Ŵanthu awo ŵakulwara chomene ŵakukaŵa yayi kufipa mtima, ndipo usange ŵakukhumbikwira wovwiri wa chipatala, apa ndipo ŵakusuzgika chomene mu mtima. Ntheura nga umo magazini yakulongosora vya kupwelelera ŵalwari yikayowoyera, “kafukufuku wakulongora kuti ntchakuzirwa chomene kumupembuzga mulwari kweniso kumovwira mwauzimu kuti wajipulike makora.” *

Pakuwona suzgo ili, Ŵakaboni ŵa Yehova ŵakuŵikapo mtima kupembuzga na kovwira Ŵakaboni ŵanyawo awo ŵali mu chipatala. Ŵalara mu mpingo ndiwo ŵakuŵa pakwamba kwendera wose awo mbalwari mu mpingo wawo. Kweni wuli usange Kaboni mulwari wakupokera wovwiri ku chipatala icho chili kutali na kwake? Mu misumba yikuruyikuru pa charu chose, Ŵakaboni ŵa Yehova ŵali kukhazikiska Magulu Ghakwendera Ŵalwari. Nyengo zinandi ŵalara ŵa mpingo awo ŵali mu magulu agha, ŵakulutanga mu vipatala kuti ŵakawovwire Ŵakaboni awo mbalwari na ŵachibali ŵawo. Ŵalwari aŵa ŵangaŵa ŵakufuma mu vigaŵa vinyake vya charu chenechicho, panji ŵangafuma mu vyaru vinyake, kuzapokera wovwiri wa chipatala. Ŵanthu ŵakujipeleka ŵakujumpha 28,000 ŵali mu Magulu 1,900 Ghakwendera Ŵalwari agho ghali mu makontineti 6. *

William uyo wali mu Gulu Lakwendera Ŵalwari wakuti: “Nasanguluskapo Ŵakaboni kweniso ŵabali ŵawo awo Mbakaboni yayi pakuŵa waka pafupi na kuŵategherezga. Nkhuŵasimikizgira kuti Yehova Chiuta wakumanya suzgo lawo ndipo wakuŵaghanaghanira. Ŵalwari kweniso ŵabali ŵawo ŵakuwonga chomene para taŵalombera.”

Ŵanandi ŵakuwonga chifukwa chakuti ŵabali ŵa mu Magulu Ghakwendera Ŵalwari ŵakaŵakhozga. Pulikani ivyo ŵanyake ŵakayowoya kufuma ku charu cha United States, uko kuli ŵabali pafupifupi 7,000 ŵa mu Magulu Ghakwendera Ŵalwari.

• Priscilla wakati: “Yewo chomene chifukwa cha kwiza kuzakaŵawona adada mu chipatala ŵati ŵakoleka na sitiroku. Ŵakakondwa chomene mwati mwiza! Ŵakazizwa kuti ndondomeko yanthena yilipo. Nkhugomezga kuti kwiza kwinu kukawovwira kuti ŵajipulikeko makora.”

• Ophilia, uyo amama ŵake ŵakaŵa ŵalwari ndipo ŵali kufwa, wakaphalira yumoza mwa ŵabali ŵa mu Gulu Lakwendera Ŵalwari kuti: “Amama ŵakakhozgeka chomene na kwiza kwinu! Ŵakamanya kuti Yehova ndiyo wakamutumani. Yewo chomene chifukwa cha chitemwa chinu.”

• Mulwari munyake wakasuzgika chomene mu mtima dokotala wati wamuphalira kuti wafwenge mu mazuŵa ghachoko waka. James, uyo nayo wali mu Gulu Lakwendera Ŵalwari, wakachezga nayo mulwari uyu ndipo wakamuphalira mazgu ghakupembuzga gha mu Baibolo agho ghali pa Ŵafilipi 4:6, 7. James wakuti: “Nkhati nalutaso kukamuwona zuŵa lakulondezgapo, nkhasanga kuti wasintha chomene. Nangauli wakamanyanga ivyo vimuchitikirenge, kweni sono wakaŵa na chigomezgo kuti Yehova wamovwirenge, ndipo naneso ivi vikanikhozga!”

Pauline, uyo mfumu wake wakafwira ku chipatala chakutali na kwake, wakalemba kuti: “Yewo chomene chifukwa cha wovwiri uwo mukatipa pa nyengo yakusuzga chomene. Tikapembuzgika kumuwonani ku chipatala usiku pakati, uku zuŵa lakulondezgapo mukalutanga ku ntchito. Tikumuwongani chifukwa cha kutinozgera malo ghakugona taŵanthu tose 11 kweniso chifukwa cha kutovwira mu nyengo yose iyi. Nkhuwonga chomene Yehova na gulu lake chifukwa cha wovwiri uwo tikapokera.”

Nicki, Gayle, na Robin, wose ŵakachita ngozi ya pa msewu mtunda wa makilomita 300 kufuma kukwawo. Carlos, uyo wali mu Gulu Lakwendera Ŵalwari, wakaphalirika ndipo wakakumana nawo ku chipatala apo ŵakafikanga. Carlos wakati, “Nkhajipeleka kuŵawovwira pa chilichose icho ŵakakhumbikwiranga, ndipo nkhakolera kantcheŵe ka Nicki mwakuti nayo wanjire mukati kuti ŵadokotala ŵakamuwone.” Pamanyuma Curtis, uyo nayo wali mu Gulu Lakwendera Ŵalwari, wakiza pamoza na muwoli wake. Ŵakakhala ku chipatala m’paka apo ŵachibali ŵa ŵalwari aŵa ŵakafikira ku chipatala ichi. Munthu munyake uyo wakawonanga wakati: “Wose ŵatatu ŵakapembuzgika chifukwa cha chitemwa icho ŵakalongoreka. Kweni munung’una wa Nicki, Robin, uyo ni Kaboni yayi, wakazizwa chomene na wovwiri wose uwo ŵakapeleka awo ŵali mu Gulu Lakwendera Ŵalwari.”