Tikupenda kuti munthu ni Kaboni wa Yehova pekha para wakupharazga makani ghawemi gha Ufumu wa Chiuta mwezi uliwose. (Mateyu 24:14) Aŵa mbanthu awo ŵali kubatizika na awo ŵandabatizike kweni mbakwenelera kupharazga makani ghawemi.

 Yayi. Kuti munthu waŵe Kaboni wa Yehova panji waŵe na udindo mu gulu lithu, wakwenera kupeleka ndalama yayi. (Milimo 8:18-20) Nakuti kanandi para munthu wakupeleka chawanangwa, wakuphalira waliyose yayi. Yose uyo ni Kaboni wa Yehova wakujipeleka na nyengo, nkhongono, na katundu wake kuti wawovwirepo pa ntchito yithu iyo yikuchitika pa charu chose.—2 Ŵakorinte 9:7.

 Mwezi uliwose, Ŵakaboni ŵa Yehova ŵakulemba ivyo ŵachita pakupharazga na kupeleka ku mpingo wawo. Munthu wakusankha yekha kupeleka lipoti ili.

 Mpingo ukusazga pamoza malipoti agha, na kutumizga ku Ofesi ya Ŵakaboni ŵa Yehova mu charu chawo. Para ofesi yapokera malipoti kufuma ku mipingo yose, yikusazga na kutumizga ku likuru la Ŵakaboni ŵa Yehova.

 Para chaka cha uteŵeti chamara, a ŵakuwona chiŵelengero chikuru chomene cha awo ŵakapeleka lipoti mu charu chilichose. Ŵakusazga viŵelengero ivi kuti ŵamanye unandi wa Ŵakaboni ŵa Yehova pa charu chose. Lipoti la Ŵakaboni ŵa Yehova la charu chilichose mungalisanga pa webusayiti yithu pa chigaŵa cha “Pa Charu Chose.” Ŵakhristu ŵakale ŵakakhozgekanga para ŵapokera malipoti. Nase tikukhozgeka na malipoti gha pa charu chose.—Milimo 2:41; 4:4; 15:3.

 Nangauli ŵanthu aŵa Mbakaboni ŵa Yehova yayi, kweni tikuŵapokelera para ŵiza kuzakasopa nase. Ŵanandi ŵakwiza para tikukumbukira nyifwa ya Yesu ndipo tikuŵapenda kuti ŵawungana nase. Tikumanya unandi wawo para tawuskako chiŵelengero cha Ŵakaboni ŵa Yehova pa charu chose. Mu 2023, ŵanthu awo ŵakiza pa mwambo wakukumbukira nyifwa ya Yesu pa charu chose ŵakaŵa 20,461,767.

 Paliso ŵanthu ŵanandi awo nangauli ŵakusopa nase yayi kweni tiŵakusambizga Baibolo kwaulere mu nyumba zawo. Pa avereji, mu 2023, mwezi uliwose tikasambira Baibolo na ŵanthu 7,281,212.

 Para boma likuchita kalembera, kanandi likufumba waka munthu uko wakusopa. Mwachiyelezgero, wupu wa U.S. Census Bureau ukuti: “Para tikuchita kalembera tikufumba waka chisopa cha munthu.” Chiŵelengero ichi chikuŵa waka cha ivyo munthu wayowoya nangauli ku chisopa icho wazunura ŵakumumanya yayi. Kweni ise tikupenda kuti munthu ni Kaboni wa Yehova para mwezi uliwose wakupeleka lipoti la ivyo wachita pakupharazga. Awo ŵakuyowoya waka kuti Mbakaboni ŵa Yehova tikuŵapenda yayi.