HADGE 04
Baa diŋ wose là?
Le ɓaa ɓaa tu mono, jar téebeere goŋ wo baa wo wer ngaɓa debaŋ. Amaa, Bible wãã ga Baa po yaŋ ‘de daŋ baa lan wo kluu ɓuy’ (2 Kronig 2:4). Baa sen diŋ woselà? Day wer mayse ga naa wãã ga, á kluu de daŋ baa maa lan wo ɓuy, ga jar téebeere goŋ wo ra mo là? Ɓil hadge sen la, naa ko maaga Baa sen ɓo’ wer see ɓe ne naa mo ɗa.
1. Ɗuu Baa ga hãylà, day mayse ɓo’ nen go ne naa ga á de sãy maaga naa mo ko ɗuu se ti là?
Ɓil Bible mono, Baa wãã ga: “Ndi diŋ Manwur [Jeofa, NWT], ɗúu ɓi nà doosen nono” (Jaŋ Esay 42:5, 8). De jag Toupouri, à ɗe Baa ga “Jeofa”. Ɗuu sen de jag Hebre da wããge ga “Á de kããge maa kolge”. Jeofa de sãy maaga naa de ko ɗuu se ti (Laage go 3:15). Mayse ɓo’ nen go ne naa cwãy ga Baa de sãy maaga naa mo ko ɗuu se ti là? Ɓil Bible mono, naa da’ ɗuu ɓe de yerge ni nen ndar renam (7000) de ti a! Jeofa diŋ ɗuu Baa maa cwãy ga “le ciŋ hãã, go ti tamsir gesiŋ la lay” mono.—Dogge jag liŋgi 4:39.
2. Bible had naa ti ɗuu Jeofa na ga hãylà?
Yoo baa maaga jar téebeere wo de goŋ rage mo deŋ ɓuy no, Bible wãã ga Baa maa cwãy diŋ Jeofa boŋ tu. Wer maylà? Diŋ wer re po wo ngaɓa. Jeofa diŋ jee wãã re fẽẽren ɓuy, day se diŋ “je ma Ciŋ Hãã debaŋn go ti tamsiri ɓuy” (Jaŋ Siŋ wora 83:19). Á diŋ jee “ma de egre daŋge ɓuy no”, kaŋ nen ga á de kããge maa joŋ fẽn maaga se da ga se joŋ ne mono. Á “joŋ fẽẽren wo ɓuy” diŋ se—ngeel maa ciŋ wo de maa gesiŋ la ɓuy (Naage nene 4:8, 11). Le ɓaa ɓaa tu mono, Jeofa diŋ Baa maa boŋ ga hay go mono, day se joŋ ge yaŋ ge diŋ maa tum pa.—Siŋ wora 90:2.
FRUGGI NEN HADGE NO
Naa ko sar sar maa ti holaŋ ɗuu togoɗge Baa wo de ɗuu ɓe maa cwãyn ɗa. Ni naa ko yaŋ so ga diŋ de ɗeŋ maa hõn ga á ngaɓ ɗuu ɓe ne naa là, day diŋ wer mayse ga á ngaɓ ɗuu ɓe ne naa là.
3. Ɗuu togoɗge Baa wo ngaɓa, amaa ɗuu ɓe maa cwãy boŋ tu
Sar sar maa ti holaŋ ɗuu togoɗge jobo wo de ɗuu ɓe maa cwãy diŋ maylà? Maa yiŋ jag ti ɓe mono, ko VIDEYO, ni ndal wee ti wiigi jag maa blam la no.
-
Sar sar maa ti holaŋ togoɗge Baa wo doo “Waŋkluu” wo de ɗuu ɓe maa cwãy diŋ maylà?
Bible wãã ga jar téebeere goŋ wo baa wo wer ngaɓa, waŋre maa kluuri wo wer ngaɓa lay. Jaŋ Siŋ wora 136:1-3, ni ndal wee ti wiigi jag maa blam la no:
-
Wose diŋ “Baa maa baan wo” de “Waŋkluu maa waŋre kluurin wo” là?
4. Jeofa da ga naa mo ko ɗuu se, ni naa mo joŋ joŋre de ɓe
Mayse wãã mo ga Jeofa da ga naa mo ko ɗuu se là? Ko VIDEYO, ni ndal wee ti wiigi jag maa blam la no.
-
Ndo ɗig ga Jeofa mbe de sãy maaga naa mo ko ɗuu se ti yawlà? Wer maylà?
Jeofa da ga naa de joŋ joŋre de ɗuu se. Jaŋ Rom wo 10:13, ni ndal wee ti wiigi jag maa blam wo la no:
-
Wer mayse ga Baa da ga naa mo ɗe se de ɗuu se, Jeofa là?
-
À joŋ see mo na joŋge ne hayga jobo ɗig ti ti ɗuu ɓo we, day ɗe mo we de ɓe no?
-
À joŋ see ne Jeofa na joŋge lay hayga naa ɗen we de ɗuu ɓe là?
5. Jeofa da ga naa mo hay diŋ bar se
Wãy po maaga à ɗen ga Soten ɓi sir Kambodia wãã ga maaga se laa ɗuu Baa maa ciŋ ga ko decoo jar mono, sen fruy se debaŋ. Ko VIDEYO, ni ndal wee ti wiigi jag maa blam la no.
-
Ɓil videyon la mono, de maaga Soten laa ɗuu Baa maa cwãyn mono, á joŋ see ne hen na joŋge là?
Maaga ndo mo baa barge de jobo mono, á de el maaga ndo mo ko ɗuu ɓe ɗa. Jaŋ Jag 4:8a, ni ndal wee ti wiigi jag maa blam wo la no:
-
Jeofa da ga ndo mo joŋ mayse là?
-
Wer mayse ga ndo ko ɗuu Baa we go, day ndo yaŋ joŋ joŋre de ɓe lay no, se kay mo maa baa barge de ɓe là?
NAA YAŊ LAƊGE GA: “Baa boŋ tu, koh ndo mo ɗe ba ne diŋ ga hãylà, á go de koge ga à wii diŋ se.”
-
Ndo yãã mbo yaŋ ga ɗuu Baa ga Jeofa yawlà?
-
Ndo ngaɓ ne jar de ɗeŋ maa hõn ga Baa de sãy maaga naa mo ɗe se de ɗuu se ti là?
KLUURI HADGE NO
Jeofa diŋ ɗuu Baa maa cwãy no. Á de sãy maaga naa de ko ɗuu sen ti, naa de ɗe se de ɓe nen maaga naa de baa barge de se.
Ferge ko nen hadge no
-
Mayse ɓo’ nen go ga Jeofa sar de baa lan wo ga jar téebeere goŋ ra wo mo deŋ là?
-
Wer mayse ga naa mo joŋ joŋre de ɗuu Baa là?
-
Mayse ɓo’ nen go ne naa ga Jeofa de sãy maaga naa mo hay diŋ bar se ti là?
MAA DA’ WER PA
Ko re po wo dwee mo ta’ la ga ɓo’ wo nen go ga Baa yaŋ cwãy ɗa.
Wer mayse ga naa wãã ga le hãã ɓaa ɓaa tu Baa hay yaŋ go là?
Koh de maaga naa bay mbe de ko maaga à hay le jaŋ ɗuu Baa ɓaa ɓaa jaŋge la wa mono, wer may ga naa mo joŋ mbe joŋre de ɓe là?
Naa mo ɗe ba Baa de ɗuu ma ẽlaybla re go ni yawlà? Wer may ga ɗuu ɓe ma cwãy boŋ tu là?
a Maa laa wer go de woore ne ɗuu Baa de peel ni mono, lan maa koge ga wer may ga à naa ɗuu Baa go ɓil Bible maa po wo la mono, jaŋ Appendice A4 ɓil La Bible. Traduction du monde nouveau.
