HADGE 01

Bible kay mo na kayge là?

KAŊ NE

Wosela yoo naa ɓuy wii jag see ɓe ti tenen no, ti bon wo no, ti húulí no, noga naw maa peeln wo no. Naa ɓuy naa yiŋ de re wo nen naw naa wo tum. Maapo naa wii jag see naa ga: naa joŋ joŋge maa ya’ re maa see naan wo go là? Naa joŋ joŋge maaga feele naa mo hay ti desãy là? Jar ngaɓa da’ wo yiŋgi jag ti wiigi jag maa kluuri wo ɓil Bible, day se kay ra de yaŋ po maa de woore wo maa soɗ tamsir ɓaaran lay. Ndo yaŋ mbo de koge ga Bible kay naa ɓuy yawlà?

1. Bible yiŋ jag ti wiigi jag maa hõn wo là?

Bible yiŋ jag ti wiigi jag maa kluuri maa blam wo la no: Tenen tĩĩ wer tĩĩgi là? Naa ti tamsir la maa maylà? Naa joo bon wer maylà? Jee táabay kol mayse blam húulí ɓe là? Naa ɓuy naa de sãy jam ti pa lay, day wer may ga durgi ti tamsir debaŋ là? Tamsir kol ge kolge nen naw maa peeln là? Bible wãã ga naa mo kiɗ wer ne wiigi jag sen wo no, day jar miliyoŋ pur da’ wo yiŋgi jag maaga baw jag jiili ɓaara ti wiɗgi jag ɓaaran wo ɓil Bible.

2. Bible kay naa kayge maaga naa mo hay tum de fruygi nen naw naa wo là?

Bible baa yaŋ maa de woore wo ne naa. Ko ba ɗa, á kay jar tiŋ wo maaga á mo lag wo liŋ ni ɓaara desãy. Á kay naa maaga naa mo soɗ gayri maa see naa wo no. Bible kay naa maaga joŋre naa mo coo wo jag naa. Naa ko ge fẽẽre maaga Bible wãã ti ɓaara lan fẽẽre maa tigriŋ wo yaŋ de maaga naa de seege de hadge sen wo lam no. Ndo ko ge yaŋ cwãy so ga “wããre sen ɓuy [kaŋ nen ga wããre maa ɓil Biblen ɓuy] . . . de ele.”—2 Timote 3:16.

Kefder sen mokay la jor glog ɓo maaga ndo mo frug nen Bible, amaa á coo go ti tu Bible ga. Wersen, wùr jor glog ɓo ga ndo mo jaŋ verse maaga wo de ngaɓge ni mo taɗ taɗ no, day ni ndo ngaf ra de fẽẽre maaga ndo de had rage mo lay no.

FRUGGI NEN HADGE NO

Naa mo ko maaga Bible kay jar po wo mo ɗa; naa joŋ joŋge maaga jaŋge Bible mo yãã jag naa là, day wer mayse ga á de el debaŋ maaga jobo mo kay naa maa laa wer ɓe là.

3. Bible ɓod nen naa ti faage

Bible doo lampa maaga ler ngeel go ne naa peel poɗag nono. Á kay naa maa maŋ ɗiggi maa de woore wo, day se ɓo’ nen naa ti fẽẽre maaga hres ge wo yaŋ peel mono.

Jaŋ Siŋ wora 119:105, ni ndal wee ti wiigi jag maa blam wo la no:

Jee yer siŋ sen hay ko Bible na de maŋ mayselà?
Day ndo ɗig ti Bible na ga hãy lay là?

4. Bible yiŋ jag ti wiigi jag naa wo no

Wãy po da’ yiŋgi jag ɓil Bible ti wiɗgi jag po maaga se hay joŋ kiŋgi pur wiɗ jag see ɓe ti ɓaara mono. Ko VIDEYO, ni ndal wee ti wiigi jag maa blam wo la no.

VIDEYO: Woo do go wa has! (1:48)

Ɓil videyon la, wãyn hay wiɗ jag see ɓe na ti re maa hõn wo là?
Hadge Bible kay ne na kayge là?

Bible wãã ga naa mo wiɗ wer fẽẽre. Jaŋ Matiye 7:7, ni ndal wee ti wiigi jag maa blam la no:

Ndo hay de sãy da’ yiŋgi jag ti wiigi jag maa hõn wo ɓil Bible ti ne?

5. Ndo joŋ joŋge maaga jaŋge Bible mo yãã jag ɓo là?

Jar wara ngaɓa wo de jaŋ Bible de fruygi day se de kay rage lay. Ko VIDEYO, ni ndal wee ti wiigi jag maa blam wo la no.

VIDEYO: Jaŋge Bible (2:05)

Ɓil videyon mono, weere jõõre wo de mãyre tigliiri sen ɗig wo ti jaŋge na ga hãylà?
De maaga á bay mbaara da jaŋge wa laybla mono, á ɗig wo ti jaŋge Bible na ga hãy lay là?

Hadge maa ɓil Biblen teŋ wo nen naa, hã wo coɓge ne naa maaga naa mo kaŋ ɗiggi ta’ ga naa da’ see naa yaŋ wurpo. Jaŋ Rom wo 15:4, ni ndal wee ti wiigi jag maa blam la no:

Ndo de sãy maaga Bible mo coɓ nen ɓo ti lay yawlà?

6. Á de el debaŋ maaga jobo mo kay mo maa laa wer Bible

Jar wara ngaɓa maaga jaŋ wo Bible ko wo ga ndalge ti ɓe de jar kay debaŋ. Jaŋ Joŋre 8:26-31, ni ndal wee ti wiigi jag maa blam la no:

Naa joŋ joŋge maa laa wer Bible là?—Ko verse 30 lan 31.

Jee Etiyopin hay de sãy maaga à mo kay se maa laa wer Bible no. Jar wara puri ko wo ga ndalge de jar ti Bible kay debaŋ

NAA YAŊ LAƊGE GA: “Jaŋge Bible diŋ ceege ti.”

Ndo ɗig ɓon na ga hãy lay? Wer may?

KLUURI HADGE NO

Naa da’ yaŋ maaga kay wo naa tum nen naw naa ɓil Bible, á yiŋ jag ti wiɗgi jag naa maa kluurin wo no, day pa, se teŋ nen naa nen maaga naa mo hay de kaŋ ɗiggi gorge.