HADGE 09

Tosge ya’ holaŋ ɓay see kããra de Baa

KAŊ NE

Re po hay naa mo we go ti boŋ ga ɗeŋ maaga ndo mo joŋ bay nen ɓo wa yaw? Ndo de sãy da’ yiŋgi jag ti wiigi jag ɓo po wo ti yaw? Ndo de sãy teŋge nen ti yaw? Ndo de sãy ya’ see ɓo see Jeofa ti maŋ yaw? Tosge kay ndo yaŋ jag re sen wo no. Ɗeŋ tosge maa ti ngeel ɓen naa diŋ maa hõn so là? Baa mbe de co’ sug tosge naan wo ɓuy yawlà? Ndo joŋ joŋge maaga Baa mo co’ sug tosge ɓon wo là? Ɓil hadge sen la naa da’ yiŋgi jag yaŋ ti wiigi jag sen wo no.

1. Naa tos diŋ woselà, day naa tos na diŋ ti mayse wo là?

Yeso had naa ga naa mo tos diŋ Jeofa Pan naa maa ciŋn boŋ tawa tu. Yeso ti see ɓe hay tosn lay. Á wãã ga: “Nday le’ we tosge no, tos we ga: Pan wúr maa ciŋ no . . . ” (Matiye 6:9). De maaga naa tos Jeofa we no, holaŋ naa ya’ wer sa’ge see kããra de ɓe ciŋ ni.

Naa tos Baa ti fẽẽren wo ɓuy tu. Amaa, maaga Baa mo yiŋ jag ti tosge naa wo mono, da ga tosge naan mo hay wo de tabge de ɗiggi ɓe. “Naa wii mopo maga naa de sãy ɓe ti we do [Baa] doga ɓil ɓe da [ . . . ] no, á co’ sug wiigi naa no” (1 Jaŋ 5:14). Yeso ɓo’ nen naa ti fẽẽre maaga naa de hay tos ti ɓaara mono (Jaŋ Matiye 6:9-13). Naa wii Jeofa ti fẽẽre maaga naa de sãy ɓaara ti mono, day pa, da ga naa mo yõõ ti go bay joŋ suse’ ne hẽn ti de el ɓe maaga á joŋ ra see naa wo mo wa, lan ni naa mo wiin ga á mo kay jar lan wo lay.

2. Naa tos Baa na tosge là?

Bible jor glog naa ga naa mo “jeel [ . . . ] jiili [naa] ne [Baa] pele” (Siŋ wora 62:9). Wersen nen da ga tosge naan mo a wo le diŋ jiili naa tem tem. Naa mbe kããge maa tosge go jag ciŋ kloŋ noga le jiili naa. Naa mbe de kããge maa tos Baa de laa koyõgre gesiŋ, de hayle noga de oole deele, mo maa de el debaŋn diŋ ga naa mo tosn de hooge sugi. Wur maa tosge ɓe bay go ka’ wa, ngeel maa tosge ɓe bay go ta’ wa lay. Ndo mbo de kããge maa tosge ɓe de wur maa hõnla ɓuy, ti ngeel maa hõnla ɓuy lay.

3. Baa yiŋ jag ti tosge naa wo na yiŋgi là?

Á yiŋ jag ti ɓaara de ɗeŋ po wo ngaɓa debaŋ. Jeofa hã kefder ɓe Bible ne naa maa yiŋ jag ne naa ti wiɗgi jag naa wo no. Jaŋge Wããre Baa “kol je maga hay mbe caw koɗ de ko re” (Siŋ wora 19:8; jaŋ Jag 1:5). Maapo se hã wooge jiili mo hayga ndo yiŋ we de re wo no. Noga á jor glog hẽẽrebe yaŋ wo maa caa war ɓo.

FRUGGI NEN HADGE NO

Naa ko fẽẽre maaga naa de joŋ ra maaga tosge naa mo co wo jag Baa mono, lan ni naa ko maaga tosge kay naa na kayge la mo ɗa.

4. Baa co’ sug tosge naan wo diŋ ga naa yaŋ durgi maa hoo sug ti jag liŋgi ɓen wo no

Maaga Baa mo laa tosge naa wo mono, da ga seele naa mo hay ẽɗane? Ko VIDEYO.

VIDEYO: Baa mbe de co’ sug tosge naa wo ɓuy yawlà? —À caa see ɓe (2:42)

Jeofa da ga naa mo tos se. Jaŋ Siŋ wora 65:2, ni ndal wee ti wiigi jag maa blam la no:

Ndo mbo de koge ga “je ma co’ sug tosgen” de sãy maaga ndo de tos se ti yawlà? Wer may?

Maaga Baa mo co’ sug tosge naa wo mono, da ga naa mo dur maa seege doo ga á da nono. Jaŋ Mise 3:4 lan 1 Piyer 3:12, ni ndal wee ti wiigi jag maa blam la no:

Naa de hay joŋ diŋ mayse maaga Jeofa mo co’ sug tosge naa wo là?

De maaga à de joŋ durgi mono, jar maa hõn wo la ɓuy de tos Baa ga saara mo naa blum. Ndo ɗig na ga Baa yiŋ mbe jag yaŋ ti tosge ɓaaran wo yaw?

5. Daga tosge naa mo a wo le diŋ jiili naa tem tem

À had jar maa po wo ga á mo tos wo diŋ tee tosge sen boŋ tum tum. Day, Baa da ga naa mo tos se mbe na doo sen no yawlà? Jaŋ Matiye 6:7, ni ndal wee ti wiigi jag maa blam la no:

Ndo joŋ joŋge maaga ndo mo “dog diŋ tee wããre se boŋ tum tum” nen tosge ɓon wo wa là?

Ti naw tum, ɗig ti fẽn po maa de woore maaga Jeofa joŋ see ɓo, ni ndo joŋ suse’ ne hẽn ti ɓe. Hayga ndo joŋ we doo sen ne nen naw renam no, ndo tosn yaŋ ti fẽẽre po wo sar sar renam bay dog wããre ti kããra.

Pããbe maa ti ngeel ɓen da ga mbarga se mo wãã wããre maaga le jiili ɓe ne se. Doo sen no lay no, Jeofa da ga naa mo tos se go de jiili naa ɓuy

6. Tosge diŋ kado po maaga Baa hã ne naa

Maaga ndo yaŋ nen re noga nen fruygi no, tosge kay mo ti ngeel sen na kayge là? Ko VIDEYO.

VIDEYO: Tosge kay naa maa coɓge jag re maa see naa wo (1:32)

Bible wãã ga tosge kay naa yaŋ maa da’ teŋge nene. Jaŋ Filip wo 4:6, 7, ni ndal wee ti wiigi jag maa blam wo la no:

Á mbe cwãy ga tosge maŋ jag re maa see naa wo go ɓuy ga, day á kay naa na kayge là?
Ndo hay de sãy tos Baa ti ti re maa hõn wo là?

Ndo ko mbo we:

Maaga à wãã ga “amen” mono, á da wããge ga “á mo hay doo sen nono” noga “cwãy cwãy”. Le ɓaa ɓaa tu mono, Bible wãã ga jar goŋ Baa hay wo ɓo’ jag tosge ɓaaran wo go de “amen”.—1 Kronig 16:36.

7. Dur maa men wur maa tosge ɓo wo

Maapo joŋre joŋ do naa pur debaŋ nen maaga ti naa yõõ go ga naa de hay tose. Yeso hay ko tosge na koge là? Jaŋ Matiye 14:23 lan Mark 1:35, ni ndal wee ti wiigi jag maa blam wo la no: