HADGE 46
Wer mayse ga naa mo hã see naa go ne Baa day naa mo joŋ batem go là?
Ndo hã see ɓo go ne Jeofa diŋ de wããge ne hẽn nen tosge ga ndo goŋ diŋ se boŋ tu, lan ga ndo kaŋ dage ɓen go peel fẽẽren ɓuy nen naw ɓo (Siŋ wora 40:9). Blam, ndo joŋ batem go kway so. De joŋge doo sen no kay, ni ndo de ngaɓge ne jar ga ndo go de hã see ɓo ne Baa nen tosge. Ɗiggi maaga ndo maŋ maa hã see ɓo go ne Baa diŋ ɗiggi maa de woore maaga ndo maŋ tee ɓe ti boŋ ga so hase. Á diŋ ɗiggi maa de woore maaga coo naw ɓon de woore. Day mayse srog glog ɓo maa maŋ ɗiggi maa de maŋ sen là?
1. Mayse srog glog jobo maa hã see ɓe go ne Baa là?
Mo hay srog glog naa maa hã see naa go ne Jeofa nen tosge diŋ dage (1 Jaŋ 4:10, 19). Bible jor glog naa ga: “Ndo da ge Waŋkluu, Baa ɓon yaŋ go de jiili ɓo ɓuy, de maysee ɓo ɓuy, de ɗiggi ɓo ɓuy, de egre ɓo ɓuy lay” (Mark 12:30). Naa ngaɓ go ga naa da Baa bay diŋ de wããre naa tawa wa, amaa de fẽẽre maaga naa joŋ ra wo mo lay. Doo maaga jee twar wo de mãy maaga da wo kããra debaŋ maŋ wo ga saara mo da kããra go no mono, dage naa see Jeofa srog glog naa maa hã see naa go ne hẽn nen tosge, lan maaga naa mo joŋ batem go lay.
2. Bosa’ maa hõn wo ga Jeofa kaŋ ne jar maaga wo go de joŋ batem ti là?
Wur maaga ndo joŋ batem mono, ndo kol go yoo jar maa ɓil feele maa ni Jeofa maa de fruygi wo no. Ndo da’ ge wer yaŋ go ne dage ɓen ti fẽẽre ngaɓa debaŋ, lan barge ɓo see ɓe ya’ yaŋ ciŋ ni debaŋ dedaŋ maaga ndo de ɓe wara mono (Jaŋ Malasi 3:16-18). Ciŋ ti maaga ndo da Jeofa doo pããbe ne mono, ndo da’ ɓil feele maa ti nenterse ga go ti tamsir ɓuy ga da wo ne, lan da wo ndo lay mono (Jaŋ Mark 10:29, 30). Kidolgi, ndo mo hay cegaɗ go ne fẽẽre maa po wo ti ɗa taŋgu maaga ndo joŋ batem mono. Ndo de had fẽẽre ti Jeofa, had dage ɓe, lan naa nen hãge ɓil ɓo go ti weel ɓe Yeso. Hayga ndo joŋ fẽẽre sen mo deŋ wo we go, lan ndo joŋ batem we go lay no, ni kaŋ nen ga ndo ti faage tenen maa tum no. Wããre Baa wãã ga: “Batem . . . Maga yãã we go jag ɓlagge ɓay patala mono”—1 Piyer 3:21.
FRUGGI NEN HADGE NO
Ko wer mayse ga á de woore maaga ndo mo hã see ɓo go ne Jeofa lan, ndo mo joŋ batem go là.
3. Wosela ɓuy maŋ jee maaga se goŋ ne diŋ se
Le ɓaa Israyel mono, jar maa po hay ɗig wo ga saara mbe de kããge maa goŋ Jeofa wo de baa Baal, ga bay diŋ baa maa cwãy wa wo ɓog ɓuy. Amaa Jeofa ɓo’ profed ɓe Eli le wããge ne hara ga á bay wo de kããge maa goŋ se, lan goŋ Baal ni lay wa. Jaŋ 1 Waŋre wo 18:21, ni ndal wee ti wiigi jag maa blam la no:
-
Jar Israyel mo hay joŋ wo na joŋge là?
Doo jar Israyel wo no lay mono, naa mo hay maŋ jee maaga naa goŋ ne go. Jaŋ Lug 16:13, ni ndal wee ti wiigi jag maa blam wo la no:
-
Wer mayse ga naa bay maa goŋ jobo noga fẽn po maa tigriŋ sara de Jeofa wa là?
-
Naa joŋ joŋge maa ngaɓge go ne Jeofa ga naa goŋ diŋ se boŋ là?
4. Ɗig ti dage maaga Jeofa de ɓe see ɓo mono
Jeofa hã fẽẽre maa de woore wo ne naa ngaɓa debaŋ. Day naa hã mayse ne hẽn lay là? Ko VIDEYO.
Jeofa joŋ joŋge maa naa nen dage ɓen go see ɓo là? Jaŋ Siŋ 104:14, 15 lan 1 Jaŋ 4:9, 10, ni ndal wee ti wiigi jag maa blam wo la no:
-
Jeofa hã fẽẽre maa hõn wo ne ndo ga co jag ɓo debaŋ là?
-
Fẽẽre sen kaŋ wo wer ɓo ɗiggi ti Jeofa na kaŋge là?
De maaga à hã kado maaga co jag naa we ne naa no, naa joŋ de sãy joŋ suse’ ne jee maaga hãn ne naa ti. Jaŋ Dogge jag liŋgi 16:17, ni ndal wee ti wiigi jag maa blam la no:
-
De maaga ndo ɗig ti fẽẽre maaga Jeofa hã ra ne ndo ɓuy we no, se jor glog ɓo maaga ndo mo hã mayse ne hẽn lay là?
5. Hãge see go ne Jeofa a de bosa’ wer debaŋ
Jar debaŋ ɗig wo ga raage ɗuu, da’ge joŋre maa kluu, noga suŋgu hã fruygi. Sen mbe na cwãy yaw? Ko VIDEYO, ni ndal wee ti wiigi jag maa blam wo la no.
-
Koh de maaga ma’ge baloŋ hay mbe de cõõre jag jee maa ɓil videyon la debaŋ laybla mono, wer mayse ga á men joŋre sen go là?
-
Ndo mbo de ɗiggi ga maŋge ɗiggi maa de woore maaga á maŋ ga se hã see se diŋ ne Jeofa, amaa bay ne baloŋ wa diŋ ɗiggi maa de woore yawlà? Wer maylà?
Taŋgu maaga apotre Pol kol krétiyẽ mono, á hay joŋ lakol jar jwif wo debaŋ, lan hay had ne diŋ jee hadge maaga à go de koge ɓe ti ngeel ɓuy. Amaa se men fẽẽre sen mo deŋ wo go ɓuy maa kol krétiyẽ. Day Pol hay fer ɗiggi ti fẽẽre maaga se hay men ra wo go mo yaw? Jaŋ Filip wo 3:8, ni ndal wee ti wiigi jag maa blam wo la no:
-
Wer mayse ga Pol wãã ga fẽẽre maaga se joŋ ra taŋgu maaga se kol krétiyẽ hay wo go nen se doo “jããre nono” là?
-
Á da’ mayse ti tuu fẽẽre maaga á men ra wo go mo là?
-
Ti ɗiggi ɓo mono, hã fruygi ne ndo debaŋ diŋ joŋre maa ni Jeofan yaw noga joŋre maa ti tamsiri?
De maaga Pol kol krétiyẽ mono, á da’ fẽẽre debaŋ de daŋ maaga se hay men ra go mono
NAA YAŊ LAƊGE GA: “Á bay de baage ga jobo hã see ɓe go ɓuy ti joŋre maa ni Baan wa.”
-
Ndo ɗig na ga á mbe ti ngeel ɓe maaga ndo mo hã see ɓo go joŋ joŋre ne Jeofa yaw? Wer mayse là?
KLUURI HADGE NO
Dage jor glog naa hã see naa go ne Jeofa nen tosge, lan joŋ batem.
Ferge ko nen hadge no
-
Wer mayse ga dage naa wo de goŋge naa mo hay diŋ maa Jeofa boŋ là?
-
Jeofa poɗ sedeewa ɓe maaga wo go de joŋ batem na poɗge là?
-
Ndo mbo go de sãy hã see ɓo ne Jeofa ti nen tosge lay yawlà?
MAA DA’ WER PA
Ko maaga wãy maa ma’ musig po wo de jee ma’ baloŋ po hã wo see ɓaara go ne Jeofa de see ɓaara mo ɗa.
Les jeunes s’interrogent—Que vais-je faire de ma vie?—Souvenirs (6:54)
Fẽẽre maa tigriŋ maaga jor wo glog ɓo maa hãã see ɓo go ne Jeofa nen tosge mono.
“Wer mayse ga ndo mo hã see ɓo go ne Jeofa là?” (La Tour de Garde, 15 janvier 2010)
Ko maaga jar maaga hã wo see ɓaara go ne Jeofa wo de fruygi ɓil videyo mo ɗa.
Nen wããre maaga kluu ɓen ga:“Pendant des années, je me suis demandé pourquoi on existe?’ ” Ɗig ti fẽn maaga kay wãy sen maa ko fẽn maaga daŋgo nen ɓe mo ɗa.
“La Bible transforme de vies” (La Tour de Garde, 1er novembre 2012)
