MAA DA’ WER PA
Weere maa mbaw mbaw maŋ wo ɗiggi de woore ti ɓaŋ joge yii na maŋge là?
Ko fẽẽre maaga kay wo jobo maa ɗiigi go ne re maaga da’ wo ne wer yii mo ɗa.
“Quelle place l’alcool a-t-il dans votre vie” (La Tour de Garde, 1er janvier 2010)
Kretiyẽ wãã mbe ‘ ‘à la santé’ ’ ti joge yii lay yawlà?
“Questions des lecteurs” (La Tour de Garde, 15 février 2007)
Ɓil wããre maaga “J’étais une barrique sans fond” ko maaga blo po men jo yii maa debaŋ go mo ɗa.
“La Bible Changes des vies” (La Tour de Garde, 1er mai 2012)
a Jar maaga wo diŋ gebee yii wo de sãy kayge dogtor maa yããge go jag ɓe. Dogtor maa kluuri wãã wo ga ɗawa diŋ ga jar maaga yiŋ wo de re wer yii mo hay jon wo wa so ɓuy yaw.
