Yayi, chifukwa nkhani ya kusopa Chiuta nja waliyose payekha. (Ŵaroma 14:12) Mbunenesko kuti Ŵakaboni ŵa Yehova ŵakusambizga ŵana ŵawo fundo za mu Baibolo, kweni para ŵana ŵakura, ŵakusankha ŵekha kuti ŵaŵe Ŵakaboni wa Yehova panji yayi.—Ŵaroma 12:2; Ŵagalatiya 6:5.

 Nga umo ŵakuchitira ŵapapi ŵanandi, Ŵakaboni ŵa Yehova nawo ŵakuchita chilichose icho ŵangafiska kuti ŵana ŵawo ŵaŵe na umoyo uwemi. Ntheura ŵakusambizga ŵana ŵawo vinthu viwemi ivyo ŵakuwona kuti vingaŵawovwira pa umoyo. Mwachiyelezgero, ŵakuŵasambizga mikhaliro yiwemi iyo ŵakwenera kuŵa nayo kweniso ivyo ŵakugomezga pa nkhani ya chisopa. Pakuti Ŵakaboni ŵa Yehova ŵakugomezga kuti fundo za mu Baibolo ndizo zingawovwira munthu kuti waŵe na umoyo uwemi, ŵakuyezgayezga kusambizga ŵana ŵawo fundo izi mwakusambira nawo Baibolo kweniso kuluta nawo ku maungano ghawo gha Chikhristu. (Dotoronome 6:6, 7) Ndipouli mwana waliyose para wakura, wakusankha yekha kuŵa Kaboni wa Yehova panji yayi.

•  Kasi Ŵakaboni ŵa Yehova ŵakubatiza ŵabonda?

•  Kasi Ŵakaboni ŵa Yehova ŵakuŵakana ŵana ŵawo awo ŵasankha kuleka kubatizika?

•  Chifukwa Wuli Ŵakaboni ŵa Yehova ŵakwenda na ŵana ŵawo mu upharazgi?

•  Kasi Ŵakaboni ŵa Yehova ŵakuchitako maholide panji vikondwelero vinyake?

•  Kasi awo ŵakaŵa Ŵakaboni ŵa Yehova kufuma apo ŵakaŵa ŵana ŵakuti wuli?

 Yayi. Baibolo lindayowoyepo vyakuti tibatizenge ŵabonda. Mwachiyelezgero, likulongora kuti Ŵakhristu ŵakale pambere ŵandabatizike ŵakapulika dankha uthenga, ‘kupokelera mazgu’, na kulapa. (Milimo 2:14, 22, 38, 41) Ntheura, kuti munthu wabatizike, wakwenera kuŵa mulara wakuti wangapulikiska fundo za mu Baibolo, kuzigomezga, na kusankha kuti wambenge kwendera fundo izi pa umoyo wake. Ivi ni vinthu vyakuti bonda wangachita yayi.

 Para ŵana ŵakura, nyengo zinyake ŵangasankha kuti ŵabatizike. Kweni pambere ŵandabatizike, ŵakwenera kumanya kuti ivyo ŵakukhumba kusankha ni nkhani yichoko yayi.

 Yayi. Nangauli Ŵakaboni ŵa Yehova ŵakukhwaskika chomene para mwana wawo ŵasankha kuleka kuŵa Kaboni, kweni ŵakulutilira kuchitira nayo lumoza vinthu kweniso kumutemwa.

 Pali vifukwa vinandi ivyo Ŵakaboni ŵa Yehova ŵakwendera lumoza na ŵana ŵawo pa kupharazga. a

•   Baibolo likuphalira ŵapapi kuti ŵasambizgenge ŵana ŵawo vya Chiuta kuti ŵamusopenge Iyo. (Ŵaefeso 6:4) Pakuti kusopa kukusazgapo kuphalirako ŵanyithu ivyo tikugomezga, ntchakuzirwa kuti ŵapapi ŵasambizgengeso ŵana ŵawo kuzirwa kwa ntchito yakupharazga.—Ŵaroma 10:9, 10; Ŵahebere 13:15.

•   Baibolo likuchiska ŵachinyamata kuti “ŵalumbe zina la Yehova”. (Masalimo 148:12, 13) Nthowa yakuzirwa iyo tingalumbira Chiuta ni para tikuphalirako ŵanyithu vyakukhwaskana na iyo. b

•   Ŵana ŵakusambira vinandi para ŵakupharazgira lumoza na ŵapapi ŵawo. Mwachiyelezgero, ŵakusambira kudumbiskana na ŵanthu ŵakupambanapambana, kuŵa na mikhaliro yiwemi nga chiwuravi, lusungu, ntchindi, na kuleka kujighanaghanira ŵekha. Kweniso vikuŵawovwira kuti ŵapulikiske makora malemba agho ghakukhozgera ivyo ŵakugomezga.

 Ŵakaboni ŵa Yehova ŵakuchitako yayi maholide panji vikondwelero vya chisopa ivyo vikukwiyiska Chiuta. c (2 Ŵakorinte 6:14-17; Ŵaefeso 5:10) Mwachiyelezgero, tikukondwelera yayi mazuŵa ghakubabikira panji Khrisimasi, chifukwa vikamba na ŵanthu ŵambura kusopa.

 Ndipouli, tikukondwa kuchezga na mabanja ghithu kweniso kupeleka vyawanangwa ku ŵana ŵithu. Tikuchita ivi nyengo yiliyose iyo yasangika, ndipo tilije zuŵa lakuŵikikirathu ilo tikupelekera vyawanangwa ku ŵanyithu.