Kasi Ŵakaboni ŵa Yehova Ŵakusambizgika Wuli Kuti Ŵafiske Uteŵeti Wawo?

JULANI

Ŵakaboni ŵa Yehova ŵakulutilira kusambizgika mu vigaŵa vyose vya umoyo wawo wa Chikhristu, kusazgapo kupharazgira ŵanji. Uteŵeti uwu ni mulimo uwo Yesu wakaphalira ŵalondezgi ŵake kuti ŵachitenge, uwo nkhupharazga na kusambizga ŵanthu makani ghawemi gha Ufumu wa Chiuta. (Mateyu 24:14; 28:19, 20) Tikusambizgika umo tingachitira mulimo uwu sabata yiliyose para tili pa maungano gha mpingo kweniso pa maungano gha chigaŵa na gha dera agho ghakuchitika chaka chilichose. Ŵakaboni ŵa Yehova awo ŵali na maudindo mu mpingo panji mu gulu la Yehova ŵakusambizgika mu masukulu ghapadera gha Baibolo.

Ivyo vili mu nkhani iyi

Kasi Ŵakaboni ŵa Yehova ŵakusambizgika vichi?

Maungano gha mpingo. Sabata yiliyose tikuwungana kaŵiri pa malo ghakusoperapo agho ghakuchemeka kuti Nyumba ya Ufumu. Kanandi ungano unyake ukuchitika mukati mwa sabata apo unyake ukuchitika ku umaliro wa sabata. Waliyose wangaluta ku maungano agha, ndipo kulije zithero.

Maungano gha mukati mwasabata. Tikusambizgika kuŵazga makora, kuyowoya makora, kupharazga na kusambizga. Masambiro agha tikupokera kwizira mu nkhani, kudumbiskana, viyelezgero na mavidiyo. Masambiro agha ghakutovwira kuti tipharazgirenge makora ŵanthu uthenga wa mu Baibolo kweniso kusambira nawo Baibolo. Wose awo ŵakwiza pa maungano agha ŵakusanga chandulo na ivyo ŵakusambira. Kweni chakuzirwa chomene ntchakuti maungano agha ghakutovwira kuti tiŵe na chipulikano chakukhora mwa Chiuta kweniso kutovwira kuti titemwanenge chomene na Ŵakhristu ŵanyithu.
Maungano gha pa Sabata. Maungano agha ghakuŵa na vigaŵa viŵiri, ndipo ghakwamba na nkhani ya mu Baibolo iyo yikovwira ŵanthu wose. Ndipo chigaŵa chachiŵiri chikuŵa chakudumbiskana nkhani iyo yikuŵa mu Gongwe la Mulinda lakusambira pa mpingo. a Nkhani izi zikulongosora nkhani za mu Baibolo na fundo izo zingatovwira para tikupharazga kweniso pa umoyo withu wa zuŵa na zuŵa.

Maungano gha dera na gha chigaŵa. Chaka chilichose tikuŵa na maungano ghakurughakuru ghatatu, ndipo pa maungano ghose agha pakuŵa ŵapharazgi ŵakufuma mu mipingo yinandi. Pa maungano agha pakuŵa nkhani zakulongosora Baibolo, viyelezgero, kufumba ŵanthu, na mavidiyo. Nga ni umo vikuŵira na maungano gha mpingo, maungano gha dera na gha chigaŵa ghakutovwira kuti timanye vinandi vya Baibolo ndiposo kuti tipharazgenge makora makani ghawemi. Pa maungano agha napo waliyose ngwakupokelereka, ndipo pakuŵavya zithero.

Sukulu za Ŵakaboni ŵa Yehova zakusambizga Baibolo

Ŵakaboni ŵa Yehova ŵanyake ŵakuchemeka ku masukulu ghakupambanapambana ghakusambizga Baibolo kuti ŵakasambire vinandi. Kasi masukulu agha ni nga? Kasi chilato chake ntchakuti wuli ndipo ghakutora nyengo yitali wuli? Ndipo mbanjani awo ŵangasambirako?

Sukulu ya Ŵapayiniya

Chilato: Kusambizga ŵateŵeti ŵanyengozose awo ŵakumanyikwa kuti ŵapayiniya, b kuti ŵapharazgenge na kusambizga mwaluso. Pa sukulu iyi pakuŵa kudumbiskana, viyezgelero, nkhani, kweniso vinyake vyakuchita mu magulu.
Utali: Mazuŵa 6.
Awo Ŵangasambirako: Ŵapayiniya ŵanyengozose awo ŵamara chaka chimoza. Ŵapayiniya awo ŵateŵetera nyengo yitali kweni ŵandanjire sukulu iyi vyaka 5 ivyo vyajumpha, ŵangachemekaso.

Sukulu ya Ŵapharazgi ŵa Ufumu

Chilato: Kusambizga ŵateŵeti ŵanyengozose. Ŵasambiri ŵakusazgirako maluso ghawo pa nkhani ya kupharazga na kusambizga, ndipo ŵakusambira nkhani za mu Baibolo mwakukwana. Ŵanandi awo ŵamalizga masambiro agha ŵakutumika kukateŵetera uko kukukhumbikwira ŵapharazgi ŵanandi.
Utali: Myezi yiŵiri.
Awo Ŵangasambirako: Ŵapayiniya awo ŵakufiska ivyo vikukhumbikwa ndipo ŵangafiska kukateŵetera kulikose uko kungakhumbikwira wovwiri.

Sukulu ya Ŵalara ŵa Mpingo

Chilato: Kovwira ŵalara kuti ŵachitenge makora milimo yawo ya kusambizga na kuliska mu mpingo ndiposo kuti ŵatemwenge chomene Chiuta na Ŵakhristu ŵanyawo.—1 Petrosi 5:2, 3.
Utali: Mazuŵa 5.
Awo Ŵangasambirako: Ŵalara awo ŵimikika sonosono na awo ŵakamba ni kale kusambira sukulu iyi.

Sukulu ya Ŵalaŵiliri ŵa Dera na Ŵawoli Ŵawo

Chilato: Kusambizga ŵalaŵiliri ŵadera, c kuti ŵachitenge makora milimo yawo. (1 Timote 5:17) Masambiro agha ghakovwiraso ŵateŵeti aŵa na ŵawoli ŵawo kuti ŵapulikiske makora Malemba.
Utali: Mwezi umoza.
Awo Ŵangasambirako: Ŵalaŵiliri ŵadera na ŵawoli ŵawo ŵakuchemeka para pajumpha chaka chimoza kufuma apo ŵakambira uteŵeti. Kufuma apo, ŵakuchemekaso para pajumpha vyaka vinkhondi.

Sukulu ya Uteŵeti wa Ufumu

Chilato: Kovwira ŵalara na ŵateŵeti ŵakovwira d kuti ŵachitenge makora milimo yawo mu mpingo. (2 Timote 3:1) Sukulu iyi yikuchitika para pajumpha vyaka vichoko waka.
Utali: Kanandi yikuchitikanga zuŵa limoza.
Awo Ŵangasambirako: Ŵalaŵiliri ŵa dera, ŵalara na ŵateŵeti ŵakovwira.

Sukulu ya Uteŵeti wa pa Beteli

Chilato: Kovwira awo ŵakuteŵetera pa Beteli e kuti ŵachitenge makora milimo yawo kweniso kuti ŵatemwenge chomene Chiuta na ŵanyawo.
Utali: Mazuŵa ghankhondi na hafu
Awo Ŵangasambirako: Wose awo ŵiza sono pa Beteli. Awo ŵateŵerera vyaka vinandi pa beteli kweni pajumpha vyaka vinkhondi kwambura kunjira sukulu iyi, ŵangachemekaso kuti nawo ŵakanjire.

Sukulu Yakusambizga Baibolo ya Giliyadi

Chilato: Kovwira ŵasambiri kuti ŵatemwenge chomene Mazgu gha Chiuta na kughapulikiska, kweniso kuti ŵakalondezgenge ivyo ŵasambira. (1 Ŵatesalonika 2:13) Ŵakhristu ŵakukhwima mwauzimu awo ŵakuluta kukasambira sukulu iyi ŵakuŵa ŵakovwira chomene ku gulu la Yehova kweniso ku ntchito yakusambizga Baibolo pa charu chose. Awo ŵamalizga sukulu iyi ŵangatumika kukapharazga panji kukateŵetera pa ofesi ya munthavi mu charu chawo panji ku charu chinyake.
Utali: Myezi 5.
Awo Ŵangasambirako: Ofesi ya munthavi ndiyo yikusankha awo ŵali mu uteŵeti wanyengozose. Sukulu iyi yikuchitikira ku United States, ku Watchtower Educational Center ku Patterson, New York.

Sukulu ya Ŵabali ŵa mu Komiti ya Munthavi na Ŵawoli Ŵawo

Chilato: Kusambizga ŵabali awo ŵakuteŵetera mu Komiti ya Munthavi f kuti ŵachitenge makora mulimo wa kulaŵilira maofesi gha munthavi na vinthu vyauzimu mu vyaru ivyo ŵali.
Utali: Myezi yiŵiri.
Awo Ŵangasambirako: Ofesi yikuru ya Ŵakaboni ŵa Yehova ndiyo yikuchema ŵabali awo ŵali mu Komiti ya Munthavi na ŵawoli ŵawo kuti ŵakanjire sukulu iyi. Sukulu iyi yikuchitikira ku Watchtower Educational Center ku Patterson, New York.

Kasi ivyo Ŵakaboni ŵa Yehova ŵakusambira vikujintha pa vichi?

Ivyo Ŵakaboni ŵa Yehova ŵakusambira nyengo zose vikujintha pa Baibolo. Tikugomezga kuti Baibolo ndakupelekeka na Chiuta ndiposo kuti lili na ulongozgi uwemi chomene wakukhwaskana na vigaŵa vyose vya umoyo wa Chikhristu.—2 Timote 3:16, 17.

Kasi Ŵakaboni ŵa Yehova ŵakwenera kulipira ndalama kuti ŵasambizgike?

Yayi. Masambiro agha ghakupelekeka kwawanangwa. Ntchito ya Ŵakaboni ŵa Yehova yikovwirika na vyawanangwa ivyo ŵanthu ŵakupeleka mwakukhumba kwawo.—2 Ŵakorinte 9:7.

a Pa webusayiti yithu ya jw.org, pali Baibolo, mabuku ghakulongosora Baibolo, na mavidiyo.

b Mupayiniya ni Kaboni wa Yehova wakubatizika, mwanalume panji mwanakazi, uyo ngwakugomezgeka ndipo wakukhumba kuti mwezi uliwose wamalirenge maora ghanandi kupharazgira ŵanthu uthenga wa mu Baibolo.

c Mulaŵiliri wa dera ni muteŵeti wanyengo zose uyo wakwendera mipingo yakupambanapambana ya mu dera lake, ndipo sabata yiliyose wakwendera mpingo umoza. Wakukhozga ŵabali na ŵadumbu kwizira mu nkhani za mu Baibolo kweniso kwenda nawo mu uteŵeti.

d Ŵateŵeti ŵakovwira ŵakuchita milimo yakupambanapambana kuti ŵawovwire ŵabali na ŵadumbu ŵawo. Ivi vikovwira kuti ŵalara ŵaŵe na nyengo yinandi pa mulimo wakusambizga na kuliska.

e Beteli ni zina ilo maofesi gha munthavi gha Ŵakaboni ŵa Yehova ghakumanyikwa nalo. Ŵateŵeti ŵanyengozose awo ŵakuteŵetera pa maofesi agha ŵakovwira pa mulimo wa Ŵakaboni ŵa Yehova mu chigaŵa cha ofesi yawo ya munthavi.

f Komiti ya Munthavi yikuŵa na ŵanalume ŵatatu panji kujumpha apa, awo mbakukhwima mwauzimu.

Kasi Ŵakaboni ŵa Yehova wasanga chandulo wuli na masambiro agha?

Natasha wa ku United States wakuti; “chifukwa chakuti nili wasoni, nkhasuzgikanga kuyowoya na ŵanthu ŵachilendo vya Baibolo. Kweni ivyo nkhusambira pa maungano gha mukati mwasabata, vikunovwira kuti niŵe na chikanga na kuŵa msambizgi waluso. Pasono nkhuyowoya makora na ŵanji mu mpingo kweniso ŵanyane awo nkhugwira nawo ntchito”.
Stephen wa ku Nigeria wakuti; “Sukulu ya Ŵapharazgi ŵa Ufumu yikanovwira kuti niŵe na mikhaliro ya Chiuta, nga chitemwa, kuzizipizga, na lusungu. Ivi vyanovwira kuti niŵe Mkhristu muwemi, mubwezi muwemi kweniso kuŵa mzengezgani muwemi. Sukulu iyi yikanisambizgaso umo ningachitira kafukufuku pa nkhani za mu Baibolo na umo ningalongosolera Mazgu gha Chiuta mu nthowa yakuti ghaŵafikenge pa mtima ŵanthu”.
Luca wa ku Italy wakuti; “Sukulu ya Ŵalara ŵa Mpingo yanovwira kuti niŵe wakujiyuyura mwakuti niŵe mulara muwemi. Nkhani izi zikanichiska chomene kuti nkhwenera kulondezga chiyelezgero cha Yesu”.
Samuel wa ku United Kingdom wakuti; “Sukulu ya Uteŵeti wa Ufumu yikanisambizga kuzirwa kwa kuŵa wakufwatuka, walusungu, ndiposo waubwezi pakuchita vinthu na ŵanji. Nkhasambira kuti para nkhuchitira ŵanji vinthu, nkhwenera kuchita chifukwa cha chitemwa, kuchita mwadango waka yayi”.
Elnathan na Princess ŵa ku Philippines ŵakuti; “Sukulu ya Giliyadi yikatovwira kuti tijisande mwakuwona pa gilasi la Mazgu gha Chiuta. (Yakobe 1:22-25) Ntheura tikawona apo tikakhumbikwiranga kusintha wunthu withu kweniso uteŵeti withu kwa Yehova. Tikasambiraso kuti tikwenera kughanaghanira chomene ŵanji kuluska ise na kuzomerezga kuti chitemwa chitilongozgenge mu vyose ivyo tikuyowoya na kuchita”.