HADGE 11

Ndo joŋ joŋge maaga jaŋge Bible ɓon mo kay mo debaŋ là?

KAŊ NE

Ndo da’ see ɓo we go ti boŋ peel joŋre po kluu ga ndo ɗig ga á bay gus maa ɓo’ jag go do ɓo wa yawlà? Maaga á mo joŋ go gus mono, maapo ndo kal car ɓil ɓe go me’me’e. Jaŋge Bible na doo sen no lay. Maapo ndo ba de wii jag see ɓo ga, ‘Ndi tĩĩ jaŋge ɓe nen genlà?’ Ɓil hadge sen la, naa ko fẽẽre po yaŋ wo ga kay wo naa nen maaga jaŋge Bibe naa mo co jag naa.

1. Wer may ga naa mo hay jaŋ Bible tum tum là?

Jobo maaga jaŋ Bible tum, noga jaŋ “jag liŋgi mani [Jeofan]” joŋ ge yaŋ de fruygi day wooge yaŋ lay (Jaŋ Siŋ wora 1:1-3). Maa tĩĩ wer ɓe mono, jaŋ Wããre Baa tum nen naw nen weere boore po me’me’e. Hayga ndo had see ɓo we go de jaŋ Bible tum no, se yãã jag ɓo yaŋ.

2. Naa joŋ joŋge maaga jaŋge Bible naa mo kay naa là?

Maaga jaŋge Bible naa mo kay naa mono, daga naa mo frug wer ɓe noga “ɗig…wer” fẽn maaga naa jaŋn go de woore ɗa (Josuwe 1:8). De maaga ndo de jaŋge ɓe mono, ndo de wii jag see ɓo ga: ‘Ngeel sen had me ti Jeofa Baa na ga hãylà? Ndi joŋ joŋre de wããre sen mo ta’ nen naw ɓin na joŋge là? Ndi kay jar de ngeel se ga ndi jaŋn mo ta’ na kayge là?’

3. Ndo joŋ joŋge maaga ndo mo da’ wur maa jaŋ Bible là?

Á mbe gus maaga ndo mo da’ wur maa jaŋ Bible yawlà? Jar debaŋ, doo ndo no lay, bay wo da’ wur go gus maa jaŋ Bible wa. Daga naa mo dur maa “joŋ joŋre de woore de wur maa do naa wo” no (Efes wo 5:16, NWT). Ndo da mbo we, ndo maŋ wur go ka’ tum nen naw maa jaŋ Bible. Jar maapo jaŋ wo ne de jag toŋ mbuh. Jar maapo jaŋ wo ne de ceg de maaga á wo de iggi mono, maapo jaŋ wo ne de law law. Jar maapo jaŋ wo ne de suŋ de maaga á le’ wo we suugi no. Day ndo lay, wur maa de woore maa ɓon na diŋ maa hõn lay?

FRUGGI NEN HADGE NO

Naa mo ko mo maaga kay naa yaŋ maaga jaŋge Bible naa mo yãã jag naa ɗa. Lan fẽn maaga kay naa maa bag jag see naa go nen maaga hadge naa mo kay naa.

Dega’ doo maaga naa mbe de kããge maa had re rege maapo wo nen maaga á mo yãã wo jag naa no mono, naa mbe de kããge maa had jaŋ Bible nen maaga á mo yãã jag naa lay

4. Joŋ nen maaga jaŋge Bible ɓon mo co jag ɓo

Tĩĩgi wer jaŋge Biblen bay gus wa. Amaa, ndo mbo na “de sãy” jaŋge ɓe ti nen maaga á mo yãã jag ɓo, dega’ doo jobo maaga de had rege po defay no lay no. Jaŋ 1 Piyer 2:2, ni ndal wee ti wiigi jag maa blam la no:

Hayga ndo yaŋ jaŋ Bible nen naw tum no, ndo dig ga á yãã mbe jag ɓo yaŋ nen maaga ndo kol go tum gor wur jaŋge ɓen yaw?

Ko VIDEYO maa ko jar po maaga jaŋge Bible hay yãã jag ɓaara mo ɗa. Blam ɓe ndal wee ti wiigi jag maa blam wo la no.

VIDEYO: Weere maa jõõre po wo de kiɗ deŋ maaga jaŋge wããre Baa mo yãã jag saara (5:33)

Ɓil videyon la, weere maa jõõre de tigliiri hay hres wo go ne re maa hõn wo ti là?
Mayse kay ra maaga á mo jaŋ wo Wããre Baa tum là?
Á joŋ wo joŋge maaga jaŋge Bible mo yãã jag saara là?

Ɗeŋ po wo maa tĩĩ wer ɓe:

Kiɗ Bible po maaga de ferge ti tu ɓe keɗed ɗawa, day de jag po maaga naa wãɗ ra tum nen naw naa wo mo lay no. Jaŋ Traduction du monde nouveau hayga á yaŋ go de ferge de jag ɓo no.
Tĩĩ wer jaŋge Biblen ti ngeel maaga sen co jag ɓo mono. Ndo da’ ɗeŋ maaga kay wo ndo yaŋ maa jaŋ Bible ti ngeel “Maaga jaŋge Bible mo yãã jag ɓo mono.”
‘Coche’ ngeel maaga ndo go de jaŋ sen mono. Ndo da’ ngeel ‘coche’ ɓen yaŋ ti ngeel “Jaŋge Bible ɓi no”.
Joŋ joŋre de application JW Library^®. Á kay mo maa jaŋ Bible lan maa co’ sug ɓe ti telefon androyid noga appareil maa tigriŋ po ti ngeel maa hõn la ɓuy ga ndo da’ see ɓo ni mono.
Joŋ joŋre de annexes maa ɓil Tra duction du monde nouveau. Ndo da’ karte wo ni, taablo wo, lan legsig ga kay wo ndo yaŋ maaga jaŋge Bible ɓon mo co jag ɓo.

5. Bag jag see ɓo go see hadge Bible ɓo no

Jaŋ Siŋ wora 119:34, ni ndal wee ti wiigi jag maa blam wo la no:

Wer mayga á de el ga naa mo tos ɗa de maaga naa le’ we jaŋ Bible noga de maaga naa le’ we bag jag see naa see hadge Bible mo là?

Ndo joŋ joŋge maaga hadge Bible ɓon mo kay mo tum là? De maaga ndo de bag jag see ɓo see hadge Bible ɓon mono, gus ne de ɗeŋ maa ta’ wo la ɗa:

Jaŋ paragraf maa taŋgun ti ngeel “Fruggi nen hadge no” wo no.
Kiɗ versen wo no, ni ndo jaŋ ra, day ɗig ti maaga á tab wo de wããre maaga à de wããge ti ɓe na tabge là.
Ɓoɗ tre wer yiŋgi jag maa ti wiigi jag maa hõnla ɓuy mono; ni se kay mo yaŋ de maaga ndo de ndalge ti ɓe de jee had mogen mono.

Ndo ko mbo we?

Sedeewa Jeofa hay joŋ wo joŋre de wer Bible wo ngaɓa. Amaa, co jag wùr debaŋ diŋ La Bible. Traduction du monde nouveau werga á de ferge ti ngeel ɓe keɗed lay, á laa gus lay, day ɗuu Baa de yerge ɓil ɓe ni lay.—Jaŋ article «Les Témoins de Jéhovah ont-ils leur Bible à eux?» ɓil sid jw.org.

NAA YAŊ LAƊGE GA: “Hadge Bible de gaali debaŋ. Wur bay do ɓi maa hadge ɓe wa day ndi go de gayri lay.”

Ndo ɗig naa ga hãy là?

KLUURI HADGE NO

Maaga jaŋge Bible mo kay mo debaŋ mono, joŋ program maa jaŋge ɓe nen naw tum, tos Baa maaga á mo kay mo maa laa wer fẽn maaga ndo de jaŋge ɓe mono, lan bag jag see ɓo go see hadge Bible ɓon wo tum.