Yayi. Ŵakaboni ŵa Yehova ŵakukana yayi kupokera katemera. Tikuwona kuti kupokera katemera ni nkhani iyo Mkhristu waliyose wakwenera kusankha payekha. Ŵakaboni ŵa Yehova ŵanandi ŵali kusankha kupokera katemera.

 Tikukhumba kupokera wovwiri uwemi wa chipatala ndipo tikuzirwiska chomene nthowa zakupambanapambana izo ŵasayansi ŵasanga kuti ŵanthu ŵaleke kusuzgika chomene na matenda. Tikuwonga chomene kujipeleka kwa ŵa vyachipatala, chomenechomene para tili mu nyengo zakusuzga.

 Ŵakaboni ŵa Yehova ŵakupulikira ivyo ŵakuyowoya ŵa vyaumoyo. Mwachiyelezgero, kwamba waka apo muliri wa COVID-19 ukambira, Ŵakaboni ŵa Yehova ŵakulutilira kukumbuska ŵanthu za umo ŵangajivikilira ku matenda kwizira pa webusayiti iyi mu viyowoyero vyakupambanapambana. Ivi vikusazgapo kuzirwa kwa kukhala mwakutalikirana na ŵanyithu, na kulondezga malango agho ghali kuŵikika pa nkhani ya ŵanthu ŵanandi kuwungana pamoza, kukhala kwa wekha, kugeza mu mawoko, kuvwara mask, na vinyake ivyo ŵamazaza ŵakuti tichitenge.—Ŵaroma 13:1, 2.

 Kwa vyaka vinandi, mabuku gha Ŵakaboni ŵa Yehova ghakudidimizga fundo zakulondezgapo izi:

•   Nkhani yakusankha wovwiri wa ku chipatala nja munthu waliyose payekha.—Ŵagalatiya 6:5.

   “[Magazini iyi] yikuŵikira kumanyuma mtundu unyake wa munkhwala yayi, panji mtundu uliwose wa wovwiri wa ku chipatala ndipo yikupeleka ulongozgi uliwose yayi wakukhwaskana na munkhwala wa ku chipatala. Iyo yikulongosora waka fundo ndipo munthu wakuchita kusankha yekha ivyo wangalondezga.”—Wukani!, ya Chingelezi ya February 8, 1987.

   “Nkhani yakuti imwe panji ŵana ŵinu ŵakapokere katemera, njakuti musankhe mwekha.”—Wukani!, ya Chingelezi ya August 22, 1965.

•   Tikupenja wovwiri wa chipatala chifukwa tikuzirwiska chomene umoyo.—Milimo 17:28.

   “Ŵakaboni ŵa Yehova ŵakuluta ku chipatala para ŵalwara kuti ŵakasange wovwiri. Ŵakuwutemwa umoyo ndipo ŵakuchita chilichose icho ŵangafiska kuti ŵalutilire kuŵa na umoyo chikuru chikukolerana na fundo za mu Malemba.”—Gongwe la Mulinda, la Chingelezi la July 1, 1975.

   “Ŵakaboni ŵa Yehova mbakukhumbisiska kupokera munkhwala na wovwiri unyake wa ku chipatala. Ŵakukhumba kuŵa na umoyo uwemi kweniso kuti ŵalutilire kuŵa na umoyo. Nakuti nga umo vikaŵira na Mkhristu wa mu nyengo yakale, Luka, Ŵakaboni ŵa Yehova ŵanyake nawo ni madokotala. . . . Ŵakaboni ŵa Yehova ŵakuwonga chomene kulimbikira na kujipeleka uko ŵa vyachipatala ŵakuchita. Ŵakuwongaso chomene ŵa vyachipatala para ŵaŵawovwira kuti ŵajipulikeko makora.”—Gongwe la Mulinda, la Chingelezi la February 1, 2011.