Taŵakaboni ŵa Yehova, tikuŵikapo mtima kukhozga nthengwa zithu kweniso kovwira ŵabwezi ŵithu kuti nawo ŵaŵe na nthengwa zakukhora. Tikuchindika Chiuta uyo wakambiska nthengwa. (Genizesi 2:21-24; Ŵaefeso 3:14, 15) Chiuta watipa Baibolo ilo lili na fundo izo zikovwira ŵanthu ŵanandi pa charu chose kuti ŵaŵe ŵakukondwa mu nthengwa zawo.

 Tikuŵikapo mtima kulondezga ulongozgi wa mu Baibolo ndipo vikutovwira kuti tiŵe ŵafumu, ŵawoli, kweniso ŵapapi ŵawemi. (Zintharika 31:10-31; Ŵaefeso 5:22–6:4; 1 Timote 5:8) Fundo za vinjeru za mu Baibolo zikovwira nanga ni banja la ŵanthu awo ŵakupambana chisopa kuti ŵakhalenge mwakukondwa. (1 Petrosi 3:1, 2) Wonani ivyo ŵanthu ŵanyake ŵakuyowoya awo mfumu panji muwoli wawo ni Kaboni ŵa Yehova:

•   Mwanalume munyake wa ku Brazil zina lake Clauir, wakati: “Kwa vyaka 6 kufuma apo tikatolerana, ine na muwoli wane Ivete tikakhaliranga waka mbembe. Kweni Ivete wati waŵa Kaboni wa Yehova, wakaŵa wachitemwa kweniso walusungu. Ivi vikawovwira kuti nthengwa yithu yileke kumara.”

•   Mwanakazi munyake wa ku Zambia zina lake Agness, wakati: “Nkhakana apo mfumu wane, Chansa, wakamba kusambira Baibolo na Ŵakaboni ŵa Yehova chifukwa nkhaghanaghananga kuti chisopa ichi chikumazga mabanja. Kweni kufuma waka panyengo iyo, nkhuwona kuti Baibolo lawovwira chomene nthengwa yithu.”

 Para tikupharazgira ŵanthu, tikuŵalongosolera uwemi wakulondezga fundo za vinjeru za mu Baibolo para ŵakukhumba

•   Kusankha munthu wakuti ŵatorane nayo

•   Kumanya ivyo ŵangachita para ŵatorana waka

•   Kumanya ivyo ŵangachita na ŵabali ŵa mfumu panji muwoli wawo

•   Kusunga makora ndalama

•   Kuleka kugazgana

•   Kusambira kugowokerana

•   Kusambizga ŵana

 Kuyowoya unenesko masuzgo ghakuŵapo. Mu 1998, kampani yinyake (Sofres) yikachita kafukufuku ndipo yikasanga kuti nthengwa yimoza ndiyo yikaŵa na masuzgo ghakuru pa nthengwa 20 izo mfumu panji muwoli njumoza wa Ŵakaboni ŵa Yehova.

 Yesu wakayowoyerathu kuti awo ŵakulondezga ivyo wakasambizganga ŵatinkhikenge na ŵamunyumba yawo. (Mateyu 10:32-36) Munthu munyake zina lake Will Durant, wakati apo Ŵaroma ŵakalamuliranga, “ŵanthu ŵakatenge Ŵakhristu ŵakumazga nthengwa zaŵene,” a ndipo ndivyo ŵanthu ŵakuyowoyera Ŵakaboni ŵa Yehova mazuŵa ghano. Kasi Ŵakaboni ŵa Yehova ŵakutimbanizga nadi mabanja gha ŵanthu?

 Pakudumura mulandu wakuti Ŵakaboni ŵa Yehova ŵakutimbanizga mabanja gha ŵanthu, khoti linyake (European Court of Human Rights) likati awo ŵakutimbanizga chomene mabanja para mfumu panji muwoli waŵa yumoza wa Ŵakaboni ŵa Yehova, mbachibali awo Mbakaboni yayi. Ŵachibali aŵa ŵakukana “kuzomerezga kuti munthu waliyose wali na wanangwa wakusankha chisopa icho wakhumba.” Khoti ili likayowoyaso kuti: “Ivi vikuchitikira Ŵakaboni ŵa Yehova pera yayi, nanga ni mabanja agho ŵakupambana matchalitchi nagho ghakusuzgika mwakuyana waka.” b Nangauli Ŵakaboni ŵa Yehova ŵakukumana na masuzgo gha sankho chifukwa cha chisopa chawo, iwo ŵakulondezga ivyo Baibolo likuyowoya kuti: “Kuwezgera munthu uheni pa uheni yayi. . . . Usange ntchamachitiko, muŵe pamtende na ŵanthu wose, kuyana na umo mungafiskira.”—Ŵaroma 12:17, 18.

 Ŵakaboni ŵa Yehova ŵakulondezga ivyo Baibolo likuyowoya kuti munthu para wakhumba kutora panji kutengwa, wakwenera kutora panji kutengwa “mu Fumu pera,” kung’anamura kutorana na munthu uyo ŵakuyana vigomezgo. (1 Ŵakorinte 7:39) Ulongozgi uwu ngwa mu Baibolo ndipo ngwakovwira chomene. Mwachiyelezgero, mu 2010 magazini yinyake yikati mabanja agho mfumu na muwoli ŵali mu chisopa chimoza, ghakuŵa paubwezi wakukhora. c—Journal of Marriage and Family.

 Kweni Ŵakaboni ŵa Yehova ŵakuchiska yayi mamembara ghawo agho ghali kutorana na mfumu panji muwoli wa chisopa chinyake kuti ŵalekane. Baibolo likuti: “Usange mubali munyake wali na muwoli wambura kugomezga, kweni mwanakazi wakuzomera kukhala nayo, wangamulekanga yayi. Usange mwanakazi wali na mfumu wambura kugomezga, kweni mwanalume wakuzomera kukhala nayo, wangamulekanga yayi mfumu wake.” (1 Ŵakorinte 7:12, 13) Ŵakaboni ŵa Yehova ŵakupulikira dango ili.