HADGE 03
Ndo hã mbo ɓil yaŋ ga wããre maaga Bible wããn diŋ cwãy yawlà?
Bible ngaɓ fẽẽre po wo pur ga joŋ ge wo yaŋ ti naw maa peeln wo no, day se baa yaŋ po wo ne naa debaŋ pa. Maapo ndo ba na de sãy da’ wer ne re sen wo ti, day ndo ba de wii jag see ɓo pa ga, wããre se ɓil kefder se ɓaa ɓaa mokay mbe diŋ cwãy an so yawlà? Yaŋ maaga Bible baa ra wo mo hã’ mbaara de kay naa wara yawlà? Day naa hã mbe ɓil yaŋ ti wããre maaga á wãã ga joŋ yaŋ nen naw maa peeln wo mo yawlà? Jar wara ti tamsir miliyoŋ pur wo de hã ɓil ti wããre maaga Bible wãã ra wo mono. Wùr jor glog ɓo maaga ndo mo frug wer re sen wo diŋ ndo de see ɓo tu.
1. Wããre maaga naa da’ ra ɓil Bible mbaara diŋ cwãy yawlà?
Ɓil Bible tu, naa da’ de yerge ni ga á diŋ “wããre ma cwãy” (Eklesiyaste 12:10). Á wãã diŋ ti wããre maaga hay hres wo cwãy, day jar téebeere maaga Bible wãã ti ɓaara hay wo ti tamsir la cwãy lay (Jaŋ Lug 1:3; 3:1, 2). De maaga jar maa de ko wer wããre maa ɓaa ɓaa wo, jar maa frug nen sir wo, le’ wo we wããge ti naw wo, ti jar téebeere wo, ti ngeel wo, noga ti fẽẽre maaga hay hres wo le go ɓaa ɓaa no, wããre ɓaaran ɓo’ nen go cwãy ga wããre maaga Bible wãã diŋ cwãy lay.
2. Wer mayse ga naa wãã ga Bible bay go de raw naw wa là?
Bible wãã ti fẽẽre po wo ngaɓa ga hay bay wo de da’ wer ti wur maaga à yern le mo wa. Naa ko ba de maaga á le’ we wããge ti koge re maa ti tamsir wo mo ɗa. Fẽẽre maaga Bible wãã ti ɓaara ti ɓaŋ koge re maa ti tamsir wo ngaɓa, jar téebeere debaŋ hay bay wo hã ɓil ti ɓaara wa. Amaa jar maa de ko wer fẽẽre maa ti wur maa ni naa wo la, wo wo go ɓo’ nen cwãy so ga mo maaga Bible wãã ti ɓe diŋ cwãy. Ga á “tum de joŋge bay fiɗgi, de joŋge de cwãy wo de de deele.”—Siŋ wora 111:8.
3. Wer mayse ga naa de hã ɓil ti fẽẽre maaga Bible wãã ga joŋ yaŋ wo nen naw maa peeln wo mo là?
Ɓil Bible mono, naa da’ profesi a wo ni ga wãã wo le go taŋgu peel bol hãã “ti [fẽẽre] maaga joŋ [wo] ga ɗa le go” (Esay 46:10). Bible hay wãã le go ti fẽẽre po wo ngaɓa peel bol ga á hresge wo yaŋ, day saara joŋ cwãy lay. Day pa, re maa de gayri maaga wo de hresge wara ti tamsir mo deŋ no, Bible hay le go de wããge ti ɓaara peel bol de woore pa. Ɓil hadge sen la mono, naa frug wer profesi po maa ɓil Bible yaŋ wo see ɓe mbage. Day ndo ko yaŋ so ga mo maaga Bible wããn bag jag go ti tu ɓe keɗed cwãy!
FRUGGI NEN HADGE NO
Naa ko fẽẽre po maaga Bible wãã ra, ga tab wo de koge re maa ti tamsir wo, lan naa ko fẽẽre po maaga Bible hay wãã ra go peel bol ga hay bag wo jag go ti ngeel ɓe mo ɗa.
4. Re maaga jar téebeere da’ wo wer ɓaara wara leɗ wo ti tu ɓaara doo maaga Bible hay go de wãã ra ge ne no
Le ɓaa ɓaa mono, jar po debaŋ hay ɗig wo ɓaaran na ga tamsir de kaŋge ciŋ ti mopo. Ko VIDEYO.
Ko mo maaga naa da’ de yerge ɓil Job kiŋgi go wara 3500 mo ɗa. Jaŋ Job 26:7, ni ndal wee ti wiigi jag maa blam la no:
-
De maaga naa ko kiŋgi maaga Bibe hay go de wããge ga tamsir “mbe de kaŋge nen leege ta’ tu” we no, wããre sen ngris naa wer mayselà?
Diŋ nen kiŋgi maa 1800 ɗa so ga jar ko re maa ti tamsir wo wo da’ge ga bii tĩĩ wer raage naa raage la mono. Amaa, kiŋgi go wara 3500 ga Bible hay go de wããge ga blam maaga bii raa we le gesiŋ no, se fer ciŋ nen swaare, fer fer le raage pa. Jaŋ Job 36:27, 28, ni ndal wee ti wiigi jag maa blam wo la no:
-
Wer mayse ga wããre maaga Bible wãã ti tĩĩgi wer bii maaga ra le ciŋ ngris mo là?
-
Verse se ga naa jaŋ ra mo deŋ la ya’ wo mbaara wer hãge ɓil ɓo ti Bible ciŋ ni yawlà?
5. Bible wãã go peel bol ti fẽẽre po wo kluuri taŋgu maaga saara wo bag jag go
Jaŋ Esay 44:27–45:2, ni ndal wee ti wiigi jag maa blam la no:
-
Go taŋgu peel bol nen kiŋgi 200 mono, Bible hay wãã mayse go ti sir Babilon là?
Mbaa ɓo’ wo nen go ne naa cwãy ga Sirus waŋ Perse de soode ɓen wo hay yãã wo sir Babilon nen kiŋgi maa 539 Taŋgu Wur maa ni Naa no (T.W.N.) b. Á kal wo soo blam bii maaga hay go de kii ti ɓi leegen ɓuy tu go ti jeŋ. Saara laa wo ɓil ɓe ni ti jagtiŋ maa kluu no. Doo kay ne saara yãã sirn bay durgi. Kiŋgi go wara de daŋ 2500 ga sir Babilon go de gwa’ge de koɗ ge ti’i. Naa ko wee maaga Bible hay wãã go ti ɓe peel bol mo ɗa.
Jaŋ Esay 13:19, 20, ni ndal wee ti wiigi jag maa blam la no:
-
Wããre sen bag jag go na bagge là?
Foto Babilon go ɓil koɗ ge ti’i ɓi sir maaga naa ɗen wara ga Irak mono
6. Bible hay go de wããge ti fẽẽre maaga wo de hresge ti wur maa waran wo mo hã’ peel bole
Bible wãã ga naa go diŋ ‘ti wur naw maa blam taw wo no’ (2 Timote 3:1). Ko maaga Bible hay wãã go ti wur naw maa blam taw wo mo ɗa.
Jaŋ Matiye 24:6, 7, ni ndal wee ti wiigi jag maa blam la no:
-
Bible hay wãã go ga mayse joŋ ge wo yaŋ ti wur naw maa blam taw wo là?
Jaŋ 2 Timote 3:1-5, ni ndal wee ti wiigi jag maa blam wo la no:
-
Bible wãã ga jar téebeere maa ti wur naw maa blam taw joŋ ge wo na joŋge là?
-
Yoo fẽẽre se ga Bible wãã ti ɓaara la mono, ndo de ko maa hõn wo joŋge là?
NAA YAŊ LAƊGE GA: “Bible mo kay diŋ ɗiggi jar téebeere wo.”
-
Ti ɗiggi ɓo mono, mayse baw jag jiili ɓo go ga Bible diŋ mo maaga naa de hã mbe ɓil ti ɓe là?
KLUURI HADGE NO
Wããre maa ɓaa ɓaa wo, koge re jar maa ti tamsir wo, lan wããre maaga Bible hay wãã ra le go peel bol ɓo’ wo nen go ɓuy tu ga naa de hã mbe ɓil ti Bible.
Ferge ko nen hadge no
-
Wããre maa ɓil Bible mokay mbe diŋ cwãy yaw mballa á diŋ gete’e?
-
Bible tab de koge re jar maa ti tamsir wo na ti ɓaŋ maa hõn wo là?
-
Ndo ɗig ga Bible mbe de kããge maa wããge ti fẽẽre maaga joŋ wo yaŋ wo peel mono? Wer mayse ga ndo ɗig doo sen ne là?
MAA DA’ WER PA
Mo maaga bay ti ngeel ɓe wa yaŋ mbe ɓil Bible yawlà?
« La science est-elle d’accord avec la Bible ? » (article jw.org)
Mayse ɓo’ nen go mo ga naa go wara ‘ti wur naw maa blam taw wo’ là?
« 6 prophéties qui se réalisent sous vos yeux » (La Tour de Garde, 1er mai 2011)
Wããre maaga Bible hay wãã go ti sir Greg bag jag go ti tu ɓe keɗede.
Ko maaga profesi maa ɓil Bible coo wo ɗiggi blo po ti Bible mo ɗa.
« Pour moi Dieu n’existait pas » (La Tour de Garde n° 5 2017)
