Ŵakaboni ŵa Yehova ŵakugomezga kuti ŵanthu wose mbakuyana waka mu maso gha Chiuta. (Milimo 10:34, 35) Kuyana na ivyo tikusambira mu Baibolo, tikovwira ŵanthu kuti ŵamazge sankho.

Mwakusazgirapo, tikukolerana na wupu uliwose yayi uwo ukukhozgera kusankhana mitundu panji mitheto. Munyengo ya muwuso wa Nazi, Ŵakaboni ŵa Yehova ku Germany na malo ghanyake ŵakakana kulondezga fundo za Hitler izo zikakhozgeranga kusankhana mitundu. Ntheura Ŵakaboni ŵa Yehova ŵanandi ŵakakomeka.

Mwakuyana waka, Ŵakaboni ŵa Yehova ku Rwanda ŵakanjilirapo yayi pa nkhondo iyo yikachitika chifukwa cha kupambana mitundu mu 1994. Ŵanyake ŵakaŵika umoyo wawo pangozi kweniso ŵanyake ŵakakomeka chifukwa chakuti ŵakavikiliranga ŵanthu awo ŵakaŵa ŵa mtundu wawo yayi.

Pakuti tikukhumba kovwira ŵanthu, tikupanga mabuku ghakulongosora Baibolo mu viyowoyero vyakujumpha 600. Kweniso mu mipingo yithu, tikupokelera ŵanthu ŵakufuma ‘mu mitundu yose na mafuko na malulimi.’—Chivumbuzi 7:9.