Pa May 20, 2015, mulara wa msumba ukuru wa Rostov-on-Don, kumwera kwa Russia wakapeleka kalata ku Ŵakaboni ŵa Yehova yakuwonga chifukwa cha kujipeleka kutozga msumba uwu.

Pa nyengo yakutozga msumba wa Rostov-on-Don, Ŵakaboni ŵa Yehova ŵakufuma mu mipingo 4 ŵakaphyera viswaswa munthowa kweniso kusora ivyo vikaŵa mumphepete mwa milonga. Mu maora ghachoko waka, ŵakazuzga mathumba pafupifupi 300 na viswaswa, ndipo galimoto zikanyamuranga na kukataya.

Chifukwa wuli Ŵakaboni ŵa Yehova ŵakawovwira kutozga msumba uwu? Mwanakazi munyake wa vyaka 67, zina lake Raisa wakati: “Nane nkheneranga kovwirapo chifukwa nkhukhumba kuti msumba wane uŵe wakutowa. Kweniso kuti waliyose wakhale pa malo ghakutowa. Nangauli mbanthu ŵachoko waka awo ŵamanyenge ntchito iyo tagwira kweni nkhukondwa na ivyo tachita. Yehova Chiuta nayo wakuwona.” Aleksander nayo wakati: “Tikupharazgira ŵanthu kweniso kuŵawovwira kugwira ntchito zamuchikaya. Nkhukondwa chomene para nawovwira ŵanthu.”

Ŵanthu ŵakawonga chomene Ŵakaboni ŵa Yehova chifukwa chakujipeleka. Munthu munyake mu msumba uwu wakazizwa wati wamanya kuti Ŵakaboni ŵa Yehova ŵakagwiranga ntchito iyi kwambura kulipirika. Nayo wakamba kugwira nawo, ndipo wakati: “Nkhamanyanga yayi kuti ntchito iyi njakukondweska nthena, ndipo nkhujipulika makora! Nangauli mwaŵanyake mukukhala kuno yayi, kweni mwatovwira!”

Mulara wa msumba uwu wakawona kagulu kachoko waka ka Ŵakaboni ŵa Yehova kawunjika mathumba ghanandi gha viswaswa. Iyo wakaŵajambura pafupi na mathumba gha viswaswa agha kuti wakalongore ŵanthu ŵanyake umo ŵakwenera kugwilira ntchito.